Аллаһын ирадәсинә ујғун јашајын

‘Мәсиһ һамы үчүн өлдү ки, јашајанлар артыг өзләри үчүн јашамасынлар’ (2 КОРИНФЛИЛӘРӘ 5:15).

1. Бир миссионерин хидмәтиндә баш верән һадисәни данышын.

«ВӘТӘНДАШ мүһарибәси битдикдән сонра бизим машын Африканын уҹгар кәндинә ҝәлән илк мүлки машын иди», — дејә Аарон адлы миссионер хатырлајырa. «Бурадакы кичик јығынҹаг илә әлагә кәсилдијиндән, биз онларын гајғысына галмалы идик. Әрзаг, ҝејим вә Мүгәддәс Китаба әсасланан әдәбијјатдан әлавә өзүмүзлә “Јеһованын Шаһидләри. Адына лајиг тәшкилат” (рус.) видеофилмини ҝәтирмишдикb. Кассетә бахмаға кәнд “театрына” — ичиндә видеомагнитафон вә телевизор олан бөјүк комаја — о гәдәр марагланан јығылмышды ки, филми ики дәфә ҝөстәрмәли олдуг. Һәр нүмајишдән сонра чохлу Мүгәддәс Китаб өјрәнмәләри башладыг. Нәтиҹәләр ҝөстәрди ки, зәһмәтимизә дәјәрди».

2. а) Нә үчүн мәсиһчиләр һәјатларыны Аллаһа хидмәтә сәрф етмәјә гәрарлыдырлар? б) Инди һансы суаллары арашдыраҹағыг?

² Аарон вә онун әмәкдашлары нә үчүн үзәрләринә бу ҹүр чәтин иши ҝөтүрмүшдүләр? Чүнки онлар Иса Мәсиһин фидијә гурбанлығына миннәтдарлыгдан ирәли ҝәләрәк, һәјатларыны Аллаһа һәср етмишләр вә Онун ирадәсинә ујғун һәјат сүрмәк истәјирләр. Онлар кими бүтүн садиг мәсиһчиләр «өзләри үчүн» јашамамаға, «Мүждә үчүн» әлләриндән ҝәлән һәр шеји етмәјә гәти гәрарлыдырлар (2 Коринфлиләрә 5:15; 1 Коринфлиләрә 9:23). Онлар билирләр ки, бу дүнјанын сону ҝәләндә нә пулун дәјәри олаҹаг, нә дә јүксәк мөвгејин. Беләликлә, онлар һәјат вә сағламлыгларыны Аллаһын ирадәсини јеринә јетирмәјә сәрф етмәк истәјирләр (Ваиз 12:1). Бәс биз буну неҹә едә биләрик? Бунун үчүн ҹәсарәт вә мөһкәмлији һарадан тапа биләрик? Хидмәтдә гаршымызда һансы имканлар ачылыр?

Ирәлијә аддымлар атын

3. Аллаһын ирадәсини јеринә јетирмәјә һансы әсас аддымлар дахилдир?

³ Аллаһын ирадәсини јеринә јетирмәк һәгиги мәсиһчиләр үчүн өмүрлүк өһдәчиликдир. Бу, адәтән бир нечә әсас аддымдан: Мүгәддәс Китабы ҝүндәлик охумагдан, «Теократик Хидмәт Мәктәби»нә јазылмагдан, тәблиғ ишиндә иштирак етмәкдән вә вәфтизә доғру аддымлар атмагдан башлајыр. Руһани ҹәһәтдән инкишаф етдикҹә һәвари Павелин сөзләрини јадымызда сахлајырыг: «Бу ишләрә фикир вер вә онларла мәшғул ол ки, сәнин тәрәггин һамыја ашкар олсун» (1 Тимотејә 4:15). Бу ирәлиләјишләр өзүмүзү иззәтләндирмәк истәјимизи дејил, Аллаһын ирадәсини тәмәннасыз јеринә јетирмәк гәтијјәтимизи ҝөстәрир. Бу јолла ҝетмәклә биз ҝөстәририк ки, һәјатын бүтүн мәсәләләриндә Аллаһын аддымларымызы јөнәлтмәсинә имкан веририк, О исә буну биздән гат-гат јахшы едир (Мәзмур 32:8).

