Шејтанын тәблиғатына гаршы дур
«АЛДАНМАЈЫН! Аллаһыныз сизә көмәк етмәјәҹәк. Тәслим олун, әкс тәгдирдә, ахырыныз пис олаҹаг!» — дејә Ашшур падшаһы Санхеривин елчиси бу сөзләрлә Јерусәлимин сакинләринә мүраҹиәт етди. Ашшур падшаһынын ордусу Јәһуда торпағына сохулмушду. Елчинин мәгсәди Јерусәлимин сакинләринин дөјүш руһуну гырмаг, горхутмаг вә тәслим олмаға мәҹбур етмәк иди (2 Пад. 18:28—35).
Ашшурлулар гәддарлыг вә амансызлыглары илә танынырдылар. Онлар әсирләри илә неҹә даврандыглары һагда түкүрпәрдиҹи шејләр јајмагла дүшмәнләрини ваһимәјә салырдылар. Тарихчи Филип Тејлорун сөзләринә әсасән, онлар «террор сијасәти илә јанашы, тәблиғат да апарырдылар; бунда мәгсәдләри истила етдикләри халглары өз идарәчиликләри алтында сахламаг вә башгаларына гаршы неҹә гәддар олдуглары һагда хәбәрләр јајмагла, еләҹә дә психоложи тәсир ҝөстәрмәклә потенсиал дүшмәнләрини горхуја салмаг иди». Тәблиғат чох ҝүҹлү силаһдыр. «О, инсанларын зеһнинә зәрәр вурур»,— дејә Филип Тејлор гејд едир.
Һәгиги мәсиһчиләр ‘ган вә әтлә дејил, пис руһи гүввәләрлә’, јәни Аллаһа гаршы үсјан галдыран руһани варлыгларла мүбаризә апарырлар (Ефес. 6:12). Бу варлыгларын башчысы Шејтан Иблисдир. О да һәдә-горху илә јанашы, тәблиғата әл атыр.
Шејтан иддиа едир ки, о, һәр биримизи нөгсансызлығымыздан дөндәрә биләр. Әјјубун ҝүнләриндә о, Јеһова Аллаһа демишди: «Инсан ҹанына ҝөрә һәр шејини верәр». Башга сөзлә, тәзјиг ҝөстәр, ҝеҹ-тез инсан Аллаһ гаршысында нөгсансызлығындан дөнәҹәк (Әјј. 2:4). Шејтан һаглыдырмы? Доғруданмы һамымызын нөгсансызлығынын мүәјјән һәдди вар вә һәмин һәдди ашанда сағ галмаг үчүн принсипләримиздән кечәҹәјик? Шејтан мәһз бу ҹүр дүшүнмәјимизи истәјир. О, бу фикри бизә тәлгин етмәк үчүн мәкрли тәблиғатдан истифадә едир. Ҝәлин онун бәзи үсулларыны нәзәрдән кечирәк вә она гаршы неҹә мүбаризә апара биләҹәјимизә бахаг.
‘Мајалары торпагдандыр’
Шејтан Әјјуба баш чәкмәјә ҝәлән үч нәфәрин арасында олан Елифаздан истифадә едәрәк инсанларын онун һүҹумлары гаршысында аҹиз олдуғуну сөјләди. Инсанлар һагда «палчыг евләрдә» јашајанлар кими данышараг о, Әјјуба деди: «Мајасы торпагдан оланлара, ҝүвәдән тез әзиләнләрә О ҝүвәнәрми? Өмүрләри сәһәрдән ахшама чатмыр, фәрги јохдур, һамы әбәди јох олур» (Әјј. 4:19, 20).
Мүгәддәс Јазыларын башга јериндә биз «сахсы» — ҝилдән һазырланмыш тезсынан ‘габлара’ бәнзәдилирик (2 Кор. 4:7). Биз мирас алдығымыз ҝүнаһ вә гејри-камиллик уҹбатындан зәифик (Ром. 5:12). Өз ҝүҹүмүзлә Шејтанын һүҹумлары гаршысында дурмаг мүмкүн дејил. Амма мәсиһчи олдуғумуз үчүн биз Јеһованын көмәјинә архалана биләрик. Зәифликләримизә бахмајараг, биз Онун ҝөзүндә гијмәтлијик (Јешаја 43:4). Үстәлик, Јеһова диләјәнләрә мүгәддәс руһ верир (Лука 11:13). Онун руһу бизә «ән үстүн гүдрәт»и верә биләр ки, Шејтанын башымыза ҝәтирдији бәлалара таб ҝәтирә биләк (2 Кор. 4:7; Филип. 4:13, И—93). Әҝәр «мөһкәм иманла» Иблисә гаршы дурсаг, Аллаһ бизи мөһкәмләндирәҹәк вә ҝүҹ верәҹәк (1 Пет. 5:8—10). Буна ҝөрә дә Шејтан Иблисдән горхмалы дејилик.
Инсан ‘һагсызлығы су кими ичир’
«Инсан, һәгигәтән, тәмиз ола биләрми? Гадындан доғулан инсан салеһ ола биләрми?» — дејә Елифаз сорушду. Вә сонра сөзүнә давам едәрәк деди: «Аллаһ мүгәддәсләринә белә, етибар етмирсә, ҝөјләр белә, Онун ҝөзүндә тәмиз дејилсә, һагсызлығы су кими ичән ијрәнҹ, корланмыш инсана О етибар едәрми?» (Әјј. 15:14—16). Елифазын Әјјуба дедији о иди ки, Јеһова һеч бир инсаны салеһ һесаб етмир. Иблис дә мәнфи дүшүнҹә тәрзиндән истифадә едир. О истәјир ки, биз кечмиш сәһвләримизә ҝөрә нараһатчылыг кечирәк, өзүмүзә һәддиндән артыг тәнгиди јанашаг вә ислаһедилмәз олдуғумузу дүшүнәк. О һәмчинин истәјир ки, биз Јеһованын бизә гаршы һәддән артыг тәләбкар олдуғуну дүшүнәк вә Онун мәрһәмәтини, бағышлајан олдуғуну вә көмәјини лазымынҹа гијмәтләндирмәјәк.
Әлбәттә, ‘һамымыз ҝүнаһ ишләтмиш вә Аллаһын иззәтиндән мәһрум галмышыг’. Һеч бир гејри-камил инсан Јеһованын мүкәммәл тәләбләринә мүвафиг ола билмәз (Ром. 3:23; 7:21—23). Амма бу о демәк дејил ки, Онун ҝөзүндә бизим һеч бир дәјәримиз јохдур. Јеһова билир ки, бизим ҝүнаһлы вәзијјәтимиздән суи-истифадә едән «Иблис вә шејтан адланан... гәдим илан»дыр (Вәһј 12:9, 10). Бизим ‘торпагдан дүзәлдијимизи’ билән Јеһова буну нәзәрә алыр вә биздә сәһв тутмаға чалышмыр (Мәз. 103:8, 9, 14).
Әҝәр пис јолумуздан әл чәкиб сәмими-гәлбдән төвбә едириксә, Јеһова ҝүнаһымыздан кечәҹәк (Јешаја 55:7; Мәз. 51:17). