«Јахшы ишләрә сәјли» ол!

«Иса Өзүнү бизим үчүн фәда етди ки, бизи һәр ҹүр һагсызлыгдан хилас етсин вә тәмизләјиб, Өзүнә хүсуси вә јахшы ишләрә сәјли бир халг төрәтсин» (ТИТ. 2:14).

1. Ерамызын 33-ҹү илинин нисан ајынын 10-да Иса мәбәдин әразисинә ҝәләндә нә баш верир?

ЕРАМЫЗЫН 33-ҹү илинин нисан ајынын 10-дур. Пасха бајрамына ҹәми бир нечә ҝүн галыб. Јерусәлим мәбәдинин әразисинә топлашан ҹамаат севинҹлә бу бајрамы ҝөзләјир. Иса ҝәләндә нә баш верәҹәк? Мүждә јазанлардан үч нәфәр — Матта, Марк вә Лука икинҹи дәфә Исанын сатыҹылары вә алыҹылары бурадан говдуғуну тәсдигләјир. О, сәррафларын масаларыны вә ҝөјәрчин сатанларын күрсүләрини чевирир (Мат. 21:12; Марк 11:15; Лука 19:45). Үч ил бундан габаг Исанын ҝөстәрдији гејрәт һеч дә зәифләмәмишди (Јәһ. 2:13-17).

2, 3. Һарадан билирик ки, Исанын ҝөстәрдији гејрәт јалныз мәбәди тәмизләмәклә битмәди?

² Маттанын јаздығына ҝөрә, Исанын ҝөстәрдији гејрәт јалныз мәбәди тәмизләмәклә битмир. О һәмчинин јанына ҝәлән корлары вә топаллары сағалдыр (Мат. 21:14). Лука Исанын ҝөрдүјү диҝәр ишләри дә гәләмә алыб. «[Иса] һәр ҝүн мәбәддә тәлим верирди» (Лука 19:47; 20:1). Беләликлә, Исанын сәјли олмасы хүсусилә дә онун тәблиғ хидмәтиндән ҝөрүнүрдү.

³ Һәвари Павел Титуса јаздығы мәктубунда изаһ етмишди: «Иса Өзүнү бизим үчүн фәда етди ки, бизи һәр ҹүр һагсызлыгдан хилас етсин вә тәмизләјиб, Өзүнә хүсуси вә јахшы ишләрә сәјли бир халг төрәтсин» (Тит. 2:14). Бәс биз неҹә «јахшы ишләрә сәјли» ола биләрик? Јәһуданын хејирхаһ падшаһларынын нүмунәси бизи буна неҹә тәшвиг едә биләр?

Тәблиғ вә өјрәтмәк ишиндә сәј ҝөстәр

4, 5. Јәһуда падшаһларындан дөрдүнүн јахшы ишләрә сәјли олдуғу нәдән ҝөрүнүр?

⁴ Аса, Јеһошафат, Хизгија вә Јошија Јәһудада бүтпәрәстлијин көкүнү кәсмәк үчүн тәдбирләр ҝөрмүшдүләр. Аса «өзҝә аллаһларын гурбанҝаһларыны вә сәҹдәҝаһлары арадан галдырды вә сүтунлары гырды, Ашера бүтләрини кәсди» (2 Салн. 14:3). Јеһошафат Јеһоваја ибадәтә олан гејрәт һисси илә алышыб-јанараг «сәҹдәҝаһлары вә Ашера бүтләрини Јәһудадан ҝөтүрдү» (2 Салн. 17:6; 19:3)a.

⁵ Хизгијанын Јерусәлимдә тәшкил етдији једдиҝүнлүк Пасха бајрамынын тәнтәнәли сурәтдә гејд едилмәсиндән сонра «бүтүн Исраиллиләр Јәһуда шәһәрләринә чыхыб даш сүтунлары сындырды, Ашера бүтләрини кәсди. Бүтүн Јәһуда вә Бинјамин, Ефрајим, Менашше торпагларында олан сәҹдәҝаһлары вә гурбанҝаһлары ахыра гәдәр дағытдылар» (2 Салн. 31:1). Јошија падшаһ оланда онун ҹәми сәккиз јашы варды. Мүгәддәс Јазыларда дејилир: «Падшаһлығынын сәккизинҹи илиндә һәлә ҝәнҹ икән бабасы Давудун Аллаһыны ахтармаға башлады. Он икинҹи илдә Јәһуданы вә Јерусәлими сәҹдәҝаһлардан, Ашера бүтләриндән, ојма бүтләрдән вә төкмә бүтләрдән тәмизләмәјә башлады» (2 Салн. 34:3). Ҝөрдүјүмүз кими, бу падшаһларын дөрдү дә јахшы ишләрә сәјли иди.

