‘Аллаһын сөзүнү ҹәсарәтлә сөјлә’

«Һамы Мүгәддәс Руһла долмушду вә Аллаһын сөзүнү ҹәсарәтлә сөјләјирди» (ҺӘВ. ИШ. 4:31).

1, 2. Нәјә ҝөрә биз хидмәтдә еффектив олмаға ҹан атмалыјыг?

ӨЛҮМҮНДӘН үч ҝүн әввәл Иса шаҝирдләринә демишди: «Сәмави Сәлтәнәт һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир». Ҝөјләрә галхмаздан өнҹә, дирилмиш Иса давамчыларына бүтүн халглар арасында шаҝирдләр һазырламағы вә ‘әмр етдији һәр шејә риајәт етмәји онлара өјрәтмәји’ тапшырды. Иса һәмчинин «дөврүн сонуна гәдәр һәр ҝүн» онларла олаҹағыны вәд етди (Мат. 24:14; 26:1, 2; 28:19, 20).

² Јеһованын Шаһидләри олан бизләр тәмәли биринҹи әсрдә гојулмуш ишдә фәал сурәтдә иштирак едирик. Һәјати ваҹиб олан Падшаһлығын тәблиғи вә шаҝирд һазырламаг иши гәдәр башга ваҹиб иш јохдур. Буна ҝөрә дә хидмәтдә еффектив олмаг зәруридир. Бу мәгаләдә тәблиғ заманы мүгәддәс руһун бизә ҹәсарәтлә данышмаға неҹә көмәк етдијини ҝөрәҹәјик. Нөвбәти ики мәгаләдә исә мәһарәтлә өјрәтмәк вә мүнтәзәм шәкилдә тәблиғ етмәк ишиндә Јеһованын руһунун бизә неҹә јардымчы олдуғуну ҝөрәҹәјик.

Бизә ҹәсарәт ҝәрәкдир

3. Падшаһлыг һаггында тәблиғ етмәк үчүн нәјә ҝөрә бизә ҹәсарәт ҝәрәкдир?

³ Аллаһ бизә Падшаһлығы бәјан етмәк кими шәрәфли бир иш тапшырыб. Амма бу иш әнҝәлсиз өтүшмүр. Бәзи инсанлар Аллаһын Падшаһлығы һаггында хош хәбәри һәвәслә гәбул етсәләр дә, чохлары Нуһун ҝүнләриндә јашајан инсанлара бәнзәјир. Иса демишди ки, онлар ‘туфан ҝәлиб һамысыны апарынҹаја гәдәр бихәбәр идиләр [«фикирләшмирдиләр», ЈД]’ (Мат. 24:38, 39). Бу ҝүн инсанлар бизә дә ришхәнд едир вә мүгавимәт ҝөстәрирләр (2 Пет. 3:3). Тәгибләр һакимијјәт даирәләри, синиф вә ја иш јолдашлары, һәтта аилә үзвләри тәрәфиндән ола биләр. Бураја өзүмүзүн утанҹаглыг вә инсан горхусу кими зәифликләримизи дә әлавә едәк. Бир чох амилләр бизә Аллаһын Кәламыны «ҹәсарәтлә» сөјләмәкдә чәтинликләр јарада биләр (Ефес. 6:19, 20). Мәтанәтлә Аллаһын кәламыны сөјләмәк үчүн ҹәсарәт тәләб олунур. Буна неҹә наил ола биләрик?

4. а) Ҹәсарәт нәдир? б) Неҹә олду ки, һәвари Павел салониклиләрә ҹәсарәтлә тәблиғ едә билди?

⁴ «Ҹәсарәт» кими тәрҹүмә олунан јунан сөзү «сәмимијјәт, ачыг олмаг» мәнасыны дашыјыр. Һәмин сөз «һүнәр, әминлик,.. горхмазлыг» фикрини верир. Ҹәсарәтли олмаг кобуд вә ја сәрт олмаг демәк дејил (Колос. 4:6). Биз ҹәсарәтли вә һамы илә сүлһдә олмаг истәјирик (Ром. 12:18). Бундан әлавә, Аллаһын Падшаһлығы һаггында хош хәбәри тәблиғ едәркән биз ҹәсарәтли олмагла јанашы, нәзакәтли олмаға чалышырыг ки, билмәдән һеч кимин үрәјинә тохунмајаг. Ҝөрдүјүмүз кими, ҹәсарәтли олмаг үчүн сәј тәләб едән башга хүсусијјәтләр дә инкишаф етдирмәлијик. Бу ҹүр ҹәсарәт инсанын дахилиндән вә ја өз ҝүҹүнә архајынлыг һиссиндән ирәли ҝәлмир. Неҹә олду ки, һәвари Павел вә әмәкдашлары ‘Филипидә әзаб чәкиб, тәһгир олундугдан’ сонра ‘ҹәсарәт алыб’ Салоникдә тәблиғ едә билдиләр? Павел гејд едир ки, онлар буна Аллаһын сајәсиндә мүвәффәг олмушлар. (1 Салоникилиләрә 2:2 ајәсини оху.) Јеһова Аллаһ бизә горхуларымызы арадан галдырмаға вә ејни ҹәсарәтә јијәләнмәјә көмәк едә биләр.

