Аллаһа вар гүввәтинлә вә севинҹлә хидмәт ет
ЈЕҺОВА истәјир ки, сән севинҹ ичиндә јашајасан (Мәз. 100:2). Онун һәр бир хидмәтчиси кими, чох еһтимал ки, сән дә мәшғулсан. Ола билсин, һәјатыны Аллаһа һәср етмәздән әввәл, сән бу гәдәр мәшғул дејилдин, лакин инди руһани вә диҝәр мәсулијјәтләрин чох олдуғундан бәзән өзүнү ағыр јүк алтында һисс едирсән. Истәдијин һәр шеји едә билмәјәндә виҹданын сәни нараһат едә биләр. Бәс таразлы олмағы неҹә өјрәнмәк олар вә сән ‘Рәббин вердији севинҹи’ неҹә горуја биләрсән? (Неһ. 8:10).
Јашадығымыз чәтин ҝүнләрдә чохлу тәзјигләрә мәруз галырыг, буна ҝөрә дә ишләримизи дүзҝүн планлашдырмағы өјрәнмәлијик. Һәвари Павелин Аллаһдан илһам алараг Ефеслиләрә 5:15, 16 ајәләриндә вердији мәсләһәт чох јериндәдир. Орада охујуруг: «Нә ҹүр һәрәкәт етдијинизә чох диггәт верин, һикмәтсиз кими јох, һикмәтли кими јашајын. Һәр фүрсәтдән истифадә един, чүнки јашадығымыз ҝүнләр шәрдир».
Бу мүдрик мәсләһәти нәзәрә алараг, гаршына неҹә реал мәгсәдләр гоја биләрсән вә шәхси өјрәнмә, аилә гајғысы, хидмәт, иш вә диҝәр ваҹиб мәшғулијјәтләр арасында таразлығы неҹә горуја биләрсән?
Өзүнү Аллаһа һәср едиб вәфтиз олунан заман кечирдијин севинҹ һисси јадындадырмы? Севинҹ Јеһова вә Онун нијјәтләри һаггында биликдән һасил олан бир һиссдир. Бунлары дәрк етмәк вә севинҹ әлдә етмәк үчүн, ола билсин, сәнә ајларла Мүгәддәс Китабы чалышганлыгла өјрәнмәк лазым ҝәлиб. Лакин бу, сәј ҝөстәрмәјинә дәјиб. Чүнки нәтиҹәдә һәјатын јахшылыға доғру дәјишиб.
Севинҹини горујуб сахламаг үчүн руһән гидаланмаға давам етмәк лазымдыр. Әҝәр Мүгәддәс Китабы охујуб өјрәнмәк үчүн вахт тапмагда чәтинлик чәкирсәнсә, өз графикини нәзәрдән кечир. Ҝүн әрзиндә ҹәми бир нечә дәгигә Мүгәддәс Китабы арашдырмағын вә үзәриндә дүшүнмәјин сајәсиндә сән Јеһоваја даһа да јахын ола биләрсән. Бу, мүтләг сәнин севинҹини артыраҹаг.
Јеһованын хидмәтчиләринин әксәријјәти һәјати ваҹиб ишләрә вахт тапмаг үчүн даһа аз әһәмијјәтли ишләрин һесабына вахты сатын ала биләрләр. Өзүндән соруш: «Дүнјәви журнал вә ја гәзетләри охумаға, телевизора бахмаға, мусигијә гулаг асмаға вә ја севимли мәшғулијјәтләримә нә гәдәр вахт сәрф едирәм?» Бу ҹүр мәшғулијјәтләрә јалныз таразлы јанашдығымыз тәгдирдә онлар бизә севинҹ ҝәтирә биләр (1 Тим. 4:8). Әҝәр вахтындан дүзҝүн истифадә етмәјә чәтинлик чәкирсәнсә, онда ҹәдвәлиндә дәјишиклик ет.
Ҝәлин ҝөрәк, үч ушаг атасы вә ағсаггал олан Адәмә нә көмәк едир. О дејир: «Мән садә һәјат тәрзи сүрмәјә, чохлу вахт апаран мәшғулијјәтләрдән узаг дурмаға вә даим диггәт тәләб едән әшјалар алмамаға чалышырам. Бу о демәк дејил ки, мән өзүмү һәр шејдән мәһрум едирәм, мән садәҹә садә әјләнҹә вә истираһәтә үстүнлүк верирәм».
