Ҝәнҹлик илләримин үмидсизлијинә чарә

Евсебијо Марсијо данышды

Мән 1993-ҹү илин сентјабр ајында ҹидди режимли һәбсханаја ҝетдим. Орада бир дустағы, кичик баҹым Маривини вәфтиз етмәли идим. Вәфтиз заманы бәзи дустаглар вә һәбсхана ишчиләри бизи һөрмәтлә мүшаһидә едирдиләр. Орада олмағымызын сәбәбини изаһ етмәздән әввәл, иҹазә верин, әввәлки һәјатымыз барәдә данышым.

МӘН 1954-ҹү илин мај ајынын 5-дә Испанијада дүнјаја ҝәлмишәм. Аиләмизин сәккиз өвладындан илки идим. Мариви исә евин үчүнҹү ушағы иди. Нәнәмиз бизи мөмин католик кими тәрбијә едирди. Ушаглығын хош хатирәләри һәлә дә јаддашымдан силинмәјиб. Нәнәмлә олан вахтларда өзүмү Аллаһа јахын һисс едирдим. Анҹаг валидејнләримин евиндәки аб-һава диндарлыгдан чох узаг иди. Атам һәмишә анамы вә бизи дөјүрдү. Һәјатымыз горху ичиндә кечирди, бир тәрәфдән дә анамын әзијјәт чәкдијини ҝөрмәк мәним үчүн чох ағыр иди.

Мәктәбә ҝедәндә мәјуслуғум даһа да артды. Мүәллимләрдән бири, кешиш, суала сәһв ҹаваб верәндә башымызы дивара вурурду. Башга бир кешиш шаҝирдләрлә ев тапшырыгларына бахаркән онлары зорламышды. Бундан әлавә, одлу ҹәһәннәм кими католик тәлимләри мәни чашдырыр вә горхудурду. Тезликлә мән Аллаһдан узаглашмаға башладым.

Мәнасыз һәјатын чәнҝиндә

Мәнә Аллаһын јолуну ҝөстәрән олмадығындан, вахтымы ҝеҹә клубларында әхлагсыз вә зоракы инсанларла кечирмәјә башладым. Орада тез-тез дава олур, бычаглар, зәнҹирләр, стәканлар вә стуллар ишә дүшүрдү. Адәтән бу давалара гарышмасам да, бир дәфә мәни елә вурмушдулар ки, һушуму итирмишдим.

Ахырда бу ҹүр мүһитдән безиб, сакит дискотекалар ахтармаға башладым. Һәтта белә јерләрдә дә наркотикләрдән истифадә етмәк ади һал иди. Анҹаг наркотикләрдән һәзз вә дахили раһатлыг тапмаг әвәзинә, мәни гара басыр вә тәшвиш бүрүјүрдү.

Бу ҹүр јашамаг хошума ҝәлмәсә дә, кичик гардашым Һосе Лүизи вә јахын достум Миҝели дә ејни һәјат тәрзинә сүрүкләмишдим. Һәмин вахт бир чох испан ҝәнҹләри кими, биз дә позғун дүнјанын тәләсинә дүшмүшдүк. Наркотик алмаға пул тапмаг үчүн, демәк олар ки, һәр шејә әл атырдым. Артыг бүтүн ләјагәтими итирмишдим.

Јеһова дадыма чатыр

Бу мүддәт әрзиндә достларымла бир нечә дәфә Аллаһын мөвҹудлуғу вә һәјатын мәнасы һаггында сөһбәт етмишдим. Мән үрәјими бошалтмаг үчүн Аллаһы ахтармаға башладым. Фикир вермишдим ки, иш јолдашым Франсиско башгаларындан фәргләнир. О, хошбәхт, хејирхаһ вә дүз адама охшајырды, буна ҝөрә үрәјими она ачмаг гәрарына ҝәлдим. Јеһованын Шаһиди олан Франсиско мәнә наркотикләрә аид мәгаләләри олан «Ҝөзәтчи Гүлләси» журналы верди.

Мәгаләләри охудугдан сонра, Аллаһа дуа едиб көмәк истәдим: «Аллаһым, билирәм ки, сән варсан. Сәни таныјыб ирадәни јеринә јетирмәк истәјирәм. Хаһиш едирәм, мәнә көмәк ет!» Франсиско, еләҹә дә башга Шаһидләр Мүгәддәс Китабын васитәсилә мәни руһландырыр вә Мүгәддәс Китаба әсасланан әдәбијјат верирдиләр. Анладым ки, Аллаһ дуама ҹаваб олараг онларын васитәсилә мәнә көмәк едир. Тезликлә өјрәндикләрими достларыма вә Һосе Лүизә данышмаға башладым.

