Һагсызлыға таб ҝәтирмәк мүмкүндүр!
ЕЛӘ инсан вармы ки, әдаләтсизликлә үзләшмәсин? Һәрдән бә’зи һәрәкәтләр садәҹә бизим ҝөзүмүздә һагсызлыг олдуғу һалда, чох вахт һагсызлыға доғрудан да јол верилир.
Һагсызлыгла үзләшәндә үрәјимиз ағрыјыр вә һәтта бу, Аллаһла мүнасибәтләримизин сојумасына ҝәтириб чыхара биләр. Биздә вәзијјәти дүзәлтмәк үчүн ҝүҹлү истәк јарана биләр. Чүнки ‘һеч заман һагсызлыг етмәјән’ Јараданымыз Јеһова Аллаһ инсанлары чох ҝүҹлү әдаләт һисси илә јарадыб (Ганунун тәкрары 32:4; Јарадылыш 1:26). Бунунла белә, бә’зән әдаләтсизлијә јол верилдијинин шаһиди олуруг. Бир дәфә мүдрик бир адам гејд етмишди: «Мән јенә сәма алтында едилән бүтүн зүлмләри ҝөрдүм: мәзлумларын ҝөз јашларыны ҝөрдүм, онлара тәсәлли верән јох иди, гүдрәт залымларын әлиндә иди, мәзлумлара тәсәлли верән јох иди» (Ваиз 4:1). Белә исә, һагсызлыға неҹә таб ҝәтирә биләрик?
Һагсызлыг нәдир?
Һагсызлыг әдаләт нормаларына зидд олан һәрәкәт вә ја һалдыр. Инсанлар үчүн әдаләт нормаларыны ким мүәјјән едир? Ајдындыр ки, әдаләтли вә дәјишмәз Јараданымызын нәјин әдаләтли, нәјин әдаләтсиз олдуғуну ҝөстәрән нормалары мүәјјән етмәјә һаггы вар. Онун нөгтеји-нәзәринҹә, ‘һәјатвериҹи гајдаларла’ јеримәк — «пислик», башга сөзлә десәк, әдаләтсизлик етмәмәк демәкдир (Језекел 33:15). Белә ки, Јеһова илк инсаны јараданда, она виҹдан, јә’ни дүзү сәһвдән ајырмаға көмәк едән дахили сәс верди (Ромалылара 2:14, 15). Бундан башга, Јеһова Өз Кәламы олан Мүгәддәс Китабда нәјин әдаләтли, нәјин әдаләтсиз олдуғуну ҝөстәриб.
Бәс әҝәр өзүмүзә гаршы һагсызлыг едилдијини дүшүнүрүксә, онда неҹә? Јахшы олар ки, һагсызлыға доғрудан да јол верилдијини ајырд етмәк үчүн мәсәләјә објектив бахаг. Мәсәлән, ҝөтүрәк јәһуди пејғәмбәри Јунусун дүшдүјү вәзијјәти. Јеһова ону ҝөндәрди ки, ҝедиб ниневалылара башларынын үстүнү фәлакәт алдығыны чатдырсын. Әввәлҹә Јунус тапшырығы јеринә јетирмәк истәмәјәрәк башыны ҝөтүрүб гачды. Анҹаг әввәл-ахыр Ниневаја ҝедиб, оранын сакинләрини Јеһованын онлара фәлакәт ҝөндәрәҹәјиндән хәбәрдар етмәли олду. Онлар төвбә етдикләри үчүн Јеһова гәрара ҝәлди ки, шәһәри мәһв етмәсин, сакинләрини дә сағ сахласын. Бу заман Јунус һансы һиссләри кечирди? «Бу иш Јунусун һеч хошуна ҝәлмәди вә о һирсләнди» (Јунус 4:1). Она елә ҝәлди ки, бу, Јеһова тәрәфиндән бөјүк әдаләтсизлик иди.
Сөзсүз ки, үрәкләри ҝөрән, ‘салеһлији вә әдаләти севән’ Јеһова сәһв гәрар вермәмишди (Мәзмур 33:5). Јунус садәҹә баша дүшмәли иди ки, Јеһованын чыхардығы гәрарлар Онун мүкәммәл әдаләти илә узлашыр. Бизә гаршы һагсызлыг едилдијини дүшүнәндә өзүмүздән соруша биләрик: «Бәлкә Јеһова мәсәләјә башга ҹүр бахыр?»
