Һәр шејдә Аллаһын рәһбәрлијини ахтарын
«Әбәди, сонсузадәк бу Аллаһ бизим Аллаһымыздыр. Өмрүмүзүн сонунадәк О бизә јол ҝөстәрәҹәк!» МӘЗ. 48:14
1, 2. Нәјә ҝөрә өз мүдриклијимизә етибар етмәли дејил, Јеһованын рәһбәрлијини ахтармалыјыг вә бунунла бағлы һансы суаллар јараныр?
НӘЈИН бош вә ја зәрәрли олдуғуну арашдыраркән асанлыгла алдана биләрик (Сүл. мәс. 12:11). Әҝәр мәсиһчи үчүн јолверилмәз олан бир шеји етмәји бејнимизә гојмушугса, онда үрәјимиз мүтләг бунун үчүн инандырыҹы сәбәбләр тапаҹаг (Јер. 17:5, 9). Буна ҝөрә мәзмурчу Јеһоваја: «Ҝөндәр Өз нуруну, һәгигәтини, гој јолуну мәнә ҝөстәрсинләр», дејә дуа етмәклә мүдриклик ҝөстәрди (Мәз. 43:3). О өз гејри-камил мүдриклијинә дејил, Јеһоваја етибар едир, ән јахшы рәһбәрлији Ондан ҝөзләјирди. Мәзмурчу кими, биз дә рәһбәрлији Аллаһдан ҝөзләмәлијик.
2 Бәс нә үчүн ән чох Јеһованын рәһбәрлијинә етибар етмәк лазымдыр? Биз Аллаһын рәһбәрлијини нә заман ахтармалыјыг? Бу рәһбәрликдән фајда әлдә етмәк үчүн өзүмүздә һансы әһвал-руһијјәни инкишаф етдирмәлијик вә бу ҝүн Јеһова бизә рәһбәрлијини неҹә тәгдим едир? Садаладығымыз ваҹиб суаллара бу мәгаләдә ҹаваб тапаҹағыг.
Јеһованын рәһбәрлијинә нә үчүн етибар етмәк олар?
3-5. Јеһованын рәһбәрлијинә нә үчүн там етибар едә биләрик?
3 Јеһова бизим сәмави Атамыздыр (1 Кор. 8:6). О, һәр биримизи јахшы таныјыр вә үрәјимиздә оланлары ҝөрүр (1 Шам. 16:7; Сүл. мәс. 21:2). Давуд падшаһ Аллаһа демишди: «Отурушуму-дурушуму Өзүн билирсән, фикирләрими узагдан дујурсан. Сөзләрими дилә ҝәтирмәмишдән әввәл, ја Рәбб, һамысыны тамамилә билирсән» (Мәз. 139:2, 4). Әҝәр Јеһова бизи белә јахшы таныјырса, Онун бизим үчүн нәјин ән јахшы олдуғуну билдијинә неҹә шүбһә едә биләрик? Бундан әлавә, Јеһова сонсуз мүдриклијә саһибдир. О, һәр шеји, һәтта инсанларын ҝөрә билмәдији шејләри белә ҝөрүр вә ишин нәтиҹәсини әввәлҹәдән билир (Јешаја 46:9-11; Ром. 11:33). О, «тәк һикмәтли олан» (ЈД) Аллаһдыр (Ром. 16:27).
4 Бундан әлавә, Јеһова бизи севир вә бизим үчүн ән јахшы шејләри арзулајыр (Јәһ. 3:16; 1 Јәһ. 4:8). Севән Аллаһ олдуғу үчүн, О бизә гаршы сәхавәтлидир. Шаҝирд Јагуб јазырды: «Һәр бир јахшы бәхшиш вә һәр камил һәдијјә јухарыдан, нурлар Атасындан ҝәлир» (Јаг. 1:17). Аллаһын рәһбәрлијинә табе оланлар Онун сәхавәтиндән бөјүк фајда әлдә едирләр.
