Зәифликләрә бахмајараг, гүввәтлијик

ЗӘИФЛИКЛӘРИНИЗ сизи үзә биләр. Онлар адама санки зәли кими јапышыр. Ола билсин, онлардан һеч вахт јаха гуртара билмәјәҹәјинизи дүшүнүр, јахуд өзүнүзү башгалары илә мүгајисәдә јарарсыз һисс едир вә онларын сиздән јахшы олдуғуну фикирләширсиниз. Диҝәр тәрәфдән исә, бәлкә дә, сиз ҝүҹүнүзү түкәдән вә һәјата марағынызы өлдүрән үзүҹү хәстәликдән әзијјәт чәкирсиниз. Сәбәб нә олурса олсун, сизә елә ҝәлә биләр ки, вәзијјәтиниз чыхылмаздыр. Белә һалларда сиз Аллаһа: «Каш ки мәни өлүләр дијарында ҝизләдәјдин, гәзәбин кечәнәдәк сахлајајдын, мәнә мөһләт верәјдин, сонра мәни јада салајдын» дејән Әјјуб кими ејни һиссләри кечирә биләрсиниз (Әјј. 14:13).

Белә үмидсизликдән неҹә јаха гуртармаг олар? Чәтин олса да, проблемләри бир мүддәт јаддан чыхармаг лазымдыр. Мәсәлән, Јеһованын Өз садиг хидмәтчиси Әјјуба вердији суаллара диггәт јетирә биләрсиниз: «Мән јерин тәмәлини гојаркән һарадајдын? Анлајышын варса, сөјлә. Инди ки билирсән, де ҝөрүм, јерин өлчүсүнү ким гојду, јахуд јер үстүндә өлчү хәттини ким чәкди?» (Әјј. 38:4, 5). Бу суалларын маһијјәти үзәриндә дүшүнәндә биз, еһтимал ки, Јеһованын мисилсиз мүдриклијини вә гүдрәтини етираф етмәјә тәшвиг олунаҹағыг. Аллаһын дүнјанын индики вәзијјәтинә јол вермәсинин тутарлы сәбәбләри вар.

«Бәдәнимә бир нештәр»

Јеһованын башга садиг хидмәтчиси Ондан ‘бәдәниндәки нештәри’, кечиб-ҝетмәјән проблемини узаглашдырмағы хаһиш етмишди. Һәвари Павел үч дәфә Аллаһа јалварды ки, ону бу әзабдан азад етсин. Тикан адамы ҝөјнәтдији кими, бу сынаг да, һәр нә олса да, Павелин Јеһоваја хидмәтдә севинҹини әлиндән ала биләрди. Павел буну даим ‘јумругланмаға’ (И–93) бәнзәдирди. Јеһова исә она деди: «Лүтфүм сәнә јетәр; чүнки Мәним гүдрәтим зәифликдә камилләшир». Јеһова Павели бәдәниндәки нештәрдән азад етмәди. Павел онунла чарпышмалы олду, буна бахмајараг деди: «Мән зәиф олдуғум заман гүввәтлијәм» (2 Кор. 12:7-10). О нәји нәзәрдә тутурду?

Павелин проблеми мөҹүзәли шәкилдә јох олмады. Анҹаг бу, Павелин Јеһоваја хидмәтдә мөһтәшәм ишләр ҝөрмәсинә мане олмады. Павел Јеһоваја архаланыр вә һәмишә Ондан көмәк диләјирди (Филип. 4:6, 7). Јердәки һәјатынын сонуна јахын Павел дејә билди: «Мүбаризәдә јахшы чарпышдым, гачышы битирдим, иманы һифз етдим» (2 Тим. 4:7).

Јеһова Өз ирадәсини јеринә јетирмәк үчүн, гүсурларына вә чәтинликләринә бахмајараг, гејри-камил инсанлардан истифадә едир вә һаглы олараг иззәт Јеһоваја чатыр. О, инсанлара чәтинликләринин өһдәсиндән ҝәлмәк вә хидмәтдә севинҹләрини горумаг үчүн рәһбәрлик вә мүдриклик тәгдим едә биләр. Бәли, О, бөјүк ишләр ҝөрмәк үчүн, зәифликләринә бахмајараг, гејри-камил инсанлардан истифадә едә биләр.

