Бизим ҝүнләрин «исраилли гызы»
ИСА МӘСИҺИН өлүмүнүн Хатирә Ҝеҹәсинә ики һәфтә галмыш, Бразилијанын Праја-Гранди шәһәриндә јашајан Салис аиләсинин һәр үзвү дәвәт едәҹәји инсанларын сијаһысыны тутду. Валидејнләри алты јашлы Абигајлә бир дәвәтнамә вердиләр вә ондан кими дәвәт етмәк истәдијини сорушдулар.
— Һәмишә мәнә ҝүлүмсәјән дајыны.
— О кимдир?
— О, әлил арабасында отурур.
Дөрд ҝүн сонра Абигајл һәмин адамы валидејнләринә ҝөстәрди. Онун ады Валтер иди вә Падшаһлыг Залынын јахынлығында јашајырды. 15 ил әввәл, онун 28 јашы оланда, дүшдүјү автомобил гәзасы нәтиҹәсиндә ајаглары шикәст олмушду. Варлы олдуғу үчүн онун ики ҹанҝүдәни варды. Абигајл үчүн Валтерлә данышмаға иҹазә алындыгдан сонра валидејнләри изаһ етдиләр ки, гызлары она дәвәтнамә вермәк истәјир.
Сөһбәтин сонунда Абигајл деди: «Падшаһлыг Залымызда оланларын һамысынын чохлу дәвәтнамәси вар, мәним исә бир дәнәдир. Буна ҝөрә мән јалныз сизи дәвәт едирәм. Әҝәр ҝәлмәсәниз, демәли, јаныма һеч ким ҝәлмәјәҹәк. Амма ҝәлсәниз, мән чох севинәҹәјәм, Јеһова мәндән дә чох севинәҹәк».
Хатирә Ҝеҹәси ҝүнү башга Шаһидләр вә Абигајл бу мәрасим үчүн Падшаһлыг Залында тәмизлик ишләри ҝөрүрдүләр. Ҝүнорта Валтер машыны илә Падшаһлыг Залынын јанындан кечәндә Абигајлы ҝөрүб, сүрүҹүсүнә машыны сахлатдырды. Пәнҹәрәни ачыб Абигајлдан бурада нә етдијини сорушду. Абигајл деди ки, Падшаһлыг Залына ҝәлмәк она хош олсун дејә, ораны јығышдырырлар.
Һәмин ахшам Абигајл чох һәјәҹанлы иди. Мәрузә артыг сөјләнирди, амма Абигајл Валтерин ҝәлиб-ҝәлмәдијини билмәк үчүн тез-тез әтрафа бојланырды. Бирдән Валтер ҹанҝүдәнләри илә Зала дахил олду. Абигајлын үзүндә севинҹ тәбәссүмү ҹанланды. Мәрузәдән сонра Валтер етираф етди ки, һәмин ҝүн башга шәһәрә ҝетмәјә һазырлашырды, лакин фикрини дәјишиб Абигајлын хатиринә Хатирә Ҝеҹәсинә ҝәлди. Сонра әлавә етди: «Мәрузәдә мәһз еһтијаҹ дујдугларымы ешитдим». О, Мүгәддәс Китаб истәди, ону өјрәнмәјә вә ҝөрүшләрә ҝәлмәјә башлады.
Валтер Абигајл барәдә тез-тез данышырды вә онун баҹысы онунла таныш олмаг истәди. Баҹысы Абигајлы ҝөрәндә бу гыз онун чох хошуна ҝәлди. О деди: «Инди мән гардашымын нәјә ҝөрә белә хошбәхт олдуғуну баша дүшүрәм».
Валтер Мүгәддәс Китабы өјрәнир вә јығынҹаг ҝөрүшләринә ҝәлир. О, һәтта шәрһләр верир вә өјрәндикләрини башгаларына данышыр. Шүбһәсиз, балаҹа Абигајл, Наамана һәгиги Аллаһ олан Јеһованы танымаға көмәк едән исраилли гызы јадымыза салыр (2 Падшаһлар 5:2-14).