Һагсызлыгла үзләшәнләр
Мүгәддәс Китабда һагсызлыгла үзләшән бир чох инсанларын нүмунәләри вар. Онларын гаршылашдыглары чәтинликләрә неҹә таб ҝәтирдикләрини арашдырараг чох шеј өјрәнә биләрик. Мәсәлән, гардашлары пахыллыгдан Јусифи Мисирә көлә кими сатдылар. Мисирдә ағасынын арвады Јусифи јолдан чыхармаға чалышырды, анҹаг рәдд ҹавабы аланда Јусифә шәр атыб, ону әхлагсыз тәклифләр етмәкдә ҝүнаһландырды. Нәтиҹәдә Јусиф зиндана дүшдү. Анҹаг онун иманы әл-голуну бағлајан дәмир зәнҹирләрдән мөһкәм иди. О јол вермәди ки, әдаләтсизлик иманыны вә Јеһоваја е’тибарыны зәифләтсин (Јарадылыш 37:18-28; 39:4-20; Мәзмур 105:17-19).
Һагсызлыгла үзләшән башга бир адам Навот олмушдур. О, Исраил падшаһы Ахавын арвады Изевелин чиркин ојунунун гурбаны олду. Падшаһ Навота ирсән кечән торпаг саһәсини әлдә етмәк истәјирди. Исраиллиләрә мирас алдыглары мүлкү һәмишәлик сатмаг гадаған едилмишди, буна ҝөрә дә Навот падшаһын ону сатын алмаг тәклифини рәдд етди (Левилиләр 25:23). Белә олдугда Ахавын залым арвады јаланчы шаһидләр тутду ки, Навоту Аллаһы вә падшаһы лә’нәтләмәкдә иттиһам етсинләр. Нәтиҹәдә, Навот вә оғуллары өлдүрүлдү. Тәсәввүр един, ҹамаат ону өлдүрмәк үчүн даш-галаг едәндә Навот һансы һиссләри кечирирди! (1 Падшаһлар 21:1-14; 2 Падшаһлар 9:26).
Анҹаг Иса Мәсиһә гаршы едилән һагсызлыгла мүгајисәдә бүтүн бунлар ҹүз’и ҝөрүнүр. Гејри-гануни гурулмуш мәһкәмәдә јалан ифадәләр әсасында она өлүм һөкмү чыхарылды. Һаким күрсүсүндә отуран Рома валисинин өз ҝөзү илә ҝөрдүјү дүзҝүнлүјү мүдафиә етмәјә ҹәсарәти чатмады (Јәһја 18:38-40). Бәли, Шејтан Иса Мәсиһә һәлә һеч кимә гаршы едилмәмиш һагсызлығы етди!
Бу нүмунәләр Јеһованын әдаләтсизлијә лагејд олдуғунуму ҝөстәрир? Әсла! Јеһова бу һадисәләрә инсан нөгтеји-нәзәриндән бахмыр (Јешаја 55:8, 9). Јусиф көләлијә сатылдығы үчүн аҹлыг башлајанда аиләсини хилас едә билди. О заман о, Мисирдә гида еһтијатынын пајланмасына рәһбәрлик етмәк үчүн тә’јин едилмишди. Әҝәр Јеһова әдаләтсизлијә јол вермәсәјди, Јусиф зиндана дүшмәзди. О, мәһз орада ики мәһбусун јухусуну јозду. Сонралар онлардан бири Јусиф һаггында фир’она данышды, бунун сајәсиндә дә Јусиф һәмин вәзифәјә тә’јин едилди (Јарадылыш 40:1; 41:9-14; 45:4-8).
Бәс Навот һагда нә демәк олар? Јенә дә мәсәләјә Јеһованын ҝөзү илә бахмаға чалыш. Навот өлсә дә, о, өлүләри дирилтмәјә гадир олан Јеһова үчүн дири иди (1 Падшаһлар 21:19; Лука 20:37, 38). Навот Јеһованын ону јенидән дирилдәҹәји вахта гәдәр ҝөзләмәлидир, анҹаг өлүләр һеч нә билмәдикләри үчүн һәмин мүддәт бир ан кими кечәҹәк (Ваиз 9:5). Бундан башга, Јеһова Ахавы вә онун аилә үзвләрини ҹәзаландырараг Навотун интигамыны алды (2 Падшаһлар 9:21, 24, 26, 35, 36; 10:1-11; Јәһја 5:28, 29).
