Јеһовадан горх — хошбәхт ол!

«Нә бәхтијардыр Рәбдән горхан» (МӘЗМУР 112:1).

1, 2. Јеһова гаршысында горху инсана нә ҝәтирә биләр?

ХОШБӘХТЛИК асанлыгла әлдә олунмур. Әсл хошбәхтлијә доғру сечим етмәклә, дүзҝүн давранмагла вә јанлыш јолдан дөнмәклә наил олмаг мүмкүндүр. Јараданымыз Јеһова бизә ән јахшы һәјат јолуну ҝөстәрмәк үчүн Кәламы олан Мүгәддәс Китабы вериб. Јеһованын ҝөстәришләрини өјрәниб, онлара әмәл едәрәк Ондан горхдуғумузу ҝөстәрәндә, һәгигәтән дә һәјатымыздан разы галаҹаг вә хошбәхт өмүр сүрәҹәјик (Мәзмур 23:1; Сүлејманын мәсәлләри 14:26).

² Бу мәгаләдә биз һәгиги Аллаһ горхусуна малик олан гәдимдә вә мүасир дөврдә јашајан инсанларын нүмунәләрини нәзәрдән кечирәҹәјик. Бу нүмунәләрдән Аллаһ горхусунун јанлыш һәрәкәтләрдән гачынмаг үчүн ҝүҹ, дүзҝүн оланыны етмәк үчү исә ҹәсарәт вердијини өјрәнәҹәјик. Ҝөрәҹәјик ки, Аллаһ горхусу падшаһ Давудун етдији кими бизи дә атдығымыз сәһв аддымы дүзәлтмәјә тәшвиг едәрәк хошбәхтлик ҝәтирә биләр. Һәмчинин өјрәнәҹәјик ки, Јеһова гаршысында горху валидејнләрин ушагларына верә биләҹәји һәгиги дәјәри олан мирасдыр. Аллаһын Кәламы бизи әмин едир: «Бәхтијардыр Рәбдән горхан» (Мәзмур 112:1).

Итирилмиш хошбәхтлији ҝери гајтармаг

3. Руһани ҹәһәтдән сағалмаға Давуда нә көмәк етди?

³ Әввәлки мәгаләдә мүзакирә етдијимиз кими, Давуд үч һалда һәгиги Аллаһ горхусу ҝөстәрмәдији үчүн ҝүнаһ ишләтди. Лакин онун Јеһованын вердији ҹәзаја олан мүнасибәти ҝөстәрди ки, әслиндә о, Аллаһдан горхан инсандыр. Аллаһа һөрмәт вә еһтирам Давуду ҝүнаһыны бојнуна алмаға, сәһвини дүзәлтмәјә вә Јеһова илә мүнасибәтини бәрпа етмәјә тәшвиг етди. Сәһвләринин өзү илә јанашы башгаларына да изтираблар ҝәтирмәсинә бахмајараг, сәмими гәлбдән төвбә етдијинә ҝөрә Јеһова Өз јардымыны вә хејир-дуасыны ондан әсирҝәмәди. Давудун нүмунәси ҹидди ҝүнаһ ишләтмиш мүасир мәсиһчиләри үрәкләндирә биләр.

4. Аллаһ горхусу хошбәхтлијә јенидән наил олмаға неҹә көмәк едир?

