Падшаһлығын тәблиғчиләринә тәләбат олан әразиләрдә хидмәт едә биләрсәнми?

«Бирләшмиш Штатларда ҝүзәранымыз јахшы иди, лакин бурадакы инсанларын вар-дөвләт һәрислијинин ҝеҹ-тез бизә вә ики оғлумуза пис тәсир едәҹәјиндән горхурдуг. Һәјат јолдашымла мән әввәлләр миссионер кими хидмәт етмишдик вә јенидән о садә, хошбәхт јашадығымыз ҝүнләрә гајытмаг истәјирдик».

БУ ИСТӘКДӘН ирәли ҝәләрәк, 1991-ҹи илдә Ралф вә онун һәјат јолдашы Пам бир нечә филиала мәктуб јазыб тәблиғчиләрә тәләбат олан јердә хидмәт етмәк арзуларыны билдирдиләр. Мексикадакы филиал онларын мәктубуна ҹаваб верәрәк бу өлкәдә инҝилисдилли әһалијә тәблиғ етмәк үчүн тәблиғчиләрә бөјүк тәләбат олдуғуну јазды. Филиалын гејд етдији кими, һәгигәтән дә һәмин ‘тарлалар бичилмәк үчүн ағармышды’ (Јәһ. 4:35). Ралфла Пам 8 вә 12 јашлы оғуллары илә бирликдә дәвәти дәрһал гәбул етдиләр вә Мексикаја көчмәк үчүн һазырлыг ҝөрмәјә башладылар.

Тәблиғ үчүн ҝениш әрази

Ралф дејир: «Бирләшмиш Штатлардан көчмәјә һазырлашанда бәзи баҹы-гардашлар јахшы нијјәтләрдән ирәли ҝәләрәк дејирдиләр: “Хариҹә көчмәк чох тәһлүкәлидир!”, “Бәс хәстәләнсәниз, неҹә олаҹаг?”, “Инҝилисдилли әразидә тәблиғ етмәк үчүн көчмәк нәјә лазымдыр? Онсуз да орада инҝилисдилли инсанлар һәгигәтлә марагланмајаҹаглар”. Амма гәрарымыз гәти иди, чүнки биз бу гәрары бир ан ичиндә вермәмишдик. Биз буну нечә ил иди ки, планлашдырырдыг. Бунун үчүн борҹа ҝирмәкдән гачмаға чалышыр вә пул јығырдыг. Ејни заманда, тез-тез аиләмизлә бир јерә топлашыб үзләшә биләҹәјимиз чәтинликләри мүзакирә едирдик».

Ралф вә аиләси илк нөвбәдә Мексикадакы филиала баш чәкдиләр. Гардашлар онлара өлкәнин хәритәсини ҝөстәриб: «Бу сизин тәблиғ едәҹәјиниз әразидир!» — дедиләр. Аилә Мехикодан 240 километр шимал-гәрбдә јерләшән вә әһалисинин әксәријјәтини әҹнәбиләрин тәшкил етдији Сан-Мигел-де-Алленде шәһәриндә јашамаг гәрарына ҝәлди. Онлар бу шәһәрә көчәндән үч ил сонра орада 19 тәблиғчидән ибарәт инҝилисдилли јығынҹаг јаранды. Бу, Мексикадакы илк инҝилисдилли јығынҹаг иди, анҹаг гаршыда ҝөрүләси ишләр һәлә чох иди.

Бәзи һесабламалара ҝөрә, Мексикада Бирләшмиш Штатлардан бир милјон адам јашајыр. Бундан әлавә, инҝилис дили бир чох мексикалы мүтәхәссисләрин вә тәләбәләрин икинҹи дилидир. Ралф дејир: «Биз даһа чох ишчиләрин олмасы үчүн дуа едирдик. Символик мәнада ‘торпаға нәзәр салмаға’ ҝәлән баҹы-гардашлар үчүн евимиздә һәмишә әлавә чарпајы һазыр иди» (Сај. 13:2).

