Ҝилеадын 124-ҹү бурахылышы

Миссионерләр чәјирткәләрә бәнзәјирләр

ҜӨЗӘТЧИ Гүлләсинин Мүгәддәс Китаб Мәктәби Ҝилеад һәр алты ајдан бир Бирләшмиш Штатлардакы Бет-Ел аиләсинин үзвләринин һамысынын дәвәт олундуғу бурахылыш програмыны тәшкил едир. 2008-ҹи ил мартын 8-дә Бет-Ел аиләси илә бирликдә Ҝилеад Мәктәбинин 124-ҹү синфинин бурахылышына 30-дан чох өлкәдән гонаглар ҝәлмишди. 6 411 иштиракчынын һамысы тәләбәләр үчүн әламәтдар олан бу ҝүндә онларын севинҹини бөлүшүрдүләр.

Програма сәдрлик едән Рәһбәрлик Шурасынын үзвү Стивен Летт програмы «Јеһованын символик чәјирткәләри илә бирликдә ирәли!» адлы мәрузә илә ачды. Вәһј 9:1-4 ајәләриндә 1919-ҹу илдә руһани әталәтдән чыхан бир груп мәсһ олунмушлар гәфләтән фәалијјәтә кечән бөјүк чәјирткә сүрүсүнә бәнзәдилир. Шаҝирдләрә хатырладылды ки, ‘башга гојунларын’ үзвләри кими, онлар бу символик чәјирткә сүрүсүнә гошулмушлар (Јәһ. 10:16).

Сонра Бирләшмиш Штатлардакы Бет-Ел комитәсинин үзвү Лон Шиллинг «Бир-биринизи тамамлајын» адлы мәрузә илә програмы давам етдирди. Мәрузә биринҹи әсрдә јашамыш Мүгәддәс Китаб персонажлары олан мәсиһчи әр-арвад Акила вә Прискиланын (Приска) нүмунәсинә әсасланырды (Ром. 16:3, 4). Ҝилеад синфи 28 ҹүтлүкдән ибарәт иди. Онлара хатырладылды ки, миссионер кими мүвәффәгијјәт газанмаг үчүн аилә телләрини мөһкәм сахламалыдырлар. Мүгәддәс Китабда Акиланын ады бир дәфә дә олсун, арвады Прискиласыз чәкилмәјиб. Беләликлә, һәвари Павелин вә јығынҹағын ҝөзүндә онлар ајрылмаз ҹүтлүк идиләр. Буна бәнзәр тәрздә, бу ҝүн миссионер әр-арвадлар да бир јердә ишләмәли, бир јердә ибадәт етмәли вә хариҹи өлкәјә алдыглары тәјинатларынын гејри-ади чәтинликләринә бир јердә синә ҝәрмәли, беләликлә дә, бир-бирини тамамламалыдырлар (Јар. 2:18).

«Јеһованын јахшылығына һај верин» адлы нөвбәти мәрузәни Рәһбәрлик Шурасынын үзвү Гај Пирс тәгдим етди. Пирс гардаш изаһ етди ки, јахшы олмаг пислик етмәмәкдән даһа бөјүк мәна дашыјыр. Јахшы инсан башгаларына фајда ҝәтирмәк үчүн јахшы ишләр ҝөрүр. Ән бөјүк јахшылығы Јеһова Аллаһ тәзаһүр етдирир (Зәк. 9:16, 17, КМ). Аллаһын јахшылығы вә мәһәббәти бизи башгаларына јахшылыг етмәјә тәшвиг едән һәрәкәтвериҹи гүввә ола биләр. Пирс гардаш тәләбәләри тәрифләјәрәк, сөзүнә белә јекун вурду: «Сиз јахшылыг едирсиниз. Биз әминик ки, Јеһова Аллаһын сизә верәҹәји истәнилән тәјинатда јахшылыг етмәклә Аллаһын јахшылығына бундан сонра да ҹаваб верәҹәксиниз».

Сонра јениҹә Ҝилеад мәктәбинин мүәллими тәјин олунмуш кечмиш миссионер Мајкл Бөрнет «Буну ҝөзләринизин арасына алын бағы кими тахын» адлы нитг илә чыхыш етди. Исраиллиләр ҝөзләринин арасына алын бағы тахырмыш кими, Јеһованын онлары Мисирдән мөҹүзәви шәкилдә гуртардығыны јадда сахламалы идиләр (Чых. 13:16, КМ). Тәләбәләрә Ҝилеад мәктәбиндә алдыглары зәнҝин тәлими, мәҹази дилдә десәк, ҝөзләринин арасына алын бағы тахырмыш кими јадда сахламаг нәсиһәт едилди. Бөрнет гардаш миссионерләрин өз араларында вә башгалары илә јаранан истәнилән анлашылмазлығы һәлл едәркән һәлим вә тәвазөкар олмағын, еләҹә дә Мүгәддәс Китаб принсипләрини тәтбиг етмәјин зәрурилијини вурғулады (Мат. 5:23, 24).

