Јер үзүндә әбәди һәјат — Аллаһын вердији үмид
«Хилгәт... вурнухмаја [үмидлә] табе етдирилди» (РОМ. 8:20, 21).
1, 2. а) Нәјә ҝөрә јер үзүндә әбәди јашамаг үмиди бизим үчүн әһәмијјәт кәсб едир? б) Әксәр инсанларын јер үзүндә әбәди һәјатын олаҹағына шүбһә илә јанашмасынын сәбәби нәдир?
ЈӘГИН инсанларын јахын ҝәләҹәкдә артыг гоҹалмајаҹағыны вә өлмәјәҹәјини, јер үзүндә әбәдијјән јашајаҹағыны илк дәфә өјрәнәндә нә гәдәр севиндијини хатырлајырсан (Јәһ. 17:3; Вәһј 21:3, 4). Ола билсин, бу Мүгәддәс Китаб үмидини башгалары илә бөлүшмәк сәнин үчүн хош иди. Ахы әбәди һәјат үмиди тәблиғ етдијимиз хош хәбәрин әсас һиссәсини тәшкил едир. Бу үмид һәјата олан бахышларымызы белә формалашдырыр.
2 Бир чох христиан динләри јер үзүндә әбәди һәјатын олаҹағыны рәдд едирләр. Мүгәддәс Китабда өлмәз руһ тәлими олмадығы һалда, әксәр килсәләр өјрәдир ки, инсанда өлүмдән сонра ајрылыб руһани аләмдә јашамаға давам едән һансыса бир һиссә вар (Ваиз 9:5). Бу сәбәбдән бир чох инсанлар јер үзүндә әбәди һәјатын олаҹағына шүбһә илә јанашыр. Буну нәзәрә алараг, өзүмүздән соруша биләрик: «Бу үмид һәгигәтән дә Мүгәддәс Китаба әсасланырмы? Әҝәр әсасланырса, онда Аллаһ илк дәфә бу үмиди инсанлара нә заман вериб?»
Үмидлә «вурнухмаја табе етдирилди»
3. Бәшәр тарихинин илк чағларындан Аллаһын инсанлара даир нијјәти нәдән бәлли иди?
3 Јеһованын инсанлара даир нијјәти бәшәр тарихинин илк чағларындан бәлли иди. Аллаһ Адәмә итаәткар олдуғу тәгдирдә әбәди јашајаҹағыны ајдын билдирди (Јар. 2:9, 17; 3:22). Сөзсүз ки, Адәмин илк нәсли камиллијин неҹә итирилдијиндән аҝаһ иди, чүнки сүбутлар ҝөз габағында иди. Еден бағына ҝириш гадаған иди вә инсанлар тәдриҹән гоҹалыб өлүрдүләр (Јар. 3:23, 24). Ҝетдикҹә инсанларын өмрү гысалырды: Адәм 930 ил, Дашгындан сағ чыхан Сам ҹәми 600 ил, оғлу Арпакшад исә 438 ил јашады. Ибраһимин атасы Тераһ 205 ил, Ибраһимин өзү 175, оғлу Исһаг 180, нәвәси Јагуб исә 147 ил өмүр сүрдү (Јар. 5:5; 11:10-13, 32; 25:7; 35:28; 47:28). Јәгин чохлары анлајырдылар ки, инсан өмрүнүн ҝөдәлмәси әбәди һәјат үмидинин итирилдијинә дәлаләт едир. Бәс онларын әбәди һәјатын јенидән олаҹағына инанмаға әсаслары вар идими?
4. Аллаһын Адәмин итирдији хејир-дуалары гајтараҹағына инанмаг үчүн гәдимдә јашамыш садиг инсанларын һансы әсаслары варды?
