«Ҝәнҹ икән евләндијин арвадынла хошбәхт јаша!»
«Ҝәнҹ икән евләндијин арвадынла хошбәхт јаша!.. Оғлум, нијә әхлагсыз гадынла мәст олмалысан?» (СҮЛЕЈМАНЫН МӘСӘЛЛӘРИ 5:18, 20).
1, 2. Әрлә арвадын бир-биринә дујдуглары севҝи һансы мә’нада хејир-дуалыдыр?
МҮГӘДДӘС Китаб ҹинси јахынлыг барәдә сусмур. Мәсәлән, Сүлејманын мәсәлләри 5:18, 19 ајәләриндә јазылыб: «Гој чешмән бәрәкәтли олсун, ҝәнҹ икән евләндијин арвадынла хошбәхт јаша! Севимли маралын, ҝөзәл ҹејранын һәмишә сәни өз дөшләри илә дојдурсун, онун ешги илә мәст ол».
2 Бурада ишләдилән ‘чешмә’ сөзү әрлә арвадын ҹинси јахынлыгдан алдыглары һәззә аиддир. Севмәк вә ҹинси јахынлыгдан һәзз алмаг габилијјәтини киши илә гадына Аллаһ бәхш етдији үчүн ‘чешмә бәрәкәтли’, јә’ни хејир-дуалы адланыр. Ҹинси јахынлыг јалныз никаһда олан инсанлар үчүн нәзәрдә тутулуб. Буна ҝөрә дә «Сүлејманын мәсәлләри» китабында дүшүндүрүҹү суал верилир: «Оғлум, нијә әхлагсыз гадынла мәст олмалысан, јад арвады гојнуна алмалысан?» (Сүлејманын мәсәлләри 5:20).
3. а) Никаһ гурулушу бу ҝүн һансы вәзијјәтдәдир? б) Аллаһ никаһда хәјанәтә неҹә бахыр?
3 Тој ҝүнү, евләнәнләр бир-бирләрини севиб сәдагәтли галаҹагларыны тәнтәнәли сурәтдә вә’д едирләр. Буна бахмајараг, бир чох аиләләр хәјанәт үзүндән дағылыр. Бир тәдгигатчынын ијирмидән артыг аилә илә кечирдији сорғунун нәтиҹәләринә ҝөрә гадынлардан 25 фаизи, кишиләрдән исә 44 фаизи һәјат јолдашларына хәјанәт едиб. Һәвари Павел јазырды: «Алданмајын: нә әхлагсызлар, нә бүтпәрәстләр, нә зинакарлар, нә кишибазлар... Аллаһын Сәлтәнәтини [Падшаһлығыны] мирас алмајаҹаглар» (1 Коринфлиләрә 6:9, 10). Бу ајә бирмә’налы сурәтдә ҝөстәрир ки, зина, јә’ни һәјат јолдашына хәјанәт Аллаһ гаршысында бөјүк ҝүнаһдыр. Мәсиһчиләр өзләрини ҝөзләмәлидирләр ки, Аллаһын гаршысында бу бөјүк ҝүнаһа батмасынлар. Әрлә арвада ‘никаһа һөрмәт етмәјә вә кәбин јатағыны ләкәсиз’ сахламаға нә көмәк едә биләр? (Ибраниләрә 13:4).
Һијләҝәр үрәкдән горун
4. Евли мәсиһчи өзүнүн дә хәбәри олмадан ешг маҹәрасына неҹә ҹәлб едилә биләр?
4 Бу ҝүн әхлаги ҹәһәтдән чүрүк дүнјада јашајанларын чохунун фикри-зикри әхлагсызлыгдадыр. ‘Онлар дурмадан, динҹәлмәдән ҝүнаһ ишләјирләр’ (2 Петер 2:14). Чохлары өзләринә аиләдән кәнарда мә’шуг ахтарырлар. Артыг мүәјјән вахтдыр ки, бә’зи өлкәләрдә гадынлар кишиләрлә чијин-чијинә ишләјир. Бу вәзијјәт ишдә ешг маҹәраларынын јаранмасы үчүн әлверишли шәраит јарадыр. Интернет сөһбәт отаглары, һәтта ән утанҹаглара белә һәддиндән артыг јахын мүнасибәт јаратмаға имкан верир. Евлиләрдән бир чохлары өзләринин дә хәбәри олмадан бу ҹүр тәләләрә дүшүрләр.
5, 6. Бир мәсиһчи гадын һансы тәһлүкәли вәзијјәтә дүшмүшдү вә онун һадисәсиндән биз нә өјрәнирик?