Онлар хидмәтләрини ҝенишләндирмәк үчүн һәјатларыны садәләшдирмишләр

Тезликлә һәмин әразијә хидмәтләрини ҝенишләндирмәк истәјән чохлу баҹы-гардашлар ҝәлмәјә башлады. Онларын арасында Бирләшмиш Штатлардан олан Билл вә Кети дә варды. Онлар тәблиғчиләрә бөјүк тәләбат олан әразиләрдә артыг 25 ил хидмәт етмишдиләр. Билл вә Кети испан дилини өјрәнмәји дүшүнүрдүләр, амма Бирләшмиш Штатлардан олан тәгаүдчүләрин мәскән салдығы Чапала ҝөлүнүн саһилләриндәки ҝөзәл Аҹиҹик шәһәринә көчәндән сонра фикирләри дәјишди. Билл дејир: «Аҹиҹикдә һәгигәти өјрәнмәк истәјән инҝилисдилли инсанларын ахтарышы илә даһа чох мәшғул олурдуг». Бу шәһәрә көчдүкдән сонра Билл вә Кети ики ил әрзиндә Мексикада икинҹи инҝилисдилли јығынҹағын тәшкил олунмасынын шаһиди олдулар.

Канададан олан Кен вә Ҹоан да һәјатларыны садәләшдирмәк вә Падшаһлыг ишинә даһа чох вахт сәрф етмәк истәјирдиләр. Онлар да Мексикаја көчмүшдүләр. Кен дејир: «Ҝүнләрлә исти сујун вә ишығын олмадығы, телефонун ишләмәдији әразидә јашамаға алышмаг үчүн чохлу вахт тәләб олунду». Лакин тәблиғ онлара чохлу севинҹ ҝәтирирди. Кен гыса мүддәт әрзиндә хидмәти көмәкчи, ики илдән сонра исә ағсаггал тәјин олунду. Әввәлҹә онларын гызы Британни үчүн ҝәнҹләрин аз олдуғу кичик инҝилисдилли јығынҹаға гајнајыб-гарышмаг чәтин иди. Амма о, Падшаһлыг Залларынын тикинтисиндә иштирак етмәјә башлајандан сонра өзүнә өлкәнин һәр јериндә чохлу ҝөзәл достлар тапды.

Бирләшмиш Штатларын Техас штатындан олан Патрик вә Роксана јахынлыгларында инсанларын инҝилис дилиндә данышдығы миссионер саһәсинин олдуғуну ешидәндә чох севинмишдиләр. Патрик дејир: «Мексиканын шимал-шәргиндә јерләшән Монтерреј шәһәринә ҝәләндә баша дүшдүк ки, бура ҝәлмәјимиз Јеһованын рәһбәрлији иди». Онлар беш ҝүнүн ичиндә Техасдакы евләрини сатыб, белә десәк, ‘Македонијаја кечдиләр’ (Һәв. иш. 16:9). Мексикада пул газанмаг асан дејилди, лакин 17 тәблиғчиси олан кичик бир груп ики илин ичиндә онларын ҝөзү өнүндә 40 тәблиғчидән ибарәт јығынҹаға чеврилди.

Ҹефф вә Деб дә хидмәтләрини ҝенишләндирмәк үчүн һәјатларыны садәләшдирмәк гәрарына ҝәлмишдиләр. Онлар Бирләшмиш Штатлардакы ҝениш евләрини сатыб Мексиканын ҹәнуб саһилиндәки Канкун шәһәриндә балаҹа бир мәнзилә көчдүләр. Әввәлләр онлар евләринин јахынлығында раһат, кондисионерли бинада кечирилән конгресләрдә иштирак едирдиләр. Инди исә онлар инҝилис дилиндә ән јахын вә үстүачыг стадионларда кечирилән конгресә ҝетмәк үчүн сәккиз саат јол гәт етмәли олурдулар. Анҹаг Канкунда 50 тәблиғчидән ибарәт јығынҹағын јаранмасынын шаһиди олмаг онлара дәрин мәмнунлуг ҝәтирди.