⁴ Сонјанын нүмунәсинә нәзәр салагa. Таммүддәтли хидмәт етмәсинә бахмајараг, Сонја пис достларын әһатәсинә дүшәрәк мәсиһчијә јарашмајан һәрәкәт етди. Ону јығынҹагдан кәнар етмәк лазым ҝәлди. Өзүнә ҝәлдикдә, Сонја Јеһова илә мүнасибәтләрини бәрпа етмәк үчүн тәләб олунан һәр бир шеји етди. Бир мүддәт сонра о, јенидән јығынҹағын үзвү олду. Бүтүн бу мүддәт әрзиндә Сонјанын үрәјиндә Јеһоваја хидмәт етмәк арзусу һеч вахт сөнмәмишди. О, јенидән таммүддәтли хидмәтә башлады. Сонралар о, ағсаггал кими хидмәт едән гардаш илә аилә гурду вә һазырда онунла бирликдә севинҹлә јығынҹагда хидмәт едир. Мәсиһчи јолундан мүвәггәти олараг кәнар дүшдүјүнә ҝөрә пешманчылыг чәксә дә, Сонја Аллаһ горхусунун она јенидән јығынҹаға дөнмәсинә көмәк етдијинә ҝөрә хошбәхтдир.

Ҝүнаһ етмәкдәнсә әзаб чәкмәк јахшыдыр

5, 6. Давудун ики дәфә Шаулун һәјатына неҹә вә нә үчүн рәһм етдијини изаһ един.

⁵ Әлбәттә, Аллаһ горхусунун елә әввәлҹәдән адамы ҝүнаһдан сахламасы даһа јахшыдыр. Бу, Давудун һадисәсиндән ҝөрүнүр. Бир дәфә Шаул үч мин нәфәрлик ордусу илә Давуду тә’гиб едәркән, онун адамлары илә бирликдә ҝизләндији мағараја ҝирди. Адамлары Давуду Шаулу өлдүрмәјә тәһрик етдиләр. Мәҝәр гаты дүшмәнини онун әлинә верән Јеһова дејилдими? Давуд хәлвәтҹә Шаула јахынлашды вә либасынын әтәјиндән кәсди. Давуд Аллаһдан горхдуғу үчүн, һәтта нисбәтән зәрәрсиз һәрәкәтинә ҝөрә виҹданы она әзаб вермәјә башлады. Давуд Шаулу өлдүрмәк истәјән адамларынын гаршысыны алараг деди: «Рәббин мәсһ етдији ағама әл галдырыб белә бир иш ҝөрмәји Рәбб мәндән узаг етсин, чүнки о, Рәббин мәсһ олунмушудур»b (1 Шамуел 24:1-7).

⁶ Башга бир вахт, Шаул ҝеҹәләмәк үчүн дүшәрҝә салды, һәмин ҝеҹә онун вә адамларынын үстүнә ‘Рәбб тәрәфиндән дәрин јуху ҝәлди’. Давуд вә онун ҹәсур баҹысы оғлу Авишај дүшәрҝәнин дүз ортасына ҝәләрәк, јухуја ҝетмиш Шаулун башынын үстүндә дурдулар. Авишај бирдәфәлик Шаулун ишини битирмәк истәјәндә Давуд онун әлини сахлајараг сорушду: «Рәббин мәсһ етдијинә әл галдыран ҝүнаһсыз сајылармы?» (1 Шамуел 26:9, 12).

7. Давуду ҝүнаһ етмәкдән нә чәкиндирди?

⁷ Әлинә ики дәфә фүрсәт дүшсә дә, Давуд Шаулу нә үчүн өлдүрмәди? Чүнки о, Шаулдан чох Јеһовадан горхурду. Давуд, Аллаһдан һәгигәтән дә горхдуғуна ҝөрә ҝүнаһ ишләтмәкдәнсә, лазым ҝәләрсә изтираб чәкмәјә һазыр иди (Ибраниләрә 11:25). О, Јеһованын Өз халгына вә шәхсән она гајғы ҝөстәрдијинә там архајын иди. Давуд билирди ки, Аллаһа е’тинасызлыг Онун наразылығыны газандырдығы һалда, итаәткарлыг вә инам хошбәхтлик вә чохлу хејир-дуалар ҝәтирир (Мәзмур 65:4). О, һәм дә баша дүшүрдү ки, Аллаһ Шаулу девирәрәк ону падшаһ етмәк вә’дини өз вахтында вә лазым билдији јолла јеринә јетирәҹәк (1 Шамуел 26:10).