5 Ҝәлин Мери (ад дәјишдирилиб) адлы мәсиһчи гадынын һәјатындан бир һадисәјә диггәт јетирәк. Мери мәсиһчи олмајан әринин иш јолдашы илә аз гала әхлагсызлыг едәҹәкди. Әрини аиләси аз марагландырырды. Бир нечә ил әввәл Мери әринин иш јолдашы илә таныш олду. О адам чох нәзакәтли иди, һәтта Мүгәддәс Китаба да мараг ҝөстәрирди. Мери данышыр: «О чох јахшы адам иди. Әримлә онун арасында јерлә ҝөј гәдәр фәрг варды». Бир аздан онларда бир-биринә гаршы һиссләр ојанды. Мери дүшүнүрдү: «Мән ки, әримә хәјанәт етмирәм. О, Мүгәддәс Китабла марагланыр, бәлкә мән она көмәк етдим?»
6 Мәсәлә чох дәринләшмәмиш Мери өзүнә ҝәлди (Галатијалылара 5:19-21; Ефеслиләрә 4:19). Виҹданы ону нараһат етмәјә башлады вә о, бу мәсәләни јолуна гојмаг гәрарына ҝәлди. Меринин нүмунәси ҝөстәрир ки, «инсан үрәји һәр шејдән һијләҝәрдир, сағалмаз хәстәлији вар» (Јеремја 17:9). Мүгәддәс Китаб мәсләһәт ҝөрүр: «Һәр шејдән әввәл өз үрәјини гору, чүнки һәјат чешмәси одур» (Сүлејманын мәсәлләри 4:23). Үрәји неҹә горумаг олар?
‘Узагҝөрән шәрдән гачыр’
7. Аиләдә чәтинлији олан адама көмәк едәндә, Мүгәддәс Китабын һансы мәсләһәти бизи горујар?
7 Һәвари Павел јазырды: «Ким дүшүнүрсә ки, ајаг үстә дуруб, еһтијатлы олсун ки, јыхылмасын» (1 Коринфлиләрә 10:12). Сүлејманын мәсәлләри 22:3 ајәсиндә јазылыб: «Узагҝөрән габагҹадан шәри ҝөрүб ондан гачар». «Мәнә һеч нә олан дејил» дејиб вәзијјәтә е’тинасыз јанашма. Јахшы оларды ки, бунун ҝәләҹәкдә һансы проблемләрә ҝәтириб чыхараҹағы барәсиндә дүшүнәсән. Буна ҝөрә чалыш, әкс ҹинсдән олуб аиләдә чәтинликлә гаршылашан адамын үрәк сирдашына чеврилмә (Сүлејманын мәсәлләри 11:14). Гој о белә мәсәләләри, ән јахшысы һәјат јолдашы илә мүзакирә етсин. О, һәм дә никаһа һөрмәт едән вә ејни ҹинсдән олан јеткин мәсиһчи илә вә јахуд да ағсаггалларла даныша биләр (Титуса 2:3, 4). Ағсаггаллар белә мәсәләләрдә өзләри ҝөзәл нүмунәдирләр. Әҝәр ағсаггал мәсиһчи гадынла тәкбәтәк данышмалыдырса, буну һамынын ҝөзү габағында, Падшаһлыг Залында едир.
8. Иш јериндә нә үчүн еһтијатлы олмаг лазымдыр?
8 Иш јериндә јахын мүнасибәтләр үчүн шәраит јарадан вәзијјәтләрдән узаглаш. Мәсәлән, әкс ҹинсдән олан әмәкдашынла иш вахтындан сонра бир јердә ишләмәк тәһлүкәли ола биләр. Мәсиһчи киши вә гадын данышығы, давранышы илә ҝөстәрмәлидир ки, белә мүнасибәтләрә баш гошмаг фикриндә дејил. Аллаһ јолунда јеријән гадын ҝејими вә макијажы илә өзүнә диггәти ҹәлб етмәјәҹәк, киши иш јолдашларына наз етмәјәҹәк. Ејни шеј кишиләрә дә аиддир (1 Тимотејә 4:8; 6:11; 1 Петер 3:3, 4). Һәјат јолдашы вә ушагларынын шәкилләрини ҝөз габағында гојсан, аиләнин сәнин үчүн һәр шејдән үстүн олдуғуну һәм башгалары биләр, һәм дә өзүн унутмазсан. Киминсә сәнә сөз атмасына, сәнинлә ешгбазлыг етмәсинә гәтијјән јол вермә (Әјјуб 31:1).
