«Әјјубун тәһәммүлү барәсиндә ешитмисиниз»
«Әјјубун тәһәммүлү барәсиндә ешитмисиниз вә Рәббин ахырда нә етдијини дә ҝөрдүнүз; чүнки Рәбб чох шәфгәтли вә мәрһәмәтлидир» (ЈАГУБ 5:11).
1, 2. Полшалы бир аилә һансы сынагларла үзләшмишди?
ҺИТЛЕРИН гошуну шимали Полшанын Гданск шәһәрини ишғал едәндә Һаралд Апт бир илдән аз иди ки, Јеһованын Шаһиди иди. О заман вәзијјәт чәтинләшди, бәли, һәгиги мәсиһчиләр үчүн тәһлүкәли вәзијјәт јаранды. Ҝестапо Һаралды имандан имтина етмәк һаггында сәнәди имзаламаға мәҹбур етмәјә чалышса да, о буну рәдд етди. Бир нечә һәфтә һәбсханада галдыгдан сонра, Һаралды Заксенхаузен һәбс дүшәрҝәсинә ҝөндәрдиләр, бурада ону һәдәләјир вә дөјүрдүләр. Забит мејитләр јандырылан бинанын баҹасыны ҝөстәриб Һаралда деди: «Әҝәр 14 ҝүнә дининдән дөнмәсән, ора, өз Јеһованын јанына галхаҹагсан».
2 Һаралд һәбс едиләндә онун һәјат јолдашы Елза он ајлыг гызларыны һәлә сүддән ајырмамышды. Лакин о да ҝестапонун диггәтиндән јајынмады. Чох кечмәдән ушағы әлиндән алдылар, өзү исә Освентсим өлүм дүшәрҝәсинә ҝөндәрилди. Лакин онларын һәр икиси сағ галды. «Ҝөзәтчи Гүлләси»нин 1980-ҹи ил 15 апрел сајында (инҝ.) онларын неҹә таб ҝәтирдикләри барәдә охуја биләрсиниз. Һаралд јазырды: «Дини е’тигадыма ҝөрә, өмрүмүн 14 илини һәбс дүшәрҝәләриндә вә һәбсханаларда кечирмишәм. Мәндән сорушурдулар ки, бүтүн бунлара таб ҝәтирмәкдә һәјат јолдашымын мәнә көмәји дәјибми. Әлбәттә! Мән әввәлҹәдән билирдим ки, о, һеч вахт иманындан дөнмәјәҹәк вә бу мәнә ҝүҹ верирди. Мән билирдим ки, о мәним имандан дөнәрәк азадлыға чыхмағымы ҝөрмәкдәнсә, өлүмүмү ҝөрмәјә разыдыр... Елза өзү дә алман һәбс дүшәрҝәләриндә чох чәтинликләрә таб ҝәтириб».
3, 4. а) Кимләрин нүмунәси таб ҝәтирмәк үчүн мәсиһчиләри мөһкәмләндирә биләр? б) Нә үчүн Мүгәддәс Китаб бизи Әјјубун һадисәсини дәриндән арашдырмаға тәшвиг едир?
3 Әзијјәтләрә таб ҝәтирмәк һеч дә асан дејилдир, бир чохлары буну тәсдиг едә биләр. Бу сәбәбдән Мүгәддәс Китаб бүтүн мәсиһчиләрә мәсләһәт верир: «Рәббин ады илә данышмыш пејғәмбәрләри, мәшәггәтә дөзмә вә сәбир нүмунәси олараг алын» (Јагуб 5:10). Әсрләр бојунҹа Аллаһын бир чох хидмәтчиләри әсассыз јерә тә’гибләрә мә’руз галмышлар. ‘Бөјүк шаһидләр булудунун’ гојдуғу нүмунә мәсиһчи јарышымызы тәһәммүллә гачмаг үчүн бизә ҹәсарәт верә биләр (Ибраниләрә 11:32-38; 12:1).