5 Нәһајәт, Јеһова һәр шејә гадир Аллаһдыр. Мәзмурчу Онун һаггында демишди: «Һагг-Тааланын пәнаһында јашајан, Күлли-Ихтијарын көлҝәсиндә отуран инсан Рәбб һаггында белә сөјләјир: “О мәним сығынаҹағымдыр, галамдыр, Аллаһымдыр, Она ҝүвәнирәм”» (Мәз. 91:1, 2). Јеһованын рәһбәрлијинә табе оланда, биз һеч заман уғурсузлуға уғрамајан Аллаһа пәнаһ апарырыг. Һәтта мүгавимәтлә үзләшсәк дә, Јеһова бизә дајаг олур. О, бизим үмидләримизи һеч вахт боша чыхармајаҹаг. (Мәз. 71:4, 5; Сүлејманын мәсәлләри 3:19-26 ајәләрини оху.) Бәли, Јеһова бизим үчүн нәјин ән јахшы олдуғуну билир, бизим үчүн ән јахшы шејләр арзулајыр вә бизә ән јахшы шејләри вермәјә гадирдир. Онун рәһбәрлијинә етинасызлыг ҝөстәрмәк неҹә дә ағылсызлыг оларды! Бәс биз Онун рәһбәрлијинә нә заман еһтијаҹ дујуруг?
Рәһбәрлијә нә заман еһтијаҹ дујуруг?
6, 7. Јеһованын рәһбәрлијинә нә заман еһтијаҹ дујуруг?
6 Әслиндә биз Аллаһын рәһбәрлијинә өмрүмүз боју, ҝәнҹ јашларындан гоҹаланадәк еһтијаҹ дујуруг. Мәзмурчу дејирди: «Әбәди, сонсузадәк бу Аллаһ бизим Аллаһымыздыр. Өмрүмүзүн сонунадәк О бизә јол ҝөстәрәҹәк!» (Мәз. 48:14). Мүдрик мәсиһчиләр, мәзмурчу кими, һәр заман Аллаһын рәһбәрлијини ахтараҹаглар.
7 Әлбәттә, елә вахтлар олур ки, көмәјә хүсусилә еһтијаҹ дујуруг. Һәрдән ‘әзаб чәкирик’, бунун сәбәби тәгибләр, шиддәтли хәстәлик вә јахуд гәфилдән ишимизи итирмәк ола биләр (Мәз. 69:16, 17). Белә вахтларда Јеһоваја үз тутмаг тәсәлли ҝәтирир, чүнки таб ҝәтирмәк үчүн Онун бизә гүввә верәҹәјинә вә мүдрик гәрар гәбул етмәјә көмәк едәҹәјинә әмин олуруг. (Мәзмур 102:17 ајәсини оху.) Лакин Онун көмәјинә башга һалларда да еһтијаҹ дујуруг. Мәсәлән, инсанлара Падшаһлыг һаггында хош хәбәри данышанда хидмәтимизин сәмәрәли олмасы үчүн, бизә Јеһованын рәһбәрлији лазымдыр. Истираһәт, ҝејим вә хариҹи ҝөрүнүш, үнсијјәт, иш, тәһсил вә саирә мәсәләләрлә бағлы гәрар гәбул едәндә јалныз Јеһованын рәһбәрлијинә риајәт етдијимиз һалда мүдрик давранмыш олуруг. Әслиндә рәһбәрлијә еһтијаҹ дујдуғумуз вәзијјәтләр садаламагла гуртармаз.
Аллаһын рәһбәрлијини ахтармамаг тәһлүкәлидир
8. Һәвванын гадаған олунмуш мејвәдән јемәси нә демәк иди?
