‘Мүждә ҝүнүндә’ диггәти јајындыран шејләрдән узаг дураг
ШӘҺӘР дарвазасынын өнүндә дөрд ҹүзамлы отуруб нә едәҹәкләри барәдә дүшүнүрдү. Онлара һеч ким сәдәгә вермәмишди. Самаријаны мүһасирәјә алан суријалылар шәһәрә гида ҝәтирилмәсинин габағыны алмышдылар. Шәһәрә ҝирмәјин һеч бир мәнасы јох иди; әрзаг чох баһа иди. Верилән мәлумата әсасән, һәтта инсан әтинин јејилдији һал да олмушду (2 Пад. 6:24-29).
‘Нәјә ҝөрә суријалыларын дүшәрҝәсинә ҝетмәјәк? — дејә ҹүзамлылар фикирләширдиләр. — Онсуз да итириләҹәк бир шејимиз јохдур’. Онлар һәмин ахшам алагаранлыгда јола дүшдүләр. Дүшәрҝәјә јахынлашанда орадан сәс-сәмир ҝәлмирди. Һеч ҝөзәтчиләр дә ҝөзә дәјмирди. Атлар вә ешшәкләр бағлы, әсҝәрләр исә јох иди. Онлар бир чадырын ичинә бахдылар. Ичәридә һеч ким јох иди, јемәк-ичмәк исә бол иди. Онлар отуруб дојунҹа једиләр. Ҹүзамлылар гызыл-ҝүмүш, пал-палтар вә башга гијмәтли әшјалар да ҝөрдүләр. Онлар истәдикләрини ҝөтүрүб ҝетдиләр вә онлары ҝизләтдиләр, сонра исә јенидән гајытдылар. Дүшәрҝәдә бир адам белә јох иди. Јеһова мөҹүзәли шәкилдә елә етмишди ки, суријалыларын гулағына бөјүк орду сәси ҝәлмишди. Суријалылар онлара һүҹум едилдијини зәнн едәрәк орадан тәләм-тәләсик гачмышдылар. Инди орада галан һәр шеји ким истәсә ҝөтүрә биләрди.
Ҹүзамлылар гијмәтли әшјалары ҝөтүрүб ҝизләтдиләр. Самарија әһалисинин аҹлыг ичиндә олдуғу јадларына дүшәндә виҹданлары онлары нараһат етмәјә башлады. Онлар бир-биринә дедиләр: «Биз јахшы еләмирик, бу ҝүн мүждә ҝүнүдүр». Ҹүзамлылар тез Самаријаја гајыдыб бу мүждә һагда хәбәр вердиләр (2 Пад. 7:1-11).
Биз дә ‘мүждә ҝүнү’ адланан дөврдә јашајырыг. «Дөврүн сонуна әламәт» һаггында данышараг Иса демишдир: «Сәмави Сәлтәнәт һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир» (Мат. 24:3, 14). Бу, бизә неҹә тәсир етмәлидир?
Һәјатын гајғылары вә шәхси марагларымыз бизи ‘ағырлашдыра’ биләр
Ҹүзамлылар севинҹдән гыса мүддәтә Самаријаны унутдулар. Чүнки онларын фикри әлдә едәҹәкләри шејләрдә иди. Бу, бизимлә дә баш верә биләрми? Дөврүн сонуна әламәтләрдән бири дә ‘гытлыгдыр’ (Лука 21:7, 11). Иса шаҝирдләринә хәбәрдарлыг етмишдир: «Диггәтли олун ки, үрәкләриниз гарынгулулуг вә сәрхошлугла, бу һәјатын гајғылары илә ағырлашмасын вә о Ҝүн сизи гәфләтән јахаламасын» (Лука 21:34). Биз мәсиһчиләр диггәтли олмалыјыг ки, һәјатын ҝүндәлик гајғылары ‘мүждә ҝүнүндә’ јашадығымызы унутмағымыза сәбәб олмасын.
Блесинг адлы баҹымыз шәхси марагларынын онун һәјатыны ағырлашдырмасына јол вермирди. О, тәһсил алдығы мүддәтдә пионер кими хидмәт едирди, сонра да бет-еллијә әрә ҝедәрәк Бениндәки Бет-Ел аиләсинин үзвү олду. О дејир: «Мән хадимә кими хидмәт едирәм вә тәјинатымдан, һәгигәтән дә, чох разыјам». Блесинг архаја дөнүб 12 иллик таммүддәтли хидмәтини севинҹлә јада салыр вә ‘мүждә ҝүнүндә’ јашадығымызы нәзәрдән гачырмадығына ҝөрә хошбәхтдир.
