Аллаһын вердији сәрвәт

ӘҜӘР Аллаһа садигсинизсә, бу о демәкдирми ки, Аллаһ сизә сәрвәт верәҹәк? Бәлкә дә. Анҹаг ола билсин, бу, сизин фикирләшдијиниз сәрвәт олмајаҹаг. Мәсәлән, ҝөтүрәк, Исанын анасы Мәрјәми. Ҹәбрајыл мәләк она ҝөрүнүб ону «немәтли гыз» адландырмыш вә Аллаһын Оғлуну дүнјаја ҝәтирәҹәјини демишди (Лука 1:28, 30-32). Лакин Мәрјәм варлы дејилди. Иса доғулдугдан сонра Мәрјәм ‘бир ҹүт гумру, јахуд ики ҝөјәрчин баласы’ гурбан ҝәтирди. Адәтән, бу ҹүр гурбанлары касыблар ҝәтирирдиләр (Лука 2:24; Левилиләр 12:8).

Мәрјәмин касыб олмасы Аллаһын она хејир-дуа вермәдијиними ҝөстәрирди? Әксинә, о, гоһуму Елизаветә баш чәкмәјә ҝедәндә «Елизавет Мүгәддәс Руһла долду. Вә јүксәк сәслә гышгырыб деди: “Сән гадынларын бәхтијарысан, сәнин бәтнинин сәмәрәси дә бәхтијардыр!”» (Лука 1:41, 42). Мәрјәм Аллаһын севимли Оғлунун анасы олмаг шәрәфинә лајиг ҝөрүлмүшдү.

Исанын өзү дә варлы олмамышды. Онун тәкҹә валидејнләри јох, һәтта өзү дә јер үзүндәки һәјаты боју касыб олмушду. Бир дәфә о, давамчысы олмаг истәјән бир нәфәрә демишди: «Түлкүләрин һини вә ҝөј гушларынын јувасы вардыр; Инсан Оғлу исә башыны сөјкәмәјә јер тапмыр» (Лука 9:57, 58). Буна бахмајараг, Иса Мәсиһин јер үзүндә ҝөрдүјү ишләр давамчыларынын бөјүк сәрвәт әлдә етмәсинә јол ачмышды. Һәвари Павел јазмышды: «О... сизин уғрунузда јохсуллашды ки, сиз Онун јохсуллуғу илә зәнҝинләшәсиниз» (2 Коринфлиләрә 8:9). Иса давамчыларына һансы сәрвәти вермишди? Бәс биз һансы сәрвәтә маликик?

Исанын вердији сәрвәт

Чох вахт вар-дөвләт инсанын Аллаһа иман ҝәтирмәсинә мане олур, чүнки, адәтән, варлы инсан Аллаһа јох, пулуна бел бағлајыр. Иса демишди: «Сәрвәти оланлар Аллаһын Сәлтәнәтинә нә чәтинликлә ҝирәҹәкләр!» (Марк 10:23). Ајдындыр ки, Исанын давамчыларына тәклиф етдији сәрвәт мадди сәрвәт дејилди.

Әслинә галса, биринҹи әсрдәки мәсиһчиләрин әксәријјәти јохсул инсанлар иди. Анаданҝәлмә чолаг бир адам сәдәгә диләјәндә Петер она демишди: «Мәндә ҝүмүш вә ја гызыл јохдур, лакин мән оланымы сәнә верирәм. Назаретли Иса Мәсиһин ады илә ајаға дур вә јери!» (Һәвариләрин ишләри 3:6).

Шаҝирд Јагубун сөзләри дә ҝөстәрир ки, мәсиһчи јығынҹағы әсас етибары илә касыб инсанлардан тәшкил олунмушду. О јазырды: «Гулаг асын, еј севимли гардашларым: мәҝәр Аллаһ бу дүнјанын јохсулларыны иманда зәнҝин вә Ону севәнләрә вәд етдији Сәлтәнәтин вариси сечмәдими?» (Јагуб 2:5). Бундан башга, һәвари Павел демишди ки, «мүдрик, нүфузлу вә әсилзадә» адамлардан мәсиһчи јығынҹағынын үзвү олмаг үчүн дәвәт олунанлар чох дејилди (1 Коринфлиләрә 1:26).

