Јеһованын Кәламы ҹанлыдыр
Салоникилиләрә вә Тимотејә јазылан биринҹи вә икинҹи мәктублардан диггәтәлајиг фикирләр
САЛОНИКДӘКИ јени јығынҹаг һәвари Павел тәрәфиндән тәсис едилдији ҝүндән тәгибләрә мәруз галыр. Бу сәбәбдән, тәхминән 20 јашында олан Тимотеј орадан јахшы хәбәрлә гајыданда Павел салониклиләрә мәктуб јазыб онлары тәрифләмәјә вә руһландырмаға тәшвиг олунур. Ола билсин, ерамызын 50-ҹи илинин сонунда јазылмыш бу мәктуб Павелин јаздығы илһамланмыш мәктубларындан биринҹиси иди. Чох чәкмәмиш о, Салоникдәки мәсиһчиләрә икинҹи мәктубуну јазыр. Бу дәфә Павел бәзиләринин јанлыш дүшүнҹә тәрзинә дүзәлиш верир вә гардашлары иманда мөһкәм дурмаға тәшвиг едир.
Тәхминән он ил сонра Павел Македонијада, Тимотеј исә Ефесдәдир. Павел Тимотејә үнванландығы мәктубунда ону тәшвиг едир ки, Ефесдә галсын вә јығынҹагдакы јаланчы мүәллимләрин тәсиринә бахмајараг, һәмиманлыларына Јеһова илә јахшы мүнасибәтләрини горујуб сахламаға көмәк етсин. Ерамызын 64-ҹү илиндә Ромада баш верән јанғындан сонра мәсиһчиләрә гаршы тәгиб далғасы галханда Павел Тимотејә икинҹи мәктубуну јазыр. Бу онун Аллаһдан илһам алараг јаздығы сон мәктубдур. Бу ҝүн биз Павелин бу дөрд мәктубундакы руһландырыҹы фикирләрдән вә мәсләһәтләрдән фајдалана биләрик (Ибр. 4:12).
‘ОЈАГ ДУРУН’
Павел салониклиләри ‘имандан ирәли ҝәлән фәалијјәтләринә, мәһәббәтдән һасил олан әмәкләринә вә мәтанәтләринә’ ҝөрә тәрифләјир. Павел дејир ки, онлар онун ‘үмиди, севинҹи, ифтихар едәҹәји таҹыдыр’ (1 Салон. 1:3; 2:19).
Салоникдәки мәсиһчиләри бир-бирләринә дирилмә үмиди илә тәсәлли вермәјә тәшвиг етдикдән сонра Павел јазыр: «Рәббин [«Јеһованын», ЈД] Ҝүнү оғру ҝеҹә ҝәлән кими ҝәләҹәк». Павел онлара ‘ојаг дуруб ајыг олмағы’ мәсләһәт ҝөрүр (1 Салон. 4:16-18; 5:2, 6).
Мүгәддәс Китаб суалларына ҹаваблар:
4:15-17 — ‘Рәбби һавада гаршыламаг үчүн булудлар ичиндә галдырылаҹаг’ оланлар кимләрдир вә бу неҹә баш верир? Онлар Мәсиһин Падшаһ кими иштиракы әрзиндә јашајан мәсһ едилмишләрдир. Онлар Исаны ҝөзәҝөрүнмәз сәмави аләмдә гаршылајырлар. Амма буну етмәк үчүн әввәлҹә өлмәли вә руһани варлыглар кими дирилмәлидирләр (Ром. 6:3-5; 1 Кор. 15:35, 44). Мәсиһин иштиракы артыг башладығы үчүн бу ҝүн өлән мәсһ олунмушлар өлү вәзијјәтдә галмырлар — дәрһал дирилдилиб ҝөјә ‘галдырылырлар’ (1 Кор. 15:51, 52).
5:23 — Павел дуасында: «Руһунуз, ҹаныныз вә бәдәниниз гүсурсуз һифз олунсун», — демәклә нәји нәзәрдә тутурду? Павел бу сөзләри демәклә Салоникдәки мәсһ олунмушларын да дахил олдуғу мәсиһчи јығынҹағыны нәзәрдә тутурду. О, садәҹә јығынҹағын јох, онун ‘руһунун’, јәни орадакы әһвал-руһијјәнин һифз олунмасы барәдә дуа едирди. Павел јығынҹағын ‘ҹаны’, јәни һәјаты вә ја мөвҹудлуғу, һәмчинин онун ‘бәдәни’ — бүтүн мәсһ олунмушлар барәдә дә дуа едирди (1 Кор. 12:12, 13). Бу дуа Павелин јығынҹаға ҝөрә чох нараһат олдуғуну ҝөстәрир.
Бизим үчүн ибрәт дәрсләри:
1:3, 7; 2:13; 4:1-12; 5:15. Мәсләһәт вермәјин ән јахшы үсулу инсаны һәм тәрифләмәк, һәм дә даһа јахшы давранмаға тәшвиг етмәкдир.