4 Әјјуб Мүгәддәс Китабда тәһәммүл нүмунәси кими гаршымызда дурур. Јагуб јазырды: «Будур, биз тәһәммүл едәнләри бәхтијар һесаб едирик: Әјјубун тәһәммүлү барәсиндә ешитмисиниз вә Рәббин ахырда нә етдијини дә ҝөрдүнүз; чүнки Рәбб чох шәфгәтли вә мәрһәмәтлидир» (Јагуб 5:11). Әјјубун һадисәси, Јеһованын хејир-дуа вердији садиг инсанларын алаҹаглары мүкафат һагда биздә мүәјјән гәдәр тәсәввүр јарадыр. Даһа ваҹиби исә одур ки, бу һадисә бизә бәлалар заманы көмәк едәҹәк һәгигәти ачыглајыр. «Әјјуб» китабы бу суаллара ҹаваб тапмаға көмәк едир: сынаглар заманы ваҹиб мүбаһисәли суалы нә үчүн нәзәрдән гачырмамалыјыг? Һансы кејфијјәтләр вә әһвал-руһијјә таб ҝәтирмәкдә көмәк едәр? Бәлаја дүчар олмуш һәмиманлыларымызы неҹә үрәкләндирә биләрик?
Вәзијјәти һәртәрәфли ҝөрмәк
5. Сынаг вә имтаһанлар гаршысында һансы ваҹиб мәсәләни јадда сахламалыјыг?
5 Фәлакәтләрлә үзләшәркән руһани таразлығы горумаг үчүн вәзијјәт һаггында һәртәрәфли тәсәввүрә малик олмалыјыг. Әкс тәгдирдә, шәхси проблемләримиз руһани ҝөзләримизи думанландыра биләр. Ән ваҹиби Аллаһа садиг галмагдыр. Сәмави Атамызын бу мүраҹиәти һәр биримиз үчүн мүһүмдүр: «Оғлум, һикмәтли ол, гој гәлбим севинсин, онда мәни утандырана [«Мәнә истеһза едәнә», ЈД] ҹаваб верә биләрәм» (Сүлејманын мәсәлләри 27:11). Бу неҹә дә надир имтијаздыр! Зәифликләримизә вә гејри-камиллијимизә бахмајараг, биз Јараданымызы севиндирә биләрик. Јеһоваја олан мәһәббәтимиздән ирәли ҝәләрәк сынаг вә имтаһанлара тәһәммүл едәркән биз Ону севиндиририк. Һәгиги мәсиһчи мәһәббәти һәр бир шејә таб ҝәтирир. О, һеч вахт түкәнмир (1 Коринфлиләрә 13:7, 8).
6. Шејтан Аллаһа неҹә вә нә дәрәҹәдә истеһза етди?
6 «Әјјуб» китабы Шејтаны ачыг-ашкар Јеһоваја истеһза едән бири кими таныдыр. О, һәмчинин ҝөзәҝөрүнмәз дүшмәнин мәнфур тәбиәтини вә Аллаһла мүнасибәтимизи позмаг арзусунда олдуғуну ачыглајыр. Әјјубун һадисәсиндән ҝөрүндүјү кими, Шејтан хүсусилә дә Јеһованын бүтүн хидмәтчиләрини худбинликдә иттиһам едир вә онларын Аллаһа олан мәһәббәтинин сојујаҹағыны сүбут етмәјә ҹан атыр. О, мин илләрдир ки, Аллаһа истеһза едир. Шејтан ҝөјдән говуланда, ҝөјдән ҝәлән сәс ону «гардашларымызын иттиһамчысы» адландырды вә «Аллаһымызын өнүндә ҝеҹә вә ҝүндүз» иттиһамлар ирәли сүрдүјүнү деди (Вәһј 12:10). Сәдагәтлә тәһәммүл едәрәк бу иттиһамларын әсассыз олдуғуну ҝөстәрә биләрик.
7. Физики зәифлијә гаршы дурмағын ән јахшы үсулу нәдир?