Бәс онда Иса давамчыларына һансы сәрвәти вермишди? Измир јығынҹағына ҝөндәрдији мәктубда Иса демишди: «Сәнин... әзабындан вә јохсуллуғундан (амма сән зәнҝинсән)... хәбәрдарам» (Вәһј 2:8, 9). Измирдәки мәсиһчиләр касыб олсалар да, гызыл вә ҝүмүшдән гат-гат үстүн олан сәрвәтә малик идиләр. Онлары зәнҝин едән иман вә нөгсансызлыглары иди. Иман өз-өзлүјүндә чох гијмәтлидир, чүнки һәр кәс иман саһиби дејил (2 Салониклиләрә 3:2). Имансызлар исә Аллаһын ҝөзүндә касыбдырлар (Вәһј 3:17, 18).

Иманын ҝәтирдији сәрвәт

Бәс иман һансы мәнада гијмәтлидир? Аллаһа иман едән инсанлар ‘Аллаһын хејирхаһлығынын, мүлајимлијинин вә сәбирлилијинин боллуғундан’ фајда әлдә едирләр (Ромалылара 2:4). Һәмчинин Исанын фидјә гурбанлығына иман ҝәтирдикләри үчүн онлар ‘ҝүнаһларынын әфвинә маликдирләр’ (Ефеслиләрә 1:8). Бундан башга, онлар иманлы инсанларын «Мәсиһин кәламы» васитәсилә әлдә етдикләри мүдриклијә саһибдирләр (Колослулара 3:16). Онлар иманла Аллаһа дуа етдикдә «Аллаһын һәр ҹүр ағылдан үстүн олан сүлһү» үрәкләрини вә дүшүнҹәләрини горујараг онлара мәмнунлуг вә хошбәхтлик ҝәтирир (Филипилиләрә 4:7).

Бунлардан әлавә, Аллаһа Оғлу Иса Мәсиһ васитәсилә иман ҝәтирәнләрин әбәди јашамаг кими ҝөзәл үмиди вар. Иса Мәсиһин бу сөзләри чохларына танышдыр: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун» (Јәһја 3:16). Инсан Ата вә Оғул һаггында дәгиг билик алдыгда үмиди даһа да мөһкәмләнир, чүнки Иса һәм дә демишди: «Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар» (Јәһја 17:3).

Аллаһ бизә, әсас етибарилә, руһани хејир-дуалар версә дә, емосионал вә физики ҹәһәтдән дә фајда әлдә едирик. Мәсәлән, ҝөтүрәк Бразилијада јашајан Далидјону. Аллаһ һагда дәгиг билик алмаздан әввәл, о, чох ичирди. Бу, онун аиләси илә мүнасибәтләринә дә чох пис тәсир ҝөстәрирди. Бундан башга, онун мадди вәзијјәти дә гејри-сабит иди. Лакин Јеһованын Шаһидләри илә Мүгәддәс Китабы өјрәнмәјә башлајандан сонра онда бөјүк дәјишикликләр баш верди.

Далидјонун Мүгәддәс Китабдан өјрәндикләри она зәрәрли вәрдишләрини тәрҝитмәјә көмәк етди. О, руһани ҹәһәтдән чох инкишаф етди вә инди белә дејир: «Мән әввәлләр барлары ҝәзирдим, инди исә евдән-евә тәблиғ едирәм». О, инди вахтынын чох һиссәсини инсанлара Аллаһын Кәламы һаггында данышмаға сәрф едир. Бу ҹүр дәјишикликләр тәкҹә онун сағламлығыны јох, һәмчинин мадди вәзијјәтини дә јахшылашдырды. Далидјо дејир: «Әввәл ичкијә хәрҹләдијим пулла инди башгаларына әл тутур, ја да өзүмә лазым олан шејләри алырам». Һәмчинин о, Аллаһын нөгтеји-нәзәринә саһиб олан инсанлар арасындан өзүнә әсил достлар тапыб. Инди Далидјо Аллаһы танымаздан габаг һеч тәсәввүрүнә белә ҝәтирмәдији гәлб раһатлығы вә мәмнунлуг тапыб.

