Дәгиг биликдә «бөјүк шөвглә» тәрәгги ет
ЈЕҺОВАНЫН бүтүн хидмәтчиләри Ону разы салмаг истәјир. Буна ҝөрә биз иманымызы мөһкәмләндирмәјә вә мүгәддәс хидмәтимизи сәјлә иҹра етмәјә ҹан атырыг. Лакин һәвари Павел диггәтимизи, онун ҝүнләриндә бәзи јәһудиләрин мәруз галдыглары ҝизли тәһлүкәјә јөнәлдир: «Аллаһ үчүн сәјләри вардыр, лакин елмә [«дәгиг билијә», ЈД] әсасланмамышдыр» (Ром. 10:2). Ҝөрүндүјү кими, Јеһоваја иманымыз вә ибадәтимиз садәҹә һиссләрә әсасланмамалыдыр. Јараданымыз вә Онун ирадәси һаггында дәгиг билијимиз олмалыдыр.
Башга бир ајәдә исә Павел Аллаһа мәгбул давранышла алдығымыз билијин бир-бири илә бағлы олдуғуну гејд едир. О дуа едирди ки, Мәсиһин давамчылары ‘Рәббә лајиг шәкилдә һәрәкәт едиб, Ону һәр ҹәһәтдән разы салмаг’ үчүн Аллаһын ирадәси һаггында дәгиг билијә јијәләнәрәк ‘һәр ҹүр хејирли ишдә сәмәрә вериб, Аллаһы танымагда тәрәгги етсинләр’ (Колос. 1:9, 10). Нәјә ҝөрә «дәгиг билијә» јијәләнмәк чох ваҹибдир вә нә үчүн бу биликдә тәрәгги етмәлијик?
Иманымызын тәмәли
Аллаһ вә Онун ирадәси һаггында Мүгәддәс Китабда ачыгланан дәгиг билик иманымызын тәмәлини тәшкил едир. Белә билик олмадан Јеһоваја иманымыз картдан дүзәлдилән вә бир балаҹа күләк әсән кими учуб-дағылан евә бәнзәјәрди. Павел бизи тәшвиг едир ки, ‘ағлымызы јениләшдирәрәк’ Аллаһа мүгәддәс хидмәтимизи шүурлу шәкилдә иҹра едәк (Ром. 12:1, 2). Мүгәддәс Китабы мүнтәзәм охујуб-өјрәнмәк бу саһәдә бизә көмәк едә биләр.
Полшада јашајан даими пионер Јева дејир: «Әҝәр Аллаһын Кәламыны мүнтәзәм шәкилдә арашдырмасајдым, Јеһова һаггында дәгиг биликдә тәрәгги етмәздим. Чох кечмәмиш мәсиһчи мәнлијими итирәрдим вә Аллаһа иманым зәифләјәрди, бир сөзлә, руһани ҹәһәтдән ифласа уғрајардым». Ҝәлин һеч заман буна јол вермәјәк! Јеһова һаггында дәгиг биликдә тәрәгги едән вә бунунла Онун илтифатыны газанан бир нәфәрин нүмунәсинә бахаг.
«Ганунуну нә гәдәр севирәм!»
Мүгәддәс Китабда 119-ҹу мәзмур кими танынан нәғмәдә мәзмурчунун Јеһованын ганунлары, өјүдләри, гајдалары, әмрләри вә һөкмләри һаггында һиссләри тәсвир олунур. Мәзмурчу јазырды: «Гајдаларындан зөвг алырам... Өјүдләриндән зөвг алырам». О һәмчинин јазмышды: «Ганунуну нә гәдәр севирәм! Һәмишә онун үзәриндә дәриндән дүшүнүрәм» (Мәз. 119:16, 24, 47, 48, 77, 97).
«Зөвг алырам» вә «дәриндән дүшүнүрәм» ифадәләри Аллаһын Кәламы үзәриндә дүшүнмәк, јәни дүшүнмәкдән зөвг алмаг демәкдир. Бу ифадәләр ҝөстәрир ки, мәзмурчу Аллаһын ганунларыны өјрәнмәји чох севирди. Мәзмурчунун мәһәббәти садәҹә ҝүҹлү емосијалардан ирәли ҝәлмирди. Әксинә, о, ганунлар үзәриндә дүшүнмәји, Јеһованын сөзләрини анламағы сәмими-гәлбдән арзулајырды. Онун әһвал-руһијјәсиндән ҝөрмәк олар ки, Аллаһ вә Онун ирадәси һаггында мүмкүн гәдәр дәгиг билик әлдә етмәк истәјирди.
