Анаданҝәлмә Аллаһа һәср олунмушлар

«О [Јеһова] сизи... Өзүнә... халг олараг сечди» (ГАНУНУН ТӘКРАРЫ 7:6).

1, 2. Јеһова халгы наминә һансы бөјүк иши ҝөрдү вә исраиллиләрлә Аллаһ арасында һансы мүнасибәтләр јаранды?

ЕРАМЫЗДАН әввәл 1513-ҹү илдә Јеһованын Өз хидмәтчиләри илә мүнасибәтләринин јени мәрһәләси башланды. Һәмин илдә Аллаһ, о вахтын дүнја империјасы олан Мисири рүсвај едиб исраиллиләри көләликдән азад етди. Бунунла Јеһова онларын Хиласкары вә Саһиби олду. Бу ишин иҹрасына башламаздан әввәл Аллаһ Мусаја деди: «Исраил өвладларына сөјлә: “Мән Рәббәм. Сизи Мисирлиләрин зүлмүндән гуртараҹағам, онларын әсарәтиндән чыхараҹағам вә голуму узадыб бөјүк ҹәзалар баһасына сизи сатын алаҹағам. Сизи Өзүмә халг едәҹәјәм вә сизин Аллаһыныз олаҹағам”» (Чыхыш 6:6, 7; 15:1-7, 11).

² Мисирдән чыхандан бир гәдәр сонра исраиллиләр Јеһова Аллаһла әһд бағладылар. Јеһова ајры-ајрылыгда инсанларла, аиләләрлә вә ја гәбиләләрлә дејил, бир халгла мүнасибәт гурду вә бу андан е’тибарән јер үзүндә Онун тәшкил олунмуш халгы мөвҹуд олмаға башлады (Чыхыш 19:5, 6; 24:7). Јеһова халгына ҝүндәлик һәјатларына, ән ваҹиби исә ибадәтләринә рәһбәрлик ҝөстәрән ганунлар верди. Муса онлара деди: «Һансы милләт белә үстүндүр ки, Аллаһы она бу ҹүр јахын олсун? Һансы милләт белә үстүндүр ки, бу ҝүн гаршыныза ҝәтирдијим бу Ганун кими әдаләтли гајдалара вә һөкмләрә малик олсун?» (Ганунун тәкрары 4:7, 8).

Шаһидләр халгы

3, 4. Исраилин халг кими мөвҹуд олмасынын ваҹиб сәбәби нә иди?

³ Јүзилликләр сонра Јеһова пејғәмбәри Јешајанын васитәсилә исраиллиләрин бир халг кими мөвҹуд олмаларынын ваҹиб сәбәбини онлара хатырлатды. О деди: «Еј Јагуб, еј Исраил, сәни јарадан, сәнә һәјат верән Рәбб белә дејир: “Горхма, чүнки Мән сәни сатын алдым, сәни адынла чағырдым, сән Мәнимсән. Чүнки Мән сәнин Аллаһын Рәббәм, Исраилин Мүгәддәсијәм, сәнин Хиласкарынам... Оғулларымы узаглардан, гызларымы дүнјанын уҹгар јерләриндән ҝәтир. Мәним адымла чағырылан һәр инсаны, иззәтим үчүн јаратдығым, бәли, һәјат вердијим, јаратдығым һәр бир адамы ҝәтир”. Рәбб бәјан едир: “Сизсиниз Мәним шаһидләрим, сечдијим гулларым... Бу халгы Мән Өзүм үчүн јаратдым ки, Мәнә һәмдләр сөјләсин”» (Јешаја 43:1, 3, 6, 7, 10, 21).

⁴ Јеһованын адыны дашыјан исраиллиләр диҝәр милләтләрин гаршысында Онун Али һөкмранлығына шәһадәт етмәли идиләр. Бу халг Јеһованын ‘иззәти үчүн јарадылмышды’. Исраиллиләр Јеһоваја ‘һәмдләр сөјләмәклә’ вә Онун мө’ҹүзәли ишләриндән данышмагла мүгәддәс адыны иззәтләндирмәли идиләр. Гысаҹа десәк, онлар шаһидләр халгы кими Јеһоваја хидмәт етмәли идиләр.

5. Исраил халгы һансы мә’нада һәср олунмуш халг иди?