7 Јадда сахламалыјыг ки, Шејтан башымыза ҝәлән һәр бәдбәхтликдән бизи Јеһовадан узаглашдырмаг үчүн истифадә едәҹәк. О, Исаны нә заман сынаға чәкди? Гырх ҝүн оруҹ тутараг аҹанда (Лука 4:1-3). Анҹаг Иса руһани ҝүҹү сајәсиндә гәтијјәтлә Шејтанын ширникдириҹи тәклифләрини рәдд етди. Неҹә дә ваҹибдир ки, хәстәлик вә ја гоҹалығын нәтиҹәси олан физики зәифлијимизә руһән ҝүҹлү олараг гаршы дураг! Һәтта «заһири варлығымыз позулурса да» биз руһдан дүшмүрүк, чүнки «дахили варлығымыз ҝүндән-ҝүнә тәзәләнир» (2 Коринфлиләрә 4:16).
8. а) Мәнфи һиссләр һансы зәрәри јетирә биләр? б) Иса һансы дүшүнҹә тәрзинә малик иди?
8 Бундан башга мәнфи һиссләр инсанын руһанилијинә зәрәр јетирә биләр. Инсан тәәҹҹүб ичиндә чашыб гала биләр: «Јеһова буна нә үчүн јол верир?» Бир башгасы исә сәрт рәфтарла үзләшәндә дүшүнә биләр: «Һеч гардаш да белә давранар?» Белә һиссләр диггәтимизи әсас мәсәләләрдән јајындырараг шәхсән өзүмүзә ҹәмләшдирир. Әјјуб хәстәлијинин ону һалдан салмасындан чох, үч достунун јаратдығы чашгынлагдан әзијјәт чәкирди (Әјјуб 16:20; 19:2). Һәвари Павел дә ҝөстәрмишди ки, узунсүрән гәзәб «иблисә јер», јә’ни имкан јарадыр (Ефеслиләрә 4:26, 27). Мәсиһчи кимәсә әсәбиләшдијини бүрузә вермәк вә ја фикрини сон дәрәҹәдә һагсызлыға ҹәмләшдирмәк әвәзинә, јахшы оларды ки, өзүнү Јеһова Аллаһа, ‘әдаләтлә мүһакимә Едәнә тәслим едән’ Исадан нүмунә ҝөтүрсүн (1 Петер 2:21-23). Мәсиһин дүшүнҹә тәрзи Шејтанын һәмләләринә гаршы әсас мүдафиә үсулу ола биләр (1 Петер 4:1).
9. Аллаһ пајымыза дүшән јүкләрә вә үзләшдијимиз имтаһанлара даир бизи нәјә әмин едир?
9 Һәр шејдән әввәл биз һеч вахт фикирләшмәмәлијик ки, проблемләримиз Аллаһын биздән наразы олдуғуну ҝөстәрир. Тәсәлли умдуғу адамлар Әјјуба сәрт сөзләр јағдыранда бу сәһв фикир ону инҹидирди (Әјјуб 19:21, 22). Мүгәддәс Китаб бизи әмин едир: «Аллаһ писликлә имтаһан олунмур вә Өзү дә һеч кими имтаһан етмир» (Јагуб 1:13). Әксинә, үзәримизә нә јүк дүшүрсә-дүшсүн, Јеһова ону дашымаға көмәк едәҹәјини вә гаршылашдығымыз имтаһанлардан гуртулуш верәҹәјини вә’д едир (Мәзмур 55:22; 1 Коринфлиләрә 10:13). Чәтинликләр заманы Јеһоваја јахынлашараг вәзијјәтә дүзҝүн гијмәт верәҹәк вә Шејтана мүвәффәгијјәтлә мүгавимәт ҝөстәрә биләҹәјик (Јагуб 4:7, 8).
Тәһәммүл етмәк үчүн көмәк
10, 11. а) Әјјуб нәјин сајәсиндә тәһәммүл етди? б) Тәмиз виҹдана саһиб олмасы Әјјуба неҹә көмәк етди?
10 Әјјуб вәзијјәтинин чәтинлији илә јанашы, јаланчы тәсәлличиләринин сөзлә она һүҹумуна вә фәлакәтләринин әсл сәбәби барәдә олан чашгынлығына бахмајараг, нөгсансызлығыны горуду. Онун тәһәммүлүндән һансы ибрәт дәрсини алырыг? Шүбһәсиз, нөгсансызлығыны горумағынын әсас сәбәби Әјјубун Јеһоваја олан садиглији иди. «О... Аллаһдан горхан вә өзүнү шәрдән узаг сахлајан бир адам иди» (Әјјуб 1:1). Бу онун һәјатда сечдији јол иди. Һәтта һәр шејин бирдән-бирә нә үчүн писләшдијини баша дүшмәсә дә, Әјјуб Јеһоваја арха чевирмәди. О, неҹә ки јахшы, еләҹә дә пис вахтларда Аллаһа хидмәт етмәли олдуғуна әмин иди (Әјјуб 1:21; 2:10).