‘Өмрүнүн бүтүн ҝүнләрини севдијин арвадынла кечир’
9. Јени ешг маҹәрасынын јаранмасына нә сәбәб олур?
9 Үрәји горумаг дејәндә јалныз тәһлүкәли вәзијјәтләрдән гачмаг нәзәрдә тутулмур. Никаһдан кәнар кимәсә марағын олмасы әрлә арвадын бир-биринин тәләбатларыны нәзәрә алмадыгларыны ҝөстәрир. Ола биләр, әр арвадына чох аз диггәт јетирир вә ја гадын даима әриндән шикајәтләнир. Бирдән она елә ҝәлир ки, иш јериндән ја да јығынҹагдан таныдығы бир адамда һәјат јолдашында чатышмајан ҹәһәтләрин һамысы вар. Бир аздан араларында бағлылыг јараныр. Онлар һисс едирләр ки, јени ешг ағылларыны башларындан алыр. Һадисәләрин бу ҹүр ҹәрәјан етмәси Мүгәддәс Китаб ајәсинин һәгигилијини тәсдигләјир: «Һәр кәс өз еһтирасы илә апарылараг вә алданараг имтаһан олунур» (Јагуб 1:14).
10. Әрлә арвад өз мүнасибәтләрини неҹә мөһкәмләдә биләрләр?
10 Әрләр вә арвадлар севҝини, достлуғу, чәтин анда дајағы никаһдан кәнарда ахтармагданса, мүнасибәтләрини мөһкәмләндирмәли, араларындакы севҝини алышдырмаға чалышмалыдырлар. Мүтләг бир-биринизә вахт ајырын, диггәт ҝөстәрин. Вахтилә бир-биринизи нәјә ҝөрә севдијиниз барәсиндә дүшүнүн. Нишанлы вахтларынызда кечирдијиниз һиссләри јенидән јашајын. Бирҝә кечирдијиниз хошбәхт анлары хатырлајын. Вәзијјәтиниз барәдә Аллаһа дуа един. Мәзмурчу Давуд Аллаһа јалварырды: «Еј Аллаһ, мәндә тәмиз үрәк јарат, дахилимә јенидән сәдагәт руһуну вер» (Мәзмур 51:10). Аллаһын Сүлејманын васитәсилә вердији мәсләһәтинә әмәл един: ‘Сәма алтында Аллаһын сәнә вердији өмрүнүн бүтүн ҝүнләрини севдијин гадынла [«арвадынла», КМ] кечир’ (Ваиз 9:9).
11. Никаһ телләрини бәркитмәкдә билик, һикмәт вә дәрракә нә дәрәҹәдә ваҹибдир?
11 Никаһ телләринин мөһкәмләнмәсиндә билик, һикмәт вә дәрракәнин ролу данылмаздыр. Сүлејманын мәсәлләри 24:3, 4 ајәләриндә јазылыб: «Һикмәтлә ев тикиләр, дәрракә илә мөһкәмләнәр. Мәнзилләр билик васитәсилә, һәр ҹүр дәјәрли, јахшы шејләрлә долар». Хошбәхт еви мәһәббәт, сәдагәт, Аллаһ горхусу, иман кими ‘дәјәрли, јахшы шејләр’ долдурар. Бу ‘дәјәрли, јахшы шејләрә’ саһиб олмаг үчүн илк нөвбәдә Аллаһ һаггында билик лазымдыр. Демәли, әрлә арвад Мүгәддәс Китабы јахшыҹа өјрәнмәлидирләр. Бәс һикмәт вә дәрракә барәсиндә нә демәк олар? Ҝүндәлик чәтинликләрин өһдәсиндән ҝәлмәк үчүн инсана һикмәт, јә’ни Мүгәддәс Китабдан алынан билији һәјатда тәтбиг етмәк баҹарығы лазымдыр. Дәрракәли инсан өз һәјат јолдашынын һисс вә дүшүнҹәләрини баша дүшүр (Сүлејманын мәсәлләри 20:5). Јеһова Аллаһ Сүлејманын дили илә дејир: «Оғлум, мәним һикмәтимә диггәт јетир, гулағыны мүдрик сөзләримә тәрәф чевир» (Сүлејманын мәсәлләри 5:1).
Аиләлиләр һәјатда әзијјәтлә растлашанда нә етмәлидирләр?
12. Аиләдә чәтинликләрин олмасына нәјә ҝөрә тәәҹҹүбләнмәк лазым дејил?
