Македонијаја кечә биләрсәнми?

КИЧИК Асијанын лиман шәһәри Троасда һәвари Павел ҝөрүнтү алыр. Бир македонијалы она јалварыр: «Македонијаја кеч вә бизә көмәк елә!» Павел бу ҝөрүнтүнү аландан дәрһал сонра јолдашлары илә гәнаәтә ҝәлир ки, ‘Рәбб онлары Мүждәни [Македонијада] јајмаға чағырыр’. Онларын бу чағырыша һај вермәси һансы бәһрәләри ҝәтирди? Македонија әјаләтинин баш шәһәри Филипидә Лидија адлы бир гадын аиләси илә бирҝә мәсиһчилији гәбул етди. Романын бу әјаләтиндә һәгигәти гәбул едән башга инсанлар да олду (Һәв. иш. 16:9-15).

Ејни әһвал-руһијјә бу ҝүн Јеһованын Шаһидләри арасында да мүшаһидә олунур. Бир чохлары бөјүк һәвәслә өз һесабына Падшаһлығын тәблиғчиләринә даһа чох еһтијаҹ олан әразиләрә көчүрләр. Ҝөтүрәк Лизаны. О, һәјатынын Аллаһа хидмәт әтрафында дөвр етмәсини истәјирди, буна ҝөрә дә Канададан Кенијаја көчдү. Канададан олан Треворла Емили дә хидмәтләрини ҝенишләндирмәк мәгсәдилә Малавијә көчдүләр. Инҝилтәрәдән олан Пол илә Мегги исә тәгаүдә чыхмаларыны Јеһоваја даһа чох хидмәт етмәк имканы кими гијмәтләндириб, Шәрги Африкаја көчмәк гәрарына ҝәлдиләр. Сәндә дә фәдакарлыг руһу вармы? Һәјатында белә бир дәјишиклик едә биләрсәнми? Әҝәр едә биләрсәнсә, буна мүвәффәг олмаг үчүн һансы Мүгәддәс Китаб принсипләри вә практики мәсләһәтләр сәнә көмәк едә биләр?

Өзүнү тәһлил ет

Инсанын илк нөвбәдә ҝөтүр-гој етмәли олдуғу шеј онун мотивләридир. Чүнки, Исанын сөзләринә ҝөрә, ән бөјүк әмр: «Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев» әмридир. Бәли, сәни хариҹи өлкәдә хидмәт етмәјә Јеһоваја мәһәббәт вә шаҝирд һазырламаг тапшырығыны јеринә јетирмәк истәји тәшвиг етмәлидир. Сонра Иса демишдир: «Буна бәнзәјән икинҹиси будур: “Гоншуну өзүн кими сев”». Инсанлара мәһәббәт онлара сәмими-гәлбдән көмәк етмәк арзусунда әкс олунур (Мат. 22:36-39; 28:19, 20). Хариҹи өлкәдә хидмәт, адәтән, чохлу сәј вә фәдакарлыг тәләб едир — бу садәҹә сәрҝүзәшт вә ја маҹәра дејил. Бу истәк мәһәббәтдән ирәли ҝәлмәлидир. Һал-һазырда Намибијада хидмәт едән нидерландлы Ремко вә Сүзанна хидмәтләри барәдә дејирләр: «Бизи бурада сахлајан мәһәббәтдир».

Намибијада рајон нәзарәтчиси кими хидмәт едән Вилли гејд едир: «Хариҹи өлкәдә хидмәтләринә сон гојмајан баҹы-гардашлар һәмин өлкәјә јерли һәмиманлыларынын онларын бүтүн гајғыларыны өз үзәрләринә ҝөтүрәҹәкләри фикри илә ҝәлмәмишдиләр. Онлар бура јерли гардашларла чијин-чијинә хидмәт етмәк вә онлара тәблиғ ишиндә көмәк етмәк нијјәти илә ҝәлмишдиләр».

Мотивләрини арашдырдыгдан сонра өзүндән соруш: «Хариҹдә хидмәт етмәк үчүн һансы тәҹрүбәм вар? Хидмәтим нә дәрәҹәдә сәмәрәлидир? Һансы дилләри билирәм? Тәзә дил өјрәнә биләрәмми?» Бу суаллары аиләнлә бирликдә һәртәрәфли мүзакирә ет. Јығынҹағынын ағсаггаллары илә мәсләһәтләш. Вә бу барәдә мүтләг Јеһоваја дуа ет. Өзүнү бу ҹүр дүрүстлүклә тәһлил етмәјин сајәсиндә сән хариҹдә хидмәт едиб-едә билмәјәҹәјини вә үмумијјәтлә, бунун үчүн гәтијјәтинин олуб-олмадығыны мүәјјән едә биләҹәксән. («Өзүнү тәһлил ет» адлы чәрчивәјә бах.)

Һарада хидмәт етмәли?