Бәзи мексикалы баҹы-гардашлар да инҝилисдилли әразидә тәблиғ ишинә көмәк етмәјә башладылар. Мисал үчүн, Рубен вә аиләси Сан-Мигел-де-Аллендедә илк инҝилисдилли јығынҹағын јарандығыны вә бу јығынҹағын әразисинин бүтүн Мексика олдуғуну ешидәндә дәрһал көмәк әлләрини узатмаг гәрарына ҝәлдиләр. Онлар инҝилис дилини өјрәнмәли, тамамилә фәргли бир мәдәнијјәтә алышмалы вә ҝөрүшләрә ҝетмәк үчүн һәр һәфтә 800 километр мәсафә гәт етмәли идиләр. Рубен дејир: «Биз чох илләр әрзиндә Мексикада јашајан, амма хош хәбәри илк дәфә доғма дилләриндә ешитмәк фүрсәти олан әҹнәбиләрә шаһидлик етмәјә шад идик. Бәзиләри ҝөз јашлары илә бизә өз миннәтдарлыгларыны билдирирдиләр». Рубен вә онун аиләси Сан-Мигел-де-Аллендедәки јығынҹаға көмәк етдикдән сонра Гуанахуато шәһәриндә (мәркәзи Мексика) пионер кими хидмәт етмишләр. Бурада онлар 30-дан чох тәблиғчиси олан инҝилисдилли јығынҹағын тәшкил олунмасында иштирак етмишләр. Һал-һазырда онлар Гуанахуато јахынлығында јерләшән Ирапуато шәһәриндәки групда хидмәт едирләр.

Тәблиғи чәтинләшдирән һаллар

Бурада әҹнәбиләрдән савајы, бир чох мексикалылар да инҝилис дилиндә данышыр. Хош хәбәри онлара чатдырмаг чох вахт чәтин олур, чүнки онлар варлы инсанларын јашадығы әразиләрдә јашајыр вә әксәр һалларда гапыны гуллугчулар ачыр. Һәтта гапыны ев саһибләри ачсалар белә, онлар Јеһованын Шаһидләрини јерли кичик тәригәт сајдыглары үчүн чох вахт гулаг асмагдан имтина едирләр. Амма башга өлкәләрдән ҝәлән Јеһованын Шаһидләри онлара тәблиғ едәндә бәзиләри гулаг асырлар.

Гуеретаро шәһәриндә (мәркәзи Мексика) јашајан Глоријанын нүмунәсинә нәзәр салаг. О дејир: «Әввәлләр мән испанҹа данышан Јеһованын Шаһидләри илә растлашмышам, лакин һеч вахт онлара гулаг асмамышам. Анҹаг аиләм вә достларым проблемләрлә үзләшәндә мән депрессијаја дүшдүм вә дуада Аллаһа мүраҹиәт едәрәк мәнә чыхыш јолу ҝөстәрмәсини хаһиш етдим. Чох кечмәди ки, инҝилис дилиндә данышан бир гадын гапымызы дөјдү. О, евдә киминсә инҝилис дилиндә данышыб-данышмадығыны сорушду. Гадынын әҹнәби олмасы мәндә мараг ојатды вә мән инҝилис дилиндә данышдығымы сөјләдим. О, тәгдимәсини едәркән өз-өзүмә фикирләширдим: “Ҝөрәсән, бу америкалы бурада нә едир?!” Амма бундан әввәл Аллаһдан дуада әламәт истәмишдим. Ола билсин ки, бу, Аллаһын дуаларыма вердији ҹаваб иди». Глорија Мүгәддәс Китабы өјрәнмәјә разылыг верди вә аиләсинин мүгавимәтләринә бахмајараг, руһән тез инкишаф етди вә вәфтиз олунду. Бу ҝүн Глорија даими пионердир, онун әри вә оғлу да Јеһоваја хидмәт едир.

Хидмәтләрини ҝенишләндирәнләрин алдығы мүкафатлар

Падшаһлығын тәблиғчиләринә тәләбат олан јерләрдә хидмәт етмәјин өз чәтинликләри вар, амма мүкафатлары да чохдур. Мәгаләнин әввәлиндә хатырланан Ралф дејир: «Биз Бөјүк Британијадан, Чиндән, Јамајкадан, Исвечдән вә һәтта Гананын күбар ҹәмијјәтиндән олан инсанларла Мүгәддәс Китаб өјрәнмәси кечирирдик. Онлардан бәзиләри таммүддәтли хидмәтә башламышлар. Өтән илләр әрзиндә аиләмиз једди инҝилисдилли јығынҹағын јаранмасынын шаһиди олду. Оғулларымызын икиси дә бизимлә бирҝә пионер хидмәтинә башлады вә һал-һазырда онлар Бирләшмиш Штатлардакы Бет-Елдә хидмәт едирләр».