6. Нәјә ҝөрә хидмәтимизи Јәһуданын садиг падшаһларынын ҝөрдүјү ишлә мүгајисә едә биләрик?

⁶ Ејнилә, бу ҝүн биз дә инсанлара, бүтпәрәстлик дә дахил олмагла, јалан дини тәлимләрин буховларындан азад олмаға көмәк едирик. Евдән-евә тәблиғ едәркән гаршымыза мүхтәлиф инсанлар чыхыр (1 Тим. 2:4). Асијалы ҝәнҹ бир гызын анасы евдә чохсајлы сурәтләрә сәҹдә едирди. Гызын фикринҹә, бу сурәтләрин һамысы һәгиги Аллаһ ола билмәзди, буна ҝөрә дә тез-тез дуа едирди ки, һәгиги Аллаһы тапа билсин. Ҝүнләрин бир ҝүнү ики нәфәр Јеһованын Шаһиди онун гапысыны дөјдү. Онларын сајәсиндә о, һәгиги Аллаһын бөјүк адынын Јеһова олдуғуну өјрәнди. Вә нәһајәт, бүтләр һаггында һәгигәти өјрәндији үчүн о неҹә дә шад иди! Инди о, сәјлә тәблиғ едир вә инсанлара Јеһова һаггында өјрәнмәјә көмәк едир (Јешаја 42:8, КМ; Мәз. 115:4-8; 1 Јәһ. 5:21).

7. Јеһошафатын ҝүнләриндә өлкәни долашыб ҝәзән мүәллимләрин нүмунәсини неҹә тәглид едә биләрик?

⁷ Евдән-евә тәблиғ едәркән саһәмизи нә дәрәҹәдә әсаслы сурәтдә ишләјирик? Мараглыдыр ки, Јеһошафат һөкмранлығынын үчүнҹү илиндә беш рәис, доггуз левили вә ики каһин ҝөндәрир ки, бүтүн шәһәрләри долашыб халга Јеһованын ганунларыны өјрәтсинләр. Онларын ҝөрдүјү бу иш о гәдәр уғурлу олду ки, әтраф халглар Јеһовадан горхмаға башладылар. (2 Салнамәләр 17:9, 10 ајәләрини оху.) Саһәмизә мүхтәлиф саатларда вә мүхтәлиф ҝүнләрдә ҝәлмәклә аиләнин бир нечә үзвү илә сөһбәт едә биләрик.

8. Тәблиғ хидмәтимизи неҹә ҝенишләндирә биләрик?

⁸ Бизим ҝүнләрдә Аллаһын бир чох хидмәтчиләри евләрини бурахыб Падшаһлығын сәјли тәблиғчиләринә еһтијаҹ олан әразиләрә көчмүшләр. Сән дә белә едә биләрсәнми? Белә бир имканы олмајанларын бәзиләри әразиләриндә јашајан вә башга дилләрдә данышан инсанлара тәблиғ етмәјә чалыша биләрләр. 81 јашлы Рон гардашын јашадығы әрази чохмилләтли олдуғундан о, 32 дилдә саламлашмағы өјрәнди! Бу јахынларда о, күчәдә Африкадан олан бир әр-арвада раст ҝәләндә онлары доғма јоруба дилләриндә саламлады. Онлар Ронун нә вахтса Африкада олуб-олмадығы илә марагландылар. Гардаш: «Јох»,— дејә ҹаваб верәндә онларын дилини һарадан билдијини сорушдулар. Бунун сајәсиндә гардаш онлара ҝөзәл шаһидлик етди. Онлар бөјүк мәмнунијјәтлә бир нечә журнал ҝөтүрүб өз үнванларыны она вердиләр. Гардаш да бу үнваны јерли јығынҹаға өтүрдү ки, бу әр-арвадла Мүгәддәс Китаб өјрәнмәси башласынлар.

9. Тәблиғ хидмәтиндә бирбаша Мүгәддәс Китабдан охумаг нәјә ҝөрә ваҹибдир? Нүмунә ҝәтирин.