Бир ҝүн достларымла рок консертиндән чыханда, араланыб кәнардан онлара тамаша етдим. Санки бирдән ҝөзләрим ачылды, наркотикләрин тәсири алтында һәрәкәтләримизин нә дәрәҹәдә ијрәнҹ олдуғуну ҝөрдүм. Һәмин ан белә һәјат тәрзиндән әл чәкиб Јеһованын Шаһиди олмаг гәрарына ҝәлдим.

Франсискодан Мүгәддәс Китаб истәдим, о да мәнә Мүгәддәс Китабла бирликдә «Әбәди һәјата апаран һәгигәт» китабыны вердиa. Аллаһын инсанларын ҝөзләриндән бүтүн јашлары силәҹәјини, һәтта өлүмү арадан галдыраҹағыны охујанда, инсанлары азадлыға чыхаран һәгигәти тапдығыма шүбһәм галмады (Јәһја 8:32; Вәһј 21:4). Сонралар Јеһованын Шаһидләринин Падшаһлыг Залында кечирилән ҝөрүшә ҝетдим. Орада ҝөрдүјүм меһрибанлыг вә сәмимијјәт мәнә чох ҝүҹлү тәсир бағышлады.

Падшаһлыг Залында ҝөрдүкләрими башгалары илә бөлүшмәји елә чох истәјирдим ки, дәрһал Һосе Лүизи вә достларымы бир јерә топлајыб һәр шеји онлара данышдым. Бир нечә ҝүндән сонра һамымыз јығынҹаг ҝөрүшүнә ҝетдик. Гаршыдакы сырада отуран бир гыз чеврилиб бизә өтәри бахды. Бир груп узунсачлы һиппини ҝөрәндә әмәлли-башлы горхду вә чалышды ки, бир дә ҝери дөнүб бахмасын. Јәгин о бири һәфтә бизи Падшаһлыг Залында ҝөрәндә о чох тәәҹҹүбләнмишди, чүнки бу дәфә биз костјумда вә галстукда ҝәлмишдик.

Чох кечмәмиш Миҝел вә мән Јеһованын Шаһидләринин рајон конгресинә ҝетдик. Биз әввәлләр һеч вахт белә бир шеј ҝөрмәмишдик — бүтүн јашлардан олан инсанлар арасында һәгиги гардашлыг мөвҹуд иди. Гәрибәси дә о иди ки, конгрес бизим ахырынҹы дәфә рок консертинә ҝетдијимиз театрда кечирилирди. Анҹаг бу дәфә аб-һава вә сәсләнән мусиги бизи руһландырды.

Јолдашларымын һамысы Мүгәддәс Китабы өјрәнмәјә башлады. Тәхминән сәккиз ај сонра, 1974-ҹү илин ијул ајынын 26-да Миҝел вә мән вәфтиз олдуг. Икимизин дә ијирми јашы варды. Јолдашларымыздан дөрдү бир нечә ај сонра вәфтиз олду. Мүгәддәс Китабдан алдығым тәлим мәни тәшвиг етди ки, чох сәбирли анама ев ишләриндә көмәк едим вә јени иманым һаггында она данышым. Бизим мүнасибәтләримиз мөһкәмләнди. Мән һәмчинин кичик баҹы-гардашларыма даһа чох көмәк етмәјә башладым.

Сонралар, гардашымын бириндән башга, бүтүн баҹы-гардашларым вә анам Мүгәддәс Китаб һәгигәтләрини өјрәндиләр вә Јеһованын Шаһиди кими вәфтиз олундулар. 1977-ҹи илдә мән Соледадла евләндим. Соледад бизи биринҹи дәфә Падшаһлыг Залында ҝөрүб һејрәтә ҝәлән һәмин ҝәнҹ гыз иди. Бир нечә ајын ичиндә һәр икимиз пионер хидмәтинә башладыг (Јеһованын Шаһидләри хош хәбәрин таммүддәтли тәблиғчиләрини белә адландырырлар).

