Шаҝирд һазырламаг ишиндән севинҹ әлдә ет
«Ҝедин, бүтүн халглары шаҝирдим един» (МАТ. 28:19).
1-3. а) Башгаларына Мүгәддәс Китабы өјрәтмәк бир чохларында һансы һиссләри доғурур? б) Һансы суаллары нәзәрдән кечирәҹәјик?
БИРЛӘШМИШ ШТАТЛАРДА һинддилли групда хидмәт едән бир баҹы јазыр: «Сон 11 һәфтә әрзиндә пакистанлы бир аилә илә Мүгәддәс Китабы өјрәнирдим. Биз достлашдыг. Онларын тезликлә Пакистана гајыдаҹагларыны дүшүнәндә ҝөзләрим јашарыр. Бу, тәкҹә онлардан ајрылдығым үчүн кәдәр ҝөз јашлары дејил, һәм дә онлара Јеһова һаггында өјрәтмәк имканым олдуғу үчүн севинҹ ҝөз јашларыдыр».
2 Сәнә дә нә вахтса киминләсә Мүгәддәс Китаб өјрәнмәси кечирмәк севинҹи нәсиб олубму? Иса вә онун биринҹи әсрдәки давамчылары шаҝирд һазырламаг ишиндән бөјүк севинҹ дујурдулар. Исанын һазырладығы 70 шаҝирди хидмәтдән севиндириҹи хәбәрләрлә гајыданда о, ‘руһән севинди’ (Лука 10:17-21). Шаҝирд һазырламаг иши бу ҝүн дә бир чохларына бөјүк севинҹ ҝәтирир. Буна сүбут олараг, 2007-ҹи илдә тәблиғчиләр сәјлә вә севинҹлә һәр ај орта һесабла алты милјон јарым Мүгәддәс Китаб өјрәнмәси кечирибләр.
3 Анҹаг бәзи тәблиғчиләрин Мүгәддәс Китаб өјрәнмәләри һеч олмајыб. Башгалары исә сон илләр әрзиндә Мүгәддәс Китаб өјрәнмәси кечирмәмишләр. Мүгәддәс Китаб өјрәнмәси кечирәркән биз һансы чәтинликләрлә гаршылашырыг? Онларын өһдәсиндән неҹә ҝәлә биләрик? Вә Исанын: «Ҝедин, бүтүн халглары шаҝирдим един» тапшырығына әмәл етмәк үчүн әлимиздән ҝәләни едәндә һансы мүкафаты алырыг? (Мат. 28:19).
Севинҹдән мәһрум едән чәтинликләр
4, 5. а) Дүнјанын бәзи јерләриндә инсанлар хош хәбәрә неҹә һај верирләр? б) Диҝәр јерләрдә тәблиғчиләр һансы чәтинликләрлә гаршылашырлар?
4 Дүнјанын мүәјјән јерләриндә инсанлар вердијимиз әдәбијјатлары мәмнунијјәтлә гәбул едир вә севинҹлә Мүгәддәс Китабы өјрәнирләр. Замбијада мүвәггәти хидмәт етмиш австралијалы әр-арвад јазыр: «Дејиләнләр һәгигәт имиш. Замбија тәблиғ үчүн әсл ҹәннәтдир. Күчәдә тәблиғә сөз јохдур! Инсанлар өзләри бизә јахынлашыр, бәзиләри һәтта журналларын конкрет сајыны истәјирләр». Замбијадакы баҹы-гардашлар сон илләрин бириндә 200 000-дән чох Мүгәддәс Китаб өјрәнмәси кечирмишләр, белә ки һәр тәблиғчијә орта һесабла бирдән чох өјрәнмә дүшүр.
5 Диҝәр јерләрдә исә тәблиғчиләрә әдәбијјат пајламаг вә мүнтәзәм олараг Мүгәддәс Китаб өјрәнмәси кечирмәк мүшкүл мәсәләдир. Нәјә ҝөрә? Чүнки чох вахт тәблиғчиләр ҝәләндә инсанлар евдә олмур, оланлар исә динә лагејд јанаша биләрләр. Ола билсин, онларын бөјүјүб баша чатдыглары аилә диндар олмајыб, јахуд јалан динин икиүзлүлүјү онларда икраһ доғурур. Бир чох инсанлар јаланчы чобанлар үзүндән руһани хәстәлијә тутулуб — тагәтдән дүшүб вә дағыныг һалдадыр (Мат. 9:36). Тәәҹҹүблү дејил ки, белә инсанлар Мүгәддәс Китаб һаггында данышмаға еһтијат едирләр.