⁹ Јеһошафатын әмри илә өлкәни ҝәзиб долашан мүәллимләрин әлиндә «Рәббин Ганун китабы» варды. Мүгәддәс Китаб Аллаһын Кәламы олдуғу үчүн биз бүтүн дүнјада инсанлара онун әсасында тәлим вермәјә чалышырыг. Хидмәтимиздә Мүгәддәс Китабдан охумагла инсанлара онун сөзләринин доғрулуғуну ҝөрмәјә көмәк едирик. Мәсәлән, бир гадын Линда адлы баҹымыза әринин үрәк тутмасы олдуғундан даим диггәтә еһтијаҹы олдуғуну деди. Гадын ҝилеј-ҝүзар едәрәк сөјләди: «Билмирәм, нә етмишәм ки, Аллаһ башыма белә бир бәла ҝәтириб?» Линда деди: «Олар, бир фикри нәзәринизә чатдырым?» Сонра Јагуб 1:13 ајәсини охујуб, әлавә етди: «Бизим вә әзизләримизин башына ҝәлән мүсибәтләр Аллаһын ҹәзасы дејил». Бу сөзләрдән сонра гадын Линданы бәрк гуҹаглады. Линда дејир: «Мән она Мүгәддәс Китабын көмәјилә тәсәлли верә билдим. Аллаһын Кәламындан охудуғумуз бәзи ајәләри инсанлар индијәдәк һеч ешитмәјибләр». Онларын сөһбәтиндән сонра һәмин гадын Мүгәддәс Китабы өјрәнмәјә разылыг верди.

Сәјлә хидмәт едән ҝәнҹләр

10. Јошија ҝәнҹ мәсиһчиләр үчүн һансы ҝөзәл нүмунәни гојуб?

¹⁰ Ҝәлин Јошијанын нүмунәсинә јенидән гајыдаг. О һәлә ҝәнҹ икән һәгиги ибадәти дәстәкләјирди вә бүтпәрәстлијә гаршы ҝүҹлү мүбаризә апармаға башлајанда тәхминән 20 јашы варды. (2 Салнамәләр 34:1-3 ајәләрини оху.) Сајсыз-һесабсыз ҝәнҹ оғлан вә гызлар хидмәтдә бу ҹүр сәј ҝөстәрир.

11-13. Јеһоваја сәјлә хидмәт едән мүасир ҝәнҹләрдән нә өјрәнә биләрик?

¹¹ Инҝилтәрәдә јашајан Һанна гоншу шәһәрдә франсыздилли групун тәшкил олундуғуну ешидәндә онун 13 јашы варды вә мәктәбдә франсыз дилини өјрәнирди. Атасы ону һәмин ҝөрүшләрә апарыб-ҝәтирмәјә разы олду. Инди 18 јашы олан Һанна даими пионер кими хидмәт едир вә франсыздилли инсанлара сәјлә тәблиғ едир. Башга инсанлара Јеһова һаггында өјрәтмәк үчүн сән дә хариҹи дил өјрәнмәјә һазырсанмы?

¹² «Аллаһы иззәтләндирән мәгсәдләрә ҹан атын» (рус.) филми Рејчелин чох хошуна ҝәлиб. 1995-ҹи илдә хидмәтә башлајанда дүшүнҹә тәрзинин неҹә олдуғу барәдә дејир: «Мән елә дүшүнүрдүм ки, һәгигәти артыг мәнимсәмишәм. Филмә бахдыгдан сонра исә анладым ки, чох илләр әрзиндә әсас шејләрдән башга һеч нә етмәмишәм. Мән һәгигәтдән мөһкәм јапышмаг үчүн мүбаризә апармалы, хидмәт вә шәхси өјрәнмә заманы фикрими ҹәмләмәли вә ҹидди сәј ҝөстәрмәли олурам». Инди Рејчел һисс едир ки, Јеһоваја хидмәтдә даһа чох сәј ҝөстәрир. Бу һансы бәһрәләри ҝәтирди? О дејир: «Јеһова илә мүнасибәтләрим мөһкәмләнди. Инди дуаларым даһа долғундур, шәхси өјрәнмә заманы дәрин арашдырмалар апарырам вә бу, мәнә даһа чох мәмнунлуг ҝәтирир, Мүгәддәс Китаб һекајәләри исә мәним үчүн даһа реал олуб. Инди хидмәтдән даһа чох севинҹ дујурам вә Јеһованын кәламларынын инсанлара тәсәлли вердијини ҝөрмәк мәнә әсил мәмнунлуг ҝәтирир».

