Ушагларынызы өјрәдин

Јоаш пис достлуг уҹбатындан Јеһовадан узаглашды

ЈЕҺОВАНЫН мәбәди јерләшән Јерусәлимдә дәһшәтли вәзијјәт һөкм сүрүрдү. Ахазја падшаһы гәтлә јетирмишдиләр. Бу һадисәдән сонра онун анасы Аталја елә бир шеј етмишди ки, буну тәсәввүр етмәк белә чәтиндир. О, Ахазјанын оғулларыны, өз доғма нәвәләрини өлдүртдүрмүшдү! Билирсән нә үчүн?a ~ Чүнки һакимијјәти өз әлинә кечирмәк истәјирди.

Лакин Аталјанын көрпә нәвәси Јоашы хилас етмишдиләр, нәнәсинин исә бундан хәбәри јох иди. Бунун неҹә баш вердијини билмәк истәјәрдин? ~ Јоашын бибиси Јеһошева ону Аллаһын мәбәдиндә ҝизләтди. Чүнки онун әри Јеһојада баш каһин иди. Онлар бирликдә балаҹа Јоашы горудулар.

Алты ил Јоашы мәбәддә ҝизлинҹә сахладылар. Бу вахт әрзиндә она Јеһова Аллаһ вә Онун ганунлары һагда һәр шеји өјрәтдиләр. Нәһајәт, једди јашына чатанда Јеһојада Јоашы тахта чыхармаг гәрарына ҝәлди. Билмәк истәјирсән, о, буну неҹә етди вә Јоашын нәнәси гәддар мәләкә Аталја илә нә баш верди? ~

О вахтлар Јерусәлимдә падшаһлар хүсуси кешикчиләр сахлајырды вә Јеһојада хәлвәтҹә онларын һамысыны бир јерә топлады. Онлара арвады илә бирликдә Ахазја падшаһын оғлуну неҹә хилас етдикләрини данышды вә Јоашы онлара ҝөстәрди. Кешикчиләр онун гануни варис олдуғуна әмин олдулар. Сонра онлар план гурдулар.

Јеһојада Јоашы мәбәддән чыхартды вә падшаһлыг таҹыны онун башына гојду. Буну ҝөрән халг ‘әл чалыб “Јашасын падшаһ!” деди’. Падшаһ кешикчиләри Јоашы горумаг үчүн ону дөврәјә алдылар. Аталја шән нидалары ешидәндә мәбәдә тәрәф гачыб: «Хәјанәт! Хәјанәт!» — дејә бағырды. Лакин Јеһојаданын әмри илә кешикчиләр ону тутдулар вә өлдүрдүләр (2 Падшаһлар 11:1-16).

Неҹә дүшүнүрсән, ҝәнҹ падшаһ Јоаш сонралар да каһин Јеһојадаја гулаг асыр вә дүзҝүн давранырдымы? ~ Бәли, нә гәдәр ки Јеһојада сағ иди, о, белә дә едирди. Һәтта Јоаш тәдбир ҝөрдү ки, халг Аллаһын мәбәдинин тәмири үчүн ианә етсин. Вахтилә бу ишә онун атасы Ахазја вә бабасы Јеһорам биҝанә јанашмышдылар. Анҹаг ҝәл ҝөрәк, баш каһин Јеһојада өләндән сонра нә баш верди? (2 Падшаһлар 12:1-16).

О вахт Јоашын тәхминән 40 јашы вар иди. Јеһованы севәнләрлә јахын мүнасибәтләри горумаг әвәзинә, о, јаланчы аллаһлара ибадәт едәнләрлә достлашды. Һәмин вахт Аллаһын мәбәдиндә Јеһојаданын оғлу Зәкәријјә каһин кими хидмәт едирди. Јоашын пис әмәлләри һагда ешидәндә сәнҹә, Зәкәријјә нә етди? ~

Зәкәријјә үзүнү падшаһа вә бүтүн халга тутуб деди: «Сиз Рәбби тәрк етдијиниз кими О да сизи тәрк етди». Бу сөзләр Јоашы өзүндән елә чыхарды ки, Зәкәријјәни дашгалаг едиб өлдүрмәји әмр етди. Бир тәсәввүр ет: бир вахтлар гатилләрин әлиндән хилас едилән Јоаш, инди өзү Зәкәријјәнин гатили олду! (2 Салнамәләр 24:1-3, 15-22).

Бу һекајәдән өзүмүзә нә дәрс ҝөтүрә биләрик? ~ Әлбәттә, биз һеч вахт кинли, гәддар Аталјаја охшамаг истәмәздик. Әксинә, Исанын өјрәтдији кими, өз һәмиманлыларымызы вә һәтта дүшмәнләримизи дә севмәлијик (Матта 5:44; Јәһја 13:34, 35). Бир шеји дә унутма: әҝәр биз бу вахта гәдәр, Јоашын әввәлҹә етдији кими, дүзҝүн давранмышыгса, бундан сонра да Јеһованы севән вә бизи Она хидмәт етмәјә тәшвиг едән инсанларла достлуг етмәлијик.

[Һашијә]

Суаллар:

○ Јоаш кимдән вә неҹә хилас едилди?

○ Неҹә олду ки, Јоаш падшаһ олду вә о, һансы јахшы ишләри ҝөрдү?

○ Јоаш пис инсана неҹә чеврилди вә кими өлдүрдү?

○ Мүгәддәс Китабын бу һекајәсиндән нә өјрәнирик?

[25-ҹи сәһифәдәки шәкил]

Јоаш хилас едилди