4. Әсассыз горхулары неҹә кәнара ата биләрик?

⁴ Анҹаг тәрәддүд етмәк вә ја һәддән артыг өзүмүзү дүшүнмәк Аллаһа хидмәтдә ирәлиләмәјимизә мане олаҹаг (Ваиз 11:4). Беләликлә, Аллаһа вә инсанлара хидмәт етмәкдән севинҹ тапмаг үчүн әввәлҹә өзүмүздә олан горхуну арадан галдырмалыјыг. Мәсәлән, Ерик әҹнәби дилли јығынҹагда хидмәт етмәк барәдә фикирләширди. Анҹаг ону бу суаллар нараһат едирди: «Ҝөрәсән мән о јығынҹаға өјрәшә биләҹәјәм? Гардашлар хошума ҝәләҹәкләр? Бәс мән онларын?» О данышыр: «Ахырда баша дүшдүм ки, өзүмдән даһа чох гардашлар һаггында дүшүнмәлијәм. Нараһатчылығы кәнара атыб фикрими едә биләҹәјим ишләрә јөнәлтмәк гәрарына ҝәлдим. Көмәк үчүн дуа етдим вә буна ујғун даврандым. Инди бурадакы хидмәтимдән сонсуз дәрәҹәдә севинҹ дујурам» (Ромалылара 4:20). Бәли, Аллаһа вә инсанлара тәмәннасыз олараг нә гәдәр чох хидмәт едәҹәјиксә, о гәдәр дә севинҹ вә мәмнунлуг тапаҹағыг.

5. Аллаһын ирадәсинә ујғун јашамаг үчүн нәјә ҝөрә ишләримизи диггәтлә планлашдырмалыјыг? Нүмунә ҝәтирин.

⁵ Аллаһын ирадәсинә ујғун јашамаг үчүн ишләримизи планлашдыранда да диггәтли олмалыјыг. Биз борҹа ҝирмирик ки, нә бу дүнјанын гулу олаг, нә дә Аллаһын ишиндә азадлығымыз мәһдудлашсын. Мүгәддәс Китаб бизә хатырладыр: «Борҹлу адам борҹ верәнә гул олар» (Сүлејманын мәсәлләри 22:7). Јеһоваја е’тибар етмәк вә хидмәти биринҹи јерә гојмаг ваҹиб шејләри нәзәрдән гачырмамағымыза көмәк едир. Мәсәлән, Гвомингин ики баҹысы вә анасы илә јашадығы јердә евләрин гијмәти баһа, даими иш тапмаг исә чәтиндир. Онлар пулу гәнаәтлә хәрҹләјир вә мәсрәфләри өз араларында бөлүшдүрүрләр. Буна ҝөрә дә онлардан кимсә ишләмәјәндә белә лазым олан һәр шејләри олур. «Һәрдән евә һамы пул ҝәтирә билмир», — Гвоминг дејир. «Буна бахмајараг биз пионер хидмәтини давам етдирир вә анамыза јахшы бахырыг. Анамыза миннәтдарыг ки, о руһани ишләримизи гурбан верәрәк ону һәр шејлә тә’мин етмәјимизи тәләб етмир» (2 Коринфлиләрә 12:14; Ибраниләрә 13:5).

6. Һәјатымызы Аллаһын ирадәсинә ујғунлашдырмаг үчүн нә етмәли олдуғумузу бир нүмунә неҹә ҝөстәрир?