Павел бәдәниндәки нештәри Аллаһын нә үчүн ҝөтүрмәдијини белә изаһ едирди: «Мән... гүррәләнмәјим дејә» (2 Кор. 12:7). Павелин ‘нештәри’ она имканларынын мәһдуд олдуғуну хатырладыр вә өзү һаггында јүксәк фикирдә олмамаға көмәк едирди. Елә Иса да буну өјрәдирди: «Ким өзүнү јүксәлдирсә, алчалдылаҹаг вә ким өзүнү алчалдырса, јүксәлдиләҹәкдир» (Мат. 23:12). Сынаглар Аллаһын хидмәтчиләринә тәвазөкар олмағы өјрәдә вә сәдагәтлә тәһәммүл етмәк үчүн Јеһоваја ҝүвәнмәли олдугларыны баша дүшмәјә көмәк едә биләр. Беләликлә, Павел кими, онлар да ‘Рәбб илә өјүнә’ биләрләр (1 Кор. 1:31).

Ҝизли зәифликләр

Бәзиләринин өзләринин дә хәбәри олмадығы вә ја гәбул етмәк истәмәдикләри зәифликләри ола биләр. Мәсәлән, кимсә өзүнә ҝүвәнәрәк, өзү һаггында јүксәк фикирдә ола биләр (1 Кор. 10:12). Гејри-камил инсанлара хас олан зәифликләрдән бири дә мөвге саһиби олмаг истәјидир.

Давуд падшаһын орду башчысы Јоав шүҹаәтли, әзмли вә зирәк адам иди. Бунунла белә, о өзүндән чох разы вә шөһрәтпәрәст олдуғуну ҝөстәрән ҹидди сәһвләрә јол верди. О, ики орду башчысыны гәддарҹасына гәтлә јетирир. Әввәлҹә гисас алмаг үчүн Авнери өлдүрүр, сонра саламламаг бәһанәсилә, халасы оғлу Амасаны өпмәк үчүн сағ әли илә саггалындан тутур вә сол әлиндәки гылынҹыны гарнына сохур (2 Шам. 17:25; 20:8-10). Амаса Јоавын јеринә орду башчысы кечдијиндән, Јоав, јәгин ки, јенидән орду башчысы олмаг үмидилә, бу имкандан рәгибиндән јаха гуртармаг үчүн истифадә едир. Ҝөрүрүк ки, Јоав, худбин истәкләри дә дахил олмагла, һиссләрини ҹиловламады. О, амансызҹасына давранды вә бир балаҹа да олса, пешманчылыг һисси кечирмәди. Давуд падшаһ һәјатынын сонуна јахын оғлу Сүлејмана нәсиһәт етди ки, етдији писликләрә ҝөрә Јоавы ҹәзаландырсын (1 Пад. 2:5, 6, 29-35).

Биз һеч бир вәҹһлә јанлыш арзуларымыза тәслим олмамалыјыг; биз зәифликләримизи ҹиловлаја биләрик. Бунун үчүн биринҹи онлары ҝөрмәли вә гәбул етмәлијик. Сонра исә онлара үстүн ҝәлмәк үчүн тәшәббүс ҝөстәрә биләрик. Һәмин зәифликләрә галиб ҝәлмәкдә бизә көмәк етмәси үчүн Јеһоваја мүнтәзәм дуа едә биләр вә бу мејлләрлә неҹә мүбаризә апараҹағымызы өјрәнмәк үчүн Онун Кәламыны сәјлә арашдыра биләрик (Ибр. 4:12). Ола биләр, гүсурларымызын үзәриндә һәмишә ишләмәли олаг, анҹаг бу бизи руһдан салмамалыдыр. Нә гәдәр ки, гејри-камилик бу мүбаризә давам едә биләр. Павел өзүнүн дә бу вәзијјәтдә олдуғуну белә етираф едирди: «Истәдијим шеји етмирәм, анҹаг нифрәт етдијим иши ҝөрүрәм». Анҹаг билдијиниз кими, Павел, зәифликләри тамамилә өз ихтијарында дејилмиш кими, онлара тәслим олмады. Әксинә, Аллаһын Иса Мәсиһ васитәсилә көмәјинә ҝүвәнәрәк онларла мүбаризәсинә давам етди (Ром. 7:15-25). Башга бир ајәдә Павел демишди: «Бәдәнимә ҹәфа вериб ону көлә едирәм ки, башгаларына вәз етдикдән сонра, өзүм јарышда иштирак етмәкдән мәһрум олмајым» (1 Кор. 9:27).