⁵ Б. е. ә XI әсрдә јашамыш Сүлејман падшаһын сөзләриндән ҝөрүнүр ки, Јеһова ‘ирси олмаг үчүн [исраиллиләри] јер үзүнүн бүтүн халгларындан ајырды’ (1 Падшаһлар 8:53). Һәр бир исраиллинин дә Јеһова илә хүсуси мүнасибәти вар иди. Бир гәдәр әввәл Муса онлара демишди: «Сиз Аллаһыныз Рәббин өвладларысыныз... Аллаһыныз Рәббин мүгәддәс халгысыныз» (Ганунун тәкрары 14:1, 2). Демәли, ҝәнҹ исраиллиләрә һәјатларыны Јеһоваја һәср етмәк лазым дејилди, чүнки онлар Аллаһа һәср олунмуш халгда доғулурдулар (Мәзмур 79:13; 95:7). Һәр јени нәсил Јеһованын ганунлары илә тәрбијә едилирди вә Јеһова илә әһддә олдуғуна ҝөрә, бу ганунлара риајәт етмәјә борҹлу иди (Ганунун тәкрары 11:18, 19).

Сечим етмәкдә азад идиләр

6. Һәр бир исраилли һансы сечими етмәли иди?

⁶ Исраиллиләр Аллаһа һәср едилмиш халгда доғулсалар да, Јеһоваја хидмәт едиб-етмәјәҹәкләрини сечмәкдә азад идиләр. Вә’д едилмиш дијара ҝирмәздән әввәл Муса онлара бу сөзләрлә мүраҹиәт етмишди: «Гаршынызда һәјатла өлүмү, бәрәкәтлә лә’нәти гојдуғум үчүн бу ҝүн ҝөјү вә јери сизә шаһид тутурам. Һәјаты сечин ки, сиз вә өвладларыныз јашаја биләсиниз. Аллаһыныз Рәбби севин, сөзү гулағынызда галсын вә Она бағланын. Чүнки сизин һәјатыныз Одур. Белә етсәниз, Рәббин ата-бабаларыныз Ибраһимә, Исһага вә Јагуба вермәји вә’д етдији торпагда сизи узун өмүрлү едәҹәк» (Ганунун тәкрары 30:19, 20). Ҝөрдүјүмүз кими, Јеһованы севмәк, сөзләринә гулаг асмаг вә Она бағлы галмаг исраиллиләрин шәхси гәрары олмалы иди. Бәли, онларын ирадә азадлығы вар иди. Онлар сечимләринин бәһрәсини бичәҹәкдиләр (Ганунун тәкрары 30:16-18).

7. Јешуанын мүасирләри өләндән сонра нә баш верди?

⁷ Садиглијин вә сәдагәтсизлијин нәтиҹәләрини һакимләрин Исраили идарә етдији дөврдә баш вермиш һадисәләрдән ајдын ҝөрмәк олар. Бундан бир гәдәр әввәл исраиллиләр Јешуанын ҝөзәл нүмунәсинә риајәт едирдиләр вә Аллаһ онлара хејир-дуа верирди. «Јешуанын бүтүн өмрү боју Рәббин Исраил үчүн етдији бүтүн бөјүк ишләри ҝөрән вә Јешуадан сонра сағ галан ағсаггалларын бүтүн өмрү бојунҹа халг Рәббә гуллуг етди». Јешуанын өлүмүндән бир мүддәт кечәндән сонра ‘Рәббин Исраил үчүн етдији ишләри билмәјән башга бир нәсил төрәди. Исраил өвладлары Рәббин ҝөзүндә пис олан ишләри ҝөрмәјә’ башладылар (Һакимләр 2:7, 10, 11). Ҝөрүнүр, јени нәсил өз мирасыны — Јеһоваја һәср олунмуш халгын үзвү олмаг шәрәфини гијмәтләндирмирди вә Аллаһын кечмишдә халгы наминә етдији мөһтәшәм ишләри унутмушду (Мәзмур 78:3-7, 10, 11).

Һәср олунмаја мүвафиг јашамаг

8, 9. а) Исраиллиләр һәср олунмаларына мүвафиг јашадыгларыны неҹә ҝөстәрә биләрдиләр? б) Көнүллү гурбанлары ҝәтирәнләр нә газанырдылар?

⁸ Јеһова халгына, һәср олунмаја мүвафиг һәјат сүрмәк үчүн имкан јаратмышды. Мәсәлән, Онун ганунунда мүтләг вә көнүллү гурбанлар вә ја тәгдимләрин ҝәтирилмәси нәзәрдә тутулурду (Ибраниләрә 8:3). Тахыл тәгдимләри, јандырма вә үнсијјәт гурбанлары көнүллү иди. Онлары Јеһованын лүтфүнү газанмаг вә Она миннәтдарлыгларыны ифадә етмәк үчүн ҝәтирирдиләр (Левилиләр 7:11-13).