⁶ Әҝәр сәнин башын бүтүнлүклә дүнјәви ишләрә — мадди вә ја башга шејләрә — гарышыбса, Аллаһын ирадәсини биринҹи јерә гојмаг үчүн көклү дәјишикликләр етмәк лазым ҝәлә биләр. Адәтән белә дәјишикликләри дәрһал етмәк мүмкүн олмур вә илк вахтлар сәһвләрә јол вермәк һеч дә уғурсузлуғун әламәти дејил. Мәсәлән, Коихи вахтынын чохуну әјләнҹәләрә сәрф едирди. О, Мүгәддәс Китабын тә’лимләри илә јенијетмә икән таныш олмушду, анҹаг чох илләр әрзиндә видеоојунлара алудә олмушду. Бир ҝүн о өзү-өзүнә деди: «Сән нә едирсән? Артыг 30-у адламысан, анҹаг һәлә дә һәјатда бир ағыллы иш ҝөрмәмисән!» Коихи јенидән Мүгәддәс Китабы өјрәнмәјә башлады вә јығынҹағын көмәјини гәбул етди. Дәјишиклик тәдриҹән баш версә дә, тәслим олмады. Чохлу дуалар етмәјин вә башгаларынын көмәји сајәсиндә о, ахырда бу һәвәсиндән азад олду (Лука 11:9). Коихи инди севинҹлә хидмәти көмәкчи кими хидмәт едир.

Таразлы олмағы өјрәнин

7. Аллаһын ишини јеринә јетирәркән нә үчүн таразлы олмалыјыг?

⁷ Аллаһын ирадәсинә ујғун јашамаг үчүн үрәкдән сә’ј ҝөстәрмәлијик. Бу ишдә һеч вахт һәвәссиз вә ја тәнбәл олмамалыјыг (Ибраниләрә 6:11, 12). Буна бахмајараг, Јеһова истәмир ки, биз өзүмүзү физики, әгли вә ја емосионал ҹәһәтдән әлдән салаг. Аллаһын ишини өз ҝүҹүмүзлә ҝөрә билмәдијимизи тәвазөкарлыгла е’тираф етмәк Аллаһы иззәтләндирир вә бизим таразлы олдуғумузу ҝөстәрир (1 Петер 4:11). Јеһова Онун ирадәсини јеринә јетирмәк үчүн лазыми ҝүҹү верәҹәјини вә’д едир, анҹаг Аллаһын биздән ҝөзләмәдији, ҝүҹүмүздән артыг ишләри етмәјә чалышмамалыјыг (2 Коринфлиләрә 4:7). Өзүмүзү әлдән салмајараг Аллаһа хидмәти давам етдирмәк үчүн ҝүҹүмүзү ағылла сәрф етмәк лазымдыр.

8. Бир ҝәнҹ мәсиһчи һәм дүнја, һәм дә Аллаһ үчүн әлиндән ҝәләни етмәјә чалышанда нә баш верди вә о һансы дәјишиклији етди?

⁸ Мәсәлән, Шәрги Асијада јашајан Жи Һи ики ил ҝәрҝин ишдә ишләјә-ишләјә пионер кими хидмәт едирди. «Мән һәм Јеһова үчүн, һәм дә дүнја үчүн әлимдән ҝәләни етмәјә чалышырдым, анҹаг ҝеҹә ҹәми беш саат јатырдым. Ахырда руһани ишләр үчүн ҝүҹүм галмады вә хидмәтдән чох аз севинҹ дујурдум», — дејә о данышыр. Јеһоваја ‘бүтүн үрәји илә, бүтүн ҹаныјла, бүтүн дүшүнҹәсијлә вә бүтүн гүввәтилә’ хидмәт етмәк үчүн Жи Һи чох вахт вә ҝүҹ тәләб етмәјән иш ахтармаға башлады (Марк 12:30). О дејир: «Чох пул газанмағым үчүн аиләмин мәнә тәзјиг ҝөстәрмәсинә бахмајараг, Аллаһын ирадәсини биринҹи јерә гојдум. Инди дә газандығым пул лазымлы шејләрә, мәсәлән, јахшы ҝејинмәјә чатыр. Дојунҹа јатмаг исә елә јахшыдыр ки! Артыг хидмәтдән севинҹ дујурам, һәм дә руһани ҹәһәтдән әввәлкиндән даһа мөһкәмәм. Бу она ҝөрәдир ки, дүнјанын ҹәлбедиҹи вә алдадыҹы шејләринә аз вахтым галыр» (Ваиз 4:6; Матта 6:24, 28-30).

