Билмирсән әввәлки тохум мәһсулдар олаҹаг, јохса сонракы!
«Тохумуну сәһәр вахты сәп, ахшама гәдәр дә әлин бош дурмасын. Чүнки билмирсән ки, әввәлки мәһсулдар олаҹаг јохса сонракы јахуд һәр икиси бирликдә» (ВАИЗ 11:6).
1. Нәјә ҝөрә бөјүмә просесини мүшаһидә етмәк мараглыдыр вә биздә тәвазөкарлыг һасил едир?
ӘКИНЧИ сәбирли олмалыдыр (Јаг. 5:7). Тохуму әкдикдән сонра онун нә заман ҹүҹәрәҹәјини вә бөјүјәҹәјини ҝөзләмәлидир. Шәраит јахшы оланда ҹүҹәртиләр јаваш-јаваш торпағы дешәрәк ҝөрүнмәјә башлајыр. Сонра онлар бөјүјәрәк сүнбүл бағлајыр. Нәһајәт, бичин вахты ҝәлиб чатыр. Әсл мөҹүзә олан бөјүмә просесини мүшаһидә етмәк неҹә дә ҝөзәлдир! Тохуму бөјүдәнин Ким олдуғуну дәрк етмәјимиз биздә тәвазөкарлыг һасил едир. Биз тохуму әкә вә ону сувара биләрик. Амма ону бөјүтмәјә јалныз Аллаһ гадирдир. (1 Коринфлиләрә 3:6 ајәси илә мүгајисә ет.)
2. Әввәлки мәгаләдә арашдырдығымыз мәсәлләрдә Иса руһани бөјүмәнин һансы мәгамларына тохунду?
2 Әввәлки мәгаләдә дејилдији кими, Иса Падшаһлыг һаггында тәблиғ ишини тохум сәпән әкинчинин иши илә мүгајисә етди. Иса мүхтәлиф нөв торпаглар һаггында мәсәлиндә вурғулады ки, әкинчи јахшы тохум әксә дә, онун бөјүјүб-бөјүмәјәҹәји инсанын үрәјинин вәзијјәтиндән асылыдыр (Марк 4:3-9). Јатан әкинчи һаггында мәсәлдә исә о, әкинчинин бөјүмә просесини там анламадығыны гејд етди. Бунун сәбәби ондадыр ки, тохум инсанларын јох, Аллаһын ҝүҹү сајәсиндә бөјүјүр (Марк 4:26-29). Ҝәлин Исанын башга үч мәсәлини дә арашдыраг. Бунлар, хардал тохуму, хәмир мајасы вә тор һаггында мәсәлләрдирa.
Хардал тохуму мәсәли
3, 4. Хардал тохуму мәсәли Падшаһлыг һаггында хош хәбәрин һансы саһәләрини вурғулајыр?
3 «Маркын Мүждәси»нин 4-ҹү фәслиндә јазылан хардал тохуму мәсәли ики шеји — биринҹиси, Падшаһлыг һаггында хәбәрин һејрәтамиз инкишафы, икинҹиси, бу хәбәри гәбул едән инсанлара верилән сығынаҹағы вурғулајыр. Иса демишди: «Аллаһын Сәлтәнәтини нәјә бәнзәдәк? Јахуд ону нә мәсәллә мүгајисә едәк? Хардал тохуму кимидир. Јерә әкилдикдә тохумларын ән кичијидир, әкилдикдән сонра бөјүјүр вә бүтүн бағча биткиләриндән даһа бөјүк олур; елә ири будаглар салыр ки, ҝөјүн гушлары онун көлҝәси алтында јува тикә билирләр» (Марк 4:30-32).
4 Бурада «Аллаһын Сәлтәнәтини»н инкишафы тәсвир олунур. Онун инкишафы ерамызын 33-ҹү илинин Пентикост ҝүнүндән башлајараг Падшаһлыг һаггында хәбәрин јајылмасындан вә мәсиһчи јығынҹағынын бөјүмәсиндән ҝөрүнүр. Хардал тохуму чох хырда олдуғундан һансыса ән кичик шејин мүнасиб символудур. (Лука 17:6 ајәси илә мүгајисә ет.) Лакин бир мүддәтдән сонра онун һүндүрлүјү 3-5 метрә чата биләр, будаглары исә мөһкәм олур, буна ҝөрә дә әсл ағаҹа охшајыр (Мат. 13:31, 32).
5. Биринҹи әсрдәки мәсиһчи јығынҹағы неҹә бөјүјүрдү?