4:1, 9, 10. Јеһованын хидмәтчиләри даима руһән инкишаф етмәлидирләр.
5:1-3, 8, 20, 21. Јеһованын ҝүнү јахынлашдыгҹа ‘ајыг олмалы, көксүмүзә иман вә мәһәббәт зиреһини, башымыза дәбилгә олараг хилас үмидини ҝејмәлијик’. Бундан әлавә, биз Аллаһын пејғәмбәрлик Кәламы олан Мүгәддәс Китаба ҹидди диггәт јетирмәлијик.
«САБИТ ДУРУН»
Јығынҹагда бәзиләри Павелин биринҹи мәктубунда јаздыгларыны тәһриф едәрәк Мәсиһин ‘иштиракынын’ (ЈД) чатдығыны иддиа едирләр. Павел бу сәһв фикри дүзәлтмәк үчүн нәјин ‘әввәлҹә ҝәләҹәјиндән’ бәһс едир (2 Салон. 2:1-3).
Павел тәшвиг едир: «Сабит дурун вә... өјрәндијиниз тәлимләрә бағлы галын». О, онлара тапшырыр ки, ‘бош-бикар ҝәзән һәр гардашдан узаглашсынлар’ (2 Салон. 2:15; 3:6).
Мүгәддәс Китаб суалларына ҹаваблар:
2:3, 8 — «Һагсызлыг адамы» (И-93) кимдир вә о, неҹә мәһв едиләҹәк? Бу ‘адам’ Христиан дүнјасынын руһаниләрини тәмсил едир. Писләрә гаршы Аллаһын һөкмләрини бәјан вә иҹра етмәк сәлаһијјәти верилән шәхс «Кәлам», јәни Аллаһын Баш Нүмајәндәси олан Иса Мәсиһдир (Јәһ. 1:1). Буна ҝөрә дә демәк олар ки, Иса «ағзындан чыхан нәфәслә [гүввәсилә]» һагсызлыг адамыны мәһв едәҹәк.
2:13, 14 — Мәсһ олунмушлар һансы мәнада ‘та башланғыҹдан хилас үчүн сечилибләр’? Јеһова демишди ки, гадынын өвлады Шејтанын башыны әзәҹәк вә мәсһ олунмушлар да бир синиф кими елә һәмин вахт хилас үчүн тәјин едилмишди (Јар. 3:15). Јеһова онларын ҹаваб верәҹәкләри тәләбләри, едәҹәкләри ишләри вә мәруз галаҹаглары сынаглары да билдирмишди.
Бизим үчүн ибрәт дәрсләри:
1:6-9. Јеһова Өз һөкмләрини салеһләрлә писләри бир-бириндән ајырараг иҹра едәҹәк.
3:8-12. Өзүмүзү тәмин етмәк вә хидмәтимизи давам етдирмәк үчүн ишләмәлијик, амма Јеһованын ҝүнүнүн јахынлашмасы буну етмәмәјә бәһанә олмамалыдыр. Бош-бикар ҝәзсәк, тәнбәлләшәҹәјик вә ‘башгаларынын ишинә мүдахилә етмәјә’ башлајаҹағыг (1 Пет. 4:15).
«СӘНӘ ҺӘВАЛӘ ЕДИЛМИШ ӘМАНӘТИ ҺИФЗ ЕТ»
Павел Тимотејә ‘јахшы дөјүшчү кими дөјүшмәји, имана вә тәмиз виҹдана’ саһиб олмағы өјрәдир. Һәвари јығынҹагда тәјинат алан гардашлар үчүн тәләбләр садалајыр. О, Тимотејә һәм дә ‘мурдар әфсанәләри рәдд етмәји’ нәсиһәт едир (1 Тим. 1:18, 19; 3:1-10, 12, 13; 4:7).
Павел јазыр: «Ағсаггалы [јәни јашлы адамы] мәзәммәтләмә». О, Тимотеји тәшвиг едир: «Сәнә һәвалә едилмиш әманәти һифз ет, Аллаһа мәкруһ олан бошбоғазлыг вә јалан јерә “елм” адланан бир-биринә зидд фикирләриндән гачын» (1 Тим. 5:1; 6:20).
Мүгәддәс Китаб суалларына ҹаваблар:
1:18; 4:14 — Тимотеј һагда һансы «пејғәмбәрлик сөзләри» сөјләнилмишди? Ола билсин, бу, Павел икинҹи миссионер сәјаһәти заманы Листраја баш чәкәркән Тимотејин мәсиһчи јығынҹағында ҝәләҹәк ролу барәдә Аллаһын илһамы илә сөјләнилән пејғәмбәрлик сөзләри иди (Һәв. иш. 16:1, 2). Бу «пејғәмбәрлик сөзләри»нә әсасланараг јығынҹағын ағсаггаллары ҝәнҹ Тимотејин үзәринә ‘әлләрини гојуб’ ону хүсуси хидмәт үчүн тәјин етмишдиләр.