9. Ҝөрдүјүмүз ишләр тәблиғ етдијимиз инсанлара неҹә тә’сир ҝөстәрә биләр?

⁹ Һәр кәс Аллаһа таммүддәтли хидмәт едә билмир. Әҝәр сән гоҹалыгла, зәиф сәһһәтлә вә ја башга чәтинликләрлә мүбаризә апармалы олурсанса, јадда сахла ки, Јеһова сәнин сәдагәтини вә хидмәтдә Онун үчүн үрәкдән етдијин һәр шеји јүксәк гијмәтләндирир (Лука 21:2, 3). Буна ҝөрә һеч ким, һәтта аз да олса, чәкдији әмәјин башгаларына ҝөстәрә биләҹәји тә’сири гијмәтдән салмамалыдыр. Мәсәлән, тәсәввүр един ки, бир нечә гапыны дөјмүшүк, чатдырдығымыз хәбәр исә санки һеч кәси марагландырмајыб. Орадан ҝедәндән сонра, һәтта һеч ким гапы ачмаса белә, ев саһибләри ҝәлишимиз барәдә бәлкә дә саатларла вә ја ҝүнләрлә данышаҹаглар! Биз хош хәбәри ешидән һәр кәсин ону гәбул едәҹәјини ҝөзләмәсәк дә, бә’зиләри һај верәҹәк (Матта 13:19-23). Башгалары бәлкә дә сонралар дүнјада вә ја өз һәјатларында нә исә баш верәндә хош хәбәрә мараг ҝөстәрәҹәк. Һәр неҹә олурса олсун, хидмәтдә баҹардығымыз һәр шеји етмәклә Аллаһын ишини ҝөрүрүк. Биз «Аллаһын јанында әмәкдашларыг» (1 Коринфлиләрә 3:9).

10. Јығынҹагда һамынын гаршысында һансы имканлар дурур?

¹⁰ Бундан башга, һамымыз өз аилә үзвләримизә вә руһани баҹы-гардашларымыза көмәк едә биләрик (Галатијалылара 6:10). Бизим јахшы нүмунәмиз әтрафымыздакылара ҝүҹлү тә’сир ҝөстәрәрәк узун мүддәт онларын јадында гала биләр (Ваиз 11:1, 6). Ағсаггалларын вә хидмәти көмәкчиләрин өз ишләрини сә’јлә јеринә јетирмәси, јығынҹағын руһани сағламлығына вә сабитлијинә көмәк едир, тәблиғ иши исә инкишаф едир. Биз әминик ки, ‘Рәббин ишиндә тәрәгги едәндә’ әмәјимиз ‘әбәс’ олмур (1 Коринфлиләрә 15:58).

Гој Аллаһын ирадәсини јеринә јетирмәк һәјат јолунуз олсун

11. Мәсиһчиләрин гаршысында јерли јығынҹагла әмәкдашлыг етмәкдән башга һансы имканлар вар?

¹¹ Биз бир мәсиһчи кими һәјаты севир вә етдијимиз һәр ишдә Аллаһы иззәтләндирмәк истәјирик (1 Коринфлиләрә 10:31). Падшаһлыг мүждәсини сә’јлә тәблиғ едиб, Исанын әмр етдији һәр шејә әмәл етмәји инсанлара өјрәтсәк, гаршымызда Аллаһа хидмәт етмәк үчүн севинҹ ҝәтирән чохлу имканлар ачылаҹаг (Матта 24:14; 28:19, 20). Јерли јығынҹагла әмәкдашлыг етмәклә јанашы тәблиғчијә даһа чох еһтијаҹ олан башга әразиләрдә, өлкәләрдә вә ја дилләрдә хидмәт етмәк имканы вар. Тәләбләрә ҹаваб верән субај ағсаггал вә хидмәти көмәкчиләр Хидмәти Тәкмилләшдирмә Мәктәбинә дә’вәт ала биләр, сонра исә, истәр өз өлкәләриндә, истәрсә дә башга өлкәләрдә јеткин мәсиһчиләрин көмәјинә еһтијаҹ олан јығынҹагларда хидмәт етмәјә тә’јин олуна биләрләр. Таммүддәтли хидмәтдә олан әр-арвадлар Ҝилеад миссионер мәктәбиндә тә’лим ала вә хариҹи өлкәләрдә хидмәт етмәјә ҝөндәрилә биләрләр. Һәм дә Бет-Елдә мүхтәлиф ишләри јеринә јетирмәк, о ҹүмләдән, Падшаһлыг Залларынын вә филиалларын тикинтисиндә иштирак етмәк үчүн көнүллүләрә һәмишә еһтијаҹ вардыр.