Чох вахт апаран шејләрдән гачын
Иса 70 шаҝирдини тәблиғ етмәјә ҝөндәрәндә деди: «Мәһсул чох, ишчиләр исә аздыр. Беләликлә, мәһсулун Саһиби олан Рәббә јалварын ки, Өз мәһсулуну топламаға ишчиләр ҝөндәрсин» (Лука 10:2). Бичин заманы ләнҝимәк мәһсулун зај олмасына ҝәтириб чыхартдығы кими, тәблиғ ишинә лагејд мүнасибәт дә нәтиҹәдә һәјат иткисинә ҝәтириб чыхара биләр. Буна ҝөрә Иса әлавә етди: «Јолда кимсә илә саламлашмајын» (Лука 10:4). Бурада «саламлашма» сөзү алтында садәҹә «салам» вермәк нәзәрдә тутулмур. Бура достлар ҝөрүшәндә онларын бир-бирини гуҹагламасы вә саатларла сөһбәт етмәси дахилдир. Буна ҝөрә дә Иса давамчыларына диггәти јајындыран лазымсыз шејләрдән гачынараг вахтларындан мүдрик истифадә етмәји өјрәдирди. Онларын тәблиғ етдији хәбәр чох тәҹили иди.
Белә ишләрин үмумиликдә нә гәдәр вахт апардығы үзәриндә фикирләшин. Узун илләр әрзиндә телевизор ән чох вахт оғурлајан бир шеј олмушдур. Бәс мобил телефон вә компүтерләр һаггында нә демәк олар? Британијада 1000 нәфәр арасында кечирилән сорғуја әсасән, «орта һесабла бир британијалы ҝүн әрзиндә ев телефону илә данышмаға 88 дәгигә, мобил телефонла данышмаға 62 дәгигә, електрон почтуна 53 вә СМС јазмаға исә 22 дәгигә сәрф едир». Онлар буна көмәкчи пионерин тәблиғә ҝүн әрзиндә сәрф етдији вахтдан икигат артыг вахт сәрф едирләр! Бәс сәнин бу кими шејләрә нә гәдәр вахтын ҝедир?
Ернст вә Һилдегард Зелиҝер ҹүтлүјү вахтларындан һәр заман сәмәрәли истифадә етмәјә чалышырдылар. Үстәлик, онлар һәјатларынын 40 илдән чохуну насист һәбс дүшәрҝәләриндә вә коммунист һәбсханаларында кечирмишләр. Азадлыға чыхандан јерүзү хидмәтләрини баша вуранадәк онлар пионер кими хидмәт етдиләр.
Зелиҝерләрлә чохлары мәктублашмаг истәјирдиләр. Бу ҹүтлүк ҝүнүн чох вахтыны мәктуб јазмаға вә охумаға сәрф едә биләрди. Лакин руһани ишләр онларын һәјатында әсас јери тутурду.
Әлбәттә, севдикләримиздән мәктуб алмаг вә онларла телефонда данышмаг һамымыза хошдур вә бунда гәбаһәтли бир шеј јохдур. Бәзән ҝүндәлик графикимиздә мүәјјән дәјишикликләр етмәк фајдалыдыр. Анҹаг бу мүждә ҝүнүндә еһтијатлы олмалыјыг ки, вахтымызы чох вахт апаран шејләрә сәрф етмәјәк.
Хош хәбәри әтрафлы сурәтдә тәблиғ ет
‘Мүждә ҝүнүндә’ јашамаг неҹә дә бөјүк хејир-дуадыр! Ҝәлин биз дә әввәлҹә әсас мәгсәддән јајынан дөрд ҹүзамлы кими олмајаг. Онларын сонра дедикләрини хатырлајаг: «Биз јахшы еләмирик». Ејнилә, шәхси марагларын вә вахт апаран шејләрин хидмәтдә там иштирак етмәкдән бизи јајындырмасына јол вермәк дүзҝүн дејил.
Бу саһәдә бизим үчүн ҝөзәл нүмунә вар. Хидмәтинин илк 20 илинә нәзәр салараг һәвари Павел јазырды: «Мән... Мәсиһин Мүждәсини бүтүнлүклә елан етдим» (Ром. 15:19). Павел јол вермирди ки, нә исә онун сәјини зәифләтсин. Ҝәлин биз дә онун кими бу ‘мүждә ҝүнүндә’ Падшаһлыг хәбәрини сәјлә бәјан едәк.
[28-ҹи сәһифәдәки шәкил]
Блесинг баҹы шәхси марагларынын таммүддәтли хидмәтинә мане олмасына јол вермирди
[29-ҹу сәһифәдәки шәкил]
Зелиҝерләр вахтларыны нәјә сәрф етдикләринә чох ҹидди јанашырдылар