«Јол будур, ҝедин бу јола»

Емилија Педерсонун һәјат һекајәси

Нәгл етди Рут Паппес

ААНАМ Емилија Педерсон 1878-ҹи илдә доғулуб. Мәктәб мүәллими олса да, онун әсил арзусу һәјатыны инсанлара Аллаһ һаггында өјрәтмәјә һәср етмәк иди. Онун бу арзусуна сүбут Миннесотанын (АБШ) кичик Ҹаспер гәсәбәсиндә јерләшән евимиздәки ири чамадан иди. О бу чамаданы миссионер кими хидмәт етмәк истәдији Чинә көчмәк үчүн алмышды. Амма анасы өләндә планларындан имтина етмәли вә евләриндә галыб кичик гардашынын вә баҹыларынын гајғысына галмалы олду. Анам 1907-ҹи илдә Теодор Һолинә әрә ҝетди. Мән 1925-ҹи ил декабрын 2-дә дүнјаја ҝөз ачдым вә једди ушағы олан ата-анамын сонбешији олдум.

Анамын Мүгәддәс Китаба даир чохлу суаллары вар иди вә суалларына ҹаваб ахтарырды. Суалларындан бири пис инсанларын шиддәтли әзаб чәкдикләри одлу ҹәһәннәм тәлими һаггында иди. Лүтеран килсәсинин пастору илә сөһбәт едәркән анам ондан хаһиш етди ки, Мүгәддәс Китабда бу тәлимин неҹә тәсдиг едилдијини тапмаға она көмәк етсин. О ҹаваб вермишди ки, Мүгәддәс Китабда јазыланларын әһәмијјәти јохдур, одлу ҹәһәннәм һаггында тәлим тәдрис олунмалыдыр.

Анам һәгигәти тапыр

1900-ҹү ил тәзәҹә тамам оланда анамын баҹысы Емма мусиги тәһсили алмаг үчүн Нортфилдә (Миннесота штаты) ҝетмәли олду. О, мүәллими Милјус Кристиансонҝилдә галырды. Онун арвады Мүгәддәс Китаб Тәдгигатчысы иди (о вахтлар Јеһованын Шаһидләри белә адланырдылар). Сөһбәт әснасында Емма Мүгәддәс Китабы охујан диндар бир баҹысы олдуғуну деди. Миссис Кристиансон тезликлә анама мәктуб јазыб, онун Мүгәддәс Китаба даир бүтүн суалларына ҹаваб верди.

Бир ҝүн Мүгәддәс Китаб Тәдгигатчысы олан Лора Отһаут Ҹәнуби Дакота штатынын Су-Фолз шәһәриндән гатарла Ҹасперә тәблиғ етмәјә ҝәлди. Анам онун вердији Мүгәддәс Китаб нәшрләрини арашдырды вә 1915-ҹи илдә Лоранын ҝәтирдији әдәбијјатлары пајлајараг Мүгәддәс Китаб һәгигәтләрини башгалары илә бөлүшмәјә башлады.

Анам 1916-ҹы илдә ешитмишди ки, Чарлз Тејз Рассел Ајованын Су-Сити шәһәриндә кечириләҹәк конгресдә чыхыш едәҹәк. О һәмин конгресә ҝетмәк истәди. О вахт анамын артыг 5 ушағы варды вә ән балаҹасы — Марвин бешајлыг иди. Буна бахмајараг, о, Су-Ситијә ҝетмәк үчүн ушаглары да ҝөтүрүб, гатарла 160 километр гәт етди. О, Рассел гардашын мәрузәләрини динләди, «Јарадылыш фотодрамы»на бахды вә вәфтиз олунду. Евә гајыдан кими, конгрес һаггында бир мәгалә јазды вә бу мәгалә «Ҹаспер ҹорнел» гәзетиндә дәрҹ олунду.

Анам 1922-ҹи илдә Сидар-Поинтдә (Оһајо штаты) кечирилән конгресә јығышан 18 000 нәфәр арасында иди. Һәмин конгресдән сонра о, Аллаһын Падшаһлығыны бәјан етмәкдән һеч вахт ваз кечмәди. Онун нүмунәси бизи: «Јол будур, ҝедин бу јола» мәсләһәтинә һај вермәјә тәшвиг етди (Јешаја 30:21).