Севимли баҹымын хилас олмасы

Кичик баҹым Маривини ушаглыгда зорламышдылар вә бу дәһшәтли һадисә онун һәјатына чох пис тәсир ҝөстәрмишди. Јенијетмә јашларында о, позғун һәјат тәрзи сүрүрдү: наркотик гәбул едир, оғурлугла вә фаһишәликлә мәшғул олурду. 23 јашы оланда һәбсханаја дүшдү вә һәмин һәјат тәрзини сүрмәјә давам етди.

О вахт мән Јеһованын Шаһидләринин рајон нәзарәтчиси кими хидмәт едирдим. 1989-ҹу илдә Соледадла мән Маривинин јатдығы һәбсхананын јерләшдији әразијә тәјин олундуг. Һәмин әрәфәдә һакимијјәт органлары онун оғлуну әлиндән алмышды, буна ҝөрә дә о, елә мәјус олмушду ки, артыг јашамаг истәмирди. Ҝүнләрин бириндә она баш чәкдим вә бирликдә Мүгәддәс Китабы өјрәнмәји тәклиф етдим, о да тәклифими гәбул етди. Бир ај өјрәндикдән сонра, Мариви наркотикдән вә сигаретдән әл чәкди. Һәјатында бу ҹүр дәјишикликләр етмәси үчүн Јеһованын она ҝүҹ вердијини ҝөрмәк, мәни севиндирирди (Ибраниләрә 4:12).

Өјрәнмәјә башлајандан аз сонра Мариви артыг Мүгәддәс Китаб һәгигәтләрини дустагларла вә һәбсхана ишчиләри илә бөлүшүрдү. Ону бир һәбсханадан башгасына көчүрсәләр дә, тәблиғини дајандырмырды. Һәбсханаларын бириндә о, һәтта камерадан камераја тәблиғ едирди. Илләр әрзиндә Мариви мүхтәлиф һәбсханаларда бир чох дустагларла Мүгәддәс Китабы өјрәнмәјә башламышды.

Бир ҝүн Мариви һәјатыны Јеһоваја һәср етмәк вә вәфтиз олунмаг истәдијини билдирди. Анҹаг нә онун һәбсхананы тәрк етмәсинә, нә дә киминсә һәбсханаја дахил олуб ону вәфтиз етмәсинә иҹазә верилирди. О, һәмин һәбсхананын позғун мүһитинә даһа дөрд ил таб ҝәтирмәли олду. Иманыны горумаға она нә көмәк етди? Һәмин әразидә јығынҹаг ҝөрүшләри кечирилдији вахт, о, һәбсхана камерасында отуруб ејни програмы арашдырырды. Мариви һәм дә мүнтәзәм шәхси өјрәнмә кечирир вә дуа едирди.

Сонралар Маривини ҹидди режимли һәбсханаја кечирдиләр. Орада һовуз олдуғундан, о, фикирләшди ки, вәфтиз олмаға имканы јараныб. Белә дә олду, нәһајәт Маривинин вәфтиз олунмасына иҹазә верилди. Бунун сајәсиндә мән ора вәфтиз үчүн мәрузә илә чыхыш етмәјә ҝәлдим. Һәјатынын ән ваҹиб анында баҹымын јанында олдум.

Кечирдији һәјат тәрзинин нәтиҹәсиндә Мариви ГИЧС-ә тутулмушду. Анҹаг јахшы давранышы сајәсиндә, о, һәбсханадан вахтындан әввәл, 1994-ҹү илин март ајында азад едилди. О, анамын јанына көчдү вә өләнә гәдәр, ики ил әрзиндә фәал мәсиһчи кими хидмәт етди.

Мәнфи һиссләрин өһдәсиндән ҝәлирәм

Мән дә кечмиш һәјатымын нәтиҹәләриндән тамамилә азад ола билмәмишәм. Атамын пис рәфтары, еләҹә дә јенијетмә икән сүрдүјүм һәјат тәрзи шәхсијјәтимдә өз изини бурахмышдыр. Јеткин јашларыма гәдәм гојандан мәни тез-тез пис һиссләр чулғајыр, өзүмү ҝүнаһкар вә дәјәрсиз һисс едирәм. Һәрдән тамамилә үмидсизлијә гапылырам. Бунунла белә, нараһатчылыг доғуран бу һиссләрлә мүбаризә апармагда Аллаһын Кәламынын мәнә мисилсиз көмәји дәјиб. Узун илләр әрзиндә һәр дәфә бу һиссләр баш галдыранда Јешаја 1:18 вә Мәзмур 103:8-13 кими ајәләрин үзәриндә дәриндән дүшүнмәк мәнә онларын мәнҝәнәсиндән гуртармаға көмәк едиб.