Јеһова Аллаһа иман ҝәтирмәјин һәјаты зәнҝинләшдирмәсинә даир башга бир нүмунә Ренатонун һәјатыдыр. Бу ҝүн онун хошбәхт, ҝүлүмсәр үзүнә баханда һеч демәзсән ки, нә вахтса онунла амансыз рәфтар едилиб. Доғулан кими анасы ону атмышды. Бәдәниндә ҹырмаг изләри вә ганчырлар, ҝөбәк ҹијәси кәсилмәмиш һалда ону ҝәтириб сәбәтдә бир скамјанын алтына атмышдылар. Јолдан өтән ики гадын сәбәтин тәрпәндијини ҝөрмүшдү. Онлара елә ҝәлмишди ки, кимсә орада пишик баласыны гојуб ҝедиб. Анҹаг ҝөрәндә ки, сәбәтдәки јени доғулмуш көрпәдир, дәрһал ону тибби јардым алмасы үчүн јахынлыгдакы хәстәханаја апармышдылар.

Һәмин гадынлардан бири Јеһованын Шаһиди иди. О, Рита адында башга бир Шаһидә ушаг һаггында данышды. Бир нечә дәфә өлү ушаг доған Ританын тәкҹә бир гызы вар иди. О, оғлан ушағы истәјирди, буна ҝөрә дә Ренатону оғуллуға ҝөтүрдү.

Ренато балаҹа оланда Рита она доғма анасы олмадығыны сөјләди. Лакин о, мәһәббәтлә вә нәвазишлә онун гајғысына галыр вә она Мүгәддәс Китаб принсипләрини ашыламаға чалышырды. Ренато бөјүдүкҹә, Мүгәддәс Китаба мараг ҝөстәрмәјә башлады. Һәмчинин гејри-ади тәрздә хилас олдуғуна ҝөрә ҝет-ҝедә миннәтдарлығы да артырды. Һәр дәфә мәзмурчу Давудун «ата-анам мәни атса белә, Рәбб мәни гәбул едәр» сөзләрини охујанда онун ҝөзләри јашарыр (Мәзмур 27:10).

Етдији һәр шејә ҝөрә Јеһоваја миннәтдарлығынын әламәти кими Ренато 2002-ҹи илдә вәфтиз олунду вә нөвбәти ил таммүддәтли хидмәтә башлады. О, һәлә дә доғма ата-анасынын ким олдуғуну билмир, бәлкә дә буну һеч вахт билмәјәҹәк. Лакин Ренато дүшүнүр ки, онун индијә кими алдығы ән гијмәтли бәхшишләрдән бири Јеһованы танымаг вә Она гајғыкеш вә нәвазишли ата кими иман етмәк олуб.

Јәгин, сиз Аллаһла сых вә јахшы мүнасибәтләринизин олмасыны арзулајырсыныз, чүнки белә мүнасибәтләр һәјатынызы сөзүн әсил мәнасында зәнҝинләшдирә биләр. Јеһова Аллаһла вә Онун Оғлу Иса Мәсиһлә бу ҹүр мүнасибәтләрә малик олмаг имканы һамынын — һәм касыбларын, һәм дә варлыларын гаршысында ачыгдыр. Ола билсин, бу, вар-дөвләт ҝәтирмәјәҹәк, лакин биз дүнјанын бүтүн пулларыны версәк белә, һеч вахт ала билмәјәҹәјимиз гәлб раһатлығыны вә мәмнунлуғу тапаҹағыг. Доғрудан да Сүлејманын мәсәлләри 10:22 ајәсиндә јазылан сөзләр һәгигәтдир: «Рәббин хејир-дуасы инсана сәрвәт ҝәтирәр, даһа она гүссә вермәз».

Јеһова Аллаһ Она јахынлашмаг истәјән инсанлара дәрин мараг ҝөстәрир: «Аһ, каш ки сән Мәним әмрләримә диггәт јетирәјдин! Онда әмин-аманлығын һеч вахт гурумајан чај кими ахарды, салеһлијин дәниз далғалары кими оларды» (Јешаја 48:18). Һәмчинин Аллаһ Она тәмиз үрәклә јахынлашанлара бол-бол хејир-дуа верәҹәјини дә вәд едир: «Тәвазөкарлығын вә Рәбб горхусунун нәтиҹәси сәрвәт, шәрәф, һәјатдыр» (Сүлејманын мәсәлләри 22:4).

[6-ҹы сәһифәдәки јазы]

Аллаһа иман етмәк инсана гәлб раһатлығы, мәмнунлуг вә хошбәхтлик ҝәтирир

[5-ҹи сәһифәдәки шәкил]

Јохсул олса да, Исанын јер үзүндәки аиләси Аллаһдан бол-бол хејир-дуа алмышды