Тәблиғ хидмәти бәһрәләр ҝәтирир

1920-ҹи илләрин әввәлләриндә валидејнләрим Ҹаспердән көчдүләр. Атамын ишләри јахшы ҝедирди вә о, бөјүк аиләсинин гајғысына галырды. Атам һәгигәтә јахшы јанашырды, анамын тәблиғ ишини бүтүн үрәклә дәстәкләјирди вә бизим евимизин гапысы о вахтлар пилигрим адланан сәјјар хидмәтчиләрин үзүнә һәмишә ачыг иди. Сәјјар хидмәтдә олан гардашлар нитглә чыхыш едәндә евимиздә чох вахт јүз вә ја јүзә јахын адам топлашырды — бүтүн отагларымыз адамла долу олурду.

Тәхминән једди јашым оланда халам Летти анама зәнҝ едиб деди ки, гоншусу Ед Ларсон вә арвады Мүгәддәс Китабы өјрәнмәк истәјирләр. Онлар бөјүк шөвглә һәгигәти гәбул етдиләр вә бир мүддәт сонра сәккиз ушаг анасы олан гоншусу Марта Ван Далени өјрәнмәдә онлара гошулмаға дәвәт етдиләр. Марта вә онун бүтүн аиләси дә Мүгәддәс Китаб Тәдгигатчысы олдуa.

О заман биздән бир нечә километр аралыда јашајан Гордон Каммеруд адлы бир ҝәнҹ атам илә ишләмәјә башлады. Гордона хәбәрдарлыг етмишдиләр: «Өзүнү мүдиринин гызларындан ҝөзлә. Онларын гәрибә дини вар». Буна бахмајараг, Гордон Мүгәддәс Китабы өјрәнмәјә башлады вә тезликлә һәгигәти тапдығына әмин олду. Үч ајдан сонра о вәфтиз олунду. Онун валидејнләри дә һәгигәти гәбул етдиләр вә аиләләримиз — Һолинләр, Каммерудлар вә Ван Даленләр аиләси јахын дост олду.

Конгресләр бизи мөһкәмләндирир

Сидар-Поинтдә кечирилән конгрес анамы о гәдәр руһландырды ки, о, һеч бир конгреси бурахмаг истәмәди. Буна ҝөрә бу ҝөрүшләрдә иштирак етмәк үчүн гәт етдијимиз узун мәсафәләр ушаглыг хатирәләримә һәкк олунуб. Онлардан ән әламәтдары 1931-ҹи илдә Оһајо штатынын Колумбус шәһәриндә кечирилән конгрес олмушдур, чүнки орада Јеһованын Шаһидләри ады гәбул едилди (Јешаја 43:10-12). ‘Бөјүк издиһамын’ ким олдуғуна даир тарихи нитгин сөјләнилдији 1935-ҹи илдә Вашингтонда кечирилән конгрес дә мәним үчүн јаддагалан олду (Вәһј 7:9). Конгресдә вәфтиз олан 800 нәфәрин арасында баҹыларым Лилиан вә Јунис дә варды.

Аиләмиз 1937-ҹи илдә Колумбусда (Оһајо штаты), 1938-ҹи илдә Сиетлдә (Вашингтон штаты), 1939-ҹу илдә исә Нју-Јоркда кечирилән конгресләрдә олуб. Ван Даленләр, Каммерудләр вә башгалары бизимлә бирҝә ҝедир вә биз јол боју чадырлар гуруб орада ҝеҹәләјирдик. Јунис 1940-ҹы илдә Лео Ван Даленә әрә ҝетди вә онлар пионер хидмәтинә башладылар. Һәмин ил Лилиан вә Гордон Каммеруд евләндиләр вә онлар да пионер олдулар.

1941-ҹи илдә Миссури штатынын Сент-Луис шәһәриндә кечирилән конгрес хүсуси олду. Орада минләрлә ҝәнҹ «Ушаглар» китабыны алды. Бу конгрес мәним үчүн дөнүш нөгтәси олду. Гыса мүддәт сонра, 1941-ҹи ил сентјабрын 1-дән гардашым Марвин вә арвады Ҹојс илә бирҝә пионер хидмәтинә башладым. О вахт мәним 15 јашым вар иди.