Павел ҝөрүнтүдә Македонијаја чағырылмышды. Бу ҝүн Јеһова бизи истигамәтләндирмәк үчүн гејри-ади үсуллардан истифадә етмир. Амма Аллаһын халгы бу журнал вә башга нәшрләр васитәсилә һансы әразиләрдә тәблиғчиләрә тәләбат олдуғу барәдә өјрәнир. Беләликлә, илк нөвбәдә һәмин әразиләрин сијаһысыны тутмаға башла. Әҝәр сәнин јени дил өјрәнмәк вә ја хариҹи өлкәдә һәмишәлик галмаг фикрин јохдурса, әсас әһалисинин сәнин билдијин дилдә данышдығы бир өлкәјә ҝетмәк имканыны нәзәрдән кечир. Сонра виза үчүн олан тәләбләр, нәглијјат, орада јашамағын нә дәрәҹәдә тәһлүкәсиз олдуғу, јашајыш сәвијјәси вә иглим барәдә өјрән. Башга өлкәдә хидмәт едәнләрлә мәсләһәтләшмәк дә фајдалы оларды. Топладығын мәлуматы дүзҝүн истифадә етмәк барәдә Јеһовадан дуаларында көмәк дилә. Унутма ки, ‘Мүгәддәс Руһ [Павели вә әмәкдашларыны] Асија әјаләтиндә кәламы тәблиғ етмәјә гојмамышды’. Сонра онлар Битинијаја ҝетмәјә чалышсалар да, «Исанын Руһу онлара изин вермәди». Ејнилә, һәгигәтән дә көмәк едә биләҹәјин јери мүәјјән етмәјин үчүн бир гәдәр вахт тәләб олуна биләр (Һәв. иш. 16:6-10).

Ола билсин, артыг сәнин бир нечә вариантын вар. Әҝәр хариҹи өлкәдә хидмәт етмәји планлашдырырсанса, сијаһындакы өлкәләрин филиалларына мәктуб јаз. Гысаҹа олараг теократик тәрҹүмеји-һалыны јаз вә кирајә мәнзил, мүнасиб хәстәхана, иш јери кими мәсәләләр дә дахил олмагла, јашамаг үчүн нә гәдәр вәсаит лазым олдуғу барәдә конкрет суалларыны вер. Сонра исә јаздығын мәктубу вә ја мәктублары јығынҹағынын хидмәти комитәсинә вер. Ағсаггаллар төвсијә мәктубуну әлавә едиб, онлары сәнин сечдијин филиаллара ҝөндәрәҹәкләр. Чох ҝүман ки, алдығын ҹаваб мәктублары сәнә хидмәтинин һарада даһа еффектив олаҹағыны мүәјјән етмәјә көмәк едәҹәк.

Јухарыда сөзләри ҝәтирилән Вилли дејир: «Хидмәтләриндә мүвәффәгијјәт газананлар хидмәт етмәк истәдикләри өлкәләрә әввәлҹә баш чәкиб һарада һәгигәтән дә хошбәхт ола биләҹәкләрини мүәјјән етмишләр. Бир ҹүтлүк баша дүшүрдү ки, узаг әразидә хидмәт етмәк онлар үчүн чәтин олаҹаг. Буна ҝөрә дә онлар тәләбат олан, ејни заманда өзләрини хошбәхт һисс едә биләҹәкләри кичик бир шәһәрдә мәскунлашдылар».

Јени чәтинликләр

Евдән узагда јашамаг вә тамамилә јени бир мүһитә дүшмәк, сөзсүз ки, өзү илә мүәјјән чәтинликләр ҝәтирәҹәк. Јухарыда ады чәкилән Лиза дејир: «Бәзән тәнһалыг һисси дөзүлмәз олур». Бәс о, бунун өһдәсиндән неҹә ҝәлир? Лиза јени көчдүјү әразидәки јығынҹаг үзвләри илә јахын олмаға чалышыр. О, һәр кәсин адыны өјрәнмәји гаршысына мәгсәд гојуб. Бунун үчүн јығынҹаға бир аз тез ҝәлир, ҝөрүш гуртарандан сонра исә бир аз јубаныр ки, баҹы-гардашларла үнсијјәт етсин. Лиза башгалары илә хидмәтә чыхыб, чохларыны евинә дәвәт едиб вә өзүнә јени достлар газаныб. О дејир: «Вердијим гурбанлара ҝөрә пешман дејиләм. Јеһова мәни һәгигәтән дә хејир-дуаландырыб».

Ушагларыны бөјүдүб әрсәјә чатдырдыгдан сонра Полла Мегги 30 ил јашадыглары евләриндән көчдүләр. Пол дејир: «Тәсәввүр етмирдик ки, мал-мүлкүмүзү бурахыб ҝетмәк белә асан олаҹаг. Анҹаг аиләмиздән ајрылмаг чох чәтин, ҝөзләдијимиздән дә чәтин олду. Тәјјарәдә ҝөз јашларымызы сахлаја билмәјиб о гәдәр ағламышдыг ки. “Биз буну һеч вахт едә билмәрик”,— дејәрәк тәслим олмаг чох асандыр. Лакин биз Јеһоваја ҝүвәнирдик. Јени достлар газанмаг тәслим олмамаг үчүн ҝүҹ верир».