6. Бәзи тәблиғчиләрин имканларыны нә мәһдудлашдырыр?
6 Бәзи садиг тәблиғчиләр онлары севинҹдән мәһрум едән башга чәтинликләрлә гаршылашырлар. Онлар вахтилә шаҝирд һазырламаг ишиндә фәал иштирак етсәләр дә, сәһһәтләри вә гоҹалыгла бағлы проблемләр инди онларын имканларыны мәһдудлашдырыр. Өзүмүзүн өзүмүзә јаратдығымыз манеәләрә дә нәзәр салаг. Мәсәлән, сән Мүгәддәс Китаб өјрәнмәси кечирмәк үчүн кифајәт гәдәр баҹарығынын олмадығынымы дүшүнүрсән? Јеһова Мусаны фиронун јанына ҝөндәрәндә онун кечирдији һиссләр, ола билсин, сәнә дә танышдыр. Муса демишди: «Ја Худавәнд, мән нә кечмишдә, нә дә гулунла данышдығын вахт натиг олмамышам» (Чых. 4:10). Бундан әлавә, биздә горху ола биләр ки, бүтүн ҹәһдләримиз боша чыхаҹаг, өјрәтдијимиз инсан шаҝирд олмајаҹаг, чүнки биз мүкәммәл мүәллим дејилик. Белә бир агибәтдән гачмаг үчүн өјрәнмә кечирмәмәк гәрарына ҝәлә биләрик. Бу чәтинликләрин өһдәсиндән неҹә ҝәлмәк олар?
Үрәјини һазырла
7. Исаны хидмәт етмәјә нә тәшвиг едирди?
7 Илк нөвбәдә, биз өз үрәјимизи һазырламалыјыг. Иса демишдир ки, инсанын «ағзы үрәјиндән ҝәләни сөјләјир» (Лука 6:45). Исаны хидмәт етмәјә тәшвиг едән башгаларынын рифаһы илә сәмими-гәлбдән марагланмасы иди. Мәсәлән, о, јәһуди гардашларынын руһән аҹынаҹаглы вәзијјәтдә олдугларыны ҝөрәндә «онлара јазығы ҝәлди». О, шаҝирдләринә деди: «Мәһсул чох[дур]... Мәһсулун Саһиби олан Рәббә јалварын ки, Өз мәһсулуну јығмаға ишчиләр ҝөндәрсин» (Мат. 9:36-38).
8. а) Нә һагда фикирләшмәјимиз јахшы оларды? б) Мүгәддәс Китабы өјрәнән бир гадынын сөзләриндән нә өјрәнә биләрик?
8 Јахшы оларды ки, киминләсә Мүгәддәс Китабы өјрәнмәјин бизә һансы фајданы ҝәтирдији һагда дәриндән дүшүнәк. Һәмчинин хидмәтдә растлашдығымыз инсанлар вә чатдырдығымыз хәбәрин онлара ҝәтирәҹәји фајда барәдә дә дүшүнәк. Бир гадын јашадығы өлкәнин филиалына јазыб: «Евимдә мәнә Мүгәддәс Китабы өјрәдән Шаһидләрә нә гәдәр миннәтдар олдуғуму билдирмәк истәјирәм. Билирәм ки, бәзән мәнә ҝөрә ишләриндән олурлар, чүнки үзәрләринә чохлу суаллар јағдырырам вә онлар планлашдырдыглары вахтдан артыг отурмалы олурлар. Анҹаг онлар чох сәбирлидирләр вә өјрәндикләрини мәнимлә мәмнунијјәтлә бөлүшмәјә һазырдырлар. Бу инсанларын һәјатыма дахил олдуглары үчүн Јеһоваја вә Исаја чох миннәтдарам».
9. Иса диггәтини нәјә ҹәмләјирди вә биз ону неҹә тәглид едә биләрик?
9 Әлбәттә, Исанын көмәк етмәк ҹәһдләринә һәр кәс һај вермирди (Мат. 23:37). Бәзиләри бир мүддәт онун ардынҹа ҝетдикдән сонра онун тәлимләринә гаршы чыхыр вә «артыг Онунла ҝәзмирди» (Јәһ. 6:66). Лакин Иса јол вермәди ки, бәзиләринин хошаҝәлмәз мүнасибәти тәблиғ етдији хәбәрин дәјәрсиз олдуғуну дүшүнмәјә вадар етсин. Сәпдији тохум әксәр инсанларын үрәјиндә бәһрә ҝәтирмәсә дә, Иса диггәтини ишинин мүсбәт ҹәһәтләринә ҹәмләшдирирди. Тарлаларын бичилмәк үчүн ағардығыны ҝөрән Иса бичин ишиндә иштирак етмәкдән бөјүк севинҹ дујурду. (Јәһја 4:35, 36 ајәләрини оху.) Јалныз бәһрәсиз саһәни ҝөрмәк әвәзинә, Иса кими, биз дә диггәтимизи бичин ишиндә иштирак етмәјә јөнәлдиб мәһсул ҝөзләјә биләрикми? Ҝәлин ҝөрәк, бу ҹүр мүсбәт әһвал-руһијјәни неҹә горумаг олар.