⁹ Бу гурбанлар Јеһоваја хош иди. Јандырма гурбанынын вә тахыл тәгдиминин ‘Рәббин хошуна ҝәлән әтирли тәгдимләр’ олдуғу дејилмишди (Левилиләр 1:9; 2:2). Үнсијјәт гурбаны ҝәтириләндә һејванын ганы вә пији Јеһоваја тәгдим едилирди, әтини исә каһинләрлә гурбаны ҝәтирән јејирди. Бу символик сүфрә Јеһова илә сүлһ мүнасибәтләринин рәмзи иди. Ганунда дејилирди: «Рәббә үнсијјәт гурбанлары ҝәтирәндә елә ҝәтирин ки, гурбаныныз гәбул едилсин» (Левилиләр 19:5). Исраиллиләрин һамысы анаданҝәлмә Аллаһа һәср олунса да, һәср олунмаларына ҹидди јанашанлар көнүллү гурбанлар ҝәтирмәклә Јеһованын разылығыны газанырдылар вә Аллаһ онлара бол-бол хејир-дуа верирди (Малаки 3:10).

10. Јешаја вә Малаки пејғәмбәрләрин ҝүнләриндә Јеһова исраиллиләрдән наразы олдуғуну неҹә ҝөстәрди?

¹⁰ Лакин һәср едилмиш Исраил халгы тез-тез сәдагәтсизлик ҝөстәрирди. Пејғәмбәри Јешајанын васитәсилә Јеһова онлара сөјләди: «Јандырма гурбаны үчүн Мәнә гузулар ҝәтирмәдин, гурбанларынла Мәнә еһтирам етмәдин. Сәнә тәгдимләрә ҝөрә әзијјәт вермәдим» (Јешаја 43:23). Көнүлсүз ҝәтирилән гурбанларын Јеһованын ҝөзүндә һеч бир дәјәри јох иди. Мәсәлән, Јешајадан үч әср сонра, Малаки пејғәмбәрин ҝүнләриндә исраиллиләр зәдәли һејванлары гурбан ҝәтирирдиләр. Малаки онлара белә деди: «“Мән сиздән разы дејиләм, ҝәтирәҹәјиниз гурбанлары да гәбул етмәјәҹәјәм” дејир Ордулар Рәбби... “Сиз гурбан олараг оғурлуг, чолаг, хәстә һејван ҝәтирирсинизсә, Мән ону сиздән гәбул едәҹәјәмми?” дејә сорушур Рәбб» (Малаки 1:10, 13; Амос 5:22).

Артыг һәср олунмуш халг дејилләр

11. Исраил халгына һансы имкан верилмишди?

¹¹ Исраиллиләр Јеһоваја һәср олунанда Аллаһ онлара вә’д етмишди: «Әҝәр сөзүмә диггәтлә гулаг асыб әһдимә риајәт етсәниз, сиз бүтүн халглар арасындан Мәнә мәхсус халг олаҹагсыныз. Бүтүн јер үзү Мәнимдир; сиз исә Мәнә хидмәт едән каһинләр сәлтәнәти, мүгәддәс милләт олаҹагсыныз» (Чыхыш 19:5, 6). Вә’д едилмиш Мәсиһ Исраил халгы арасында доғулмалы вә онлара Аллаһын Падшаһлығынын биринҹи үзвләри олмаг имканы вермәли иди (Јарадылыш 22:17, 18; 49:10; 2 Шамуел 7:12, 16; Лука 1:31-33; Ромалылара 9:4, 5). Лакин исраиллиләрин әксәријјәти Аллаһла бағладыглары әһди поздулар (Матта 22:14). Онлар Мәсиһи рәдд едиб өлдүрдүләр (Һәвариләрин ишләри 7:51-53).

12. Исанын һансы сөзләри ҝөстәрир ки, Јеһова исраиллиләри сечилмиш бир халг кими рәдд етди?