Шүбһә јохдур ки, мәзмурчунун Аллаһын Кәламына олан мәһәббәти үрәјинин дәринлијиндән ҝәлирди. Биз дә өзүмүздән соруша биләрик: мәним дә Аллаһ Кәламына гаршы дәрин мәһәббәтим вармы? Мүгәддәс Китабы һәр ҝүн охујуб-арашдырмагдан һәзз алыраммы? Аллаһын Кәламыны чалышганлыгла охујураммы вә охумаздан әввәл Јеһоваја дуа едирәмми? Бу суаллара вердијимиз ҹаваблардан Аллаһ һаггында дәгиг биликдә нә гәдәр тәрәгги едиб-етмәдијимизи ҝөрмәк олар.
Јева дејир: «Мән даима шәхси өјрәнмәми јахшылашдырмаға чалышырам. «“Ҝөзәл торпаға” бахын» (рус.) брошүрасыны алдыгдан сонра, демәк олар ки, ону һәр шәхси өјрәнмәмдә истифадә едирәм. Лазым ҝәлдикдә, “Мүгәддәс Јазыларын дәрк едилмәси” (инҝ.) вә диҝәр нәшрләрдән тез-тез истифадә етмәјә чалышырам».
Аилә гајғылары чох олан Војтсех илә Малгожатанын да нүмунәсини нәзәрдән кечирәк. Бу әр-арвад шәхси өјрәнмә үчүн вахты һарадан тапыр? «Биз имкан дахилиндә вахт едиб Аллаһын Кәламыны ајры-ајрылыгда арашдырырыг. Сонра исә тапдығымыз мараглы вә ја руһландырыҹы фикирләри аиләви өјрәнмәмиздә вә ҝүндәлик сөһбәтләримиздә бөлүшүрүк». Дәрин шәхси өјрәнмә онлара чох севинҹ ҝәтирир вә ‘дәгиг биликдә’ тәрәгги етмәјә көмәк едир.
Өјрәндикләрини миннәтдарлыгла гәбул ет
Биз мәсиһчиләр билирик ки, Аллаһ ‘бүтүн инсанларын хилас олуб, һәгигәти дәрк етмәләрини’ истәјир (1 Тим. 2:3, 4). Бу, Мүгәддәс Китабы охумағын вә ону ‘анламағын’ ваҹиблијини вурғулајыр (Мат. 15:10). Буна наил олмаг үчүн өјрәндикләрини миннәтдарлыгла гәбул ет. Павелин тәблиғ етдији веријалыларда мәһз белә әһвал-руһијјә варды: «Бу јәһудиләр... “Бу тәлимләр доғрудурму?” — дејәрәк һәр ҝүн Мүгәддәс Јазылары арашдырараг Аллаһ кәламыны бөјүк шөвглә гәбул етдиләр» (Һәв. иш. 17:11).
Мүгәддәс Китабы өјрәнәндә сән дә гәдим веријалылар кими буну шөвглә вә фикрини лазымсыз шејләрә јајындырмадан едирсәнми? Мәсиһчи әввәлләр охујуб-арашдырмағы хошламаса да, веријалыларын нүмунәсини тәглид етмәјә чалыша биләр. Бундан башга, бәзи инсанлар јашлашдыгҹа охујуб-өјрәнмәјә даһа аз мејлли олурлар, мәсиһчиләр исә белә олмалы дејилләр. Јашымыздан асылы олмајараг, диггәтимизи мүәјјән шејә ҹәмләмәјә мүвәффәг ола биләрик. Охујанда башгалары илә бөлүшә биләҹәјин фикирләри ахтармаг олар. Мәсәлән, шәхси өјрәнмә заманы охудугларыны вә ја өјрәндикләрини һәјат јолдашынла, јахуд мәсиһчи достунла бөлүшмәји гаршына мәгсәд гоја биләрсәнми? Белә етмәклә бу шејләр јаддашында вә үрәјиндә һәкк олунаҹаг вә башгаларына да мүсбәт тәсир ҝөстәрәҹәк.