Бичмәк мәгсәдилә сәп
10, 11. Хидмәтдә севинҹини неҹә горуја биләрсән?
10 Әкинчи тохуму мәһсул јығмаг мәгсәдилә сәпир. Биз дә Мүгәддәс Китаб өјрәнмәси башламаг мәгсәдилә тәблиғ етмәлијик. Тутаг ки, сән мүнтәзәм олараг хидмәтдә иштирак едирсән, анҹаг евдә чох аз адам тапырсан, јахуд да тәкрар башчәкмә заманы онлары үмумијјәтлә евдә тапмырсан. Әлбәттә, бу сәни руһдан сала биләр. Онда сән евдән-евә тәблиғ етмәмәлисән? Әлбәттә, јох! Бу ҝүн дә бир чох инсанлар заманын сынағындан кечмиш бу тәблиғ үсулу сајәсиндә илк дәфә һәгигәти ешидирләр.
11 Лакин севинҹини горумаг вә даһа чох инсана тәблиғ етмәк үчүн мүхтәлиф тәблиғ үсулларындан истифадә едә биләрсәнми? Мәсәлән, күчәдә вә ја ишҝүзар әразиләрдә тәблиғ етмәји сынамысанмы? Телефон васитәсилә тәблиғ едә, јахуд вахтилә тәблиғ етдијин адамларла әлагә сахламаг үчүн телефон нөмрәләрини ала биләрсәнми? Хидмәтдә исрарлы олмагла вә она ујғунлашмагла Падшаһлыг һаггында хош хәбәрә һај верән инсанлар тапараг севинҹ әлдә едәҹәксән.
Лагејдлијин өһдәсиндән неҹә ҝәлмәк олар?
12. Саһәмиздәки инсанларын чоху лагејдлик ҝөстәрирсә, нә едә биләрик?
12 Саһәндә јашајан инсанлар динә гаршы лагејддирләрсә, нә етмәк олар? Сөһбәтә башламаг үчүн мараг ојадаҹаг бир мөвзуја тохуна биләрсәнми? Һәвари Павел Коринфдәки һәмиманлыларына јазмышды: «Јәһудиләрлә јәһуди кими даврандым; өзүм Мүгәддәс Ганунун һакимијјәти алтында олмадығым һалда, Ганун алтындакылары әлдә етмәк үчүн, онларла Ганун алтындакы адам кими даврандым». Павелин мәгсәди нә иди? О дејир: «Һәр кәс үчүн һәр шеј олдум ки, һәр неҹә олурса-олсун бәзиләрини хилас едим» (1 Кор. 9:20-22). Биз дә саһәмиздә јашајан инсанлар үчүн мараглы мөвзулар сечә биләрикми? Динлә марагланмајан инсанларын чоху аилә мүнасибәтләрини јахшылашдырмаг истәјир. Һәмчинин һәјатын мәнасыны ахтаранлар да вар. Сән Падшаһлыг хәбәрини һәмин инсанлара елә тәгдим едә биләрсәнми ки, бу онларда мараг доғурсун?
13, 14. Шаҝирд һазырламаг ишиндән алдығымыз севинҹи артырмаг үчүн нә едә биләрик?
13 Ҝет-ҝедә даһа чох тәблиғчи әксәр инсанларын лагејдлик ҝөстәрдији әразиләрдә белә шаҝирд һазырламаг ишиндән даһа чох севинҹ әлдә едир. Неҹә? Онлар әҹнәби дил өјрәнирләр. 60-дан чох јашы олан бир әр-арвад фикир вериб ки, јығынҹагларынын әразисиндә аиләләри илә бирҝә минләрлә чинли тәләбәләр јашајыр. Гардаш дејир: «Бу бизи Чин дилини өјрәнмәјә тәшвиг етди. Бунун үчүн һәр ҝүн вахт сәрф етмәли олсаг да, чохлу өјрәнмәләрә башламаға мүвәффәг олдуг».