11 Виҹданынын тәмиз олмасы да Әјјуба тәсәлли иди. Һәтта өмрүнүн сонуна аз галдығыны дүшүнәндә дә башгаларына көмәк етмәк үчүн әлиндән ҝәләни етдијини, Јеһованын салеһ нормаларына риајәт етдијини вә јалан ибадәтин һәр бир нөвүндән кәнар дурдуғуну билмәк она тәскинлик верирди (Әјјуб 31:4-11).
12. Әјјуб Елиһудан алдығы көмәјә неҹә һај верди?
12 Дүздүр, бә’зи мәсәләләрә даир дүшүнҹә тәрзинин дәјишмәси үчүн Әјјубун көмәјә еһтијаҹы варды. О, тәһәммүлүндә бөјүк ролу олан бу көмәји тәвазөкарлыгла гәбул етди. Әјјуб һөрмәтлә Елиһунун мүдрик мәсләһәтини динләди вә Јеһованын дүзәлишинә мүсбәт ҹаваб верди. О е’тираф етди: «Билмәдијим шејләрдән... данышдым. Она ҝөрә өзүмдән зәһләм ҝедир, торпағын, күлүн ичиндә төвбә едирәм» (Әјјуб 42:3, 6). Она әзаб верән хәстәлијин давам етмәсинә бахмајараг, Әјјуб севинирди ки, дүшүнҹә тәрзинин дәјишмәси ону Аллаһа јахынлашдырды. Әјјуб деди: «Билирәм, Сән [Јеһова] һәр шејә гадирсән» (Әјјуб 42:2). Јеһова Өз әзәмәтини тәсвир едәндә Әјјуб Јараданла мүгајисәдә өз мөвгејини даһа ајдын баша дүшдү.
13. Мәрһәмәтли олмағын Әјјуба һансы фајдасы дәјди?
13 Нәһајәт, Әјјуб мәрһәмәт ҝөстәрмәкдә ҝөзәл бир нүмунә гојуб. Сахта тәсәлличиләринин ону чох инҹитдијинә бахмајараг, Јеһова Әјјуба онлар үчүн дуа етмәји тапшыранда, Әјјуб Аллаһын дедијини јеринә јетирди. Бундан сонра Јеһова Әјјубу сағалтды (Әјјуб 42:8, 10). Мәһәббәт вә мәрһәмәт бизә таб ҝәтирмәкдә көмәк етдији һалда, һиддәтин һеч бир фајдасы дәјмәјәҹәк. Һиддәти боғараг биз руһани ҹәһәтдән тәравәт алаҹағыг. Јеһова да мәһз белә етдикдә хејир-дуа верир (Марк 11:25).
Тәһәммүл етмәјә бизә көмәк едән мүдрик мәсләһәтчиләр
14, 15. а) Мәсләһәтчи һансы кејфијјәтләри сајәсиндә башгаларына шәфа верә биләр? б) Нә үчүн Елиһу Әјјуба көмәк едә билди?
14 Әјјубун һадисәсиндән һәм дә мүдрик мәсләһәтчиләрин чох дәјәрли олдуғуну өјрәнирик. Беләләри ‘дар ҝүн үчүн дөғулан’ гардашлардыр (Сүлејманын мәсәлләри 17:17). Анҹаг ҝөрдүјүмүз кими, бә’зи мәсләһәтчиләр сағалтмаг әвәзинә јара вура биләрләр. Јахшы мәсләһәтчи ҝәрәк Елиһу кими мәрһәмәтли, һөрмәтҹил вә хејирхаһ олсун. Ағсаггаллара вә башга јеткин мәсиһчиләрә проблемләри олан гардашларын дүшүнҹә тәрзини ислаһ етмәк лазым ҝәлә биләр, бу заман белә мәсләһәтчиләр «Әјјуб» китабындан чох шеј өјрәнә биләрләр (Галатијалылара 6:1; Ибраниләрә 12:12, 13).