Инсанлар адәтән өзләринә һагг газандырмаға мејлли олурлар. Биз Јеһованын нөгтеји-нәзәринә јијәләнмәклә буна гаршы мүбаризә апара биләрик, бунун үчүн дә Павелин мәсиһчиләрә вердији: «Писликдән икраһ един, јахшылыға сарылын» мәсләһәтинә әмәл етмәлијик (Ром. 12:9). Зәифликләримизә галиб ҝәлмәк үчүн биздән дүрүст, гәтијјәтли вә низам-интизамлы олмаг тәләб олунур. Давуд Јеһовадан хаһиш едирди: «Гәлбими, фикирләрими саф ет» (Мәз. 26:2). О билирди ки, Аллаһ ән дәрин мејлләримизә дүзҝүн гијмәт верә биләр вә еһтијаҹымыз оланда бизә көмәк етмәјә гадирдир. Әҝәр биз Јеһованын Кәламы вә мүгәддәс руһу васитәсилә вердији рәһбәрлијә риајәт едириксә, гүсурларымыз үзәриндә гәләбәјә доғру ирәлиләјә биләрик.

Бәзиләринә елә ҝәлә биләр ки, үзләшдикләри проблемләрин өһдәсиндән тәкбашына ҝәлә билмирләр. Сөзсүз ки, белә вәзијјәтдә јығынҹағын ағсаггаллары мәһәббәтлә көмәк едиб онлары руһландыра биләрләр (Јешаја 32:1, 2). Анҹаг вәзијјәтә реал бахмаг мүдриклик оларды. Бәзи проблемләрин индики системдә там һәлли јохдур. Бунунла белә, чохлары проблемләрин өһдәсиндән ҝәлмәји өјрәнмишләр ки, бунун да сајәсиндә һәјатларындан мәмнунлуг дујурлар.

Јеһованын көмәјинә әмин олун

Бу чәтин анларда һансы проблемләрлә гаршылашмағымыздан асылы олмајараг, әмин ола биләрик ки, Јеһова бизә јол ҝөстәрәҹәк вә гајғымыза галаҹаг. Мүгәддәс Китаб бизи тәшвиг едир: «Аллаһын ҝүҹлү әлинин һимајәси алтында тәвазөкар олун ки, О Өз вахтында сизи уҹалтсын. Бүтүн гајғынызы Онун үзәринә гојун, чүнки сизин гајғыныза галан Одур» (1 Пет. 5:6, 7).

Узун илләр Бет-Елдә хидмәт етмиш Кети әринин Алсһејмер хәстәлијинә тутулдуғуну биләндә бу дәрдә дөзә билмәјәҹәјини дүшүнмүшдү. Јеһовадан мүдриклик вә емосионал ҝүҹ истәмәк ҝүндәлик зәрурәтә чеврилмишди. Әринин вәзијјәти ҝет-ҝедә писләшдикҹә, гајғыкеш руһани гардашлар хәстәјә неҹә гуллуг етмәк лазым олдуғуну өјрәнмәјә чалышыр, баҹылар исә онлара мәнәви дајаг олурдулар. Бу мәсиһчиләр Јеһованын онлары ҝүҹләндирмәк үчүн тәгдим етдији бир васитә олдулар вә әри тәхминән 11 ил сонра өләнә гәдәр Кети онун гајғысына гала билди. О дејир: «Мән Јеһоваја ҝөз јашлары вә һәрарәтлә миннәтдарлығымы билдирирдим; мәһз Онун көмәји сајәсиндә ахыра кими дөзә билдим. Һеч билмәздим ки, бу гәдәр јорғун ола-ола, белә узун вахт әрзиндә үзәримә дүшән мәсулијјәтин өһдәсиндән ҝәлә биләрәм!»