14 Хариҹи дил өјрәнмәк имканын олмаса да, хидмәтдә әҹнәбиләрә раст ҝәләндә «Бүтүн халглардан олан инсанлар үчүн хош хәбәр» брошүрасындан сәмәрәли истифадә едә биләрсән. Онлара һәтта мүнтәзәм олараг әдәбијјат да ҝәтирмәк олар. Дүздүр, башга дилдә данышан вә башга мәдәнијјәтә мәнсуб олан инсанларла үнсијјәт јаратмаг үчүн чох вахт вә ҝүҹ тәләб олунур. Аллаһын Кәламында јазылан бир принсипи унутма: «Чох әкән... чох да бичәҹәкдир» (2 Кор. 9:6).
Јығынҹағын үмуми иши
15, 16. а) Нәјә ҝөрә демәк олар ки, шаҝирд һазырламаг јығынҹағын үмуми ишидир? б) Бу ишдә јашлы баҹы-гардашларымыз һансы ролу ојнајырлар?
15 Шаҝирд һазырламаг јалныз бир нәфәрин иши дејил. Әксинә, бу, јығынҹағын үмуми ишидир. Нә үчүн белә демәк олар? Чүнки Иса демишдир: «Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк» (Јәһ. 13:35). Һәгигәтән дә, Мүгәддәс Китабы өјрәнәнләр ҝөрүшләрә ҝәләндә бурадакы мәһәббәт долу аб-һава чох вахт онлара дәрин тәәссүрат бағышлајыр. Мүгәддәс Китабы өјрәнән бир адам јазыр: «Мән јығынҹаглара ҝедәндә елә севинирәм ки. Орада инсанлар чох сәмими вә меһрибандырлар». Иса демишдир ки, онун давамчылары өз аиләләри тәрәфиндән тәгибләрә мәруз гала биләрләр. (Матта 10:35-37 ајәләрини оху.) Бунунла белә, онларын јығынҹагда чохлу руһани «гардашлар, баҹылар, аталар вә аналар, ушаглар» газанаҹагларыны да вәд етмишди (Марк 10:30).
16 Јашлы баҹы вә гардашларымыз Мүгәддәс Китабы өјрәнәнләрин руһани инкишафында хүсуси рол ојнајырлар. Онларын бәзиләри Мүгәддәс Китаб өјрәнмәләри кечирә билмәсәләр дә, јығынҹаг ҝөрүшләриндә вердикләри руһландырыҹы шәрһләр онлара гулаг асанларын һамысынын иманыны мөһкәмләндирир. Онларын ‘салеһлик јолунда’ јеридикләри мүддәтдә газандыглары һәјат тәҹрүбәләри јығынҹаға ҝөзәллик верир вә сәмими инсанлары Аллаһын тәшкилатына ҹәлб едир (Сүл. мәс. 16:31).
Горху һиссинин өһдәсиндән неҹә ҝәлмәк олар?
17. Әҝәр Мүгәддәс Китаб өјрәнмәси кечирә билмәјәҹәјини дүшүнүрсәнсә, нә едә биләрсән?
17 Әҝәр Мүгәддәс Китаб өјрәнмәси кечирмәк баҹарығынын олмадығыны дүшүнүрсәнсә, Јеһованын Мусаја мүгәддәс руһ вермәклә вә гардашы Һаруну әмәкдашы тәјин етмәклә она көмәк етдијини хатырла (Чых. 4:10-17). Иса вәд етмишдир ки, Аллаһын руһу шаһидлик ишиндә бизә дајаг олаҹаг (Һәв. иш. 1:8). Үстәлик, Иса шаҝирдләрини тәблиғ етмәјә ики-ики ҝөндәрмишди (Лука 10:1). Буна ҝөрә дә, Мүгәддәс Китаб өјрәнмәси кечирмәкдә чәтинлик чәкирсәнсә, дуада Аллаһдан мүгәддәс руһ вә мүдриклик дилә, сонра да јанында өзүнү әмин һисс едәҹәјин вә тәҹрүбәси сәнә фајдалы олаҹаг адамла хидмәтә ҝет. Бу гејри-ади иши јеринә јетирмәк үчүн Јеһованын садә инсанлары — «дүнјанын зәиф сајдыгларыны» сечдијини билмәк иманымызы неҹә дә мөһкәмләндирир! (1 Кор. 1:26-29).
18. Бүтүн ҹәһдләримизин боша чыхаҹағындан горхуругса, нә едә биләрик?
