Ушагларынызы өјрәдин

Марк тәслим олмады

ИСАНЫН һәјаты һагда олан дөрд Мүждәдән бирини Марк јазмышдыр. О, Мүждәләрдән ән гысасы вә ән асан охунаныдыр. Марк ким иди? Неҹә дүшүнүрсән, о, Исаны таныјырды? ~a Ҝәл ҝөрәк Марк һансы чәтин сынагларла үзләшмишди вә бир мәсиһчи кими нәјә ҝөрә һеч вахт тәслим олмамышды.

Мүгәддәс Китабда Маркын ады биринҹи дәфә һөкмдар Һирод Агриппанын һәвари Петери зиндана атмасындан сонра чәкилир. Бир ҝеҹә мәләк Петери азад едир вә о, дәрһал Маркын Јерусәлимдә јашајан анасы Мәрјәмин евинә ҝедир. Бу һадисә, Исанын ерамызын 33-ҹү илинин Пасхасында өлдүрүлмәсиндән тәхминән он ил сонра баш вермишди (Һәвариләрин ишләри 12:1-5, 11-17).

Билирсән, Петер нәјә ҝөрә Мәрјәмин евинә ҝәлди? ~ Ола билсин, Петер онун аилә үзвләрини таныдығына вә Исанын шаҝирдләринин онун евиндә ҝөрүшләр кечирдикләрини билдијинә ҝөрә бура ҝәлмишди. Маркын јахын гоһуму Барнаба чохдан, ән азы ерамызын 33-ҹү илинин Пентикост бајрамындан Исанын шаҝирди олмушду. Мүгәддәс Китабда дејилир ки, о заман Барнаба јени шаҝирдләрә көмәк етмәк үчүн бөјүк сәхавәтлилик ҝөстәрмишди. Беләликлә, Иса, ола билсин, Барнабаны, онун ја халасы, ја да бибиси олан Мәрјәми, һәмчинин Мәрјәмин оғлу Маркы таныјырды (Һәвариләрин ишләри 4:36, 37; Колослулара 4:10).

Марк өз Мүждәсиндә јазырды ки, Иса һәбс олунан ҝеҹә орада «чылпаг бәдәнинә... өртүк сарымыш» бир ҝәнҹ варды вә дүшмәнләр Исаны тутанда һәмин ҝәнҹ гачды. Сәнҹә бу ҝәнҹ ким ола биләрди? ~ Бәли, еһтимал ки, о, Марк иди! Демәли, Иса һәвариләри илә һәмин ҝеҹә Пасхадан сонра евдән чыхыб ҝедәндә, ҝөрүнүр, Марк тәләм-тәләсик кәтан өртүјә бүрүнүб, онларын ардынҹа ҝетмишди (Марк 14:51, 52).

Доғрудан да, Маркын руһани фәалијјәтләрлә зәнҝин кечмиши варды. Чох еһтимал ки, ерамызын 33-ҹү илинин Пентикост ҝүнүндә шаҝирдләрин үзәринә мүгәддәс руһ төкүләндә онларын арасында Марк да варды вә о, Аллаһын Петер кими садиг хидмәтчиләри илә јахын әмәкдашлыг едирди. О, һәмчинин Иса Шаула ҝөрүнтүдә ҝөрүндүкдән тәхминән үч ил сонра Шаула Петерлә таныш олмаға көмәк едән јахын гоһуму Барнабаны мүшајиәт етмишди. Илләр кечдикдән сонра Барнаба Шаулу ахтармаг үчүн Тарсуса ҝөндәрилмишди (Һәвариләрин ишләри 9:1-15, 27; 11:22-26; 12:25; Галатијалылара 1:18, 19).

Ерамызын 47-ҹи илиндә Барнаба вә Шаул миссионер хидмәтини иҹра етмәк үчүн сечилмишдиләр. Онлар Маркы да өзләри илә ҝөтүрмүшдүләр, лакин о, бәзи мәлум олмајан сәбәбләрә ҝөрә онлары тәрк едиб Јерусәлимә, евинә гајытмышды. Гејри-јәһудиләр арасында Павел ады илә танынан Шаул һирсләнмишди. О, Маркын бу һәрәкәтинин ҹидди сәһв олдуғуну һесаб етдији үчүн буна ҝөз јуммады (Һәвариләрин ишләри 13:1-3, 9, 13).