¹³ Лука адлы ҝәнҹ гардаша исә «Ҝәнҹләрин суаллары. Һәјатымы нәјә һәср едим?» (рус.) видеофилми бөјүк тәәссүрат бағышлады. Бу филмә бахдыгдан сонра о јазыр: «Мән неҹә јашадығымын үзәриндә дүшүнмәјә вадар олдум». Вә етираф едир: «Вахтилә мәнә тәзјиг ҝөстәрирдиләр ки, али тәһсил алым вә мадди фираванлыға наил олум, сонра руһани мәгсәдләр һагда фикирләшәрәм. Лакин белә мәгсәдләр һеч дә руһән инкишаф етдирмир, әксинә, зәифләдир». Ҝәнҹ баҹы вә гардашлар, нәјә ҝөрә мәктәбдә өјрәндикләринизи, Һанна кими, хидмәтинизи ҝенишләндирмәкдә истифадә едиб-едә билмәјәҹәјинизи нәзәрдән кечирмәјәсиниз? Нәјә ҝөрә Рејчелдән нүмунә ҝөтүрәрәк Аллаһа һәгигәтән дә иззәт ҝәтирән мәгсәдләрә ҹан атмајасыныз? Бир чох ҝәнҹләрин дүшдүјү тәләләрдән узаг дурараг Луканы тәглид един.

Хәбәрдарлыглара ҹидди јанаш

14. Јеһова һансы ибадәти гәбул едир вә нәјә ҝөрә мүасир дүнјада бу ҹүр тәмизлији горујуб сахламаг чәтин мәсәләдир?

¹⁴ Аллаһын халгы Она мәгбул тәрздә ибадәт етмәк үчүн өзүнү тәмиз сахламалыдыр. Јешаја хәбәрдарлыг едир: «Чәкилин, чәкилин, орадан чыхын, мурдар шејләрә тохунмајын, орадан [Бабилдән] чыхыб тәмизләнин, еј Рәббин әшјаларыны дашыјанлар!» (Јешаја 52:11). Јешаја бу сөзләри јазмаздан чох илләр өнҹә хејирхаһ падшаһ олан Аса Јәһудада әхлагсызлығын көкүнү кәсмәк үчүн гәти тәдбирләр ҝөрмүшдү. (1 Падшаһлар 15:11-13 ајәләрини оху.) Чох әсрләр сонра һәвари Павел Титуса деди ки, Исанын өз давамчылары уғрунда ҹаныны гурбан вермәсинин мәгсәди онлары «тәмизләјиб, Өзүнә хүсуси вә јахшы ишләрә сәјли бир халг» төрәтмәк иди (Тит. 2:14). Әхлагсызлыға гапылмыш бу дүнјада әхлаги ҹәһәтдән тәмиз галмаг асан дејил, хүсусилә дә ҝәнҹләр үчүн. Мәсәлән, Аллаһын бүтүн хидмәтчиләри, ҝәнҹ вә јашлы олмаларындан асылы олмајараг, реклам лөвһәләриндә, телевизија екранларында, филмләрдә, хүсусилә дә Интернетдә нүмајиш етдирилән порнографијадан тәмиз галмаг үчүн ҝүҹлү мүбаризә апармалыдырлар.

15. Пислијә нифрәт һисси инкишаф етдирмәкдә бизә нә көмәк едә биләр?

¹⁵ Аллаһын хәбәрдарлыгларына ҹидди јанашмаг бизә пислијә нифрәт инкишаф етдирмәјә көмәк едә биләр (Мәз. 97:10; Ром. 12:9). Бир гардашын дили илә десәк, порнографијанын «магнит кими ҝүҹлү ҹазибә гүввәсиндән азад олмаг үчүн» о, биздә икраһ һисси доғурмалыдыр. Магнитләшдирилмиш ики метал парчасыны бир-бириндән ајырмаг үчүн онлары бир јердә сахлајан гүввәдән даһа бөјүк гүввә тәләб олунур. Ејнилә, порнографијанын ширникдириҹи тәсиринә мүгавимәт ҝөстәрмәк үчүн дә бөјүк сәј тәләб олунур. Амма бу тәсирин нә дәрәҹәдә зәрәрли олдуғуну анламағымыз она гаршы нифрәт һисси инкишаф етдирмәјимизә көмәк едәҹәк. Бир гардаш Интернетдә порнографик сајтлара бахмаг вәрдишиндән јаха гуртармаг үчүн ҝүҹлү сәј ҝөстәрмәли олду. О, компүтерини елә јерә кечирди ки, аилә үзвләринин ҝөзү гаршысында олсун. Бунунла јанашы, о, өзүнү бу мурдар һәрәкәтдән тәмизләмәк вә јахшы ишләрә сәјли олмаг әзминдә иди. Гардаш һәтта башга бир аддым да атды. О, иши илә бағлы Интернетдән истифадә етмәли олдуғу үчүн гәрара ҝәлди ки, јалныз һәјат јолдашы јанында оланда Интернетә дахил олаҹаг.