12 Идеал аилә јохдур. Мүгәддәс Китабда хәбәрдарлыг едилир ки, аиләлиләрин «һәјатда әзијјәти олаҹаг» (1 Коринфлиләрә 7:28). Һәјәҹан, хәстәликләр, мүгавимәт вә башга шејләр аиләдә ҝәрҝин мүнасибәтләрә сәбәб ола биләр. Белә чәтинликләрлә гаршылашан әрлә арвад бир-биринә сәдагәтли олмалы вә проблеми һәлл етмәјә чалышмалыдырлар. Бунунла онлар Јеһова Аллаһы разы саларлар.
13. Әрлә арвад өзләринә һансы суалы вермәлидирләр?
13 Бәс әҝәр аиләдәки чәтинлијә сәбәб әрлә арвадын бир-бири илә рәфтарыдырса, онда нә етмәли? Проблеми һәлл етмәк үчүн һәр ики тәрәф бир гәдәр гүввә сәрф етмәлидир. Туталым, аиләдә әр вә ја арвад кобуд данышмаға алышыб (Сүлејманын мәсәлләри 12:18). Кечән мәгаләдә гејд едилдији кими, кобуд данышығын ағыр нәтиҹәләри олур. Мүгәддәс Китабдакы мәсәлләрдән бириндә дејилир: «Давакар, дејинҝән арвадла јашамагданса чөллүкдә јашамаг јахшыдыр» (Сүлејманын мәсәлләри 21:19). Әҝәр сәнин дә аиләндә вәзијјәт беләдирсә, өзүндән соруш: «Бәлкә елә бу пис хасијјәтимә ҝөрә әрим чох вахт мәнимлә вахт кечирмәк истәмир?» Мүгәддәс Китаб әрләрә әмр едир: «Өз арвадларынызы севин вә онларла сәрт давранмајын» (Колослулара 3:19). Сән әр, өзүндән соруш: «Сојуглуғум арвадымы кәнарда тәскинлик ахтармаға мәҹбур едирми?» Сөзсүз, әхлагсызлыға бәраәт газандырмаг олмаз. Амма белә фаҹиә кимин истәјирсән башына ҝәлә биләр. Она ҝөрә дә отуруб ачыг данышмаг вә чәтинлијин һәллини тапмаг лазымдыр.
14, 15. Проблемләрин һәллини никаһдан кәнарда ахтармаг нә үчүн чыхыш јолу дејил?
14 Никаһдан кәнарда тәскинлик ахтармагла промлемләр һәлл олунмур. Белә аддым нәјә ҝәтириб чыхарыр? Јени вә хошбәхт никаһамы? Ола биләр, кимсә бу ҹүр фикирләшир вә һәтта дејир: «Бу адамда јахшы әрә вә ја арвада хас ҹәһәтләрин һамысы вар». Бу ҹүр фикирләшәнләр јанылырлар, чүнки һәјат јолдашыны атан вә јахуд да сәни өз һәјат јолдашыны атмаға сөвг едән адам никаһын мүгәддәслијинә зәррә гәдәр дә олсун һөрмәт бәсләмир. Она ҝөрә дә «башгасы илә аилә гурсам, хош ҝүнә чыхаҹағам» фикирләшмәк дүзҝүн дејил.
15 Јухарыда ады чәкилән Мери дә һәрәкәтинин нәтиҹәләри һаггында дәриндән фикирләшмәјә башлады. О дәрк едирди ки, бу һәрәкәтинә ҝөрә һәм өзү, һәм дә башгасы Аллаһын лүтфүндән мәһрум ола биләр (Галатијалылара 6:7). Мери данышыр: «Әримин иш јолдашына дујдуғум һиссләр барәдә дүшүнмәјә башладым вә бир шеји баша дүшдүм: бу адамын һәгигәтә ҝәлмәјинә мане олан елә мән өзүм идим. Мәним һәрәкәтим һәм әримә, һәм дә о адама пис тә’сир едәр, башгаларыны бүдрәдә биләрди!» (2 Коринфлиләрә 6:3).
Ән мүһүм сәбәб
16. Әхлагсызлыг нәјә ҝәтириб чыхарыр?
16 Мүгәддәс Китаб хәбәрдарлыг едир: «Әхлагсыз гадынын додағындан санки бал ахыр, дили ширин, јағдан јумшагдыр. Амма агибәти јовшан кими аҹыдыр, икиағызлы гылынҹ кими кәскиндир» (Сүлејманын мәсәлләри 5:3, 4). Әхлагсызлығын нәтиҹәси ағыр вә һәтта өлүм дә ола биләр. Мәсәлән, адам ҹинси јолла өтүрүлән хәстәлијә јолуха биләр, виҹдан әзабы чәкәр, ҝүнаһсыз һәјат јолдашына бөјүк зәрбә ендирәр. Бүтүн бунлар пис јола дүшмәмәк үчүн ҹидди сәбәбдир.
