Һәгиги хошбәхтлик пулданмы асылыдыр?
СОНЈА Испанијада анадан олуб. Ушаг оланда о, анасы илә Јеһованын Шаһидләринин јығынҹаг ҝөрүшләринә ҝедирди. Лакин бөјүјәндә Лондона (Инҝилтәрә) көчдү вә малијјә базарында ишләмәјә башлады.
Сонја ишини севирди. О, чохлу пул газаныр вә әлиндән бөјүк мәбләғдә пул кечирди. Иши она мараглы ҝәлирди, үстәлик, ишиндә чох уғурлу иди. Сонја ҝүнүн 18 саатыны ишләјир, бәзән исә ҝеҹәләр ҹәми ики-үч саат јатырды. Онун һәјаты иши әтрафында ҹөвлан едирди. Сонра һәр шеј алт-үст олду. Еһтимал ки, ҝәрҝин һәјат тәрзинин нәтиҹәси олараг о ифлиҹ олду. Онун ҹәми 30 јашы вар иди.
Сонјанын бәдәнин бир тәрәфи ифлиҹ олмушду, һәкимләр исә онун данышыг габилијјәтинин бәрпа олунаҹағына үмид етмирдиләр. Она бахмаг үчүн анасы дәрһал Инҝилтәрәјә ҝәлди. Сонја јенидән јеримәјә башлајанда анасы она деди: «Мән јығынҹаг ҝөрүшүнә ҝедирәм, сән дә мәнимлә ҝедирсән, чүнки сәни евдә тәк гоја билмәрәм». Сонја ҝетмәјә разылашды. Бәс сонра?
Сонја дејир: «Ешитдијим һәр шеј һәгигәтә бәнзәјирди. Бу мәним чох хошума ҝәлди. Биринҹи дәфә Падшаһлыг Залына ҝәләндә мәни саламлајанлардан бири илә Мүгәддәс Китабы өјрәнмәк тәклифини бөјүк мәмнунијјәтлә гәбул етдим. Көһнә танышларым артыг мәнә баш чәкмирдиләр. Јениләри исә мәнә мәһәббәтлә јанашыр вә гајғы ҝөстәрирдиләр».
Тәдриҹән Сонјанын данышыг габилијјәти бәрпа олунду вә о, руһани ҹәһәтдән сүрәтлә инкишаф етмәјә башлады. Үстүндән бир ил кечмәмиш о, вәфтиз олду. Сонјанын јени достларындан чоху таммүддәтли хидмәт едирди вә о ҝөрүрдү ки, бу, онлара бөјүк мәмнунлуг ҝәтирир. Сонја дејир: «Мән дә онлар кими хидмәт етмәк истәјирдим. Истәјирдим ки, һәјатымда ән јахшы шеји Јеһоваја верим!» Инди Сонја да вахтынын чох һиссәсини хидмәтә һәср едир.
Сонјанын тәҹрүбәси она нәји өјрәтди? «Чохлу пул газансам да, ишдәки ҝәрҝинлик вә гејри-сабитлик мәни нараһат едиб әһвалымы позурду. Сонрадан баша дүшдүм ки, һәјатда ән ваҹиб шеј Сәмави Атамыз Јеһова илә јахшы мүнасибәтдир. Инди мән сөзүн әсил мәнасында хошбәхтәм».
Һәвари Павел јазмышды: «Һәр ҹүр пислијин көкү пулпәрәстликдир. Буна гапылан бәзиләри иман јолундан узаглашыб, өзләринә бир чох әзаблар чәкдирдиләр» (1 Тимотејә 6:10). Бу сөзләрин доғру олдуғуну Сонја өзү тәсдиг едә биләр.