5 Ерамызын 33-ҹү илиндә тәхминән 120 мәсиһчи мүгәддәс руһла мәсһ олунанда кичик мәсиһчи јығынҹағы сајҹа артмаға башлады. Гыса вахт әрзиндә кичик мәсиһчи јығынҹағына минләрлә иманлылар гошулду. (Һәвариләрин ишләри 2:41; 4:4; 5:28; 6:7; 12:24; 19:20 ајәләрини оху.) Тәхминән 30 илин ичиндә бичиндә иштирак едәнләрин сајы о дәрәҹәдә бөјүмүшдү ки, һәвари Павел Колосдакы јығынҹаға мәктуб јазараг хош хәбәрин ‘ҝөј алтында олан һәр мәхлуга тәблиғ едилдијини’ дејә билди (Колос. 1:23). Неҹә дә валеһедиҹи артымдыр!
6, 7. а) 1914-ҹү илдән һансы артым мүшаһидә олунур? б) Гаршыда һансы артым ҝөзләнилир?
6 Ҝөјләрдә 1914-ҹү илдә Аллаһын Падшаһлығынын гурулмасындан бәри хардал «ағаҹынын» будаглары ҝөзләнилдијиндән артыг бөјүјүб. Аллаһын халгы Јешајанын сөјләдији пејғәмбәрлијин һәрфи мәнада јеринә јетдијинин шаһиди олмушду: «Ән кичик аиләдән бөјүк нәсил төрәјәҹәк, азсајлы нәсил гүдрәтли милләт олаҹаг» (Јешаја 60:22). ХХ әсрин әввәлләриндә хош хәбәри тәблиғ едән мәсһ олунмушларын кичик групу һеч тәсәввүрүнә белә ҝәтирә билмәзди ки, 2008-ҹи илдә тәхминән једди милјон Шаһид 230-дан чох өлкә вә әразидә тәблиғ едәҹәкдир. Исанын мәсәлиндәки хардал тохумунун бөјүмәси илә мүгајисә едилән бу артым доғрудан да валеһедиҹидир!
7 Бәс бунунла бөјүмә сона чатырмы? Јох. Ҝәләҹәкдә јер үзүндә јалныз Аллаһын Падшаһлығынын тәбәәләри јашајаҹаг. Падшаһлыға зидд ҝедәнләрин һамысы арадан галдырылаҹаг. Бу, инсанларын сәји сајәсиндә дејил, Али Һөкмдар Јеһованын бәшәријјәтин ишләринә мүдахилә етмәси илә баш верәҹәкдир. (Даниел 2:34, 35 ајәләрини оху.) Онда биз Јешајанын гәләмә алдығы башга бир пејғәмбәрлијин там јеринә јетмәсинин шаһиди олаҹағыг: «Сулар дәнизи неҹә долдурурса, дүнја да Рәббин билији илә елә долаҹаг» (Јешаја 11:9).
8. а) Исанын мәсәлиндәки гушлар кимләри тәмсил едир? б) Артыг бу ҝүн биз нәдән мүдафиә олунмушуг?
8 Иса дејир ки, ҝөјүн гушлары «онун [Падшаһлығын] көлҝәси алтында јува тикә билирләр». Бу гушлар, мүхтәлиф торпаглара тохум сәпәләјән әкинчи мәсәлиндәки јахшы тохумлары јејән гушлар кими, Падшаһлығын дүшмәнләрини тәмсил етмир (Марк 4:4). Бу мәсәлдәки гушлар мәсиһчи јығынҹағында сығынаҹаг ахтаран сәмими инсанлары тәмсил едир. Һәтта бу ҝүн онлар Аллаһла мүнасибәтләринә зәрәр јетирән мурдар вәрдишләрдән вә бу пис дүнјанын натәмиз әмәлләриндән мүдафиә олунурлар. (Јешаја 32:1, 2 ајәләри илә мүгајисә ет.) Јеһова да Өз Падшаһлығыны ағаҹа бәнзәдәрәк пејғәмбәрлик етмишди: «Ону Исраилин уҹа дағына әкәҹәјәм. О, гол-будаг атыб мејвә верәҹәк, мөһтәшәм бир сидр ағаҹы олаҹаг. Һәр ҹүр гуш онун алтына сығынаҹаг, будагларынын көлҝәсиндә јува гураҹаг» (Јез. 17:23).