Гәрарларынын ҝәтирдији јахшы нәтиҹәләр үзәриндә дүшүнмәк сәнә севинҹини бәрпа етмәјә вә мүсбәт әһвал-руһијјәни горумаға көмәк едә биләр. Мәсәлән, үч ушаг атасы вә ағсаггал олан Мариуш дејир: «Мән Мүгәддәс Китабы өјрәнмәјә башлајанда ҝәләҹәјә никбин әһвал-руһијјә илә бахмаға башладым. Һәлә дә вахташыры чәтинликләрлә гаршылашырам вә онларын чоху һаггында Јеһовадан башга һеч ким билмир. Анҹаг Онун көмәји сајәсиндә ҝәләҹәјә севинҹлә бахырам».
Мариушун нүмунәсиндән ҝөрүндүјү кими, мүсбәт әһвал-руһијјә нараһатчылыглары тамамилә арадан галдырмыр. Амма бу, сәнә өзүнү даһа јахшы һисс етмәјә вә һәјатын чәтинликләринин өһдәсиндән мүвәффәгијјәтлә ҝәлмәјә көмәк едә биләр. Мүгәддәс Китабда охујуруг: «Мәзлумун һәр ҝүнү гарадыр, үрәји бәхтәвәрин елә бил даима зијафәти вар» (Сүл. мәс. 15:15). Һәмчинин Аллаһын сәнә ҝөстәрдији мәһәббәт үзәриндә дүшүн. Бу, сәнин Она мәһәббәтини мөһкәмләндирәҹәк вә Аллаһа мәгбул олан севинҹини артыраҹаг (Мат. 22:37).
Јеһованы вә Онун марагларыны биринҹи јерә гојмаг аиләјә чохлу севинҹ ҝәтирир. Мәсиһчи хүсусијјәтләрини тәзаһүр етдирмәјин сајәсиндә аиләдә чәкишмәләр азалыр вә мүнасибәтләр даһа мөһкәм вә јахшы олур. Беләликлә, аиләниздә әмин-аманлыг вә бирлик һөкм сүрәҹәк (Мәз. 133:1).
Аиләликҹә руһани ишләрлә мәшғул олмаг әсил севинҹ бәхш едир. Мариуш дејир: «Аиләмлә кечирдијим анлар мәним үчүн чох әзиздир. Һәјат јолдашымын мәнә чох көмәји олур. Имкан дахилиндә о, һәмишә — хидмәтдә оланда, конгресдән әввәл стадиону јығышдыранда, јахуд башга јығынҹагларда мәрузә илә чыхыш едәндә јанымда олмаға чалышыр. Бу, мәни чох руһландырыр».
Мүгәддәс Јазылар мәсиһчиләрә аиләләринин мадди еһтијаҹларынын гајғысына галмағы әмр едир (1 Тим. 5:8). Лакин әҝәр ишин һәддән артыг чох вахт вә гүввә тәләб едирсә, бу, сәни Аллаһа хидмәтдә дујдуғун севинҹдән мәһрум едә биләр. Бу барәдә Јеһоваја дуа ет (Мәз. 55:22). Бәзиләри баша дүшмүшләр ки, Аллаһын Падшаһлығыны биринҹи јерә гојмаг үчүн иш јерләрини дәјишмәлидирләр. Һеч бир мәсиһчи јол вермәмәлидир ки, ҝәлирли, анҹаг чохлу вахт вә гүввә тәләб едән иш даһа ваҹиб олан руһани ишләри көлҝәдә гојсун (Сүл. мәс. 22:3).
Дүзәлмәк истәдијин вә ја индики ишинин мүсбәт вә мәнфи ҹәһәтләрини јазмаг да фајдалы ола биләр. Әлбәттә, јүксәкмаашлы вә мәмнунедиҹи ишлә мәшғул олмаг арзусу тәбиидир. Бәс индики ишин аиләни руһән инкишаф етдирмәкдә сәнә көмәк едирми? Бүтүн амилләри објектив олараг ҝөтүр-гој ет вә елә гәрар гәбул ет ки, Јеһова илә мүнасибәтләрини биринҹи јерә гоја биләсән.
Әҝәр ишин руһани ҹәһәтдән инкишаф етмәјинә мане олурса, вәзијјәти мүтләг дәјишмәк лазымдыр. Бир чох мәсиһчиләр руһани ишләрә вахт ајырмаг үчүн һәјатларында көклү дәјишикликләр етмишләр. Полшадан олан бир гардаш дејир: «Бир дәфә ширкәтдәки ишими атмагдан башга чарәм галмады, чүнки тез-тез ишҝүзар сәфәрләрдә олурдум вә руһани ишләрә вә аиләмә дүз-әмәлли вахт ајыра билмирдим». Инди о, аиләсини доландырмаг үчүн чох вахт вә гүввә тәләб етмәјән бир ишдә ишләјир.