2:15 — Гадын ‘ушаг доғмагла’ неҹә ‘хилас олур’? Ушаг доғмаг, онун гајғысына галмаг вә ев ишләрини ҝөрмәк гадыны ‘бошбоғаз олуб, башгаларынын ишинә бурнуну сохмагдан’ ‘хилас едә’, јәни горуја биләр (1 Тим. 5:11-15).
3:16 — «Аллаһа бағлылығын мүгәддәс» (ЈД) сирри нәдәдир? Инсанын Јеһованын али һөкмранлығына мүкәммәл сурәтдә табе олмасынын мүмкүн олуб-олмадығы әсрләр боју сирр олараг галмышды. Иса өләнәдәк Аллаһ гаршысында мүкәммәл нөгсансызлығыны горумагла бу мәсәләјә ајдынлыг ҝәтирди.
Бизим үчүн ибрәт дәрсләри:
4:15. Һәгигәтдә олдуғумуз илләрдән асылы олмајараг, һамымыз даима тәрәгги етмәли вә Јеһова илә мүнасибәтләримизи мөһкәмләндирмәлијик.
6:2. Әҝәр һәмиманлымыз бизи ишә ҝөтүрүбсә, өз вәзијјәтимиздән суи-истифадә етмәмәли вә она мәсиһчи олмајан мүдирдән даһа бөјүк һәвәслә хидмәт етмәлијик.
«АЛЛАҺЫН КӘЛАМЫНЫ ТӘБЛИҒ ЕТ»
Павел Тимотеји ҝәләҹәк чәтин ҝүнләрә һазырламаг үчүн јазыр: «Аллаһ бизә горхаглыг руһу дејил, гүдрәт, мәһәббәт вә нәфсә һаким олмаг руһу вермишдир». Тимотејә мәсләһәт олунур: ‘Рәббин гулу тоггушмаја баш гошмамалы, амма һамы илә сакит рәфтар етмәли, өјрәтмәјә һазыр олмалыдыр’ (2 Тим. 1:7; 2:24).
Павел Тимотејә нәсиһәт верир: «Өјрәндијин вә әмин олдуғун шејләрә әмәл етмәкдә давам ет». Дөнүкләрин тәлимләри баш алыб ҝетдијинә ҝөрә һәвари ҝәнҹ ағсаггала мәсләһәт верир: «Аллаһын кәламыны тәблиғ ет... инсанлары... игна, мәзәммәт, тәшвиг ет» (2 Тим. 3:14; 4:2).
Мүгәддәс Китаб суалларына ҹаваблар:
1:13, (КМ) — «Сағлам сөзләрин нүмунәси» нә демәкдир? «Иса Мәсиһин сөзләри» олан ‘сағлам сөзләр’ һәгиги мәсиһчи тәлимләридир (1 Тим. 6:3). Исанын тәлимләри вә әмәлләри Аллаһын Кәламына мүвафиг олдуғуна ҝөрә, ‘сағлам сөзләр’ ифадәси дә ҝениш тәтбиг едилдикдә, Мүгәддәс Китабдакы тәлимләрин һамысына аид едилә биләр. Бу тәлимләр Јеһованын тәләбләрини ҝөрмәјимизә көмәк едир. Мүгәддәс Китабдан өјрәндикләримизи тәтбиг етмәклә бу нүмунәни изләмиш олуруг.
Бизим үчүн ибрәт дәрсләри:
1:5; 3:15. Тимотеј Мүгәддәс Јазылардакы тәлими ушаглыгдан аиләсиндә алмыш вә Мәсиһ Исаја иман ҝәтирмишди, бу иман исә онун етдији һәр шејә тәсир ҝөстәрирди. Аилә үзвләринин Аллаһ вә ушаглары гаршысында өз вәзифәләрини неҹә јеринә јетирдикләри үзәриндә ҹидди дүшүнмәләри неҹә дә ваҹибдир!
1:16-18. Һәмиманлыларымыз сынаглара, тәгибләрә мәруз галанда вә ја һәбсханалара дүшәндә ҝәлин онлар үчүн дуа едәк вә әлимиздән ҝәлдији гәдәр көмәк едәк (Сүл. мәс. 3:27; 1 Салон. 5:25).
2:22. Мәсиһчиләрин, хүсусилә дә ҝәнҹләрин башы бодибилдингә, идманын башга нөвләринә, мусигијә, әјләнҹәјә, һоббијә, сәјаһәтә, мәнасыз сөһбәтләрә вә бу кими шејләрә о гәдәр гарышмалы дејил ки, руһани ишләрә аз вахтлары галсын.
[31-ҹи сәһифәдәки шәкил]
Павелин Аллаһдан илһам алараг јаздығы мәктубларындан һансы сонунҹу иди?