Доминикан Республикасындан ҝәлән мәктуб
«Мән индијәдәк белә мәһәббәт ҝөрмәмишдим»
НЈУРКА бу һәфтә илк дәфә мәсиһчи ҝөрүшләриндән бири олан Теократик Хидмәт Мәктәбиндә чыхыш етди. О өз чыхышыны Брајл шрифти илә јазыб, сонра әзбәрләмишди. Она верилән тапшырыгда мән көмәкчи кими чыхыш едәрәк Мүгәддәс Китабы өјрәнмәк истәјән адам ролуну ојнајырдым. Мән микрофонла данышырдым, о да гулағындакы апаратын көмәјилә мәни ешидирди. Биз гуртаранда чыхышымызы бәјәнән динләјиҹиләр елә бәрк әл чалдылар ки, һәтта Нјурка да онларын сәсини ешитди. Онун үзүндәки тәбәссүм үрәјиндәки бөјүк севинҹ вә мәмнунлуғу әкс етдирирди. Мән дә чох севинирдим. Миссионер хидмәти неҹә дә бөјүк хејир-дуалар ҝәтирир!
Нјурка илә илк ҝөрүшүм һәлә дә јадымдадыр. Бу, ики ил әввәл олмушду. Саат јарым тозлу кәнд јолу илә машында ҝетдикдән сонра бирдән ҝөзүм она саташды. О, шлакбетон вә ағаҹдан тикилмиш, дамы пасланмыш тәнәкәдән олан садә кәнд евинин ејванында отурмушду. Кечиләрин, итләрин вә довшанларын сәси вә ији әтрафы бүрүмүшдү. Нјурка бүкүлүб башыашағы отурмушду, ҝөрүнүшү тәнһа вә кәдәрли иди. 34 јашы олса да, чох јашлы ҝөрүнүрдү.
Мән еһмалҹа онун чијнинә тохундум. О, 11 ил иди ки, нуруну итирмиш ҝөзләрини галдырыб биз тәрәфә бахды. Гулағына тәрәф әјиләрәк уҹадан өзүмү вә әмәкдашымы тәгдим етдим. Сонра өјрәндик ки, Нјурка Марфан синдромундан — ирсән кечән ағыр хәстәликдән әзијјәт чәкир. Нјурка һәм дә шәкәр хәстәлијинә тутулмушду, буна ҝөрә дә ганында гәфилдән галхан шәкәрин сәвијјәсини мүнтәзәм олараг јохламалы иди.
Мүгәддәс Китабы әлинә верәндә о бунун һансы китаб олдуғуну билди вә кор олмаздан әввәл Мүгәддәс Јазылары охумағы хошладығыны деди. Мән Аллаһын Кәламынын үрәкачан һәгигәтләрини бу тәк-тәнһа, тәвазөкар вә көврәк мәхлуга неҹә өјрәдә биләрдим? О, әлифбаны билдији үчүн әввәлҹә пластик һәрфләри онун әлинә верирдим. О, гыса вахт әрзиндә бу һәрфләри бир-бириндән ајырд етмәји өјрәнди. Сонра ишарә илә ҝөстәрдијим һәрфләри әлимә тохунараг мүәјјән етмәји вә Америка жест дилинин әлифбасындакы мүвафиг һәрфлә әлагәләндирмәји өјрәнди. Тәдриҹән о, башга ишарәләри дә өјрәнди. Жест дилини өзүм јениҹә өјрәнмәјә башладығым үчүн һәр мәшғәләјә саатларла һазырлашмалы олурдум. Анҹаг һәр икимизин ҝүҹлү истәји олдуғундан, гыса вахт әрзиндә жест дилиндә бөјүк наилијјәтләр әлдә етдик.
Бир хејријјә ҹәмијјәти Нјуркаја ешитмә апаратлары бағышлајанда о, даһа тез инкишаф етди. Бу апаратлар мүасир олмаса да, она бөјүк көмәји дәјди. Он илдән артыг кор олан вә демәк олар ки, там сүкунәт ичиндә јашајан Нјурка өз аләминә гәрг олмушду. Амма Јеһованын руһу онун әглини вә үрәјини билик, үмид вә мәһәббәтлә долдурараг онда һәјат ешги ојатды. Тезликлә, чәликлә ҝәзәрәк Нјурка гоншулары илә Мүгәддәс Китаб һәгигәтләрини бөлүшмәјә башлады.
Нјурка өз халасы, онун гызы вә халасы оғлунун арвады илә Мүгәддәс Китаб өјрәнмәси кечирир. О, јахшы һазырлашыр вә һәр дәрси әзбәрләјир. Гоһумлары абзаслары охујур, Нјурка исә Брајл шрифти илә чап олунан китабындан суаллары охујур. Әмәкдашы исә верилән ҹаваблары ја уҹадан онун гулағына дејир, ја да әлләринә тохунараг ишарәләрлә чатдырыр.
Нјуркаја бүтүн јығынҹағымыз көмәк едир вә руһландырыр. Бир нечә мәсиһчи гардаш она ҝөрүшләрә вә конгресләрә ҝетмәјә көмәк едир. Башгалары исә онунла хидмәтә ҝедир. Бу јахынларда Нјурка мәнә деди: «Мән индијәдәк белә мәһәббәт ҝөрмәмишдим». О, нөвбәти вилајәт конгресиндә вәфтиз олмаға һазырлашыр.
Инди биз Нјурканун евинә јахынлашанда ону ејванда, ҝүнәшин алтында отуран, башы јухары вә үзүндә тәбәссүм ҝөрүрүк. Нә үчүн ҝүлүмсәдијини сорушанда, о дејир: «Јер үзүнүн Ҹәннәтә чевриләҹәји вахт һаггында фикирләширдим, өзүмү дә орада тәсәввүр едирдим».
[23-ҹү сәһифәдәки шәкил]
Нјурка јығынҹағымызын бәзи үзвләри илә Падшаһлыг Залынын гаршысында
[25-ҹи сәһифәдәки шәкил]
Нјурка өјрәндикләрини башгалары илә бөлүшүр