5. Јеһова Петерә, Јәһјаја вә башга шаҝирдләрә ҹәсарәтли олмаға неҹә көмәк етди?

⁵ Халгын ‘рәисләри, ағсаггаллар вә дин алимләри’ тәблиғ етмәји гадаған едәндә һәвари Петер вә Јәһја деди: «Өзүнүз дејин: сизи Аллаһдан даһа артыг динләмәк Аллаһын гаршысында доғрудурму? Ешитдијимиз вә ҝөрдүјүмүз шејләри сөјләмәмәјимиз гејри-мүмкүндүр». Аллаһдан тәгибләрә сон гојмасыны хаһиш етмәк әвәзинә, онлар һәмиманлылары илә бирҝә Јеһоваја јалвардылар: «Ја Рәбб, онларын тәһдидләринә бах вә Өз гулларына гүввә вер ки, Сәнин сөзүнү там ҹәсарәтлә сөјләсинләр» (Һәв. иш. 4:5, 19, 20, 29). Јеһова онларын хаһишләринә неҹә ҹаваб верди? (Һәвариләрин ишләри 4:31 ајәсини оху.) О, мүгәддәс руһундан истифадә едәрәк онлара ҹәсарәтли олмаға көмәк етди. Аллаһын руһу ејнилә бизә дә көмәк едә биләр. Белә исә, Аллаһын руһуну неҹә ала биләрик вә о, бизи хидмәтдә неҹә истигамәтләндирә биләр?

Неҹә ҹәсарәтли ола биләрик?

6, 7. Аллаһдан мүгәддәс руһ алмағын билаваситә јолу һансыдыр? Нүмунәләр чәкин.

⁶ Мүгәддәс руһу билаваситә Аллаһдан алмағын јолу бу руһу Ондан диләмәкдир. Иса динләјиҹиләринә демишди: «Мадам ки, сиз пис олдуғунуз һалда өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!» (Лука 11:13). Бәли, биз даим Аллаһдан мүгәддәс руһ диләмәлијик. Әҝәр хидмәтин мүәјјән саһәләри — күчәдә, гејри-формал вә ја ишҝүзар әразидә тәблиғ етмәк бизи горхудурса, Јеһовадан мүгәддәс руһ вә лазыми ҹәсарәт хаһиш едә биләрик (1 Салон. 5:17).

⁷ Розаa адлы бир баҹымыз мәһз белә дә етди. Бир ҝүн Роза мәктәбдә ишдә оланда иш јолдашларындан бири башга мәктәбдә ушагларла пис рәфтар барәдә мәлуматы охујурду. Бу, она о гәдәр тәсир етмишди ки, о: «Ҝөрәсән, бу дүнја һара ҝедир?!» — дејә уҹадан деди. Роза баҹы шаһидлик етмәк үчүн бу фүрсәти әлдән верә билмәзди. Бәс о, ҹәсарәти һарадан алды? Баҹы дејир: «Мән Јеһоваја дуа етдим вә мәнә көмәк етмәси үчүн Ондан мүгәддәс руһ истәдим». О, ҝөзәл шаһидлик верди вә онлар сөзләшдиләр ки, сөһбәтләринә давам етмәк үчүн бир дә ҝөрүшсүнләр. Нју-Јорк шәһәриндә јашајан беш јашлы Милананын нүмунәсини дә нәзәрдән кечирәк. Балаҹа баҹымыз дејир: «Мәктәбә ҝетмәздән өнҹә, һәмишә анамла Јеһоваја дуа едирик». Онлар Милананын ҹәсарәтли олмасы вә өз Аллаһы һаггында башгаларына данышмасы һагда дуа едирдиләр. «Бу, гызыма ад ҝүнләри вә бајрамлара даир мөвгејини изаһ етмәјә вә онларда иштирак етмәмәјә көмәк едир»,— дејә онун анасы гејд едир. Мәҝәр бу нүмунәләр ҹәсарәт топламаг лазым ҝәләндә дуанын фајдалы олдуғуну ҝөстәрмирми?