Чох вахт конгресләр бичин вахтында дүшдүјүндән кәнд јериндә јашајан гардашларын һамысы конгресләрә ҝедә билмирди. Буна ҝөрә дә биз конгресләрдән сонра һәјәтимиздә конгресә ҝедә билмәјәнләр үчүн ҝөрүшләрин програмыны тәкрарлајырдыг. Бу чох севиндириҹи анлар иди.

Ҝилеад Мәктәби вә хариҹә тәјинат

1943-ҹү илин февралында пионерләри миссионер хидмәтинә һазырламаг мәгсәдилә Ҝилеад Мәктәби ачылды. Биринҹи синифдә Ван Даленләр аиләсинин алты нәфәр үзвү охујурду: доғма гардашлар Емил, Артур, Һомер вә Лео, онларын бибиси оғлу Доналд вә Леонун арвады олан баҹым Јунис. Онларла сағоллашанда бизи гарышыг һиссләр бүрүдү, чүнки бир дә нә вахт ҝөрүшәҹәјимизи билмирдик. Мәктәби битирдикдән сонра онларын алтысы да Пуерто-Рикоја тәјинат алды. О вахт орада јалныз бир нечә Шаһид вар иди.

Бир илдән сонра Лилиан илә Гордон, һәмчинин Марвин вә Ҹојс Ҝилеад Мәктәбинин үчүнҹү синфинә дәвәт алдылар. Онлар да Пуерто-Рикоја тәјин олундулар. 1944-ҹү илдә 18 јашым оланда мән Ҝилеад Мәктәбинин 4-ҹү синфинә дәвәт алдым. 1945-ҹи илин феврал ајында мәктәби битирдикдән сонра Пуерто-Рикоја, доғмаларымын јанына тәјин олундум. Санки јени бир һәјата гәдәм гојмушдум! Испан дилини өјрәнмәк чәтин олса да, тезликлә бәзиләримизин 20-дән чох Мүгәддәс Китаб өјрәнмәси олду. Јеһова ишимизи хејр-дуаландырды. Бу ҝүн Пуерто-Рикода 25 000-ә јахын Шаһид вар!

Аиләмиздә итки үз верир

Лео вә Јунис 1950-ҹи илдә оғуллары Марк доғулдугдан сонра Пуерто-Рикода галдылар. Онлар 1952-ҹи илдә доғмаларына баш чәкмәк үчүн мәзунијјәт ҝөтүрмәк гәрарына ҝәлдиләр. Апрелин 11-дә Америкаја учмаг үчүн тәјјарәјә миндиләр. Бәдбәхтлик үз верди: тәјјарә һаваја галхдыгдан аз сонра океана дүшдү. Лео вә Јунис һәлак олду. Икијашлы Маркы сујун үзүндә үзән тапдылар. Хилас оланлардан бири ону хилас салынын үстүнә чыхартды, она сүни нәфәс верилди вә о сағ галдыb.

Беш илдән сонра, 1957-ҹи ил мартын 7-дә анамла атам Падшаһлыг Залына ҝедәндә машынын тәкәри бурахды. Атам тәкәри дәјишән заман, јолдан кечән машын ону вурду вә о, јериндәҹә кечинди. Онун дәфн мәрузәсинә 600 нәфәрә јахын адам ҝәлмишди вә атамы севиб һөрмәт едән адамлара ҝөзәл шаһидлик верилди.

Јени тәјинатлар

Атамын өлүмүндән бир гәдәр әввәл мән Арҝентинаја тәјин олунмушдум. 1957-ҹи илин август ајында Анд дағларынын әтәјиндә јерләшән Мендоса шәһәринә ҝәлдим. 1958-ҹи илдә Ҝилеад Мәктәбинин 30-ҹу синфинин мәзуну олан Ҹорҹ Паппес Арҝентинаја тәјинат алды. Биз Ҹорҹла достлашдыг вә 1960-ҹы илин апрел ајында евләндик. 1961-ҹи илдә анам 83 јашында вәфат етди. О, һәгигәт јолунда садиг галды вә бир чохларына да садиглијини горумаға көмәк етди.