Канадалы Грег вә Кристал Намибијанын рәсми дили олан инҝилис дилиндә данышдыглары үчүн һәмин өлкәјә көчмәк гәрарына ҝәлмишдиләр. Бунунла белә, онлар баша дүшмүшдүләр ки, јерли дили дә билмәк фајдалы оларды. «Бәзән мәјуслуға гапылырдыг. Амма биз оранын мәдәнијјәтини јалныз јерли дили өјрәндикдән сонра баша дүшмәјә башладыг. Гардашларла сых үнсијјәт бизә јени мүһитә өјрәшмәјә көмәк етди».

Бу ҹүр тәвазөкарлыг вә фәдакарлыг јерли гардашлара да мүсбәт тәсир бағышлаја биләр. Ҹенни бөјүјүб боја-баша чатдығы Ирландијаја көчән аиләләри мәһәббәтлә хатырлајыр. «Онлар чох гонагпәрвәр идиләр,— дејә о гејд едир. — Бу баҹы-гардашлар өлкәмизә онлара хидмәт едилмәси үчүн јох, башгаларына хидмәт етмәјә ҝәлмишдиләр. Онлар о гәдәр чалышган вә хошбәхт идиләр ки, мәндә дә, онлар кими, бөјүк тәләбат олан јерләрдә хидмәт етмәк истәји јаранды». Һал-һазырда Ҹенни һәјат јолдашы илә бирҝә Гамбијада миссионер кими хидмәт едир.

Јеһованын хејир-дуасы «сәрвәт ҝәтирәр»

Павелин Македонијадакы хидмәти неҹә дә сәмәрәли иди! Тәхминән он ил сонра о, Филипидәки гардашларына јазырды: «Сизи һәр хатырлајанда Аллаһыма шүкүр едирәм» (Филип. 1:3).

Ҝилеад Мәктәбинә дәвәт алмамышдан әввәл Малавидә хидмәт едән Треворла Емили онун һиссләринә шәрикдирләр. «Бәзән биз гәрарымызын дүзҝүн олуб-олмадығына шүбһә едирдик, бунунла белә, хошбәхт идик. Бизим мүнасибәтләримиз даһа да мөһкәмләнди вә Јеһованын хејир-дуасыны өз үзәримиздә һисс етдик». Јухарыда хатырланан Греглә Кристал дејирләр: «Биз хидмәтдән башга, һеч бир шејлә мәшғул олмаг истәмәздик».

Амма етираф етмәк лазымдыр ки, хариҹи өлкәдә хидмәт етмәјә һамынын шәраити јол вермир. Кимләрсә өз өлкәләриндә даһа чох тәләбат олан әразиләрә көчә биләрләр. Диҝәрләри исә гаршыларына евләринә јахын јығынҹаглардан бириндә даһа фәал олмағы мәгсәд гоја биләрләр. Ән ваҹиби Јеһоваја хидмәтдә әлиндән ҝәләни етмәкдир (Колос. 3:23). Онда сән дә Сүлејманын мәсәлләри 10:22 ајәсиндә јазылдығы кими дејә биләрсән: «Рәббин хејир-дуасы инсана сәрвәт ҝәтирәр, даһа она гүссә вермәз».

[5-ҹи сәһифәдәки чәрчивә/шәкил]

Өзүнү тәһлил ет

Мотивләрини тәһлил етмәк вә хариҹи өлкәдә хидмәт едиб-едә билмәјәҹәјини мүәјјәнләшдирмәк үчүн нөвбәти суаллар үзәриндә дүшүн вә дуада Аллаһдан хаһиш ет ки, башга өлкәјә көчмәјин сәнин үчүн реал олуб-олмадығыны ҝөрмәјә көмәк етсин. Бунда сәнә «Ҝөзәтчи Гүлләси»нин сон сајлары көмәк едә биләр.

• Мән руһани инсанам? («Хошбәхт олмаг үчүн...», 15 октјабр 1997-ҹи ил, сәһифә 6, рус.)

• Хидмәтим нә дәрәҹәдә сәмәрәлидир? («Маһир вә шәраитә ујғунлашан тәблиғчи олун», бр2, сәһифә 27.)

• Аиләмдән вә достларымдан узагда јашаја биләрәмми? («Тәблиғчи өз аиләси үчүн дарыханда», 15 мај 1994-ҹү ил, сәһифә 28, рус.)

• Јени дил өјрәнә биләрәмми? («Әҹнәбидилли јығынҹагда хидмәт», 15 март 2006-ҹы ил, сәһифә 17, рус.)

• Мәсрәфләри өдәјә биләҹәјәмми? («Башга өлкәдә хидмәт едә биләрсәнми?», 15 октјабр 1999-ҹу ил, сәһифә 23, рус.)

[6-ҹы сәһифәдәки шәкил]

Тәвазөкарлыг вә фәдакарлыг јерли гардашлара мүсбәт тәсир бағышлаја биләр

[7-ҹи сәһифәдәки шәкил]

Хидмәт етмәк мәгсәди илә башга өлкәләрә көчәнләр мүвәффәгијјәт газанмышлар