¹² Өлүмүндән бир нечә ҝүн әввәл Иса јәһуди дин рәһбәрләринә демишди: «“Бәнналарын рәдд етдикләри даш күнҹүн башы олду. Буну Рәбб етди вә бу бизим үчүн һејрәтли иш олду” — сөзләрини һеч охумамысынызмы? Буна ҝөрә сизә дејирәм ки, Аллаһын Сәлтәнәти [Падшаһлығы] сиздән алыныб, онун мејвәләрини јетишдирәҹәк бир халга вериләҹәкдир» (Матта 21:42, 43). Јеһованын исраиллиләри рәдд етдијини вә артыг Онун һәср олунмуш халгы олмадығыны ҝөстәрмәк үчүн Иса деди: «Еј Јерусәлим! Пејғәмбәрләри өлдүрән вә она ҝөндәриләнләри даша басан Јерусәлим! Тојуг өз ҹүҹәләрини ганадлары алтына топладығы кими, Мән дә сәнин өвладларыны нечә дәфә топламаг истәдим, амма сиз истәмәдиниз! Будур, евиниз бош галыр» (Матта 23:37, 38).

Һәср едилмиш јени халг

13. Јеһова Јеремјанын ҝүнләриндә һансы пејғәмбәрлији сөјләди?

¹³ Јеремјанын ҝүнләриндә Јеһова халгына аид јени бир пејғәмбәрлик етди. Биз охујуруг: «Рәбб бәјан едир: “Исраил вә Јәһуда халгы илә јени бир әһд бағлајаҹағым ҝүнләр јахынлашыр. Бу әһд аталарыны Мисир торпағындан чыхартмаг үчүн әлләриндән тутдуғум ҝүн онларла бағладығым әһдә бәнзәмәјәҹәк. Онларын ағасы олдуғум һалда о әһдими поздулар” Рәбб белә бәјан едир. “О ҝүнләрдән сонра Исраил халгы илә бағлајаҹағым әһд беләдир: Ганунуму онларын дахилинә гојуб үрәкләринә јазаҹағам. Мән онларын Аллаһы, онлар да Мәним халгым олаҹаг”» (Јеремја 31:31-33).

14. Јеһованын јени һәср олунмуш халгы нә вахт вә нәјин әсасында јаранды? Бу јени халг һансы халгдыр?

¹⁴ Јени әһдин тәмәли ерамызын 33-ҹү илиндә, Иса өлүб вә бир гәдәр сонра төкүлмүш ганынын дәјәрини Атасына тәгдим етдији заман гојулду (Лука 22:20; Ибраниләрә 9:15, 24-26). Һәмин ил гејд едилән Пентикост ҝүнүндә мүгәддәс руһун шаҝирдләрин үзәринә төкүлмәси илә јени халг, «Аллаһын Исраили» доғулду вә јени әһд гүввәјә минди (Галатијалылара 6:16; Ромалылара 2:28, 29; 9:6; 11:25, 26). Һәвари Петер мәсһ едилмиш мәсиһчиләрә јазырды: «Сиз... сечилмиш нәсил, Һөкмдарын каһин тајфасы, мүгәддәс милләт, Аллаһа мәхсус халгсыныз ки, сизи гаранлыгдан Өз валеһедиҹи нуруна чағыранын фәзиләтләрини е’лан едәсиниз. Сиз бир заманлар халг дејилдиниз, инди исә Аллаһын халгысыныз» (1 Петер 2:9, 10). Јеһова илә ҹисмани Исраил арасында мөвҹуд олан хүсуси мүнасибәтләр сона чатды, Аллаһ онлары рәдд етди. Инди О, руһани Исраилә, јә’ни Хиласкар Падшаһлығынын ‘мејвәләрини јетишдирән’ мәсиһчи јығынҹағына лүтф ҝөстәрмәјә башлады (Матта 21:43).

Шәхси һәср олунма

15. Ерамызын 33-ҹү илинин Пентикост ҝүнүндә Петер динләјиҹиләрини һансы вәфтизи гәбул етмәјә тәшвиг етди?

¹⁵ Ерамызын 33-ҹү илинин Пентикост ҝүнүндән сонра һәр јәһуди вә диҝәр халгдан олан адам өзүнү Аллаһа шәхсән һәср етмәли вә «Ата, Оғул вә Мүгәддәс Руһ наминә» вәфтиз олунмалы идиa (Матта 28:19). Һәвари Петер Пентикост ҝүнүндә сәмими јәһудиләрә вә прозелитләрә белә бир чағырышла мүраҹиәт етди: «Ҝүнаһларынызын бағышланмасы үчүн төвбә един вә һәр бириниз Иса Мәсиһин ады илә вәфтиз олсун. Вә Мүгәддәс Руһун ән’амыны алаҹагсыныз» (Һәвариләрин ишләри 2:38). Јәһудиләр вә прозелитләр вәфтиз олунмагла һәјатларыны Јеһоваја һәср етдикләрини нүмајиш етдирирдиләр. Бундан савајы, онлар ҝөстәрирдиләр ки, ҝүнаһларын бағышланмасында Исаны Аллаһын истифадә етдији васитә кими гәбул едирләр. Вәфтиз олунанлар Исанын Аллаһын тә’јин етдији Баш Каһин вә мәсиһчи јығынҹағынын Башчысы олдуғуну гәбул едирдиләр (Колослулара 1:13, 14, 18).