Инди Мексикада 88 инҝилисдилли јығынҹаг вә чохсајлы груплар фәалијјәт ҝөстәрир. Бу сүрәтли инкишаф нәјин сајәсиндә баш вериб? Мексикада инҝилисдилли инсанларын чоху әввәлләр һеч вахт Јеһованын Шаһидләри илә растлашмајыб. Бәзиләри бурада, өз өлкәләриндә олдуғу кими, гоһум-әгрәбаларынын вә достларынын тәзјигинә мәруз галмадыглары үчүн хош хәбәрә һај вермишләр. Башгалары исә тәгаүдә чыхдыглары вә руһани ишләрә чох вахтлары олдуғундан Мүгәддәс Китабы өјрәнмәјә разылашмышлар. Үстәлик, инҝилисдилли јығынҹагларда тәблиғчиләрин үчдә биринин пионер кими хидмәт етмәси јығынҹагларда руһ јүксәклијинә вә артыма сәбәб олур.

Сәни хејир-дуалар ҝөзләјир

Шүбһә јохдур ки, бүтүн дүнјада даһа чох инсан Падшаһлыг һаггында хош хәбәри доғма дилиндә ешидәндә она һај верәҹәк. Буна ҝөрә дә, Јеһоваја даһа чох хидмәт етмәк истәјән чохсајлы ҝәнҹ вә јашлы, субај вә аиләли баҹы-гардашларын Падшаһлығын тәблиғчиләринә тәләбат олан јерләрә көчмәјә һазыр олдугларыны ҝөрмәк чох севиндириҹидир. Дүздүр, онлар чәтинликләрлә гаршылаша биләрләр, анҹаг бу чәтинликләр Мүгәддәс Китаб һәгигәтләрини гәбул едән сәмими-гәлбли инсанлары тапанда әлдә етдикләри севинҹлә мүгајисәдә һечдир. Бәс сән Падшаһлығын тәблиғчиләринә тәләбат олан јерләрдә — истәр өз өлкәндә, истәрсә дә хариҹдә хидмәт етмәк үчүн мүвафиг дәјишикликләр етмәјә һазырсанмы?a (Лука 14:28-30; 1 Кор. 16:9). Әҝәр беләдирсә, әмин ол ки, сәни бол хејир-дуалар ҝөзләјир.

[Һашијә]

[21-ҹи сәһифәдәки чәрчивә]

Онларын хошбәхт ҝөрүнмәсинин сәбәби

Берл Бөјүк Британијадан Канадаја көчмүш вә орада бир нечә бејнәлхалг компанијаларда менеҹер ишләмишди. О һәм дә мәһарәтли ат сүрән олмуш, һәтта 1980-ҹи илин Олимпиадасында Канаданын тәмсилчиси сечилмишди. Тәгаүдә чыхандан сонра Берл илә әри Чапала ҝөлү јахынлығына көчдүләр. Чох вахт онлар јерли ресторанда јемәк јејирдиләр. О, хошбәхт ҝөрүнән инҝилисдилли тәгаүдчүләри ҝөрәндә онларла таныш олур вә Мексикаја ҝәлишләринин сәбәбини өјрәнирди. Таныш олдуғу бу инсанлар чох вахт Јеһованын Шаһидләри олурдулар. Берл вә онун әри фикирләширдиләр ки, әҝәр Аллаһы танымаг хошбәхтлик ҝәтирир вә һәјатын мәнасыны тапмаға көмәк едирсә, онда онлар да Аллаһы танымаг истәјирләр. Бир нечә ај ҝөрүшләрә ҝәлдикдән сонра Берл Мүгәддәс Китабы өјрәнмәјә башлады вә Јеһованын Шаһиди олду. Бир нечә ил әрзиндә о, даими пионер кими хидмәт етди.