Миссионер сәјаһәтиндән гајытдыгдан сонра Павел вә Барнаба ҝөзәл наилијјәтләри һагда мәлумат вердиләр (Һәвариләрин ишләри 14:24-28). Ајлар кечдикдән сонра онлар тәблиғ етдикләри јерләрә гајыдыб јени шаҝирдләрә баш чәкмәк гәрарына ҝәлдиләр. Барнаба Маркы өзләри илә ҝөтүрмәк истәјирди. Бәс һеч билирсән Павел бу һагда нә фикирләширди? — О буну «мәсләһәт билмәди», чүнки кечән дәфә Марк онлары гојуб евләринә гајытмышды. Шүбһәсиз, бундан сонра баш верән һадисә Маркы кәдәрләндирди!

Павел илә Барнаба өзләриндән чыхыб «кәскин мүбаһисә» етдикдән сонра бир-бириндән ајрылдылар. Барнаба Маркы өзү илә ҝөтүрүб Кипрдә тәблиғ етмәјә ҝетди, Павел исә Силаны сечиб планлашдырдығы кими, јени шаҝирдләрә баш чәкмәјә јолланды. Јәгин, Марк Павел илә Барнаба арасында хошаҝәлмәз вәзијјәтин јаранмасына сәбәб олдуғуна ҝөрә чох кәдәрләнмишди (Һәвариләрин ишләри 15:36-41).

Биз Маркын биринҹи дәфә онлары тәрк едиб евинә гајытмасынын сәбәбини билмирик. Еһтимал ки, онун ҹидди сәбәби варды. Һәр неҹә олса да, ҝөрүнүр, Барнаба әмин иди ки, бу бир даһа тәкрарланмајаҹаг. О һаглы имиш. Марк тәслим олмады! Сонралар о, Петерлә бирликдә узаг Бабилдә миссионер хидмәтиндә олду. Петер орадан ҝөндәрдији саламлара нөвбәти сөзләри дә әлавә етмишди: «Оғлум Марк да сизи саламлајыр» (1 Петер 5:13).

Петер илә Маркы бир-биринә неҹә дә мөһкәм руһани телләр бағлајырды! Буну «Маркын Мүждәси»ни охујанда да ајдын ҝөрүрүк. Бурада Марк Петерин ҹанлы шаһиди олдуғу һадисәләри тәсвир едир. Нүмунә үчүн Галилеја дәнизиндә баш верән фыртына һаггындакы мәлуматы мүгајисә един. Марк Исанын гајығын һарасында вә нәјин үстүндә јатдығы һагда тәфсилатлары әлавә едир, бу кими тәфсилатлара јалныз балыгчы олан Петер диггәт јетирә биләрди. Бунун һәгигәтән дә белә олдуғуну ҝөрмәк үчүн ҝәл Матта 8:24, Марк 4:37, 38 вә Лука 8:23 ајәләрини охујаг вә мүгајисә едәк.

Сонралар Павел Ромада һәбсдә оланда Маркы она сәдагәтлә дајаг олдуғу үчүн тәрифләмишди (Колослулара 4:10, 11). Павел икинҹи дәфә орада һәбсдә оланда Тимотејә јазмышды ки, Маркы өзү илә ҝәтирсин вә сәбәбини белә изаһ етмишди: «О мәнә хидмәт үчүн јарарлыдыр» (2 Тимотејә 4:11). Һәгигәтән дә, Марк тәслим олмадығы үчүн шәрәфли хидмәтә лајиг ҝөрүлмүшдү!

Суаллар:

○ Марк һарада јашајырды вә нәјә ҝөрә демәк олар ки, о, Исаны таныјырды?

○ Марка хүсусилә ким көмәк вә дајаг олмушду?

○ Маркын тәслим олмасына нә сәбәб ола биләрди?

○ Һарадан мәлумдур ки, ахырда Павел Маркдан разы галды?

[Һашијә]

[25-ҹи сәһифәдәки шәкил]

Бу ҝәнҹ ким ола биләр? Онунла нә баш верир вә нә үчүн?

[26-ҹы сәһифәдәки шәкил]

Тәслим олмадығы үчүн Марк һансы хејир-дуалары алды?