17. Һәјат јолдашына сәдагәтли галмағын ән мүһүм сәбәби нәдир?
17 Хәјанәтин ҝүнаһ сајылмасынын әсас сәбәби одур ки, никаһын Баниси вә киши илә гадына ҹинси габилијјәт верән Јеһова Аллаһ буну гадаған едир. Пејғәмбәри Малаки васитәсилә О дејир: «Мән ҹәза вермәк үчүн сизә јахынлашаҹағам... зинакарлара... гаршы тезликлә шаһид олаҹағам» (Малаки 3:5). Сүлејманын мәсәлләри 5:21 ајәсиндә Јеһованын һәр шеји ҝөрдүјү јазылыб: «Инсанларын јоллары Рәббин ҝөзү гаршысындадыр, онларын һәр аддымларыны јохлајыр». Бәли, «Онун ҝөзләри өнүндә һәр шеј чылпаг вә ачыгдыр. Она һесабат верәҹәјик» (Ибраниләрә 4:13). Хәјанәт өрт-бастыр едилсә дә, онун физики нәтиҹәләри ҹүз’и олса да, әтрафдакыларын мүнасибәтинә аз тә’сир ҝөстәрсә дә, јадда сахламаг лазымдыр ки, ҹинси әхлагсызлығын һәр бир нөвү Јеһова илә мүнасибәтләри корлајыр. Мәһз бу, һәјат јолдашына сәдагәтли галмағын ән мүһүм сәбәбидир!
18, 19. Јусифлә Потифарын арвадынын һадисәси бизә нә өјрәдир?
18 Јагубун оғлу Јусифин нүмунәси ҝөстәрир ки, Аллаһла јахшы мүнасибәтләри горумаг истәји әхлагсызлыға гаршы ҝүҹлү сипәрдир. Фир’онун ә’јанларындан Потифар адлы бириси Јусифи бәјәниб өз евиндә јүксәк вәзифәјә гојмушду. Јусиф «ҝөзәл вә јарашыглы» олдуғундан Потифарын арвадынын она ҝөзү дүшдү. Елә ҝүн олмурду ки, о Јусифи јолдан чыхартмаг истәмәсин. Амма бир шеј чыхмырды. Сәнҹә, гадынын әхлагсыз тәклифләрини рәдд етмәјә Јусифә нә көмәк едирди? Мүгәддәс Китаб ҹаваб верир: «Јусиф бундан имтина едиб ағасынын арвадына деди: “Ағам... сәндән башга һеч бир шеји мәндән әсирҝәмәди, чүнки сән онун арвадысан. Бәс мән неҹә бу бөјүк пислији едиб Аллаһын өнүндә ҝүнаһа бата биләрәм?”» (Јарадылыш 39:1-12).
19 Субај оғлан олан Јусиф өзҝә арвады илә јахынлыг етмәкдән имтина едиб әхлаги тәмизлијини горуду. Сүлејманын мәсәлләри 5:15 ајәсиндә евли кишиләрә дејилир: «Өз су анбарындан, өз гујунун ичмәли сујундан ич». Һәјат јолдашындан башга кимәсә өтәри мараг белә ҝөстәрмәкдән чәкин. Һәјат јолдашынла араныздакы мәһәббәт телләрини бәркитмәк үчүн вар ҝүҹүнлә чалыш вә гаршына һансы чәтинликләр чыхырса-чыхсын, онлары һәлл етмәкдән өтрү вахтыны вә ҝүҹүнү әсирҝәмә. «Ҝәнҹ икән евләндијин арвадынла хошбәхт јаша!» (Сүлејманын мәсәлләри 5:18).
Сиз нә өјрәндиниз?
• Мәсиһчи өзүнүн дә хәбәри олмадан ешг маҹәрасына неҹә ҹәлб едилә биләр?
• Никаһдан кәнар маҹәралара башламамаға мәсиһчијә нә көмәк едә биләр?
• Чәтинликлә үзләшән әрлә арвад нә етмәлидирләр?
• Һәјат јолдашына сәдагәтли галмағын ән мүһүм сәбәби нәдир?
[18-ҹи сәһифәдәки шәкил]
Иш јери ешг маҹәраларынын јаранмасы үчүн әлверишли јердир.