Аллаһдан горхмаг хошбәхтлик ҝәтирир

8. Давудун чәтин вәзијјәтләрә дүшәркән неҹә давранмасындан һансы нүмунәни ҝөтүрүрүк?

⁸ Биз мәсиһчи олдуғумуз үчүн истеһзалар, тә’гибләр вә башга сынагларла үзләшә биләрик (Матта 24:9; 2 Петер 3:3). Һәтта бә’зән һәмиманлыларымызла чәтинликләр јарана биләр. Лакин биз билирик ки, Јеһова һәр шеји ҝөрүр, дуаларымызы ешидир вә өз вахтында ишләри ирадәсинә ујғун олараг гајдаја салаҹаг (Ромалылара 12:17-21; Ибраниләрә 4:16). Буна ҝөрә дә, әлејһдарларымыздан дејил, Аллаһдан горхур вә Онун хиласыны ҝөзләјирик. Биз дә Давуд кими нә гисас алыр, нә дә ки, изтираблардан гачынмаг үчүн әдаләтли принсипләри позуруг. Сон нәтиҹәдә бу, хошбәхтлик ҝәтирир. Анҹаг неҹә?

9. Тә’гибләрә бахмајараг, Аллаһ горхусунун неҹә хошбәхтлик ҝәтирдијинә даир нүмунә чәкин.

⁹ «Бир гадын вә онун јенијетмә гызы һеч јадымдан чыхмыр. Онлар мәсиһчи битәрәфлијини горумаг үчүн партија билети алмагдан имтина етдиләр» дејә узун мүддәт Африкада миссионер хидмәт едән бир гардаш данышыр. «Бир дәстә киши амансызҹасына онларын үстүнә дүшдү, сонра исә евә ҝөндәрди. Јол узуну ана, баш верәнләрин сәбәбини баша дүшмәјә чалышан, ағлајан гызына тәсәлли верирди. Әлбәттә ки, онлар о заман севинмирдиләр, лакин виҹданлары тәмиз иди. Сонралар исә Аллаһа табе олдуглары үчүн онлар чох хошбәхт идиләр. Әҝәр партија билети алсајдылар, һәмин адамлар чох шад олар, онлара лимонад верәр вә евә чатанадәк әтрафларында рәгс едәрдиләр. Лакин гыз вә онун анасы ҝери чәкилдикләрини биләрәк, дүнјанын ән бәдбәхт адамлары олардылар. Аллаһ горхусу онлары бундан хилас етди».

10, 11. Бир гадынын Аллаһдан горхмасы һансы јахшы нәтиҹәләри ҝәтирди?

¹⁰ Һәјатын мүгәддәслијинә һөрмәтлә бағлы сынагла үзләшәркән дә Аллаһ горхусу илә давранмаг хошбәхтлик ҝәтирир. Мери үчүнҹү ушаға һамилә галанда, һәким аборт етдирмәји тә’кид едирди: «Сәнин вәзијјәтин тәһлүкәлидир. Истәнилән вахт ағырлашма ола биләр вә 24 саат ичиндә һәјатыны итирә биләрсән. Сонра ушаг да өләҹәк. Неҹә олурса-олсун, ушағын сағлам доғулаҹағына һеч бир зәманәт јохдур». Мери о вахт Јеһованын Шаһидләри илә Мүгәддәс Китабы өјрәнирди, анҹаг һәлә вәфтиз олунмамышды. О дејир: «Мән артыг Јеһоваја хидмәт етмәји вә нә олурса-олсун она табе олмағы гәрара алмышдым» (Чыхыш 21:22, 23).