Хәмир мајасы мәсәли
9, 10. а) Хәмир мајасы мәсәлиндә Иса һансы мәгамы вурғулајырды? б) Мүгәддәс Китабда маја адәтән нәји тәмсил едир вә Исанын өз мәсәлиндә мајаны нүмунә ҝәтирмәси илә бағлы һансы суалы нәзәрдән кечирәҹәјик?
9 Бөјүмәнин неҹә баш вердијини инсан һәмишә ҝөрмүр. Иса нөвбәти мәсәлдә бу мәгамы вурғулајараг дејир: «Ҝөјләрин Падшаһлығы хәмир мајасына бәнзәр. Гадын ону ҝөтүрүб үч өлчү унун ичиндә, бүтүн хәмир туршујунҹаја гәдәр ҝизләдир» (Мат. 13:33, И–93). Бу маја нәји тәмсил едир вә Падшаһлығын инкишафы илә неҹә бағлыдыр?
10 Мүгәддәс Китабда маја адәтән ҝүнаһын рәмзидир. Һәвари Павел гәдим Коринф јығынҹағындакы ҝүнаһкарын зәрәрли тәсирини ҝөстәрмәк үчүн маја сөзүндән мәһз бу мәнада истифадә етмишдир (1 Кор. 5:6-8). Бәс демәк олармы ки, Иса да өз мәсәлиндә пис бир шејин артмасыны ҝөстәрмәк мәгсәдилә мајаны нүмунә ҝәтирмишди?
11. Гәдим Исраилдә мајадан неҹә истифадә едирдиләр?
11 Бу суала ҹаваб вермәздән өнҹә биз үч әсас амили нәзәрә алмалыјыг. Биринҹиси, Јеһова Пасха бајрамында исраиллиләрә мајадан истифадә етмәји гадаған етсә дә, башга һалларда тәркибиндә маја олан тәгдимләри гәбул едирди. Маја, Јеһованын бир чох хејир-дуаларына ҝөрә миннәтдарлыг ифадә етмәк үчүн көнүллү сурәтдә тәгдим етдикләри үнсијјәт гурбанларынын тәркибинә дахил иди. Бу зијафәт, иштирак едәнләрә бөјүк севинҹ ҝәтирирди (Лев. 7:11-15).
12. Мүгәддәс Јазыларда рәмзләрин неҹә истифадә едилмәсиндән нә өјрәнирик?
12 Икинҹиси, мүәјјән рәмз Мүгәддәс Јазыларда бир һалда мәнфи мәнада истифадә олунса да, диҝәр һалда мүсбәт бир шеји тәмсил едә биләр. Мәсәлән, 1 Петер 5:8 ајәсиндә Шејтан аслана бәнзәдилир, бунунла онун тәһлүкәли вә јыртыҹы олдуғу ҝөстәрилир. Лакин Вәһј 5:5 ајәсиндә Иса да асланла — «Јәһуда гәбиләсиндән олан Аслан» илә мүгајисә едилир. Бурада аслан ҹәсарәт вә әдаләт рәмзи кими истифадә олунур.
13. Исанын хәмир мајасы мәсәли руһани инкишаф һаггында нәји ҝөстәрир?
13 Үчүнҹүсү, Иса мәсәлиндә мајанын бүтүнлүклә хәмири јарарсыз едәрәк ону хараб етдијини демәмишди. О, садәҹә чөрәјин неҹә биширилдијиндән данышырды. Евдар гадын хәмирин јахшы алынмасы үчүн мајаны биләрәкдән уна гатыр. Маја унун ичиндә ҝизләдилир. Беләликлә, евдар гадын хәмирин аҹыма просесинин неҹә баш вердијини ҝөрмүр. Бу бизә тохум әкиб ҝеҹәләр јатан адамын нүмунәсини хатырладыр. Иса демишдир ки, «тохум битәр, бөјүјәр, өзү [адам] исә бунун неҹә олдуғуну билмәз» (Марк 4:27). Ҝөзәҝөрүнмәз руһани инкишафын тәсвири үчүн неҹә дә садә нүмунәдир! Әввәлҹә бөјүмәни ҝөрә билмирик, амма сонда нәтиҹә бәлли олур.
14. Мәсәлдә мајанын бүтүн хәмири аҹытмасы тәблиғ ишинин һансы мәгамыны вурғулајыр?