15 Елиһунун мәсәләјә неҹә јанашмасындан чохлу дәрс ала биләрик. О, Әјјубун үч достунун јанлыш сөзләринә ҹаваб вермәздән әввәл сәбирлә онлары динләди (Әјјуб 32:11; Сүлејманын мәсәлләри 18:13). Елиһу Әјјубу ады илә чағырыр вә она достҹасына јанашырды (Әјјуб 33:1). Үч сахта тәсәлличиләрдән фәргли олараг, о өзүнү Әјјубдан үстүн сајмыр, әксинә, дејирди: «Мән дә палчыгдан дүзәлдилмишәм». О, дүшүнүлмәмиш сөзләрилә Әјјубун әзабларыны артырмаг истәмирди (Әјјуб 33:6, 7; Сүлејманын мәсәлләри 12:18). Әјјубун кечмиш һәјатыны тәнгид етмәкдәнсә, Елиһу: «Сәнин салеһлијин мәни севиндирир» дејәрәк ону тә’рифләди (Әјјуб 33:32, ЈД). Ән ваҹиби исә Елиһу һәр шејә Аллаһын нөгтеји-нәзәри илә бахырды вә о, Әјјубун диггәтини Јеһованын һеч вахт әдаләтсиз давранмадығына јөнәлтди (Әјјуб 34:10-12). О, Әјјубу тәшвиг етди ки, өз салеһлијини сүбут етмәкдәнсә, Јеһованы ҝөзләсин (Әјјуб 35:2; 37:14, 23). Мәсиһчи ағсаггаллары вә башгалары бундан өзләринә дәрс ҝөтүрә биләрләр.
16. Неҹә олду ки, Әјјубун үч досту Шејтанын аләтинә чеврилди?
16 Елиһунун мүдрик мәсләһәти Елифаз, Билдад вә Софарын аҹы сөзләринә бәнзәмирди. Јеһова онлара деди: «Сиз гулум Әјјуб кими мәним һаггымда доғру оланы демәдиниз» (Әјјуб 42:7). Онлар Әјјубун јанына тәмиз үрәклә ҝәлдикләрини иддиа етсәләр дә, өзләрини вәфалы достлар кими дејил, Шејтанын аләтләри кими апардылар. Онларын үчү дә елә лап башланғыҹдан һесаб едирдиләр ки, фәлакәтләринин баш вермәсиндә Әјјуб өзү ҝүнаһкардыр (Әјјуб 4:7, 8; 8:6; 20:22, 29). Елифазын фикринҹә Аллаһ Өз хидмәтчиләринә е’тибар етмир вә бизим салеһ олуб-олмамағымызын Онун үчүн һеч бир әһәмијјәти јохдур (Әјјуб 15:15; 22:2, 3). О, һәтта Әјјубу етмәдији әмәлләрдә ҝүнаһландырырды (Әјјуб 22:5, 9). Елиһу исә бунун әксинә олараг, Әјјуба руһани ҹәһәтдән көмәк етди. Мәһәббәтли мәсләһәтчинин дә мәгсәди елә будур.
17. Сынаглар заманы нәји јадда сахламалыјыг?
17 «Әјјуб» китабындан тәһәммүл һаггында башга бир дәрси дә ала биләрик. Севән Аллаһымыз вәзијјәтимизи мүшаһидә едир вә мүхтәлиф үсулларла бизә көмәк етмәјә һәм гадирдир, һәм дә һазыр. Мәгаләнин әввәлиндә Елза Аптын башына ҝәләнләр һаггында охудуг. Онун һансы нәтиҹәјә ҝәлдијинә диггәт јетирин: «Һәбс олунмамышдан габаг, бир баҹынын мәктубуну охумушдум. О јазырды ки, шиддәтли сынаглар заманы Јеһованын руһу инсана гәлб раһатлығы ҝәтирир. Мән фикирләширдим ки, о, јәгин бир аз шиширдир. Лакин мән өзүм сынаглара дүшәндә, онун сөјләдикләринин һәгигәт олдуғуну анладым. Бу доғрудан да белә олур. Буну өз үзәриндә һисс етмәјинҹә тәсәввүр етмәк мүмкүн дејил. Анҹаг бу мәнимлә доғрудан да баш верди. Јеһова көмәк едир». Елза Јеһованын минилликләр әввәл Әјјубун ҝүнләриндә етдији ишләрдән данышмырды. О бизим ҝүнләримиздән данышырды. Бәли, «Јеһова көмәк едир!»