8. Јеремја пејғәмбәрин нүмунәсиндән ҹәсарәтли олмаг барәдә нә өјрәнә биләрик?

⁸ Ҝәлин Јеремјанын нәјин сајәсиндә ҹәсарәтли олдуғуна диггәт јетирәк. Јеһова ону милләтләрә пејғәмбәр тәјин едәндә о деди: «Ахы мәним данышыг габилијјәтим јохдур, чүнки һәлә ҹаванам» (Јер. 1:4—6). Лакин мүәјјән мүддәтдән сонра Јеремја елә исрарлы вә ҝүҹлү тәблиғ едирди ки, чохлары ону бәдхәбәр һесаб едирдиләр (Јер. 38:4). О, 65 илдән чох Јеһованын һөкм хәбәрләрини ҹәсарәтлә бәјан етди. Ҝөстәрдији һүнәр вә горхмазлыға ҝөрә Исраилдә ону о гәдәр јахшы таныјырдылар ки, тәхминән 600 илдән сонра Иса ҹәсарәтлә тәблиғ етмәјә башлајанда бәзиләри Јеремјанын дирилдијини зәнн едирди (Мат. 16:13, 14). Бәс башланғыҹда Аллаһын тапшырығындан бојун гачырмаг истәјән Јеремја утанҹаглығын өһдәсиндән неҹә ҝәлди? О дејир: «Онун сөзү сүмүкләримдә һәбс едилән, үрәјимдә јанан бир од олду. Ону ичимдә сахламагдан јорулдум» (Јер. 20:9). Бәли, Јеһованын сөзү Јеремјаја ҝүҹ верди вә ону данышмаға тәшвиг етди.

9. Аллаһын кәламы Јеремјаја тәсир етдији кими, бизә неҹә тәсир едә биләр?

⁹ Ибраниләрә үнванладығы мәктубунда һәвари Павел јазырды: «Аллаһын кәламы ҹанлы вә тәсирли, һәр ҹүр икиағызлы гылынҹдан итидир; о, ҹанла руһу, ојнагларла илији бир-бириндән ајыраҹаг гәдәр дәлиб кечир вә үрәјин дүшүнҹә вә нијјәтләрини ајырд едир» (Ибр. 4:12). Мүждә, јәни Аллаһын кәламы Јеремјаја тәсир етдији кими, бизә дә тәсир едә биләр. Јадда сахламаг лазымдыр ки, Мүгәддәс Китабы инсанлар гәләмә алсалар да, о, инсан мүдриклијинин јазылдығы китаблар топлусу дејил, чүнки Мүгәддәс Китаб Аллаһдан илһам алыб. 2 Петер 1:21 ајәсиндә охујуруг: «Пејғәмбәрлик һеч заман инсан ирадәсилә ҝәлмәмишдир. Лакин Аллаһын мүгәддәс инсанлары, Мүгәддәс Руһ тәрәфиндән һәрәкәтә ҝәтириләрәк данышырдылар». Мүгәддәс Китабы шәхсән диггәтлә арашдыранда дүшүнҹәләримизи мүгәддәс руһун тәсири алтында јазылмыш кәламларла долдурмуш олуруг. (1 Коринфлиләрә 2:10 ајәсини оху.) Һәмин кәламлар дахилимиздә «јанан бир од» кими олаҹаг вә биз онлары өзүмүздә сахлаја билмәјәҹәјик.

10, 11. а) Хидмәтдә ҹәсарәтлә данышмаг истәјириксә, шәхси өјрәнмәмиз неҹә олмалыдыр? б) Шәхси өјрәнмәни јахшылашдырмаг үчүн һансы аддымы атмаг нијјәтиндәсән?

¹⁰ Мүгәддәс Китабы шәхсән арашдырмағын бизә бөјүк фајдасы олсун дејә ону елә кечирмәк лазымдыр ки, Мүгәддәс Китаб хәбәри үрәкләримизин дәринликләринә чатсын вә дахили варлығымыза тәсир ҝөстәрсин. Мәсәлән, алдығы ҝөрүнтүдә Језекел пејғәмбәрә тумары јемәси тапшырылмышды, бу тумарда инадкар халга чатдырмалы олдуғу сәрт хәбәр јазылмышды. Језекел һәмин хәбәри там шәкилдә мәнимсәмәли вә өзүнүн бир һиссәси етмәли иди. Онда һәмин хәбәри бәјан етмәк бал јемәк гәдәр хош олаҹагды. (Језекел 2:8—3:4, 7—9 ајәләрини оху.)