4 Аллаһын Кәламында дејилир: «Хилгәт [инсан]... вурнухмаја [үмидлә] табе етдирилди» (Ром. 8:20, 21). Сөһбәт һансы үмиддән ҝедир? Мүгәддәс Китабын илк пејғәмбәрлијиндә дејилирди ки, ‘өвлад [иланын] башындан вураҹаг’. (Јарадылыш 3:1-5, 15 ајәләрини оху.) Өвлад һаггында вәд садиг инсанлары Аллаһын бәшәријјәтә даир нијјәтиндән әл чәкмәјәҹәјинә үмидвар едирди. Бу пејғәмбәрлик Һабил вә Нуһ кими инсанлара Адәмин итирдији хејир-дуалары Аллаһын ҝери гајтараҹағына инанмаға әсас верирди. Ола билсин, бу инсанлар баша дүшүрдүләр ки, ‘өвладын дабанындан санҹылмасы’ ган ахыдылаҹағына ишарә едир (Јар. 4:4; 8:20; Ибр. 11:4).
5. Ибраһимин дирилмәјә инандығы нәдән ҝөрүнүр?
5 Ҝәлин Ибраһимин нүмунәсинә диггәт јетирәк. Ибраһим имтаһан олундуғу заман, демәк олар ки, Исһагы, јеҝанә оғлуну гурбан ҝәтирди (Ибр. 11:17). О, нәјә ҝөрә буну етмәјә һазыр иди? (Ибраниләрә 11:19 ајәсини оху.) Ибраһим дирилмәјә инанырды! Онун бу үмиди әсассыз дејилди. Әввәла, Јеһова она ушаг саһиби олмаг баҹарығыны гајтарды; онун вә арвады Саранын аһыл јашларында бир оғлу олду (Јар. 18:10-14; 21:1-3; Ром. 4:19-21). Үстәлик, Јеһова Ибраһимә вәд етмишди: «Сәнин нәслинин вариси Исһаг олаҹаг» (Јар. 21:12). Буна ҝөрә дә о, Аллаһын Исһагы дирилдәҹәјинә зәррә гәдәр дә шүбһә етмирди.
6, 7. а) Јеһова Ибраһимлә һансы әһди кәсди? б) Јеһованын Ибраһимә вердији вәд бәшәријјәт гаршысында һансы үмиди ачды?
6 Јеһова Ибраһимин бөјүк иманыны ҝөрүб онунла ‘нәсли’, јәни өвлады илә әлагәдар әһд кәсди. (Јарадылыш 22:18 ајәсини оху.) Бу өвладын әсас һиссәси Иса Мәсиһ олду (Галат. 3:16). Јеһова Ибраһимә деди ки, онун ‘нәсли [өвлады] ҝөјдәки улдузлар вә дәниз кәнарындакы гум гәдәр артыб чохалаҹаг’, јәни Ибраһимә мәлум олмајан сајда олаҹаг (Јар. 22:17). Лакин узун мүддәт сонра бу сај билинди. Иса Мәсиһ вә онунла ҝөјдә падшаһлыг едәҹәк 144 000 нәфәр һәмин өвлады тәшкил едир (Галат. 3:29; Вәһј 7:4; 14:1). Бу Падшаһлыг ‘бүтүн милләтләрин хејир-дуа’ алаҹағы јеҝанә васитәдир.
7 Ибраһим Јеһованын онунла бағладығы әһдин маһијјәтини там анлаја билмирди. Буна бахмајараг, Мүгәддәс Китабда дејилдији кими, о, «мөһкәм тәмәлләрә малик шәһәри ҝөзләјирди» (Ибр. 11:10). Һәмин шәһәр Аллаһын Падшаһлығыдыр. Падшаһлығын ҝәтирәҹәји хејир-дуалары алмаг үчүн Ибраһим јенидән јашамалыдыр. Онун јер үзүндә әбәди јашамасы дирилмә сајәсиндә мүмкүн олаҹаг. Әбәди јашамаг имканы Һар-Меҝидону сағ кечән вә дириләҹәк инсанлар үчүн дә ачылаҹаг (Вәһј 7:9, 14; 20:12-14).
«Көксүмдәки руһ мәни сыхыр»
8, 9. Нәјә ҝөрә демәк олар ки, «Әјјуб» китабы садәҹә бир инсанын сынагларындан бәһс едән китаб дејил?