8 Јадда сахламаг лазымдыр ки, Јеһованын рәһбәрлијинә көнүллү табе олмалыјыг. Өзүмүз истәмәсәк, Аллаһ бизи буна мәҹбур етмәјәҹәк. Аллаһын рәһбәрлијинә табе олмајан илк инсан Һәвва олмушдур. Онун нүмунәсиндән белә пис гәрарын неҹә тәһлүкәли ола биләҹәјини ҝөрүрүк. Ҝәлин һәм дә онун бу һәрәкәтинин нә демәк олдуғуна бахаг. Һәвва ‘хејирлә шәри биләрәк Аллаһ кими олмаг’ истәјирди, буна ҝөрә дә гадаған едилмиш мејвәдән једи (Јар. 3:5). Белә етмәклә, о өзүнү Аллаһын јеринә гојду, Јеһованын рәһбәрлијинә табе олмаг әвәзинә, хејирлә шәрә даир өзү гәрар чыхарды. Беләликлә, Јеһованын али һакимијјәтинә арха чевирди. О истәјирди ки, ихтијары өз әлиндә олсун. Онун әри Адәм дә үсјана гошулду (Ром. 5:12).
9. Јеһованын рәһбәрлијини рәдд етмәјимиз нәји ҝөстәрир вә бу, нәјә ҝөрә ағылсызлыгдыр?
9 Әҝәр бу ҝүн биз дә Јеһованын рәһбәрлијинә табе олмуругса, демәли, Онун али һакимијјәтини гәбул етмирик. Мәсәлән, тутаг ки, кимсә порнографијаја бахмаға вәрдиш едиб. Әҝәр о, мәсиһчи јығынҹағынын үзвүдүрсә, онда бу мәсәләјә даир Јеһованын нөгтеји-нәзәрини билир. Мәсиһчиләрин арасында натәмизлијин һеч ады белә чәкилмәмәлидир, галды ки она шәһвәтлә бахмаг (Ефес. 5:3). Јеһованын рәһбәрлијинә табе олмајан адам Онун башчылығыны, беләликлә дә али һакимијјәтини инкар едир (1 Кор. 11:3). Бу, бөјүк ағылсызлыгдыр, чүнки Јеремјанын дедији кими, «аддымларыны дүзәлтмәк ҝедән адамын иши дејил» (Јер. 10:23).
10. Ирадә азадлығына нә үчүн мәсулијјәтлә јанашмалыјыг?
10 Бәзиләри Јеремјанын сөзләри илә разылашмајыб һесаб едә биләрләр ки, әҝәр Јеһова бизә ирадә азадлығы верибсә, ондан неҹә истифадә етдијимизә ҝөрә бизи мүһакимә етмәмәлидир. Анҹаг унутмалы дејил ки, ирадә азадлығы әнам олмагла јанашы, һәм дә мәсулијјәтдир. Сөзләримизә вә һәрәкәтләримизә ҝөрә Аллаһ гаршысында ҹаваб верәҹәјик (Ром. 14:10). Иса демишдир: «Ағыз үрәкдән ҝәләни сөјләјир». О, һәм дә демишди ки, «үрәкдән пис дүшүнҹәләр, гатиллик, зинакарлыг, ҹинси әхлагсызлыг, оғурлуг, јаланчы шаһидлик вә күфр чыхар» (Мат. 12:34; 15:19). Беләликлә, сөзләримиз вә һәрәкәтләримиз үрәјимизин вәзијјәтини үзә чыхарыр. Онлар бизим әслиндә неҹә инсан олдуғумузу ҝөстәрир. Мәһз буна ҝөрә дә мүдрик мәсиһчи һәр шејдә Аллаһын рәһбәрлијини ахтарыр. Јеһова белә адамы «үрәјидүз» һесаб едир вә мүтләг она ‘хејирхаһлыг едәҹәк’ (Мәз. 125:4).
11. Исраил халгынын тарихиндән нә өјрәнирик?
11 Исраил халгынын тарихини јадымыза салаг. Халг Јеһованын әмрләринә табе олуб дүзҝүн гәрарлар гәбул едәндә, О онлары горујурду (Јешуа 24:15, 21, 31). Амма чох вахт онлар ирадә азадлыгларындан суи-истифадә едирдиләр. Јеремјанын ҝүнләриндә Јеһова онлара демишди: «Мәни ешитмәдиләр, гулаг асмадылар. Бунун әвәзинә өз истәкләринә, гара үрәкләринин инадына ҝөрә һәрәкәт етдиләр, ирәлијә дејил, ҝеријә ҝетдиләр» (Јер. 7:24-26). Неҹә дә аҹынаҹаглыдыр! Ҝәлин һеч вахт инадкарлығымыз уҹбатындан вә арзуларымыза ҝөрә Јеһованын рәһбәрлијини рәдд едиб өз үрәјимизин истәји илә һәрәкәт етмәјәк; ҝеријә дејил, ирәлијә ҝедәк!
Аллаһын мәсләһәтинә әмәл етмәк үчүн нә тәләб олунур?
12, 13. а) Һансы кејфијјәт биздә Јеһованын рәһбәрлијинә әмәл етмәк истәји јарадыр? б) Иман нә үчүн ваҹибдир?
12 Биз Јеһованын рәһбәрлијинә Она олан мәһәббәтимиздән ирәли ҝәләрәк риајәт етмәк истәјирик (1 Јәһ. 5:3). Лакин Павел бунун үчүн даһа нәјин тәләб олундуғуну ҝөстәрәрәк демишдир: «Биз ҝөзлә ҝөрүләнә дејил, имана әсасән һәрәкәт едирик» (2 Кор. 5:6, 7). Иман нә үчүн ваҹибдир? Јеһова бизи «салеһлик јолу илә апарыр», бу јол исә бизи бу дүнјада вар-дөвләтә вә шан-шөһрәтә апарыб чыхармыр (Мәз. 23:3). Бу сәбәбдән, иман ҝөзләримизи Јеһоваја хидмәтин ҝәтирдији мисилсиз руһани хејир-дуалара дикмәлијик. (2 Коринфлиләрә 4:17, 18 ајәләрини оху.) Садә һәјат сүрмәли олсаг белә, иман бизә әсас шејләрлә кифајәтләнмәјә көмәк едир (1 Тим. 6:8).
13 Иса ҝөстәрди ки, һәгиги ибадәт өзүнә фәдакарлығы дахил едир, иман олмадан исә бу мүмкүн дејил (Лука 9:23, 24). Аллаһын бәзи садиг хидмәтчиләри јохсуллуға, сыхынтылара, мәнфи фикирләрә, һәтта шиддәтли тәгибләрә таб ҝәтирәрәк бөјүк фәдакарлыг ҝөстәрмишләр (2 Кор. 11:23-27; Вәһј 3:8-10). Онлар јалныз мөһкәм иман сајәсиндә бүтүн бунлара севинҹлә таб ҝәтирә билмишләр (Јаг. 1:2, 3). Мөһкәм иман бизи там әмин едир ки, Јеһованын рәһбәрлијинә риајәт етмәк һәмишә ән јахшы јолдур. Бу, һәмишә бизим јахшылығымыз үчүндүр. Бизим һеч бир шүбһәмиз јохдур ки, сәдагәтлә таб ҝәтирән адамларын мүкафаты истәнилән мүвәггәти әзаблардан гат-гат үстүн олаҹаг (Ибр. 11:6).
14. Һәҹәр нә үчүн тәвазөкарлыг ҝөстәрмәли олду?