¹¹ Демәк олар ки, биз дә ејни вәзијјәтдәјик. Бу ҝүн чохлары Мүгәддәс Китаб барәдә ешитмәк истәмирләр. Әҝәр биз Аллаһын кәламыны мәтанәтлә бәјан етмәк истәјириксә, Мүгәддәс Јазылары арашдыранда өјрәндикләримизи јахшы мәнимсәмәк олдугҹа ваҹибдир. Биз Мүгәддәс Китабы һәрдәнбир јох, мүнтәзәм шәкилдә арашдырмалыјыг. Мәзмурчунун: «Ја Рәбб, ағзымдан чыхан сөзләр, гәлбимдәки дүшүнҹәләр һүзурунда гәбул олунсун. Ја Рәбб, мәним Гајам вә Сатыналанымсан!» — дејә охудуғу сөзләр бизим дә арзумуз олмалыдыр (Мәз. 19:14). Мүгәддәс Китаб һәгигәтләринин үрәкләримизин дәринликләринә һәкк олунмасы үчүн неҹә дә ваҹибдир ки, охудугларымызын үзәриндә дәриндән дүшүнмәк үчүн вахт ајыраг! Ајдын мәсәләдир ки, биз шәхси өјрәнмәмизи јахшылашдырмаға ҹан атмалыјыгb.

12. Мүгәддәс руһун бизә истигамәт вермәсиндә мәсиһчи ҝөрүшләринин ролу нәјә ҝөрә данылмаздыр?

¹² Јеһованын мүгәддәс руһунун бизә көмәк етмәси үчүн биз һәмчинин ‘бир-биримизи мәһәббәтә вә хејирли ишләрә тәшвиг етмәли [вә] јығынҹагларымызы тәрк етмәмәлијик’ (Ибр. 10:24, 25). Мәсиһчи ҝөрүшләриндә мүнтәзәм иштирак етмәјә, диггәтлә гулаг асмаға вә өјрәндикләримизи тәтбиг етмәјә чалышмалыјыг ки, мүгәддәс руһ бизи истигамәтләндирсин. Мәҝәр Јеһованын руһу мәһз јығынҹаг васитәсилә рәһбәрлик вермир? (Вәһј 3:6 ајәсини оху.)

Ҹәсарәтли олмаг һансы фајданы ҝәтирир?

13. Еркән мәсиһчиләрин тәблиғ ишиндә әлдә етдикләри наилијјәтләрдән нә өјрәнә биләрик?

¹³ Мүгәддәс руһ каинатда ән гүдрәтли гүввәдир вә о, инсанлара Јеһованын ирадәсини јеринә јетирмәјә ҝүҹ верә биләр. Онун сајәсиндә еркән мәсиһчиләр бөјүк тәблиғ ишини һәјата кечирмәјә мүвәффәг олдулар. Онлар хош хәбәри ‘ҝөј алтында олан һәр мәхлуга тәблиғ етдиләр’ (Колос. 1:23). Онларын әксәријјәтинин «охумамыш» вә садә инсанлар олдуғуну нәзәрә алсаг, ајдындыр ки, онлары һәрәкәтә ҝәтирән даһа гүдрәтли бир гүввә варды (Һәв. иш. 4:13).

14. ‘Руһән һәрарәтли олмагда’ бизә нә көмәк едәр?

¹⁴ Мүгәддәс руһун рәһбәрлијинә ујғун јашајанда бу, бизи хидмәтдә ҹәсарәтли олмаға тәшвиг едир. Даима мүгәддәс руһ үчүн дуа етмәк, чалышганлыгла Мүгәддәс Китабы шәхсән арашдырмаг, дуа едәрәк охудугларымызын үзәриндә дүшүнмәк вә мүнтәзәм олараг мәсиһчи ҝөрүшләриндә иштирак етмәк — бүтүн бунларын ҝәтирдији фајда ‘Руһән һәрарәтли олмағымыза’ көмәк едәҹәк (Ром. 12:11). Мүгәддәс Китабда «әсли исҝәндәријәли олан» вә Ефесә ҝәлән Аполлос адында бәлағәт саһиби олан бир нәфәр јәһуди һагда дејилир: «[О,] руһҹа сәјли олуб, Рәбб барәсиндәки һәгигәти бәјан едиб, доғрулугла өјрәдирди» (Һәв. иш. 18:24, 25). ‘Руһумуз аловлу олса’, бөјүк ҹәсарәтлә евдән-евә вә гејри-формал шәкилдә тәблиғ едәҹәјик (Ром. 12:11, Мүгәддәс Китаб —2009).

15. Ҹәсарәтлә тәблиғ етмәјин бизә һансы фајдасы вар?