Тәһәммүл едән хошбәхтдир
18. Әјјуб тәһәммүлүндән һансы фајдалары әлдә етди?
18 Бизләрдән аз адам Әјјуб гәдәр ағыр сынаглара мә’руз галмалы олаҹаг. Лакин бу системдә сынагларымыз олса да, Әјјуб кими бизим дә нөгсансызлығы горумаға әсаслы сәбәбләримиз вардыр. Әслиндә, тәһәммүл Әјјубун һәјатыны зәнҝинләшдирди. Онун сајәсиндә Әјјуб «камил», јә’ни руһән јеткин инсан олду (Јагуб 1:2-4). Аллаһла мүнасибәтинин мөһкәмләндијини өзү тәсдиг етди: «Гулагларыма сорағын чатмышды, индисә Сәни ҝөзләримлә ҝөрүрәм» (Әјјуб 42:5). Әјјубун нөгсансызлығыны поза билмәдији үчүн Шејтанын јаланчы олдуғу билинди. Јүзилликләр кечәндән сонра Јеһова хидмәтчиси Әјјуб һаггында салеһ инсан кими данышырды (Језекел 14:14). Онун нөгсансызлыг вә тәһәммүл нүмунәси һәтта бу ҝүн дә Аллаһын халгыны руһландырыр.
19. Сиз нә үчүн дүшүнүрсүнүз ки, тәһәммүл етмәјә дәјәр?
19 Јагуб биринҹи әср мәсиһчиләринә тәһәммүл һаггында јазаркән, онун мәмнунлуг ҝәтирдијини деди. Јеһованын Өз хидмәтчиләринә бол-бол хејир-дуа вердијини хатырлатмаг үчүн о, Әјјубу нүмунә чәкди (Јагуб 5:11). Биз Әјјуб 42:12 ајәсиндә охујуруг: «Рәбб Әјјубун ахыр ҝүнләрини әввәлки ҝүнләриндән даһа чох бәрәкәтли етди». Јеһова Әјјуба итирдикләринин әвәзини икигат гајтарды вә о, хошбәхт, узун өмүр сүрдү (Әјјуб 42:16, 17). Буна бәнзәр шәкилдә, бу системин ахырында таб ҝәтирмәли олдуғумуз ағры, әзијјәт Аллаһын јени дүнјасында јох олаҹаг вә унудулаҹаг (Јешаја 65:17; Вәһј 21:4). Биз Әјјубун тәһәммүлү һагда ешитмишик вә Јеһованын көмәјилә онун нүмунәсини изләмәјә гәти гәрарлыјыг. Мүгәддәс Китаб вә’д едир: «Имтаһана дөзән адам хошбәхтдир. Чүнки сынагдан уғурла чыхаркән, Рәббин Ону севәнләрә вә’д етдији һәјат таҹыны алаҹагдыр» (Јагуб 1:12).
Неҹә ҹаваб верәрдиниз?
• Биз Јеһованын үрәјини неҹә севиндирә биләрик?
• Нә үчүн белә гәнаәтә ҝәлмәмәлијик ки, проблемләр Аллаһын биздән наразы олдуғуну ҝөстәрир?
• Тәһәммүл етмәјә Әјјуба нә көмәк етди?
• Һәмиманлыларымызы үрәкләндирәркән Елиһудан неҹә нүмунә ҝөтүрә биләрик?
[20-ҹи сәһифәдәки шәкил]
Јахшы мәсләһәтчи мәрһәмәтли, һөрмәтҹил вә хејирхаһ давраныр.
[21-ҹи сәһифәдәки шәкилләр]
Елза вә Һаралд Апт