14 Инкишафын инсан ҝөзүндән ҝизли олмасына бахмајараг, бүтүн дүнјада баш верир. Бу, хәмир мајасы мәсәлиндә вурғуланан башга бир амилдир. Маја бүтүн хәмири — ‘үч өлчү уну’ аҹыдыр (Лука 13:21). Маја кими, шаҝирдләрин сајынын артмасына тәкан верән Падшаһлығын тәблиғ иши дә о дәрәҹәдә ҝениш јајылыб ки, хош хәбәр «дүнјанын ән узаг јерләринә гәдәр» тәблиғ олунур (Һәв. иш. 1:8; Мат. 24:14). Падшаһлыг ишинин ҝенишләнмәсиндә иштирак етмәк бизим үчүн неҹә дә ҝөзәл шәрәфдир!
Тор мәсәли
15, 16. а) Тор мәсәлини данышын. б) Тор нәји тәмсил едир вә бу мәсәлдә Падшаһлығын инкишафынын һансы мәгамы вурғуланыр?
15 Өзләрини Иса Мәсиһин шаҝирдләри адландыран инсанларын кәмијјәти јох, кејфијјәти даһа ваҹибдир. Иса Падшаһлығын инкишафынын бу мәгамыны тор мәсәлиндә вурғулајыр. О демишдир: «Јенә, Сәмави Сәлтәнәт дәнизә атылан вә һәр чешид балыг тутан бир тора бәнзәр» (Мат. 13:47).
16 Падшаһлығын тәблиғ ишини тәмсил едән тора һәр нөв балыг дүшүр. Иса давам едир: «[Тор] долдуғу заман, ону саһилә чәкдиләр вә отуруб јахшылары габлара гојдулар, писләри исә чөлә атдылар. Бу дөврүн сонунда да белә олаҹагдыр. Мәләкләр ҝәлиб писләри салеһләрин арасындан кәнар едәҹәкләр; вә онлары соба аловуна атаҹаглар. Орада ағлашма вә диш гыҹыртма олаҹагдыр» (Мат. 13:48-50).
17. Тор мәсәлиндәки ајырма һансы вахта аиддир?
17 Бу ајырма, Исанын өзүнүн дедији кими, иззәтли зүһуру заманы гојунларла кечиләри бир-бириндән ајырараг онлара верәҹәји сон һөкмәми аиддир? (Мат. 25:31-33). Хејр. Сон һөкм Исанын бөјүк мәшәггәтдә ҝәлиши заманы чыхарылаҹаг. Бундан фәргли олараг, тор мәсәлиндәки ајырма «дөврүн сонунда» баш верирb. Биз мәһз һәмин дөврдә — бөјүк мәшәггәтә апаран дөврдә јашајырыг. Бәс онда ајырма просеси инди неҹә баш верир?
18, 19. а) Бизим ҝүнләрдә ајырма просеси неҹә баш верир? б) Сәмими инсанлар һансы аддымы атмалыдырлар? (Һәмчинин 21-ҹи сәһифәдәки һашијәјә бахын.)
18 Бизим ҝүнләрдә милјонларла символик балыглар бәшәријјәт «дәнизиндән» Јеһованын јығынҹағына дүшүрләр. Бәзиләри Хатирә Ҝеҹәсинә, башгалары ҝөрүшләрә ҝәлир, диҝәрләри исә Мүгәддәс Китабы өјрәнирләр. Бәс онларын һамысы һәгиги мәсиһчи олурлармы? Демәк олар ки, ‘онлар саһилә чәкилибләр’, амма Иса дејир ки, јалныз ‘јахшылар’ мәсиһчи јығынҹагларыны тәмсил едән габлара топланаҹаглар. Пис балыглар чөлә атылырлар, сонда исә, ҝәләҹәкдә олаҹаг мәһви тәмсил едән символик одлу собаја атылаҹаглар.
19 «Пис балыглар» кими, вахтилә Јеһованын Шаһидләри илә Мүгәддәс Китабы өјрәнән адамлар артыг өјрәнмирләр. Бәзиләри мәсиһчи аиләләриндә доғулсалар да, һеч вахт Мәсиһин әсл давамчылары олмаг истәмәмишдиләр. Онларын Јеһоваја хидмәт етмәјә арзулары олмамышды вә ја мүәјјән мүддәт хидмәт етдикдән сонра хидмәти атмышдыларc (Јез. 33:32, 33). Буна ҝөрә дә, һөкм ҝүнү ҝәлмәздән әввәл бүтүн сәмими инсанларын габа бәнзәр јығынҹагларда олмалары вә тәһлүкәсиз јердә галмалары сон дәрәҹәдә ваҹибдир.
