Охуҹуларын суаллары
Һәвва илә данышан иланын ајаглары вар идими?
Јарадылыш 3:14 ајәсинә әсасән, Јеһова Аллаһ Еден бағында Һәвваны алдадан илана мүраҹиәт етмишди. Аллаһ демишди: «Сән буну етдијин үчүн бүтүн ев һејванлары вә чөл һејванлары арасында лә’нәт газанырсан. Гарнын үстүндә сүрүнәҹәксән, бүтүн өмрүн боју торпаг јејәҹәксән». Мүгәддәс Китабда конкрет олараг дејилмир ки, Һәвваны јолдан чыхартмаг үчүн истифадә олунан һејванын әввәлҹә ајаглары вар иди, сонра исә онлары итирди. Јарадылыш 3:14 ајәсинин јазы үслубу бә’зиләриндә белә фикир јаратса да, лә’нәтләнмәздән әввәл иланларын ајаглары олдуғу гәнаәтинә ҝәлмәјә әсас јохдур. Нә үчүн?
Әсас сәбәб одур ки, әслиндә Јеһова ади һејвандан пис нијјәтлә истифадә едән руһани варлыг — Шејтан һаггында һөкм чыхармышды. Мүгәддәс Китабда Шејтан ‘јаланын атасы’ вә ‘көһнә илан’ адланыр. Чох ҝүман ки, бу ифадәләрин һәр икиси Һәвваны Аллаһын әмриндән чыхмаға сөвг етмәк үчүн Шејтанын һәгиги иланын ағзы илә данышмасына ишарә едир (Јәһја 8:44; Вәһј 20:2).
Иланлары Аллаһ јарадыб. Ҝөрүнүр, Шејтанын һијләсиндән габаг Адәм онлара да ад вермишди. Һәвва илә данышан шүурсуз һејваны ҝүнаһландырмаг олмазды. Илан нә Шејтанын ондан истифадә етдијини, нә дә Аллаһын үсјанкарлара чыхардығы һөкмләри баша дүшүрдү.
Бәс онда нә үчүн Аллаһ иланын алчалдылмасы һаггында данышырды. Иланын тәбии мүһитдә һәрәкәтләри, гарнынын үстүндә сүрүнмәси, санки торпағы јалајырмыш кими дилини бајыра чыхармасы Шејтанын алчалдылмыш вәзијјәтини чох мүнасиб шәкилдә тәмсил едир. Әввәлләр Аллаһын мәләкләри сырасында олмаг кими јүксәк мөвгејә малик олан Шејтан алчалдылараг руһани гаранлыға мәһкум едилди (2 Петер 2:4).
Бундан башга, неҹә ки илан инсанын дабаныны чала биләр, еләҹә дә Шејтан алчалдылмыш вәзијјәтиндә Аллаһын ‘Зүрријјәтини’ дабанындан санҹаҹагды (Јарадылыш 3:15, КМ). Һәмин Зүрријјәтин әсас һиссәси Шејтанын тәрәфдарларынын әлиндән мүвәггәти олараг әзијјәт чәкән Иса Мәсиһ олду. Анҹаг Мәсиһ вә дирилмиш мәсһ олунмушлар символик иланын башыны әввәл-ахыр һәмишәлик әзәҹәкләр (Ромалылара 16:20). Беләликлә, Аллаһын һәгиги иланы лә’нәтләмәси ҝөзәҝөрүнмәз ‘көһнә иланын’ алчалдылмасыны вә мәһв едилмәсини чох ҝөзәл тәмсил едир.