Ҝизли зәифликләр үзәриндә гәләбә

Инсанлар өзләрини дәјәрсиз һисс едәндә дүшүнә биләрләр ки, Јеһова онларын чәтин анларда етдикләри фәрјадлара гулаг асмыр. Бу заман Давудун Бат-Шева илә ҹидди ҝүнаһ едиб пешманчылыг чәкәркән дедији сөзләрин үзәриндә дүшүнмәк хүсусилә фајдалыдыр: «Сән [Аллаһ] сынан вә пешман олан үрәјә хор бахмазсан!» (Мәз. 51:17). Давуд сәмими-гәлбдән төвбә етмишди вә о билирди ки, Аллаһа дуа едиб, Онун мәрһәмәтинә сығына биләр. Иса да Јеһованын гајғыкешлијини әкс етдирирди. Матта Өз Мүждәсиндә Јешајанын сөзләрини Исаја тәтбиг етмишди: «Әзилмиш гамышы гырмајаҹаг, вә түстүләнән пилтәни сөндүрмәјәҹәкдир» (Мат. 12:20; Јешаја 42:3). Иса јер үзүндә оларкән фәгирләрә вә һаггы тапдаланан адамлара мәрһәмәт ҝөстәрирди. О, сөнмәк үзрә олан јағ лампасынын пилтәсинә бәнзәјән адамларын сон һәјат гығылҹымыны сөндүрмүрдү. Әксинә, мәзлумларын үрәјиндә һәјат ешгини аловландырмаг үчүн онлары ҹаныјананлыгла өјрәдирди. Бәли, Иса мәһз белә адам иди. Бәс сиз Исанын һәлә дә белә шәхсијјәт олдуғуна вә зәифликләриниздә сизә аҹыдығына инанырсынызмы? Диггәт јетирин ки, Ибраниләрә 4:15 ајәсиндә о, ‘зәифликләримиздә бизә аҹыјан’ бир шәхс кими тәсвир олунур.

Павел ‘бәдәниндәки нештәрдән’ данышаркән Мәсиһин гүдрәтинин үзәриндә «чадыр кими» (ЈД) олдуғуна диггәт јетирир (2 Кор. 12:7-9). Неҹә ки, чадыр адамы пис һавадан горујур, еләҹә дә Павел Аллаһын ону Мәсиһ васитәсилә горудуғуну һисс едирди. Павел кими, биз дә зәифликләрә вә проблемләрә тәслим олмамалыјыг. Руһани ҹәһәтдән мөһкәм галмаг үчүн Јеһованын јығынҹаг васитәсилә тәгдим етдији бүтүн имканлардан истифадә едә биләрик. Ҝүҹүмүз дахилиндә олан һәр шеји етдикдән сонра Јеһованын аддымларымызы истигамәтләндирәҹәјинә там әмин олараг Она бел бағлаја биләрик. Зәифликләр заманы Аллаһын гүдрәтинин неҹә көмәк етдијини өз үзәримиздә һисс етдикдә биз дә Павел кими дејә биләҹәјик: «Зәиф олдуғум заман гүввәтлијәм» (2 Кор. 12:10).

[3-ҹү сәһифәдәки шәкил]

Павел һәмишә дуа едирди ки, Јеһова она хидмәтини иҹра етмәјә көмәк етсин

[5-ҹи сәһифәдәки шәкил]

Давуд падшаһ ордусуну Јоава етибар етмишди

[5-ҹи сәһифәдәки шәкил]

Јоав рәгиби Амасаны арадан ҝөтүрдү

[6-ҹы сәһифәдәки шәкил]

Проблемләримизин өһдәсиндән ҝәлә билмәк үчүн ағсаггаллар мәһәббәтлә Мүгәддәс Китаб рәһбәрлијини тәгдим едирләр