14 Һәмчинин Јеһованын рәһбәрлијинә риајәт етмәкдә тәвазөкарлығын һансы ролу ојнадығына бахаг. Буну Саранын гаравашы Һәҹәрин нүмунәсиндән ҝөрүрүк. Сара ушағы олмадығыны ҝөрүб Һәҹәри Ибраһимә верди вә о, Ибраһимдән һамилә галды. Сонра Һәҹәр өз сонсуз ханымына тәкәббүрлә бахмаға башлады. Буна ҝөрә Сара онунла «сәрт рәфтар етмәјә башлады», Һәҹәр дә онун јанындан гачды. Јеһованын мәләји Һәҹәри ҝөрүб она деди: «Ханымынын јанына гајыт вә она табе ол» (Јар. 16:2, 6, 8, 9). Јәгин ки, Һәҹәр башга шеј ешитмәк истәјәрди. Мәләјин ҝөстәришинә ујғун давранмаг үчүн о өз гүруруну сындырмалы иди. Буна бахмајараг, Һәҹәр тәвазөкарлыгла мәләјин дедијини етди вә оғлу Исмаил атасынын чадырында, тәһлүкәсиз јердә дүнјаја ҝәлди.
15. Јеһованын рәһбәрлијинә риајәт етмәк үчүн биздән тәвазөкарлыг тәләб олунан бәзи һаллары нүмунә чәкин.
15 Јеһованын рәһбәрлијинә риајәт етмәк үчүн бизә дә гүрурумузу сындырмаг лазым ҝәлә биләр. Ола биләр, бәзиләри хошладыглары истираһәт нөвүнүн Јеһоваја мәгбул олмадығыны гәбул етмәли олсунлар. Мәсиһчи киминсә хәтринә дәјдији үчүн үзр истәмәли ола биләр. Јахуд о, сәһвә јол верәр вә ону етираф етмәли ола биләр. Бәс әҝәр кимсә ҹидди ҝүнаһ ишләдибсә? О, тәвазөкарлыг ҝөстәрәрәк ҝүнаһыны ағсаггаллара данышмалыдыр. Кимисә һәтта јығынҹагдан кәнар етмәк лазым ҝәлә биләр. Јығынҹаға гајытмаг үчүн о, тәвазөкарлыгла төвбә етмәли вә әмәлиндән дөнмәлидир. Бу кими һалларда Сүлејманын мәсәлләри 29:23 ајәсиндәки сөзләр инсана тәсәлли верир: «Инсаны тәкәббүрү алчалдар, тәвазөкар шәрәфә чатар».
Јеһова бизә рәһбәрлији неҹә тәгдим едир?
16, 17. Аллаһын Мүгәддәс Китаб васитәсилә вердији рәһбәрликдән там фајданы неҹә әлдә едә биләрик?
16 Аллаһ рәһбәрлији илк нөвбәдә Өз илһамланмыш Кәламы, Мүгәддәс Китаб васитәсилә тәгдим едир. (2 Тимотејә 3:16, 17 ајәләрини оху.) Аллаһын Кәламынын бизә даһа чох фајда ҝәтирмәсини истәјириксә, мүдриклик оларды ки, онун мәсләһәтләрини ахтармаг үчүн чәтинлијә дүшмәји ҝөзләмәјәк. Әксинә, Мүгәддәс Китабы ҝүндәлик охумағы адәт едәк (Мәз. 1:1-3). Беләликлә биз Аллаһын илһамланмыш Кәламыны даһа јахшы биләҹәјик. Аллаһын дүшүнҹә тәрзини мәнимсәјәҹәк, һәтта ҝөзләнилмәз чәтинликләрә белә һазыр олаҹағыг.
17 Бундан башга, Мүгәддәс Јазылардан охудугларымыз үзәриндә дүшүнмәк вә дуада онлары хатырлатмаг ваҹибдир. Мүгәддәс Китаб ајәләри үзәриндә дүшүнәндә биз онлары конкрет һалларда неҹә тәтбиг едә биләҹәјимизи өлчүб-бичирик (Мәз. 77:12). Ҹидди проблемләрлә үзләшәндә биз Јеһоваја дуа едиб, рәһбәрлик истәјирик. Јеһованын руһу бизә Мүгәддәс Китабдан вә ја она әсасланан нәшрләрдән охудуғумуз лазыми принсипләри хатырламаға көмәк едәҹәк. (Мәзмур 25:4, 5 ајәләрини оху.)