Башгаларына көмәк етмәкдән севинҹ дуј
Иса демишдир ки, «вермәк алмагдан даһа бөјүк бәхтијарлыг ҝәтирир» (Һәв. иш. 20:35). Мәсиһчиләрин вермәјә чохлу имканлары вар. Бәзән теократик тәјинатларыны ҹанла-башла јеринә јетирәнләрә меһрибанлыгла ҝүлүмсәмәк, әлләрини сыхмаг вә ја сәмими-гәлбдән миннәтдарлыг билдирмәк һәр икинизә дә еһтијаҹ дујдуғунуз севинҹи бәхш едә биләр.
Һәвари Павел һәмиманлыларыны тәшвиг едирди: «Ҹәсарәтсизләри [‘гәмҝинләри’, ЈД] руһландырын, зәифләрә јардым един» (1 Салон. 5:14). Кәдәрли оланлар проблемләринин өһдәсиндән ҝәлмәк үчүн өзләрини тагәтсиз һисс едә биләрләр. Сән белә баҹы-гардашлара көмәк әлини узада биләрсәнми? Әҝәр гардашларындан киминсә Јеһоваја хидмәтдә севинҹини итирдијини ҝөрүрсәнсә, ону руһландырмаға чалыш. Сән өзүн дә руһланаҹагсан. Бәзи проблемләрин һәлли инсанларын әлиндә дејил. Лакин сән шәфгәт һисси ҝөстәрәрәк гардашыны тәшвиг едә биләрсән ки, һәр заман бизә дәстәк олан Јеһоваја архаланмағы өјрәнсин. Чүнки Она пәнаһ апаранлар һеч вахт мәјус олмајаҹаглар (Мәз. 27:10; Јешаја 59:1).
Севинҹини итирмиш адама көмәк етмәк үчүн биз һәм дә ону хидмәтә дәвәт едә биләрик. Иса 70 шаҝирдини тәблиғ етмәјә ҝөндәрәндә онлары «ики-ики» ҝөндәрмишди (Лука 10:1). Јәгин, разылашаҹагсан ки, бу, һәр ики нәфәрә бир-бирини руһландырмаға көмәк едирди. Сән дә белә етмәклә кимәсә јенидән севинҹини бәрпа етмәјә көмәк едә биләрсәнми?
Һәјат гајғыларла долудур. Анҹаг һәвари Павел бизи сәсләјир: «Рәббә аид олдуғунуз үчүн һәмишә севинин; вә бир дә дејирәм: севинин» (Филип. 4:4). Аллаһы севдијин үчүн Она итаәт ет вә Онун һәвалә етдији иши сәјлә јеринә јетир. Сәнин һәјатын мәнасыз дејил, буна ҝөрә севинмәјә дәјәр. Үстәлик, Јеһова сәнә мәруз галдығын тәзјигләрин вә проблемләринин өһдәсиндән ҝәлмәјә көмәк едир (Ром. 2:6, 7).
Иман ҝөзләримизлә Јеһованын вәд олунмуш јени дүнјасынын нә гәдәр јахын олдуғуну ҝөрүрүк. Бу неҹә дә чохлу хејир-дуа вә севинҹ ҝәтирәҹәк! (Мәз. 37:34). Јеһованын бизи артыг индидән нә гәдәр хејир-дуаландырдығыны јадда сахлајараг биз јахшы әһвал-руһијјәјә малик ола биләр вә Јеһоваја ‘севинҹлә гуллуг едә’ биләрик (Мәз. 100:2).
[8-ҹи сәһифәдәки шәкил]
(Мәтнин там формасына нәшрин өзүндә бахын)
Севинҹини горумаг истәјирсәнсә, вахтыны дүзҝүн планлашдырмағы өјрән
ИСТИРАҺӘТ вә ӘЈЛӘНҸӘ
ЕВ вә АИЛӘ ГАЈҒЫСЫ
ИШ
МӘСИҺЧИ ҜӨРҮШЛӘРИ
ШӘХСИ ӨЈРӘНМӘ
ХИДМӘТ
[10-ҹу сәһифәдәки шәкил]
Башгаларына севинҹләрини бәрпа етмәјә көмәк едә биләрсәнми?