¹¹ Һамиләлији дөврүндә Мери Мүгәддәс Китабы өјрәнмәјә вә аиләсинин гајғысына галмаға давам едирди. Нәһајәт ушаг дүнјаја ҝәлди. «Бу доғуш әввәлкиләрдән бир аз ағыр кечди, лакин елә дә ҹидди ағырлашмалар олмады» дејә Мери сөјләјир. Аллаһ горхусу Меријә виҹданыны тәмиз сахламаға көмәк етди вә о, тезликлә вәфтиз олунду. Ушаг да бөјүдүкҹә Јеһовадан горхмағы өјрәнди вә һазырда Јеһованын Шаһидләринин филиалларынын бириндә хидмәт едир.

Јеһовадан ‘гүввәт алын’

12. Аллаһ горхусу Давуду неҹә мөһкәмләндирди?

¹² Аллаһ горхусу Давуду садәҹә олараг ҝүнаһ етмәкдән чәкиндирмәди, һәм дә чәтин шәраитләрдә гәтијјәтли вә мүдрик давранмаг үчүн она ҝүҹ верди. Бир ил дөрд ај әрзиндә Давуд адамлары илә бирликдә Шаулун әлиндән филиштлиләрин Зиглаг шәһәриндә сығынаҹаг тапды (1 Шамуел 27:5-7). Бир дәфә кишиләр шәһәрдә олмајанда амалегли сојғунчулар шәһәри јандырараг бүтүн гадынлары, ушаглары вә мал-гараны апардылар. Гајыданда баш верәнләри ҝөрән Давуд вә онун адамлары һөнкүр-һөнкүр ағладылар. Гүссә тезликлә һиддәтә чеврилди вә Давудун адамлары ону дашламаг истәјирдиләр. Фәлакәтә дүшдүјүнә бахмајараг, Давуд үмидсизлијә гапылмады (Сүлејманын мәсәлләри 24:10). Аллаһ горхусу ону Јеһоваја үз тутмаға тәшвиг етди, «Давуд Аллаһы Рәбдән гүввәт алды». Аллаһын көмәји илә Давуд вә адамлары амалеглиләрә галиб ҝәлдиләр вә һәр шејләрини ҝери гајтардылар (1 Шамуел 30:1-20).

13, 14. Аллаһ горхусу бир мәсиһчијә дүзҝүн гәрар гәбул етмәкдә неҹә көмәк етди?

¹³ Аллаһын мүасир хидмәтчиләри дә елә һалларла үзләширләр ки, гәтијјәтлә һәрәкәт етмәк үчүн онлардан Јеһоваја инам вә ҹәсарәт тәләб олунур. Кристинанын һадисәси буна нүмунәдир. Ушаг икән Кристина Јеһованын Шаһидләри илә Мүгәддәс Китабы өјрәнирди. Лакин о, пианочу олмаг, консертләр вермәк истәјирди вә бу нијјәтинә доғру хејли ирәлиләјиш етмишди. О, һәм дә тәблиғ етмәјә утандығындан вәфтизин ҝәтирдији мәс’улијјәтләри үзәринә ҝөтүрмәјә горхурду. Кристина Аллаһын Кәламыны өјрәндикҹә, онун гүввәсини һисс етмәјә башлады. О, Јеһовадан горхмағы өјрәнир вә баша дүшүрдү ки, Јеһова Өз хидмәтчиләриндән Ону бүтүн үрәји, ҹаны, дүшүнҹә вә гүввәти илә севмәләрини ҝөзләјир (Марк 12:30). Бу ону һәјатыны Јеһоваја һәср етмәјә вә вәфтиз олмаға тәшвиг етди.