Ҹорҹла мән он ил әрзиндә мүхтәлиф миссионер евләриндә башга миссионерләрлә бирҝә хидмәт етмишик. Сонракы 7 или сәјјар хидмәтдә кечирдик. Хәстәләнмиш аилә үзвләримизә көмәк етмәк үчүн 1975-ҹи илдә Бирләшмиш Штатлара гајытдыг. 1980-ҹи илдә һәјат јолдашым испандилли әразидә рајон нәзарәтчиси кими хидмәт етмәјә дәвәт олунду. О заман Бирләшмиш Штатларда 600-ә јахын испандилли јығынҹаг варды. Биз 26 ил әрзиндә онлардан бир чохуна баш чәкдик вә јығынҹагларын сајынын 3 000-дән чох олмасынын шаһиди олдуг.

Онлар һәгигәт ‘јолунда’ јеријирләр

Анама һәтта аиләмизин ҝәнҹ үзвләринин таммүддәтли хидмәтә башладыгларыны ҝөрмәк севинҹи дә нәсиб олду. Мәсәлән, бөјүк баҹым Естерин гызы Керол 1953-ҹү илдә пионер хидмәтинә башлады. О, Деннис Трембора әрә ҝетди вә о замандан етибарән онлар бирҝә таммүддәтли хидмәтдәдирләр. Естерин Лоис адлы диҝәр гызы Вендл Ҹенсенә әрә ҝетди. Онлар Ҝилеад Мәктәбинин 41-ҹи синфини битирдикдән сонра 15 ил Ниҝеријада миссионер кими хидмәт етдиләр. Валидејнләри тәјјарә гәзасында һәлак олан Маркы Леонун баҹысы Рут Ла Лонд вә онун һәјат јолдашы Көртисс оғуллуға ҝөтүрдү. Марк вә арвады Лавонн пионер хидмәтинә чох илләр һәср етмишләр вә ‘бу јолда’ дөрд ушаг бөјүдүб боја-баша чатдырмышлар (Јешаја 30:21).

Доғма баҹы-гардашларымдан јеҝанә сағ галан гардашым Орленин инди 90-дан чох јашы вар. О, индијәдәк Јеһоваја сәдагәтлә хидмәт едир. Ҹорҹла мән таммүддәтли хидмәтә севинҹлә давам едирик.

Анамын мирасы

Мән анамын чох гијмәтләндирдији бир шеји — јазы масасыны һәлә дә сахлајырам. Бу, атамын анама тој һәдијјәсидир. Сијиртмәләрдән бириндә анамын мәктублары вә гәзетдә Падшаһлыг һаггында јаздығы вә ҝөзәл шаһидлик вердији мәгаләләр сахланылан көһнә албом дурур. Онлардан бәзиләринин тарихи 1900-ҹу илләрин әввәлләринә тәсадүф едир. Орада һәм дә миссионер хидмәтиндә олан өвладларынын анама јаздығы гијмәтли мәктублар да сахланылыр. Онлары тәкрар-тәкрар охумагдан һәзз алырам. Онун бизә јаздығы мәктублар һәмишә руһландырыҹы вә ҝөзәл фикирләрлә долу иди. Анам миссионер олмаг мурадына чатмады. Лакин онун һеч вахт сөнмәјән бу истәји өзүндән сонра ҝәлән нәслин үрәјиндә бу хидмәтә ҝүҹлү һәвәс јаратды. Мән јерүзү Ҹәннәтдә бөјүк аиләмизин атама вә анама говушаҹағы вахтын һәсрәтиндәјәм! (Вәһј 21:3, 4).

[Һашијәләр]

[17-ҹи сәһифәдәки шәкил]

Емилија Педерсон

[18-ҹи сәһифәдәки шәкил]

Анам, атам (гуҹағында Марвин); ашағыда, солдан саға: Орлен, Естер, Лилиан, Милдред, 1916-ҹы ил

[19-ҹу сәһифәдәки шәкил]

Лео вә Јунис, өлүмләриндән бир гәдәр әввәл

[20-ҹи сәһифәдәки шәкил]

Солдан саға, јухарыда: Естер, Милдред, Лилиан, Јунис, Рут; ашағыда: Орлен, анам, атам вә Марвин, 1950-ҹи ил

[20-ҹи сәһифәдәки шәкил]

Ҹорҹ вә Рут Паппес сәјјар хидмәтдә, 2001-ҹи ил