8 Ибраһимин нәтиҹәси Јусифин өлүмүндән Мусанын пејғәмбәр тәјин едилмәсинә гәдәр олан вахт кәсијиндә Әјјуб адлы бир инсан јашамышдыр. Муса тәрәфиндән јазылдығы еһтимал едилән «Әјјуб» китабында Јеһованын садиг хидмәтчисинин әзаб чәкмәсинә јол вермәсинин сәбәби вә бунун нә илә нәтиҹәләндији изаһ едилир. Амма бу китаб садәҹә бир инсанын сынагларындан бәһс едән китаб дејил; орада бүтүн шүурлу варлыглара аидијјәти олан мәсәләләр мүзакирә олунур. Бу китаб Јеһованын һөкмранлығынын әдаләтли олдуғуна ајдынлыг ҝәтирир вә ҝөстәрир ки, Онун јердәки хидмәтчиләринин нөгсансызлығы вә әбәди һәјаты Еден бағында галдырылан мәсәлә илә бағлыдыр. Әјјуб бу мәсәләни баша дүшмәсә дә, үч достунун јанлыш мүлаһизәләринин онда нөгсансызлығыны горумадығы фикринин јаратмасына јол вермәди (Әјј. 27:5). Бу, бизим иманымызы мөһкәмләндирмәли, нөгсансызлығымызы горумаға вә һөкмранлыг мәсәләсиндә Јеһованын тәрәфини тутмаға габил олдуғумузу анламаға көмәк етмәлидир.
9 Әјјуба «тәскинлик» верән үч достун даһа демәјә сөзү галмадығыны ҝөрән «бузлу Баракелин оғлу Елиһу» дилләнди. Ону буна нә вадар етди? Биз охујуруг: «Синәм сөзлә долудур, көксүмдәки руһ мәни сыхыр» (Әјј. 32:5, 6, 18). Елиһунун Аллаһдан илһам алараг сөјләдији сөзләр Әјјубун имтаһанлары сона чатанда јеринә јетмәсинә бахмајараг, онун сөзләри башгалары үчүн дә әһәмијјәт кәсб едир. Онлар Аллаһ гаршысында нөгсансызлығыны горујанлара үмид үчүн әсас верир.
10. Нәдән бәллидир ки, Јеһованын ајры-ајры инсанлара вердији хәбәрин бәзән бүтүн бәшәријјәтә аидијјәти олур?
10 Бәзән Јеһова ајры-ајры инсанлара һәм онларын өзләринә, һәм дә бүтүн бәшәријјәтә аидијјәти олан хәбәр верир. Буну Бабил падшаһы Навуходоносорун һүндүр ағаҹын кәсилмәсинә даир ҝөрдүјү јуху илә әлагәдар Даниелин сөјләдији пејғәмбәрликдән ҝөрмәк олар (Дан. 4:10-27). Бу јуху Навуходоносорун үзәриндә јеринә јетсә дә, о, даһа мөһтәшәм бир шејә ишарә едирди. О ҝөстәрирди ки, Давуд падшаһын сүлаләсинин идарә етдији падшаһлыгла тәмсил олунан Аллаһын јер үзәриндәки һөкмранлығы б. е. ә. 607-ҹи илдә башланан 2 520 иллик дөврдән сонра јенидән бәрпа олунаҹагa. 1914-ҹү илдә Иса Мәсиһ Падшаһ кими тахта чыханда Аллаһын јер үзәриндә һөкмранлығы јенидән тәсис олунмаға башланды. Падшаһлығын итаәткар бәшәријјәтин үмидләрини тезликлә неҹә һәјата кечирәҹәјини бир анлыға тәсәввүрүнә ҝәтир!
«Ону гујуја дүшмәкдән гуртар»
11. Елиһунун сөзләри Аллаһ һаггында нә дејирди?
11 Елиһу Әјјуба ҹаваб верәркән «инсана әмәлисалеһлијини бәјан етмәк үчүн мин мәләјин [«гасидин», ЈД] ичиндән бир мәләк, бир васитәчи» һагда данышды. Бәс бу гасид лүтф үчүн Аллаһа дуа едәндә, неҹә? Елиһу дејир: «О заман Аллаһ она [төвбә етмиш инсана] рәһм едиб дејәр: “Ону гујуја дүшмәкдән гуртар, онун үчүн кәффарә тапмышам”. Онда бәдәни ушаг бәдәни кими тәзә олар, јенијетмәлик дөврүнә гајыдар» (Әјј. 33:23-26). Бу сөзләр ҝөстәрир ки, Аллаһ төвбә едән кәсләрә ҝөрә «кәффарә», јәни ҝүнаһларын үстүнү өртән бир шеј гәбул етмәјә һазырдыр (Әјј. 33:24).