Шәхси өјрәнмә заманы Јеһованын ‘ганунуну өјрәнмәк үчүн өз үрәјини һазырлајан’ Аллаһын хидмәтчиси Езранын нүмунәсини тәглид ет (Езра 7:10, КМ). Сән буну неҹә едә биләрсән? Илк нөвбәдә, арашдырма апармаг үчүн мүнасиб шәраит јарат. Сонра отур вә дуада Јеһовадан рәһбәрлик вә мүдриклик истә (Јаг. 1:5). Өзүндән соруш: мән бу өјрәнмәдән нә ҝөзләјирәм? Охујаркән әсас фикирләри сезмәјә чалыш. Ола билсин, сән онлары вә ја хүсусилә јадда сахламаг истәдијин парчалары гејд етмәк истәјәсән. Бу материаллардан тәблиғ едәркән, гәрар гәбул едәркән вә ја һәмиманлыларыны руһландыраркән неҹә истифадә едәҹәјини дүшүн. Сонда арашдырдығын материалы гысаҹа тәкрарла. Белә етмәклә өјрәндикләрин јаддашында јахшы һәкк олунаҹаг.
Јева неҹә арашдырма апардығы барәдә данышыр: «Мүгәддәс Китабы охујанда чарпаз истинадлары ачыр, “Ҝөзәтчи Гүлләси нәшрләринин индекси”ндән вә “Ҝөзәтчи Гүлләсинин китабханасы”ндан (ҸД-РОМ) истифадә едирәм. Хидмәтдә истифадә етмәк истәдијим фикирләри өзүм үчүн гејд едирәм».
Бәзиләри руһани ишләрлә мәшғул олараг узун илләр дәрин арашдырмадан һәзз алырлар (Сүл. мәс. 2:1-5). Бунунла јанашы, онларын мәсулијјәтләри чохдур вә шәхси өјрәнмәјә вахт ајырмагда чәтинликләри олур. Сәнинлә дә вәзијјәт беләдирсә, графикиндә һансы дәјишикликләри едә биләрсән?
Вахты неҹә тапа биләрик?
Јәгин разылашарсан ки, хошладығымыз мәшғулијјәтә һәмишә асанлыгла вахт тапырыг. Бир чохлары фикир вермишләр ки, Мүгәддәс Китабы бүтөв охумаг кими реал мәгсәдләр гојмаг шәхси өјрәнмә илә мәшғул олмаға көмәк едир. Доғрудур, узун-узады нәсил шәҹәрәләрини, гәдим мәбәдин тәфәррүаты илә тәсвирини, ҝүндәлик һәјатымыза аид олмајан кими ҝөрүнән чәтин пејғәмбәрликләри охумаг асан олмаја биләр. Мәгсәдинә наил олмагда сәнә көмәк едәҹәк аддымлар атмаға чалыш. Мәсәлән, Мүгәддәс Китабын чәтин ҝөрүнән һиссәләрини арашдырмаздан әввәл, онун тарихи вә практики тәтбиги һаггында охуја биләрсән. Белә мәлуматы, тәхминән 50 дилдә бурахылан «Һәр Мүгәддәс Јазы Аллаһдан илһам алмыш вә фајдалыдыр» китабында тапмаг олар.
Һәмчинин Мүгәддәс Китабдан охудугларыны — гәһрәманлары, һадисәләри тәсәввүрүндә ҹанландырмаг сәнә көмәк едәҹәк. Бу бир нечә мәсләһәти тәтбиг етмәк сајәсиндә шәхси өјрәнмән сәнә даһа чох мәмнунлуг вә фајда ҝәтирәҹәк вә бунун үчүн вахт ајырмаға даһа чох сәј ҝөстәрәҹәксән. Мүгәддәс Китабы ҝүндәлик охумаг вәрдишини горумаг даһа асан олаҹаг.