Јахшы давранышын фајдасы

16, 17. Јахшы давранышымыз бизи мүшаһидә едәнләрдә һансы тәәссүраты ојада биләр? Нүмунә чәкин.

¹⁶ Аллаһа хидмәт едән ҝәнҹләр неҹә дә ҝөзәл руһ тәзаһүр етдирирләр вә бу, онлара кәнардан мүшаһидә едәнләрә неҹә дә ҝүҹлү тәсир бағышлајыр! (1 Петер 2:12 ајәсини оху.) Бир киши Лондон Бет-Елиндәки чап машынына сервис хидмәти ҝөстәрмәк үчүн бүтүн ҝүнүнү орада кечирәндән сонра Јеһованын Шаһидләринә мүнасибәти тамамилә дәјишди. Бу дәјишикликләр Јеһованын Шаһидләри илә Мүгәддәс Китабы өјрәнән арвадынын нәзәриндән гачмады. Әввәлләр әри Јеһованын Шаһидләринин онун евинә ҝәлмәсини истәмирди. Амма һәмин ҝүн евә гајыданда Шаһидләрин она ҝөстәрдији хејирхаһ мүнасибәт һаггында ағыздолусу данышды. О гејд етди ки, онлардан һеч ким сөјүш сөјмүрдү. Һамы бир-бири илә сәбирлә давраныр вә орада сүлһ аб-һавасы һөкм сүрүрдү. Она хүсуси тәәссүрат бағышлајан ҝәнҹ баҹы-гардашларын көнүллү олараг вахт вә гүввәләрини хош хәбәри јајмаг ишиндә көмәк етмәк үчүн һеч бир мәваҹиб алмадан сәјлә чалышмалары иди.

¹⁷ Бунун кими, аиләләринин гајғысына галмаг үчүн дүнјәви ишдә ишләјән һәмиманлыларымыз да өз вәзифәләрини ҹанла-башла јеринә јетирирләр (Колос. 3:23, 24). Бунун сајәсиндә онларын иш јерләрини итирмәк еһтималы азалыр, чүнки мүдирләри онларын ишләринә виҹданла јанашмаларыны гијмәтләндирир вә белә ишчиләрини итирмәк истәмирләр.

18. Биз неҹә «јахшы ишләрә сәјли» ола биләрик?

¹⁸ Јеһоваја етибар етмәклә, Онун ҝөстәришләринә әмәл етмәклә вә ҝөрүш јерләримизи тәмиз сахламагла вә саирә кими ишләримизлә Онун евинә гејрәтлә јанашдығымызы ҝөстәрә биләрик. Үстәлик, биз Падшаһлығын тәблиғи вә шаҝирд һазырламаг ишиндә әлимиздән ҝәләни етмәк истәјирик. Јашлы вә ја ҝәнҹ олмағымыздан асылы олмајараг, ибадәтдә јүксәк нормалара риајәт етмәклә бөјүк хејир-дуалар алаҹағыг. Вә биз һәмишә «јахшы ишләрә сәјли бир халг» кими танынаҹағыг (Тит. 2:14).

[Һашијә]

Мүгәддәс Китаб вә мүасир нүмунәләрдән нә өјрәндиниз?

• Тәблиғ вә тәлим ишиндә неҹә сәј тәзаһүр етдирә биләрик?

• Ҝәнҹ мәсиһчиләр неҹә «јахшы ишләрә сәјли» ола биләрләр?

• Позуҹу тәсирләрдән јаха гуртармаг неҹә мүмкүндүр?

[13-ҹү сәһифәдәки шәкил]

Мүгәддәс Китабдан хидмәтдә мүнтәзәм истифадә едирсәнми?

[15-ҹи сәһифәдәки шәкил]

Мәктәбдә охујаркән хариҹи дил өјрәнмәјин сајәсиндә хидмәтини ҝенишләндирә биләрсән