¹⁵ Ҹәсарәтлә шаһидлик етмәјин бизә мүсбәт тәсири вар. Әһвал-руһијјәмиз јахшылашыр, чүнки ишимизин ваҹиблијини вә онун ҝәтирдији фајдалары даһа ајдын баша дүшүрүк. Шөвгүмүз артыр, чүнки хидмәтимиз еффектив оланда бизә даһа чох севинҹ ҝәтирир. Даһа да сәјли олуруг, чүнки тәблиғ ишимизин нә гәдәр тәхирәсалынмаз олдуғуну дәрк едирик.

16. Әҝәр хидмәтдә сәјимиз зәифләјибсә, нә етмәлијик?

¹⁶ Бәс әҝәр хидмәтә гаршы сојумушугса вә ја әввәлки кими сәјлә хидмәт етмириксә, онда неҹә? Белә һалда өзүмүзү виҹданла јохламалыјыг. Павел јазмышдыр: «Өзүнүзү јохлајын, ҝөрүн иман јолундасынызмы? Өзүнүзү имтаһан един» (2 Кор. 13:5). Өзүндән соруш: «Әввәлки кими руһән һәрарәтлијәмми? Јеһоваја мүгәддәс руһ үчүн дуа едирәмми? Дуаларым Онун ирадәсини јеринә јетирәркән Она үмид етдијими ҝөстәрирми? Дуаларымда Јеһованын бизә һәвалә етдији хидмәтә ҝөрә миннәтдарлығымы билдирирәмми? Шәхси өјрәнмәм һагда нә демәк олар? Охудугларымын вә ја ешитдикләримин үзәриндә дүшүнмәјә нә гәдәр вахт ајырырам? Јығынҹаг ҝөрүшләриндә нә дәрәҹәдә фәалам?» Бу кими суалларын үзәриндә дәриндән дүшүнмәк сәнә зәиф ҹәһәтләрини мүәјјән етмәјә вә онлары дүзәлтмәјә көмәк едә биләр.

Гој Аллаһын руһу сәни ҹәсарәтләндирсин

17, 18. а) Тәблиғ иши һал-һазырда һансы мигјасда һәјата кечирилир? б) Аллаһын Падшаһлығы һаггында хош хәбәри «бөјүк ҹәсарәтлә» неҹә тәблиғ едә биләрик?

¹⁷ Дирилдикдән сонра Иса өз шаҝирдләринә демишди: «Мүгәддәс Руһ үзәринизә ендикдән сонра анҹаг гүдрәт алаҹагсыныз. Вә Јерусәлимдә, бүтүн Јәһудеја вә Самаријада, һәтта дүнјанын ән узаг јерләринә гәдәр Мәнә шаһид олаҹагсыныз» (Һәв. иш. 1:8). О вахтдан башлајан бу иш һал-һазырда ҝөрүнмәмиш мигјасда һәјата кечирилир. Једди милјондан чох Јеһованын Шаһиди Падшаһлыг һагда хош хәбәри 230-дан чох өлкә вә әразидә бәјан едир вә онлар буна һәр ил 1,5 милјарда јахын саат сәрф едирләр. Даһа һеч вахт тәкрарланмајаҹаг бир ишдә сәјлә иштирак етмәк неҹә дә һәјәҹанландырыҹыдыр!

¹⁸ Биринҹи әсрдә олдуғу кими, бу ҝүн дә үмумдүнја тәблиғ иши Аллаһын руһунун рәһбәрлији алтында һәјата кечирилир. Әҝәр онун рәһбәрлијинә риајәт етсәк, «бөјүк ҹәсарәтлә» хидмәт едәҹәјик (Һәв. иш. 28:31). Буна ҝөрә дә ҝәлин Аллаһын Падшаһлығы һаггында хош хәбәри бәјан едәрәк руһун рәһбәрлијинә табе олаг!

[Һашијәләр]

Нә өјрәндиниз?

• Нәјә ҝөрә Аллаһын кәламыны ҹәсарәтлә тәблиғ етмәлијик?

• Еркән шаҝирдләрә ҹәсарәтлә тәблиғ етмәјә нә көмәк едирди?

• Биз неҹә ҹәсарәтли ола биләрик?

• Ҹәсарәтли олмағын һансы фајдасы вар?

[7-ҹи сәһифәдәки шәкил]

Валидејнләр ушагларына ҹәсарәтли олмаға неҹә көмәк едә биләрләр?

[8-ҹи сәһифәдәки шәкилләр]

Гысаҹа дуа етмәк хидмәтдә сәнә ҹәсарәтли олмаға көмәк едә биләр