Бәс бу мәсләһәтләр аилә мәсулијјәти чох олан мәсиһчиләрә дә фајдалы ола биләрми? Нәјә ҝөрә бир јердә отуруб аиләви өјрәнмәнин ҝәтирә биләҹәји фајдалары раһат мүзакирә етмәјәсиниз? Сөһбәт әснасында Мүгәддәс Китабдан бир парчаны мүзакирә етмәк үчүн һәр ҝүн вә ја мүәјјән ҝүнләр сәһәр бир гәдәр еркән дурмаг кими јахшы фикирләр јарана биләр. Јахуд мүзакирәләриниздән ҝөрүнәҹәк ки, аилә графикиниздә дәјишиклик етмәк лазымдыр. Мәсәлән, бәзи аиләләр ҝөрүбләр ки, ҝүндәлик ајәни мүзакирә етмәк вә ја Мүгәддәс Китабдан мүәјјән бир парчаны охумаг үчүн мүнасиб вахт аиләликҹә јемәкдән сонрадыр. Сүфрәни јығышдырмаздан вә ја башга бир ишә башламаздан өнҹә аилә 10-15 дәгигә әрзиндә ја ҝүндәлик ајәни мүзакирә едир, ја да Мүгәддәс Китабы охујур. Башланғыҹда бу, бир балаҹа чәтин ҝөрүнә биләр, амма тезликлә вәрдиш һалыны алаҹаг вә севинҹ ҝәтирәҹәк.
Војтсех вә Малгожата өз аиләләри барәдә дејирләр: «Әввәлләр вахтымыз бош вә әһәмијјәтсиз ишләрә ҝедирди. Гәрара ҝәлдик ки, интернет васитәсилә мәктублашмаға сәрф етдијимиз вахты азалдаг. Һәмчинин бәзи әјләнҹә вә севимли мәшғулијјәтләримиздән имтина едиб, дәрин шәхси өјрәнмәмиз үчүн конкрет ҝүн вә вахт тәјин етдик». Бу аилә, шүбһәсиз ки, белә дәјишикликләр етдијинә пешман дејил. Бу ҝөзәл нүмунәдир, елә дејилми?
Дәгиг биликдә тәрәгги етмәјә дәјәр!
Аллаһын Кәламыны дәриндән арашдырмаг ‘һәр ҹүр хејирли ишдә сәмәрә вермәјимизә’ көмәк едәҹәк (Колос. 1:10). Бу сәндә вәрдиш һалыны алса, тәрәггин һамыја ашкар олаҹаг. Сән Мүгәддәс Китаб һәгигәтләрини дәриндән дәрк едән руһани инсан олаҹагсан. Гәрарларын даһа таразлы олаҹаг, башгаларына даһа јахшы көмәк едә биләҹәксән вә адәтән мәлуматсыз инсанларын дүшдүјү ифрата вармајаҹагсан. Үстәлик, Јеһоваја даһа јахын олаҹагсан. Онун хүсусијјәтләрини гијмәтләндирәҹәксән, бу исә сәнин башгаларына Онун һаггында данышмағында өзүнү бүрузә верәҹәк (1 Тим. 4:15; Јаг. 4:8).
Јашындан вә тәҹрүбәндән асылы олмајараг, Аллаһын Кәламындан зөвг алмаг вә өјрәндикләрини миннәтдарлыгла гәбул етмәк үчүн әлиндән ҝәләни ет. Әмин ола биләрсән ки, Јеһова сәнин сәјини унутмајаҹаг (Ибр. 6:10). О сәнин башындан бол хејир-дуалар јағдыраҹаг.
[13-ҹү сәһифәдәки чәрчивә]
‘Дәгиг биликдә тәрәгги едәндә’...
Јеһоваја иманымыз мөһкәмләнир вә Она лајиг шәкилдә һәрәкәт едирик
биз даһа анлајышлы вә дәрракәли олуруг, мүдрик гәрарлар гәбул едирик
(Мәз. 119:99).
башгаларына Јеһоваја јахынлашмаға көмәк етмәкдән севинҹ дујуруг
[14-ҹү сәһифәдәки шәкилләр]
Өјрәнмә үчүн мүнасиб јер тапмаг чәтин олса да, буна дәјәр
[15-ҹи сәһифәдәки шәкил]
Бәзи аиләләр Мүгәддәс Китабы јемәкдән сонра охујурлар