¹⁴ Кристина руһани ҹәһәтдән ирәлиләмәк үчүн Јеһовадан көмәк истәјирди. Кристина дејир: «Мән билирдим ки, пианочу даима гастрол сәфәрләриндә олур вә илдә 400-ә гәдәр консерт вермәк үчүн мүгавилә бағлајыр. Буна ҝөрә дә гәрара алдым ки, јахшысы будур өзүмү мадди ҹәһәтдән тә’мин етмәк үчүн мүәллимлик едим вә таммүддәтли хидмәтә башлајым». Бу вахт о өз өлкәсинин мәшһур консерт залында артыг илк консертини вермәји планлашдырмышды. «Бу мәним илк вә сон консертим олду» дејә Кристина давам едир. Сонралар Кристина мәсиһчи ағсаггалы илә аилә гурду. Инди онлар бирликдә Јеһованын Шаһидләринин филиалларындан бириндә хидмәт едирләр. О, чох хошбәхтдир ки, Јеһова она дүзҝүн гәрарлар гәбул етмәк үчүн ҝүҹ верди вә инди о өз вахтыны, ҝүҹүнү хидмәтә һәср едә билир.

Гијмәтли мирас

15. Давуд өз өвладларына нәји мирас вермәк истәјирди вә о буну неҹә етди?

¹⁵ Давуд јазырды: «Ҝәлин, еј өвладлар, мәни динләјин, Рәбдән горхмағы мәндән өјрәнин» (Мәзмур 34:11). Давуд гијмәтли мирасы — һәгиги, таразлы, сағлам Аллаһ горхусуну ушагларына вермәјә гәти гәрарлы иди. Давуд сөзләри вә һәрәкәтләри илә ҝөстәрмишди ки, Јеһова ганунларынын позулдуғуну ирад тутан тәләбкар, горхулу Аллаһ дејил, јерүзү өвладларыны севән, гајғыкеш вә бағышлајан Атадыр. Давуд сорушурду: «Ким өз сәһвләрини дуја биләр?» Сонра Јеһованын даима диггәтлә сәһвләримизи изләмәдијинә даир әминлијини билдирәрәк әлавә етди: «Мәни ҝизли тәгсирләримдән тәмизлә». Давуд әмин иди ки, әҝәр әлиндән ҝәләни едәрсә, сөзләри вә дүшүнҹәләри илә Јеһованы разы сала биләр (Мәзмур 19:12, 14).

16, 17. Валидејнләр ушагларына Јеһовадан горхмағы неҹә өјрәдә биләрләр?

¹⁶ Давуд буҝүнкү валидејнләр үчүн нүмунәдир. Гардашы илә бирҝә Јеһованын Шаһидләринин филиалында хидмәт едән Ралф дејир: «Валидејнләримиз бизи елә тәрбијә едирдиләр ки, һәгигәтдә олмаг бизә хош иди. Биз ушаг оланда онлар јығынҹағын ишләри барәдә сөһбәтләрә бизи дә ҹәлб едирдиләр, бунун сајәсиндә онлар кими бизим дә, хидмәтдә сә’јимиз артды. Биз әмин идик ки, Јеһоваја хидмәтдә хејирли ишләр ҝөрә биләрик. Бир нечә ил аиләмиз Падшаһлығын тәблиғчиләринә бөјүк еһтијаҹ олан өлкәдә јашајараг, орада јени јығынҹаглар тәшкил етмәјә көмәк едирди.

¹⁷ Бизи дүз јолда сахлајан чохлу сајда сәрт гајдалар дејил, валидејнләримиз үчүн Јеһованын реал, чох мәрһәмәтли вә хејирхаһ Аллаһ олмасы иди. Онлар Јеһованы даһа јахшы танымаға вә Ону разы салмаға ҹан атырдылар. Валидејнләримизин Аллаһ горхусу вә Она олан мәһәббәти бизә чох шеји өјрәтди. Һәтта сәһвә јол верәндә белә, валидејнләримиз биздә елә фикир јаратмырдылар ки, Јеһова артыг бизи севмир, онлар гәзәблә үзәримизә јерсиз мәһдудијјәтләр дә гојмурдулар. Чох вахт онлар отуруб бизимлә сакитҹә сөһбәт едирдиләр, анам бә’зән ҝөзләриндә јаш үрәјимизә јол тапмаға чалышырды. Бунун көмәји дәјди. Валидејнләримизин сөзләриндән вә һәрәкәтләриндән Јеһоваја хидмәт етмәјин јүк олмадығыны, севинҹ вә мәмнунлуг ҝәтирдијини, Аллаһ горхусунун исә бизим хејримизә олдуғуну өјрәндик (1 Јәһја 5:3).