12, 13. а) Һансы хидмәт нөвүнә ҹан атаҹағынызы неҹә мүәјјән едә биләрсиниз? б) Бир тә’јинатда әлдә едилән тәҹрүбәнин башгасында фајдалы олдуғуну нүмунә әсасында ҝөстәрин.

¹² Һансы хидмәт нөвүнә ҹан ата биләрсиниз? Јеһованын һәср олунмуш хидмәтчиси кими рәһбәрлик алмаг үчүн һәмишә Она вә Онун тәшкилатына үз тутун. Онун ‘хејирхаһ Руһу’ сизә дүзҝүн гәрар гәбул етмәјә көмәк едәҹәк (Неһемја 9:20). Бир тә’јинат башга тә’јината јол ача биләр вә бир хидмәт нөвүндә әлдә едилән тәҹрүбә вә баҹарыг сонралар башга тә’јинатда фајдалы ола биләр.

¹³ Мәсәлән, Денис һәјат јолдашы Ҹени илә бирликдә мүнтәзәм олараг Падшаһлыг Залларынын тикинтисиндә иштирак едир. Бирләшмиш Штатларын ҹәнубунда Катрина гасырғасы баш верәндән сонра онлар көнүллүләрин ҹәрҝәсиндә ора көмәк етмәјә ҝетдиләр. Денис дејир: «Падшаһлыг Залларынын тикинтисиндә әлдә етдијимиз баҹарығы гардашларымыза көмәк етмәк үчүн истифадә етмәк бизә бөјүк севинҹ ҝәтирди. Көмәк етдијимиз инсанларын миннәтдарлығы үрәјимизи риггәтә ҝәтирди. Көмәк етмәјә ҝәлән башга груплар тикинтидә о гәдәр дә мүвәффәгијјәт әлдә едә билмәдиләр. Јеһованын Шаһидләри исә 5 300-дән артыг еви вә чохлу Падшаһлыг Залларыны тә’мир етдиләр вә ја јенидән тикдиләр. Ҹамаат буну ҝөрүр, буна ҝөрә дә чатдырдығымыз хәбәрә инди даһа чох мараг ҝөстәрир».

14. Әҝәр таммүддәтли хидмәтә башламаг истәјирсинизсә нә едә биләрсиниз?

¹⁴ Таммүддәтли хидмәти өз һәјат јолунуз едәрәк Аллаһын ирадәсинә мүвафиг јашаја биләрсинизми? Әҝәр беләдирсә, сиз мүтләг чохлу хејир-дуалар алаҹагсыныз. Әҝәр таммүддәтли хидмәтә шәраитиниз јол вермирсә, ола билсин, һәјатынызда нәји исә дәјишдирә биләрсиниз. Неһемја кими сиз дә дуа един. О, ваҹиб тапшырығы јеринә јетирмәк истәјәндә дуа етмишди: «Ја Худавәнд... бу ҝүн гулунун ишини уғурлу ет» (Неһемја 1:11). ‘Дуалары ешидәнә’ е’тибар едәрәк хаһишинизә ујғун һәрәкәт един (Мәзмур 65:2). Даһа чох хидмәт етмәк үчүн әввәлҹә сә’ј ҝөстәрмәк лазымдыр ки, Јеһова хејир-дуа версин. Таммүддәтли хидмәтә башламаг гәрарына ҝәлдинизсә, гәрарыныза бағлы галын. Вахт кечдикҹә тәҹрүбәниз, ејни заманда севинҹиниз дә артаҹаг.