18. Јеһова мәсиһчи гардашлығы васитәсилә бизә рәһбәрлији неҹә верир?
18 Јеһова Өз рәһбәрлијини мәсиһчи гардашлығы васитәсилә дә тәгдим едир. Бу гардашлығын әсас һиссәси Рәһбәрлик Шурасынын тәмсил етдији «садиг вә ағыллы гул»дур. О, нәшрләр, еләҹә дә јығынҹаг ҝөрүшләри вә конгресләр васитәсилә бизи фасиләсиз олараг руһани гида илә тәмин едир (Мат. 24:45-47; мүгајисә ет: Һәвариләрин ишләри 15:6, 22-31). Бундан башга, мәсиһчи јығынҹағындакы јеткин инсанлар, хүсусилә дә ағсаггаллар бизә көмәк едә вә Мүгәддәс Јазылардан мәсләһәт верә биләрләр (Јешаја 32:1). Мәсиһчи аиләсиндә бөјүјән ҝәнҹләрин даһа бир көмәји вардыр. Аллаһ иманлы валидејнләрә ушагларыны тәрбијә етмәк сәлаһијјәти вермишдир. Бу сәбәбдән ушаглар һәмишә валидејнләринин рәһбәрлијини ахтармалыдырлар (Ефес. 6:1-3).
19. Јеһованын рәһбәрлијини һәмишә ахтарсаг, һансы хејир-дуалары алаҹағыг?
19 Бәли, Јеһова Өз рәһбәрлијини мүхтәлиф үсулларла тәгдим едир вә јахшы оларды ки, биз онлардан там фајдаланаг. Исраилин Аллаһа сәдагәтли олдуғу вахтлардан данышаркән Давуд падшаһ демишди: «Ата-бабаларымыз Сәнә ҝүвәнмишди, Сәнә ҝүвәнәндә онлары хилас етдин. Сәнә јалвараркән гуртулдулар, Сәнә ҝүвәнәркән рүсвај олмадылар» (Мәз. 22:3-5). Јеһованын рәһбәрлијинә етибар едиб, она әмәл етсәк, биз дә ‘рүсвај олмајаҹағыг’. Үмидләримиз боша чыхмајаҹаг. Өз мүдриклијимизә ҝүвәнмәјиб, ‘јолумузу Рәббә версәк’, елә инди бол-бол хејир-дуалар бичәҹәјик (Мәз. 37:5). Әҝәр бу јолда мөһкәм галсаг, һәмин хејир-дуалар әбәди олаҹаг. Давуд падшаһ јазырды: «Рәбб әдаләти севир, һеч заман мөминләри тәрк етмир. Салеһләр даим мүдафиә олунаҹаг... Салеһләр өлкәни мүлк олараг алаҹаг, онлар орада әбәди мәскән салаҹаг» (Мәз. 37:28, 29).
Изаһ едә биләрсинизми?
• Биз нә үчүн Јеһованын рәһбәрлијинә етибар едирик?
• Јеһованын рәһбәрлијини рәдд етмәјимиз нәји ҝөстәрир?
• Һансы һалларда мәсиһчијә тәвазөкарлыг лазым ҝәлә биләр?
• Јеһова бу ҝүн бизә рәһбәрлијини неҹә тәгдим едир?
[8-ҹи сәһифәдәки шәкилләр]
Һәјатынын һәр саһәсиндә Јеһованын рәһбәрлијини ахтарырсанмы?
[9-ҹу сәһифәдәки шәкил]
Һәвва Јеһованын али һакимијјәтинә арха чевирди
[10-ҹу сәһифәдәки шәкил]
Мәләјин ҝөстәришинә әмәл етмәк үчүн Һәҹәрә һансы кејфијјәт лазым иди?