18. Һәгиги Аллаһдан горхмагла нә әлдә едәҹәјик?

¹⁸ ‘Давудун сон сөзләри’ арасында бунлар да вар иди: «Инсанлар үстүндә доғрулугла һөкм едән, Аллаһын горхусу илә сәлтәнәт сүрән шәхс булудсуз бир сәмада ҝүн доғаркән сүбһ шәфәги кимидир» (2 Шамуел 23:1, 3, 4). Ҝөрүнүр, Давудун оғлу вә вариси олан Сүлејман буну јахшы баша дүшмүшдү, чүнки Јеһовадан «дәрракәли үрәк» вә ‘јахшы илә писи ајырд етмәк’ габилијјәтини хаһиш етди (1 Падшаһлар 3:9). Сүлејман Јеһовадан горхмағын мүдриклик олдуғуну вә хошбәхтлик ҝәтирдијини дәрк едирди. Сонралар о, «Ваиз» китабына белә сөзләрлә јекун вурду: «Һәр шеј ашкар олду, нәтиҹә бундан ибарәтдир: Аллаһдан горх, Онун әмрләрини јеринә јетир. Бәли, инсанын әсас вәзифәси будур. Чүнки Аллаһ һәр иши, ҝизли олан һәр шеји — истәр јахшы олсун, истәр пис — мүһакимә едәҹәк» (Ваиз 12:13, 14). Әҝәр биз бу мәсләһәтә гулаг ассаг, һәгигәтән дә ‘тәвазөкарлығын вә Рәбб горхусунун нәтиҹәсинин’ јалныз мүдриклик вә хошбәхтлик дејил, һәм дә ‘сәрвәт, шәрәф, һәјат’ олдуғуну ҝөрәҹәјик (Сүлејманын мәсәлләри 22:4).

19. «Рәбб горхусуну» анламаға бизә нә көмәк едәҹәк?

¹⁹ Мүгәддәс Китаб вә мүасир дөвр нүмунәләриндән ҝөрдүк ки, һәгиги Аллаһ горхусу Јеһованын хидмәтчиләринин һәјатына мүсбәт тә’сир ҝөстәрир. Белә горху бизи нәинки сәмави Атамызын хошуна ҝәлмәјән әмәлләрдән сахлајыр, һәм дә дүшмәнләримизә гаршы дурмаға ҹәсарәт, јолумуза чыхан сынаг вә чәтинликләрә таб ҝәтирмәјә ҝүҹ верир. Буна ҝөрә дә ҝәлин јашымыздан асылы олмајараг, һамымыз сә’јлә Аллаһын Кәламыны өјрәнмәклә, өјрәндикләримиз үзәриндә дүшүнмәклә мәшғул олаг, мүнтәзәм вә сәмими дуалар васитәсилә Јеһоваја јахынлашаг. Белә етмәклә, биз ‘Аллаһы танымагла’ јанашы, һәм дә ‘Рәбб горхусунун’ нә олдуғуну анлајаҹағыг (Сүлејманын мәсәлләри 2:1-5).

[Һашијәләр]

Изаһ едә биләрсинизми?

Аллаһ горхусу

• ҹидди ҝүнаһдан дөнмәјә неҹә көмәк едә биләр?

• сынаглар вә тә’гибләр заманы неҹә хошбәхтлик ҝәтирә биләр?

• Онун ирадәсини јеринә јетирмәк үчүн бизә неҹә ҝүҹ верә биләр?

• өвладларымыз үчүн гијмәтли мирас неҹә ола биләр?

[32-ҹи сәһифәдәки шәкил]

Јеһова гаршысында горху Давуду падшаһ Шаулу өлдүрмәкдән сахлады.