Ушагларынызы өјрәдин

Јошија дүзҝүн давранмағы сечди

СӘНҸӘ, дүзҝүн давранмаг чәтиндир?a ~ Әҝәр белә дүшүнүрсәнсә, сән тәк дејилсән, әксәр инсанлар да бу фикирдәдирләр. Һәтта бөјүкләр дә, дүзҝүн олдуғуну билдикләри шејләри етмәјә чәтинлик чәкирләр. Ҝәл ҝөрәк, доғру сечим етмәк хүсусилә Јошија үчүн нәјә ҝөрә чәтин иди? Билирсән о ким иди? ~

Јошија Јәһуда падшаһы Амонун оғлу иди. О, дүнјаја ҝәләндә Амонун ҹәми 16 јашы варды. Атасы Менашше падшаһ кими, Амон да чох пис инсан иди. Менашше узун илләр әрзиндә залым падшаһ олмушдур. Анҹаг сонра ассуријалылар ону әсир алыб, узаг Бабилдә зиндана салдылар. Зинданда оларкән Менашше Јеһоваја јалварды ки, ону бағышласын, Јеһова да ону бағышлады.

Менашше азадлыға чыханда Јерусәлимә гајытды вә јенидән падшаһлыг етмәјә башлады. О, дәрһал әввәлләр етдији пис ишләри дүзәлтди вә халга Јеһоваја хидмәт етмәјә көмәк етди. Јәгин, оғлу Амон онун јахшы нүмунәсини тәглид етмәјәндә о, чох кәдәрләнирди. Тәхминән бу әрәфәдә Јошија доғулду. Мүгәддәс Китабда Менашшенин нәвәси илә нә гәдәр вахт кечирдији һагда һеч нә дејилмир. Лакин неҹә дүшүнүрсән, ола биләрми ки, Менашше ону Аллаһа хидмәт етмәјә тәшвиг едирди? ~

Јошија алты јашында оланда Менашше өлдү вә јеринә Јошијанын атасы Амон падшаһ олду. Амонун падшаһлығы ҹәми ики ил сүрдү, чүнки өз хидмәтчиләри ону өлдүрдүләр. Буна ҝөрә дә, Јошија сәккиз јашында Јәһуданын падшаһы олду (2 Салнамәләр, 33-ҹү фәсил). Бәс сонра нә баш верди? Јошија атасы Амонун гојдуғу пис нүмунәни, јохса төвбә етмиш бабасы Менашшенин јахшы нүмунәсини изләмәји сечди? ~

Јошија ҝәнҹ олса да, Јеһоваја хидмәт етмәјә гәти гәрарлы иди. Буна ҝөрә дә о, атасынын пис достларына јох, Јеһованы севән инсанлара гулаг асырды. Јошијанын ҹәми сәккиз јашы варды, анҹаг о, билирди ки, Аллаһы севән инсанлара гулаг асмаг дүзҝүн һәрәкәтдир (2 Салнамәләр 34:1, 2). Билмәк истәјәрдинми, Јошијаја мәсләһәт верәнләр вә онун үчүн јахшы нүмунә оланлар кимләр иди? ~

Јошија үчүн јахшы нүмунә оланлардан бири Сефанја пејғәмбәр иди. Еһтимал ки, Сефанја Менашшенин атасы олан јахшы падшаһ Хизгијанын нәслиндән олдуғу үчүн Јошијанын гоһуму иди. Јошијанын падшаһлығынын еркән илләриндә Сефанја өз адыны дашыјан вә Мүгәддәс Јазыларын бир һиссәси олан китабы јазмышды. Сефанја хәбәрдарлыг едирди ки, дүзҝүн давранмајан инсанларын ахыры пис олаҹаг вә ҝөрүнүр, Јошија бу хәбәрдарлыглара диггәт јетирирди.

Һәмчинин Јеремјанын адыны чәкмәк олар. Ола билсин, әввәлләр онун һаггында ешитмисән. Јеремја илә Јошија бир-бирләринә јахын јашамышдылар вә ушаглыгдан Јеһоваја хидмәт едирдиләр. Јеремја Јеһовадан илһам алараг өз адыны дашыјан вә Мүгәддәс Јазылара дахил олан китабы јазмышды. Јошија дөјүшдә өләндә Јеремја дәрин кәдәрини ифадә етмәк үчүн мәрсијә адланан хүсуси маһны јазмышды (2 Салнамәләр 35:25). Тәсәввүр етмәк олар ки, онлар бир-бирини Јеһоваја сәдагәтли галмаға неҹә тәшвиг едирдиләр!

Јошија һагда алдығын мәлуматдан өзүнә һансы дәрси ҝөтүрә биләрсән? ~ Әҝәр сәнин дә атан Јошијанын атасы кими Јеһоваја хидмәт етмирсә, онда башга кимсә сәнә Аллаһ һагда өјрәнмәјә көмәк едә биләрми? Мәсәлән, анан, нәнән, бабан вә ја гоһумларындан бири. Бу, һәтта ананын сәнинлә Мүгәддәс Китабы өјрәнмәјә иҹазә верәҹәји, Јеһоваја хидмәт едән башга адам ола биләр.

Јошија јашҹа ушаг олса да, јахшы баша дүшүрдү ки, Јеһоваја хидмәт едәнләрлә достлуг етмәк лазымдыр. Арзумуз будур ки, сән дә ејни шеји едәсән вә дүзҝүн давранмағы сечәсән!

[Һашијә]

Суаллар:

○ Јошијанын атасы вә бабасы ким иди вә онлар неҹә адамлар идиләр?

○ Јошијанын бабасы һәјатында һансы дәјишиклији етмишди?

○ Јошијаја јахшы нүмунә олан ики пејғәмбәрин адыны чәк вә белә инсанларла достлуг етмәк, сәнҹә, нә үчүн ваҹибдир?

[17-ҹи сәһифәдәки шәкилләр]

Сефанја вә Јеремја Јошијаја дүзҝүн давранмаға неҹә көмәк етмишди?