12. Елиһунун сөзләриндә бүтүн бәшәријјәт үчүн һансы үмид вар?
12 Ҝөрүнүр, пејғәмбәрләр јаздыглары һәр шеји анламадыглары кими, Елиһу да фидјәнин маһијјәтини там баша дүшмүрдү (Дан. 12:8; 1 Пет. 1:10-12). Буна бахмајараг, Елиһунун сөзләри бир ҝүн Аллаһын фидјә гәбул едәҹәјини вә инсанлары гоҹалығын вә өлүмүн пәнҹәсиндән гуртараҹағы үмидини әкс етдирирди. Елиһунун сөзләри әсрарәнҝиз әбәди һәјат үмиди илә бағлы иди. «Әјјуб» китабы һәмчинин дирилмәнин олаҹағыны да ҝөстәрир (Әјј. 14:14, 15).
13. Елиһунун сөзләри мәсиһчиләр үчүн һансы мәнаны кәсб едир?
13 Елиһунун сөзләри һазыркы пис системин сонунда хилас олмаға үмид едән милјонларла мәсиһчи үчүн дә бөјүк мәна кәсб едир. Јени дүнјаја гәдәм басаҹаг инсанларын арасындакы гоҹалар јенидән ҝәнҹ вә ҝүмраһ олаҹаглар (Вәһј 7:9, 10, 14-17). Дирилиб ҝәнҹлик чағларына гајыдаҹаг инсанлары ҝөрмәк үмиди бу ҝүн дә Аллаһын садиг хидмәтчиләринә севинҹ бәхш едир. Әлбәттә, мәсһ олунмуш мәсиһчиләрин ҝөјдә өлмәзлији, Исанын ‘башга гојунларынын’ исә јер үзүндә әбәди һәјаты алмасы јалныз Мәсиһин фидјә гурбанлығына иман ҝәтирмәләриндән асылыдыр (Јәһ. 10:16; Ром. 6:23).
Өлүм јер үзүндән әбәдијјән јох едилди
14. Нәдән ҝөрүнүр ки, исраиллиләрин әбәди һәјат үмидләринин олмасы үчүн Мусанын Гануну кифајәт етмирди?
14 Аллаһ исраиллиләрлә Ганун әһди кәсәндә Ибраһимин нәсли мүстәгил халг олду. Јеһова онлара Ганун верәркән демишди: «Гајдаларыма вә һөкмләримә сәјлә әмәл един; белә һәрәкәт едән адам бунларын сајәсиндә јашајаҹаг» (Лев. 18:5). Исраиллиләр Ганунун мүкәммәл нормаларына ујғун јашаја билмәдикләри үчүн Ганунун ләнәтинә туш ҝәлдиләр вә онлара бу ләнәтдән хилас олмаг лазым иди (Галат. 3:13).
15. Давуд ҝәләҹәкдә олаҹаг һансы хејир-дуа һаггында јазмаға илһамландырылмышды?
15 Мусадан сонра да Јеһова диҝәр Мүгәддәс Китаб јазычыларыны әбәди һәјат үмиди һагда хатырлатмаға илһамландырды (Мәз. 21:4; 37:29, КМ). Мисал үчүн, мәзмурчу Давуд Аллаһын һәгиги хидмәтчиләринин Сион дағында бирҝә ибадәт етдикләриндән бәһс едән мәзмурларын биринә белә јекун вурур: «Рәбб бујуруб ки, бу мәкана бәрәкәт, әбәди һәјат верилсин» (Мәз. 133:3).
16. Јешаја васитәсилә Јеһова ‘бүтүн јер үзүнүн’ ҝәләҹәјинә даир нә вәд етмишди?
