Иса Мәсиһдән нә өјрәнирик?
Бәшәријјәтин ҝәләҹәји һагда
Иса Мәсиһ инсанлара ҝөјләрдә һәјат вәд етмишдими?
Бәли, етмишди! Исанын өзү дирилдилмиш вә Атасынын јанында олмаг үчүн ҝөјә галдырылмышды. Амма өлүмүндән вә дирилмәсиндән әввәл о, 11 садиг һәварисинә демишди: «Атамын евиндә чох отаглар вардыр... Сизә јер һазырламаға ҝедирәм» (Јәһја 14:2). Лакин бу шәрәфә аз сајда адам наил олаҹагды. Бу, Исанын шаҝирдләринә дедији сөзләрдән ајдын ҝөрүнүр: «Горхма, еј кичик сүрү! Чүнки Атаныз сизә Сәлтәнәти вермәји илтифат етди» (Лука 12:32).
«Кичик сүрү» ҝөјләрдә нә едәҹәк?
Аллаһын нијјәт етдији кими, бу кичик груп Иса Мәсиһлә бирликдә сәмави һөкумәтин бир һиссәси олаҹаг. Биз буну һарадан билирик? Дирилдикдән сонра Иса һәвари Јәһјаја ачыгламышды ки, бәзи садиг мәсиһчиләр ‘дүнја үзәриндә сәлтәнәт сүрәҹәк’ (Вәһј 1:1; 5:9, 10). Бу, һәгигәтән дә хош хәбәрдир. Чүнки бәшәријјәт јахшы һөкумәтә мөһтаҹдыр. Иса Мәсиһин башчылыг етдији бу һөкумәт нәјә наил олаҹаг? Иса демишди: «Инсан Оғлу һәр шејин јениләнмәсиндә иззәтли тахтына отураҹағы заман, Мәним ардымҹа ҝәлән сизләр дә Исраилин он ики гәбиләсинә һөкм етмәк үчүн он ики тахт үзәриндә отураҹагсыныз» (Матта 19:28). Иса Мәсиһин вә онун давамчыларынын һакимијјәти ‘јениләнмәјә’, јәни илк инсанларын ҝүнаһ ишләтмәсиндән әввәл јер үзүндә олан мүкәммәл шәраитин бәрпасына наил олаҹаг.
Иса диҝәр инсанлары нәјә үмидвар етмишди?
Ҝөјдә јашамаг үчүн јарадылан Исадан фәргли олараг, инсанлар јердә јашамаг үчүн јарадылмышлар (Мәзмур 115:16). Елә буна ҝөрә дә Иса демишди: «Сиз ашағыдансыныз, Мән јухарыданам» (Јәһја 8:23). Иса инсанлары јер үзүндә ҝөзәл ҝәләҹәјин ҝөзләдијиндән бәһс едирди. Бир дәфә о демишди: «Һәлимләр нә бәхтијардырлар! Чүнки јери мирас алаҹаглар» (Матта 5:5). О, Аллаһ тәрәфиндән илһамланмыш мәзмура истинад етмишди: «Мәзлумлар өлкәни мүлк олараг алаҹаг, әмин-аманлығын боллуғундан зөвг тапаҹаг. Салеһләр өлкәни мүлк олараг алаҹаг, онлар орада әбәди мәскән салаҹаг» (Мәзмур 37:11, 29).
Беләликлә, әбәди јашамаг үмиди јалныз ҝөјләрә ҝедәҹәк ‘кичик сүрүјә’ верилмәјиб. Иса Мәсиһ, һәмчинин бүтүн дүнјадакы милјонларла инсан үчүн олан үмиддән дә данышырды. О демишди: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун» (Јәһја 3:16).
Аллаһ инсанлары әзаблардан неҹә гуртараҹаг?
Иса: «Бу дүнја инди һөкмә уғрајыр; бу дүнјанын рәиси инди чөлә атылаҹагдыр»,— демәклә инсанларын ики зүлмдән гуртулаҹағыны вәд етмишди (Јәһја 12:31). Биринҹиси, башгаларына әзаб верән аллаһсыз инсанлар мүһакимә едиләҹәк вә мәһв олунаҹаглар. Икинҹиси, Шејтан чөлә атылаҹаг вә бир дә инсанлары алдада билмәјәҹәк.
Бәс әсрләр боју јашајан, Аллаһ вә Мәсиһ һагда өјрәниб онлара иман етмәк имканы олмадан өлән инсанларла нә баш верәҹәк? Иса јанында ҹан верән гулдура демишди: «Сән Мәнимлә бәрабәр ҹәннәтдә олаҹагсан» (Лука 23:43). Иса Мәсиһ милјонларла башга инсанлар кими, һәмин адамы да јерүзү Ҹәннәтдә дирилдәндә онун Аллаһ һаггында өјрәнмәк имканы олаҹаг. О заман о, јер үзүндә әбәдијјән јашајаҹаг һәлим вә салеһ инсанларын сырасында ола биләҹәк (Һәвариләрин ишләри 24:15).
Даһа әтрафлы мәлуматы «Мүгәддәс Китаб әслиндә нә өјрәдир?»a китабынын 3-ҹү вә 7-ҹи фәслиндән ала биләрсиниз.
[Һашијә]
a Јеһованын Шаһидләри тәрәфиндән дәрҹ едилмишдир.
[17-ҹи сәһифәдәки шәкил]
«Салеһләр өлкәни мүлк олараг алаҹаг, онлар орада әбәди мәскән салаҹаг» (Мәзмур 37:29)