18 Бүтүн ҹәһдләримизин боша чыхаҹағындан, Мүгәддәс Китабы өјрәнән инсана көмәк едә билмәјәҹәјимиздән горхуругса, нә едә биләрик? Унутма ки, шаҝирд һазырламаг иши јемәк биширмәк ишинә бәнзәмир, чүнки јемәјин дадлы алыныб-алынмајаҹағы әсас етибарилә тәк бир нәфәрдән — ашбаздан асылыдыр. Бунун әксинә олараг, шаҝирд һазырламаг иши үч шәхсин иштиракыны тәләб едир. Ән әсас рол инсанлары Өзүнә ҹәлб едән Јеһоваја мәхсусдур (Јәһ. 6:44). Биз вә јығынҹагдакы баҹы-гардашлар өјрәнәнләрә руһән инкишаф етмәјә көмәк етмәк үчүн өјрәтмәк габилијјәтимиздән мүмкүн гәдәр јахшы истифадә етмәјә чалышырыг. (2 Тимотејә 2:15 ајәсини оху.) Мүгәддәс Китабы өјрәнәнләр өјрәндикләрини һәјатларында тәтбиг етмәлидирләр (Мат. 7:24-27). Әҝәр инсан Мүгәддәс Китабы өјрәнмәји дајандырырса, бу бизи мәјус едә биләр. Үмид едирик ки, Мүгәддәс Китабы өјрәнәнләр дүзҝүн сечим едәҹәкләр, ахы һәр бир кәс «өзү үчүн Аллаһа һесабат верәҹәкдир» (Ром. 14:12).
Мүкафат
19-21. а) Мүгәддәс Китаб өјрәнмәси кечирмәјин фајдалары һансылардыр? б) Јеһова тәблиғ ишиндә иштирак едәнләрә неҹә јанашыр?
19 Мүгәддәс Китаб өјрәнмәси кечирмәк диггәтимизи, илк нөвбәдә, Падшаһлығы ахтармаға ҹәмләмәјә көмәк едир. Һәмчинин Аллаһын Кәламындакы һәгигәтләри үрәјимизин вә зеһнимизин дәринликләринә һәкк едир. Бу неҹә мүмкүндүр? Барак адлы пионер гардаш дејир: «Мүгәддәс Китаб өјрәнмәси кечирмәјин сајәсиндә инсан Аллаһын Кәламыны даһа дәриндән арашдырмаға тәшвиг олунур. Мән һесаб едирәм ки, кимәсә тәлим вермәздән өнҹә өјрәдәҹәјим шејләрә өзүм әмин олмалыјам».
20 Әҝәр Мүгәддәс Китаб өјрәнмән јохдурса, хидмәтинин Аллаһын ҝөзүндә дәјәрсиз олдуғуну дүшүнмәк дүзҝүндүрмү? Әлбәттә, јох! Јеһова Ону иззәтләндирмәк сәјимизи јүксәк гијмәтләндирир. Тәблиғ ишиндә иштирак едәнләрин һамысы Аллаһын ‘әмәкдашларыдыр’. Амма сәпдијимиз тохумун Мүгәддәс Китабы өјрәтдијимиз адамын үрәјиндә Аллаһын неҹә бөјүдүјүнү ҝөрәндә севинҹимиз даһа да артыр (1 Кор. 3:6, 9). Пионер кими хидмәт едән Еми адлы баҹы дејир: «Өјрәнән инсанын руһән инкишаф етдијини ҝөрәндә инсанын үрәји Јеһоваја гаршы миннәтдарлыг һисси илә долуб-дашыр, чүнки Јеһова һәмин инсана ҝөзәл бир әнам — Ону танымаг вә әбәди һәјат алмаг имканы вермәкдә сәндән истифадә етмишдир».
21 Мүгәддәс Китаб өјрәнмәсинә башламаг вә ону кечирмәк үчүн әлимиздән ҝәләни етмәк Аллаһа хидмәтдә фәал галмаға көмәк едәҹәк вә ҝәләҹәк һәјат үчүн үмидимизи мөһкәмләндирәҹәк. Ејни заманда, Јеһованын көмәји илә бизә гулаг асанлара хилас олмаға көмәк едирик. (1 Тимотејә 4:16 ајәсини оху.) Бу неҹә дә севиндириҹидир!
Јадыныздадырмы?
• Бәзи тәблиғчиләр Мүгәддәс Китаб өјрәнмәси кечирмәклә бағлы һансы чәтинликләрлә үзләширләр?
• Саһәмиздә јашајанларын әксәријјәти хош хәбәрә лагејд јанашырса, нә етмәк олар?
• Мүгәддәс Китаб өјрәнмәси кечирмәјин һансы мүкафатлары вар?
[9-ҹу сәһифәдәки шәкилләр]
Сәмими инсанлары тапмаг үчүн башга тәблиғ үсулларындан да истифадә едирсәнми?