20, 21. а) Падшаһлығын инкишафына даир Исанын мәсәлләринин мүзакирәсиндән нә өјрәндик? б) Сән нә етмәк әзминдәсән?
20 Исанын инкишафа даир чәкдији мәсәлләрин гыса иҹмалындан нә өјрәндик? Биринҹиси, хардал тохумунун бөјүмәси кими, бүтүн дүнјада Падшаһлыг һаггында хәбәри гәбул едән инсанларын сајында валеһедиҹи артым мүшаһидә едирик. Јеһованын ишинин гаршысыны һеч нә ала билмәз! (Јешаја 54:17). Үстәлик, хардал «ағаҹынын» ‘көлҝәси алтында јува тикәнләрә’ руһани сығынаҹаг верилмишдир. Икинҹиси, тохуму бөјүдән Аллаһдыр. Уна ҝизләдилмиш маја бүтүн хәмири аҹытдығы кими, бу инкишаф просеси һәр заман ҝөрүнмүр, лакин баш верир! Үчүнҹүсү, хош хәбәрә һај верәнләрин һамысы јахшы олмур. Исанын тор мәсәлиндәки кими, бәзиләри пис балыг чыхыр.
21 Јеһованын Өз тәшкилатына бу гәдәр јахшы адамлары ҹәлб етдијини ҝөрмәк неҹә дә севиндириҹидир! (Јәһ. 6:44). Өлкәләрдә бир-биринин ардынҹа валеһедиҹи артым баш верир. Бу инкишафа ҝөрә бүтүн иззәт Јеһова Аллаһа мәхсусдур. Бүтүн бунларын шаһиди олан һәр биримиз әсрләр өнҹә јазылан мәсләһәтә әмәл етмәлијик: «Тохумуну сәһәр вахты сәп... Чүнки билмирсән ки, әввәлки мәһсулдар олаҹаг јохса сонракы јахуд һәр икиси бирликдә» (Ваиз 11:6).
[Һашијәләр]
a Нөвбәти изаһатлар «Ҝөзәтчи Гүлләси»нин 1992-ҹи ил 15 ијун сајынын 17-22-ҹи (рус.) вә 1975-ҹи ил 1 октјабр сајынын 589-608-ҹи сәһифәләриндәки (инҝ.) мәгаләләрә дүзәлишдир.
b Матта 13:39-43 ајәләриндәки мәсәлдә Падшаһлыг ишинин диҝәр јөнү вурғуланса да, һәм бурадакы, һәм дә тор мәсәлиндәки һадисәләрин јеринә јетмә вахты үст-үстә дүшүр, јәни икиси дә ‘дөврүн сону’ адланан заманда баш верир. Әкин вә бичин иши кими, символик балыглары бир-бириндән ајырма да арамсыз просесдир вә һәмин дөвр әрзиндә баш верир («Ҝөзәтчи Гүлләси» 2000-ҹи ил 15 октјабр, сәһ. 25, 26 (рус.); «Ваһид һәгиги Аллаһа ибадәт един», сәһ. 178-181, абз. 8-11).
c Бу о демәкдирми ки, Мүгәддәс Китабы өјрәнмәји дајандыран, јахуд Јеһованын халгы илә әлагәни кәсән һәр бир кәс мәләкләр тәрәфиндән пис балыглар кими кәнара атылыр? Јох, бу белә дејил! Әҝәр кимсә бүтүн үрәклә Јеһоваја дөнмәк истәсә, Јеһова ону севинҹлә гәбул едәҹәк (Мал. 3:7).
Неҹә ҹаваб верәрдиниз?
• Исанын хардал тохуму мәсәли Падшаһлығын инкишафы вә руһани тәһлүкәсизлик барәдә нәји өјрәдир?
• Исанын мәсәлиндә хәмир мајасы нәји тәмсил едир вә Иса Падшаһлығын инкишафы барәдә нәји вурғулады?
• Тор мәсәлиндә Падшаһлыг ишинин инкишафы илә әлагәдар һансы амил вурғуланыр?
• Неҹә әмин ола биләрик ки, биз ‘габлара гојулуб’ орада галанлар сырасындајыг?
[18-ҹи сәһифәдәки шәкилләр]
Хардал тохуму мәсәли бизә Падшаһлығын инкишафы барәдә нәји өјрәдир?
[19-ҹу сәһифәдәки шәкил]
Хәмир мајасы мәсәлиндән нәји өјрәнирик?
[21-ҹи сәһифәдәки шәкил]
Јахшы балығын пис балыгдан ајырылмасы нәји тәмсил едир?