Инди Иса һаггында дүшүнәк. О өлсә дә, Аллаһ ону дирилтди вә ‘һәр һөкмдарлыг, сәлаһијјәт, гүдрәт, һакимијјәт вә аддан чох јүксәлтди’ (Ефеслиләрә 1:20, 21). Шејтанын Иса Мәсиһә гаршы төрәтдији әдаләтсизлик Јеһованын Өз Оғлуну мүкафатландырмасына мане олмады. Иса әмин иди ки, әҝәр ирадәсинә ујғун оларса, Јеһова ону дирилдәрәк едилән һагсызлығы арадан галдыра биләр. Бунунла белә, Мәсиһ һәм дә билирди ки, Мүгәддәс Јазылардакы пејғәмбәрликләрин јеринә јетмәси вә һагсызлыға сон гојмасы үчүн Јеһованын Өзүнүн вахты вар.
Шејтан вә онун тәрәфдарлары салеһ инсанлара гаршы әдаләтсизлик төрәтсәләр дә, Јеһова әввәл-ахыр ишләри јолуна гојмуш, һагсызлығы һәмишәлик арадан галдырмыш, ја да ҝәләҹәкдә галдыраҹагдыр. Беләликлә, һагсызлыға сон гојулмасы үчүн биз Аллаһы ҝөзләмәлијик (Ганунун тәкрары 25:16; Ромалылара 12:17-19).
Јеһова һагсызлыға нә үчүн јол верир?
Бә’зән Јеһова мүәјјән сәбәбләр үзүндән һансыса вәзијјәти дүзәлтмәјә биләр. Бир мәсиһчи кими формалашмағымыз үчүн О бизим һагсызлыгла үзләшмәјимизә јол верә биләр. Әлбәттә, Аллаһ писликлә «һеч кими имтаһан етмир» (Јагуб 1:13). Бунунла белә, О, арзуедилмәз вәзијјәтин давам етмәсинә јол верә биләр, ејни заманда белә тә’лимә һај верәнләрә дајаг олар. Мүгәддәс Китаб бизи әмин едир: «Аллаһ Өзү сиз гыса бир мүддәт әзаб чәкдикдән сонра, сизи мүкәммәлләшдирәҹәк, мөһкәмләдәҹәк, гүввәтләндирәҹәк вә сарсылмаз едәҹәкдир» (1 Петер 5:10).
Бундан башга, Јеһованын әдаләтсизлијә сәбир етмәси һагсызлыг едәнләрә төвбә етмәк үчүн вахт верир. Исанын е’дам олунмасындан ҹәми бир нечә һәфтә сонра Петерин нәсиһәтини динләјән бә’зи јәһудиләрин «үрәкләринә елә бил ох батды». Онлар Аллаһын кәламыны үрәкдән гәбул етдиләр вә вәфтиз олдулар (Һәвариләрин ишләри 2:36-42).
Әлбәттә, әдаләтсизлик едәнләрин һамысы төвбә етмәјәҹәк. Бә’зиләри даһа да гәддарлашыб, даһа дәһшәтли һагсызлыглар едәҹәкләр. Бунунла белә, Сүлејманын мәсәлләри 29:1 ајәсиндә дејилир: «Мәзәммәтләрә бахмајыб дикбашлыг едән бирдән јыхылыб чарәсиз галар». Јеһова әввәл-ахыр һәрәкәтә кечәҹәк вә инадла пислик едәнләри мәһв едәҹәк (Ваиз 8:11-13).
Бизә гаршы едилән һагсызлыгдан өзүмүзә ҝәлмәк үчүн нә гәдәр вахт тәләб олунурса-олунсун, әмин ола биләрик ки, Јеһова бизә неҹә көмәк едәҹәјини јахшы билир. Бу пис системдә бизә гаршы едилән һагсызлығы мүтләг арадан галдыраҹаг. Бундан башга, О бизә сон мүкафаты, ‘салеһлијин өмүр сүрдүјү’ јени дүнјада әбәди һәјаты да вә’д етмишдир (2 Петер 3:13).
[17-ҹи сәһифәдәки шәкил]
Навот бөјүк һагсызлыгла үзләшәндә һансы һиссләри кечирирди?