[22-ҹи сәһифәдәки чәрчивә]

«Онлар бизим үчүн әсил хејир-дуадыр»

Јерли Шаһидләр Падшаһлыг ишиндә онлара көмәк етмәјә ҝәлән баҹы-гардашлары јүксәк гијмәтләндирирләр. Кариб һөвзәси өлкәләриндәки филиалларын бири јазыр: «Бурада јүзләрлә әҹнәби баҹы-гардашлар хидмәт едир. Әҝәр онлар бураны тәрк етмәли олсалар, бу, јығынҹагларын сабитлијинә тәсир едәҹәк. Онлар бизим үчүн әсил хејир-дуадыр».

Аллаһын Кәламында ‘бир алај гадынларын мүждә пајладығы’ дејилир (Мәз. 68:11). Буна ҝөрә дә хариҹдә тәблиғ едәнләрин арасында бу гәдәр субај баҹыларын олмасы тәәҹҹүблү дејил. Бу фәдакар баҹыларын көмәји чох бөјүкдүр. Шәрги Авропадакы филиалларын бири өз мүшаһидәси илә бөлүшүр: «Јығынҹагларымызын әксәријјәтиндә тәблиғчиләрин бөјүк гисми баҹылардыр, бәзән онлар јығынҹагдакыларын 70 фаизини тәшкил едирләр. Онлардан чоху һәгигәтдә јенидир, анҹаг хариҹдән ҝәлән субај пионер баҹылар онлара тәлим вермәклә бөјүк көмәклик ҝөстәрирләр. Бу баҹылар бизим үчүн гијмәтли һәдијјәдир!»

Бәс хариҹдә хидмәт етмәләри барәдә бу баҹыларын өзләри нә дүшүнүрләр? 30 јашларында олан вә бир нечә ил башга өлкәдә пионер кими хидмәт едән субај баҹымыз Анҹелика дејир: «Чәтинликләр чох олур. Тәјин олундуғум әразиләрин бириндә һәр ҝүн палчыглы јолларла ҝетмәли олурдум вә әзаб-әзијјәт ичиндә јашајан инсанлары ҝөрүрдүм; бу, чох мәјуседиҹи иди. Лакин хидмәтдә инсанлара көмәк етмәкдән мәмнунлуг дујурдум. Јерли баҹыларын онлара көмәк етдијимә ҝөрә дәфәләрлә өз миннәтдарлыгларыны билдирмәләри мәнә ҝүҹлү тәсир бағышлајырды. Бир баҹы онларын өлкәсиндә хидмәт етмәк үчүн бу гәдәр мәсафә гәт етмәјимин ону таммүддәтли хидмәтә башламаға тәшвиг етдијини сөјләди».

50 јашларында олан пионер баҹымыз Сју дејир: «Чәтинликләр гачылмаздыр, лакин алдығымыз хејир-дуалар гат-гат чохдур. Хидмәт инсаны чох руһландырыр! Вахтымын чох һиссәсини ҝәнҹ баҹыларла хидмәтдә кечирдијим үчүн Мүгәддәс Китабдан вә нәшрләримиздән манеәләрин өһдәсиндән ҝәлмәјә даир өјрәндикләрими онларла бөлүшүрәм. Онлар тез-тез мәнә дејирләр ки, чох илләр әрзиндә субај пионер кими хидмәт едәрәк проблемләри дәф етмәкдә ҝөстәрдијим нүмунә онлары әмин едир ки, һәјатдакы чәтинликләрин өһдәсиндән онлар да ҝәлә биләрләр. Бу баҹылара көмәк етмәк мәнә дәрин мәмнунлуг ҝәтирир».

[20-ҹи сәһифәдәки хәритә]

(Хәритәјә нәшрин өзүндә бахын)

МЕКСИКА

Гуанахуато

Ирапуато

Чапала

Аҹиҹик

Чапала ҝөлү

Монтерреј

Сан-Мигел-де-Алленде

Гуеретаро

МЕХИКО

Канкун

[23-ҹү сәһифәдәки шәкил]

Бәзиләринин хош хәбәри илк дәфә ешидән әҹнәбиләрә шаһидлик етмәк имканлары олуб