Һәгигәтән дә мә’налы һәјат

15. а) Аллаһа чохдан хидмәт едән мәсиһчиләрлә сөһбәтин вә онлар һаггында охумағын һансы фајдасы вар? б) Сизи хүсусилә кимин тәрҹүмеји-һалы руһландырмышдыр?

¹⁵ Аллаһын ирадәсинә ујғун јашамаг сизә һансы хејир-дуалары ҝәтирәҹәк? Јеһоваја чохдан хидмәт едән, хүсусилә таммүддәтли хидмәтә чох илләр һәср етмиш мәсиһчиләрлә сөһбәт един. Онларын һәјаты неҹә дә зәнҝин вә мә’налыдыр! (Сүлејманын мәсәлләри 10:22). Бу хидмәтчиләр Јеһованын онлардан јардым әлини һеч вахт әсирҝәмәдијини, һәтта ән чәтин анларда белә еһтијаҹ дујдуглары һәр шеји артыгламасы илә вердијини данышаҹаглар (Филипилиләрә 4:11-13). Сон онилликләр әрзиндә «Ҝөзәтчи Гүлләси»ндә јүзләрлә баҹы-гардашын һәјаты барәдә мәгаләләр чап олунмушдур. Онларын һәр бириндә «Һәвариләрин ишләри» китабында әкс олунан чалышганлыг вә севинҹ әкс олунур. Белә мараглы һекајәләри охујанда истәр-истәмәз дејәҹәксиниз: «Мән дә бу ҹүр јашамаг истәјирәм!»

16. Мәсиһчинин һәјатыны мә’налы вә хошбәхт едән нәдир?

¹⁶ Мәгаләнин әввәлиндә хатырланан Аарон дејир: «Мән Африкада тез-тез һәјатын мә’насынын сорағында өлкәни ҝәзиб долашан ҝәнҹләрә раст ҝәлирдим. Чохлары ону һеч вахт тапмады. Анҹаг биз исә орада Падшаһлыг Мүждәсини тәблиғ едәрәк Аллаһын ирадәсини јеринә јетирир вә долғун, мә’налы һәјат сүрүрдүк. Өз тәҹрүбәмиздән һисс етдик ки, вермәк алмагдан даһа бөјүк бәхтијарлыг ҝәтирир» (Һәвариләрин ишләри 20:35).

17. Нә үчүн инди Аллаһын ирадәсинә ујғун јашамалыјыг?

¹⁷ Бәс сизин һаггынызда нә демәк олар? Гаршыныза һансы мәгсәди гојмусунуз? Әҝәр конкрет руһани мәгсәдиниз јохдурса, онда һәмин бошлуғу башга мәшғулијјәтләр долдураҹаг. Нә үчүн дәјәрли һәјатынызы Шејтанын алдадыҹы дүнјасына бош-бошуна сәрф едәсиниз? Јахын ҝәләҹәкдә «бөјүк мәшәггәт» башлајанда вар-дөвләтин вә ҹәмијјәтдәки мөвгејин һеч бир дәјәри олмајаҹаг. Әһәмијјәтли олан тәкҹә Јеһова илә мүнасибәтимиз олаҹаг. О заман Аллаһа вә инсанлара хидмәт етдијимиз вә Аллаһын ирадәсини јеринә јетирдијимиз үчүн неҹә дә шад олаҹағыг! (Матта 24:21; Вәһј 7:14, 15).

[Һашијәләр]

Изаһ едә биләрсинизми?

• Јеһова хидмәтимизә неҹә јанашыр?

• Мәгсәдәујғун вә таразлы олмаг Аллаһа вә инсанлара хидмәт етмәјимизә неҹә көмәк едир?

• Хидмәт етмәк үчүн гаршымызда һансы имканлар вар?

• Инди мә’налы һәјат неҹә сүрә биләрик?

[26-ҹы сәһифәдәки шәкил]

Мүгәддәс хидмәтин мүхтәлиф нөвләри вар.