Ҝилеадын гоҹаман мүәллими Марк Нумар «Сәнин һаггында һансы маһны охунаҹаг?» адлы мәрузә илә күрсүјә галхды. Гәдим заманларда мүһарибәдә газанылан гәләбәни нәғмәләрлә гејд етмәк адәти варды. Белә нәғмәләрдән бириндә Рувен, Дан вә Ашер өзүнү әзијјәтә вермәјән кими тәсвир олундуғу һалда, Зевулунун фәдакарлығы тәрәннүм едилир (Һак. 5:16-18). Һәр бир мәсиһчинин һәрәкәтләри, маһнынын сөзләри кими, әввәл-ахыр башгаларына мәлум олур. Инсан Аллаһын ишиндә чалышган вә теократик гајдалара сәдагәтли олмагла Јеһованын гаршысында јахшы ад газанаҹаг вә гардашлары үчүн јахшы нүмунә олаҹаг. Јығынҹагдакы баҹы-гардашлар бизим һәрәкәтләримизлә јазылан мәҹази нәғмәјә гулаг асдыгҹа, һәмин јахшы нүмунәни изләмәјә тәшвиг олунурлар.

Ҝилеадда алдыглары тәлимин бир һиссәси кими, 124-ҹү синфин һамысы бирликдә тәхминән 3 000 саат тәблиғ едибләр. «Мүгәддәс руһун рәһбәрлијини изләјин» адлы мөвзуда тәләбәләр тәблиғ заманы баш верән һадисәләрдән бәзиләрини сәһнәләшдирәрәк Теократик Мәктәбләр Шөбәсиндән олан Сем Роберсона бир нечә һадисә данышдылар. Бу руһландырыҹы һадисәләрдән сонра Бирләшмиш Штатлардакы филиалын комитә үзвү Патрик ЛаФранк һазырда мүхтәлиф өлкәләрдә хидмәт едән Ҝилеад мәзунларындан мүсаһибәләр алды. Шаҝирдләр бу гардашлардан алдыглары фајдалы мәсләһәтләрә ҝөрә чох миннәтдар идиләр.

Рәһбәрлик Шурасынын үзвү Ентони Морис «Унутмајын, ҝөрүнән шејләр мүвәггәтидир» адлы сонунҹу мәрузә илә чыхыш етди. Мүгәддәс Јазылар бизә һазырда үзләшдијимиз һәр һансы мүвәггәти сыхынтыја дејил, Јеһованын верәҹәји ҝәләҹәк хејир-дуалара диггәтимизи ҹәмләмәји нәсиһәт едир (2 Кор. 4:16-18). Сон дәрәҹә јохсуллуг, әдаләтсизлик, зүлм, хәстәлик вә өлүм мүасир һәјатын ҝерчәкликләридир. Миссионерләр бу фаҹиәләрдән бәзиләри илә үзләшә биләрләр. Анҹаг бүтүн бунларын мүвәггәти олдуғуну јадда сахламаг бизә руһани таразлығы горумаға вә үмидимизи итирмәмәјә көмәк едәҹәк.

Летт гардаш програма јекун вураркән мәзунлар сәһнәдә ону динләјирдиләр. Гардаш онлары тәслим олмамаға тәшвиг едиб деди: «Әҝәр Јеһова бизимләдирсә, нөгсансызлығымыздан бизи һеч нә дөндәрә билмәз». О, јени миссионерләри чәјирткәләрә бәнзәјәрәк Јеһоваја гәтијјәтлә хидмәт етмәјә, һәмишә чалышган, сәдагәтли вә итаәткар галмаға тәшвиг етди.

[30-ҹу сәһифәдәки чәрчивә]

СИНФИН СТАТИСТИК МӘЛУМАТЛАРЫ

Тәмсил едилән өлкәләрин сајы: 7

Тәјинат верилән өлкәләрин сајы: 16

Тәләбәләрин сајы: 56

Орта јаш һәдди: 33,8

Һәгигәтдә олмаларынын орта ил һәдди: 18,2

Таммүддәтли хидмәтләринин орта ил һәдди: 13,8

[31-ҹи сәһифәдәки шәкил]

Ҝөзәтчи Гүлләсинин Мүгәддәс Китаб Мәктәби Ҝилеадын 124-ҹү синфинин бурахылышы

Ашағыдакы сијаһыда ҹәрҝәләр габагдан архаја доғру нөмрәләниб, адлар исә һәр ҹәрҝәдә солдан саға садаланыб.

1) Николсон, Т.; Мејн, Һ.; Сенҝеј, Ј.; Снеп, Л.; Вонејгас, К.; Поу, Л. 2) Сантана, С.; Оу, К.; Лематре, К.; Вилјамс, Н.; Александр, Л. 3) Вудз, Б.; Стејнтон, Л.; Һентли, Е.; Алварез, Г.; Круз, Ҹ.; Бенет, Ҹ. 4) Уилјамсон, А.; Гонсалес, Н.; Зүроски, Ҹ.; Деһанд, И.; Меј, Ҹ.; Дјемми, Ҹ.; Тавенер, Л. 5) Лематре, У.; Һарис, А.; Уелз, С.; Роҹерс, С.; Дурант, М.; Сенҝеј, Ж.; 6) Һентли, Т.; Вонејгас, А.; Поу, А,; Сантана, М.; Бенет, В.; Тавенер, Д.; Оу, М. 7) Зүроски, М.; Роҹерс, Г.; Дјемми, Д.; Николсон, Л.; Алварез, К.; Снеп, Ҹ. 8) Һарис, М.; Гонсалес, П.; Мејн, Ш.; Вудз, С.; Стејнтон, Б.; Уилјамсон, Д.; Дурант, Ҹ. 9) Круз, П.; Деһанд, Б.; Вилјамс, Д.; Уелз, С.; Александр, Д.; Меј, М.

[32-ҹи сәһифәдәки шәкил]

Ҝилеад мәктәби Ҝөзәтчи Гүлләсинин Тәлим Мәркәзиндә јерләшир