Өзүмү јарарсыз һисс едән вахтларда дуанын да мәнә чох бөјүк көмәји олур. Чох вахт ҝөз јашлары ичиндә Јеһоваја дуа етмишәм. Бунунла белә, 1 Јәһја 3:19, 20 ајәләриндәки сөзләр мәни мөһкәмләндирир: «Биз һәгигәтә аид олдуғумузу бундан билирик вә үрәјимиз нә хүсусда бизи мәһкум едирсә, үрәјимизи Аллаһын гаршысында сакитләшдиририк. Чүнки Аллаһ үрәјимиздән үстүндүр вә һәр шеји билир».

Аллаһа «сынан вә пешман олан» үрәклә мүраҹиәт етдијим үчүн баша дүшүрәм ки, бир заманлар фикирләшдијим кими бир о гәдәр дә пис адам дејиләм. Мүгәддәс Китаб Јеһованы ахтаранларын һамысыны әмин едир ки, Аллаһ кечмиш һәрәкәтләринә ҝөрә пешман олан вә Онун ирадәсини јеринә јетирмәк үчүн пис әмәлләриндән дөнән адама хор бахмыр (Мәзмур 51:17).

Өзүнә инамсызлыг һиссинә гапыланда ағлымы Филипилиләрә 4:8 ајәсиндәки кими руһани фикирләрлә долдурурам. 23-ҹү мәзмуру вә Дағүстү тәблиғи әзбәрләмишәм. Ағлыма мәнфи фикирләр ҝәләндә бу Мүгәддәс Китаб парчаларыны өз-өзүмә тәкрарлајырам. Әглими бу ҹүр мәнфи фикирләрдән тәмизләмәк хүсусилә јухусуз ҝеҹәләрдә фајдалы олур.

Һәјат јолдашымын вә диҝәр јеткин мәсиһчиләрин тәриф сөзләри дә мәнә көмәк едир. Әввәлләр онларын руһландырыҹы сөзләрини гәбул етмәк мәнә чәтин олса да, Мүгәддәс Китаб мәнә мәһәббәтин ‘һәр шејә инандығыны’ баша дүшмәјә көмәк едиб (1 Коринфлиләрә 13:7). Һәм дә мән ҝетдикҹә зәиф ҹәһәтләрими тәвазөкарлыгла гәбул етмәји өјрәндим.

Мәнфи һиссләрлә мүбаризә апармағымын фајдасы о олду ки, башгаларынын һалына аҹыјан сәјјар нәзарәтчи олдум. Арвадымла мән, һәр биримиз 30 илә јахын хош хәбәрин таммүддәтли тәблиғчиси кими хидмәт етмишик. Башгаларына хидмәт етмәкдән дујдуғум севинҹ мәнфи һиссләри вә хошаҝәлмәз хатирәләри өзүмдән узаглашдырмаға көмәк едир.

Инди ҝеријә бојланыб Јеһованын вердији хејир-дуалар үзәриндә дүшүнәндә, мән дә мәзмурчу кими демәјә тәшвиг олунурам: «Рәббә алгыш ет [...] Одур бүтүн тәгсирләрини әфв едән, бүтүн хәстәликләринә шәфа верән. Одур һәјатыны мәзара дүшмәкдән гуртаран, мәһәббәтин, мәрһәмәтин таҹыны башына гојан» (Мәзмур 103:1-4).

[Һашијә]

[27-ҹи сәһифәдәки шәкилләр]

Гардашым Һосе Лүиз вә достум Миҝел мәним һәм пис, һәм дә јахшы нүмунәми изләјирдиләр

[28-ҹи сәһифәдәки шәкил]

Марсијолар аиләси, 1973-ҹү ил

[29-ҹу сәһифәдәки шәкил]

Мариви һәбсханада

[30-ҹу сәһифәдәки шәкил/чәрчивә]

Һәјат јолдашым Соледадла

Мәни тез-тез пис һиссләр чулғајыр, өзүмү ҝүнаһкар вә дәјәрсиз һисс едирәм. Бунунла белә, нараһатчылыг доғуран бу һиссләрлә мүбаризә апармагда Аллаһын Кәламынын мәнә мисилсиз көмәји дәјиб