16. Павелин ҝүнләриндә сәмими јәһудиләр вә диҝәр халглардан олан инсанлар руһани Исраилин үзвү неҹә олурдулар?

¹⁶ Илләр кечдикдән сонра һәвари Павел јазмышды: «Әввәлҹә Дәмәшг вә Јерусәлим әһалисинә, сонра бүтүн Јәһудеја дијарында јашајанлара вә гејри-јәһудиләрә тәблиғ етдим ки, төвбә едиб Аллаһа тәрәф дөнсүнләр вә төвбәјә лајиг ишләр ҝөрсүнләр» (Һәвариләрин ишләри 26:20). Павел јәһудиләрә вә диҝәр халглардан олан инсанлары Исанын Мәсиһ олдуғуна инандырыр, сонра исә онлара һәср вә вәфтиз олунмаға көмәк едирди (Һәвариләрин ишләри 16:14, 15, 31-33; 17:3, 4; 18:8). ‘Аллаһа тәрәф дөнмәклә’ јени шаҝирдләр руһани Исраилин үзвләри олурдулар.

17. а) Һансы мөһүрләнмәнин сону јахынлашыр вә һал-һазырда һансы иш сүр’әтлә јеринә јетирилир? б) Ҝәлән мәгаләдә нә арашдырылаҹаг?

¹⁷ Руһани Исраилин галығынын гәти мөһүрләнмәсинин сону јахынлашыр. Бундан сонра ‘бөјүк мәшәггәтин’ дағыдыҹы күләкләрини тутуб сахлајан ‘дөрд мәләјә’ бу күләкләри бурахмаға иҹазә вериләҹәкдир. Һал-һазырда исә ‘бөјүк издиһамын’ үзвләринин јығымы сүр’әтләнир. ‘Диҝәр гојунлардан’ олан бу инсанлар ‘Гузунун ганына’ иман ҝәтирмәји гәрара алмыш вә Јеһоваја һәср олундугларыны вәфтиз олмагла ҝөстәрмишләр (Вәһј 7:1-4, 9-15; 22:17; Јәһја 10:16; Матта 28:19, 20). Онларын арасында мәсиһчи аиләләриндә бөјүјән бир чох ҝәнҹләр дә вар. Әҝәр сән дә белә бир аиләдә јашајырсанса, онда нөвбәти мәгалә сәнин үчүн мараглы олаҹагдыр.

[Һашијә]

Тәкрар үчүн суаллар

• Нәјә ҝөрә ҝәнҹ исраиллиләрә өзләрини Аллаһа шәхсән һәср етмәк лазым дејилди?

• Исраиллиләр һәср олунмаларына мүвафиг јашадыгларыны неҹә ҝөстәрә биләрдиләр?

• Јеһова Исраил халгыны нәјә ҝөрә рәдд етди вә о диҝәр халгла неҹә әвәз едилди?

• Ерамызын 33-ҹү илиндән е’тибарән јәһудиләр вә диҝәр халглардан олан инсанлар руһани Исраилин үзвү олмаг үчүн нә етмәли идиләр?

[22-ҹи сәһифәдәки шәкил]

Ҝәнҹ исраиллиләр доғулдуғу ҝүндән Аллаһын сечилмиш халгынын үзвү олурдулар.

[23вү сәһифәдәки шәкил]

Аллаһа ибадәт едиб-етмәјәҹәјини һәр бир исраилли өзү гәрара алмалы иди.

[23-ҹү сәһифәдәки шәкил]

Көнүллү тәгдимләр исраиллиләрә Јеһоваја мәһәббәтләрини тәзаһүр етдирмәк имканы верирди.

[25-ҹи сәһифәдәки шәкил]

Ерамызын 33-ҹү илинин Пентикост ҝүнүндән сонра Мәсиһин һәр давамчысы Аллаһа шәхсән һәср олунмалы вә буну суда вәфтизлә символизә етмәлидир.