16 Јеһова Јешајаны да јер үзүндә әбәди һәјат барәдә пејғәмбәрлији гәләмә алмаға илһамландырмышды. (Јешаја 25:7, 8 ајәләрини оху.) Ағыр јүк олан ҝүнаһ вә өлүм исти ‘дувағ’, јәни јорған кими бәшәријјәти өртүр. Јеһова халгыны әмин едир ки, ҝүнаһ вә өлүмү ҝөтүрәҹәк, јәни «бүтүн јер үзүндән» јох едәҹәк.
17. Мәсиһин һансы пејғәмбәрлик ролу әбәди һәјата јол ачыр?
17 Инди дә ҝәлин Мусанын Ганунунда Азазел тәкәси илә әлагәдар тәсис едилмиш гајдаја нәзәр салаг. Илдә бир дәфә, Кәффарә ҝүнүндә баш каһин ‘ики әлини [дири] тәкәнин башына гојуб Исраиллиләрин бүтүн ганунсузлугларыны етираф едир вә тәкәнин башына өтүрүрдү. Сонра исә тәкә онларын бүтүн ҹәзасыны өз үзәриндә ајаг дәјмәмиш торпаға апарараг чөлә ҝөндәрилирди’ (Лев. 16:7-10, 21, 22). Јешаја ејни ролу ојнајан вә «хәстәликләримизи», «дәрдләримизи», «чох адамларын ҝүнаһыны» өзү илә апарараг әбәди һәјата јол ачаҹаг Мәсиһин ҝәләҹәјини пејғәмбәрлик етмишди. (Јешаја 53:4-6, 12 ајәләрини оху.)
18, 19. Јешаја 26:19 вә Даниел 12:13 ајәсиндә сөһбәт һансы үмиддән ҝедир?
18 Јеһова Јешаја васитәсилә Өз халгына демишди: «Сәнин өлүләрин јашајаҹаг, бәдәнләри дириләҹәк. Еј торпаг алтында јатанлар, ојанын, севинҹ нәғмәсини охујун, чүнки шеһ торпағы неҹә тәравәтләндирирсә, Рәбб дә торпагдакы өлүләри белә дирчәлдәҹәк» (Јешаја 26:19). Ибраниҹә Мүгәддәс Јазылар инсанларын дирилиб јер үзүндә јашајаҹагларыны ачыг-ајдын ҝөстәрир. Мәсәлән, Даниел тәхминән 100 јашында оларкән Јеһова ону әмин едәрәк демишди: ‘Сән өз агибәтинә гәдәр јаша, чүнки өлүб раһат олаҹагсан вә ахирәт ҝүнү [«ҝүнләрин сонунда», КМ] дириләҹәксән’ (Дан. 12:13).
19 Марта дирилмәјә үмид етдијиндән вәфат етмиш гардашы һагда Исаја демишди: «Билирәм ки, дирилмәдә, сон ҝүндә дириләҹәкдир» (Јәһ. 11:24, И–93). Бәс Исанын тәлимләри вә онун шаҝирдләринин илһамланмыш јазылары бу үмиди дәјишдими? Јеһованын јер үзүндә әбәди һәјат вәди бу ҝүн дә гүввәдәдирми? Бу суалларын ҹавабыны нөвбәти мәгаләдә тапаҹағыг.
[Һашијә]
a «Даниелин пејғәмбәрлијинә диггәт јетирин!» (рус.) китабынын 6-ҹы фәслинә бахын.
Изаһ едә биләрсинизми?
• Инсанлар һансы үмидлә «вурнухмаја табе етдирилди»ләр?
• Ибраһимин дирилмәјә инандығы нәдән ҝөрүнүр?
• Елиһунун Әјјуба дедији сөзләр бәшәријјәтә һансы үмиди верир?
• Ибраниҹә Мүгәддәс Јазыларда дирилмә вә јер үзүндә әбәди һәјат үмиди неҹә вурғуланыр?
[5-ҹи сәһифәдәки шәкил]
Елиһунун Әјјуба дедији сөзләр инсанларын гоҹалыгдан вә өлүмдән азад олунаҹагларына үмид верир
[6-ҹы сәһифәдәки шәкил]
Аллаһ Даниели әмин етди ки, о, ‘ҝүнләрин сонунда дириләҹәк’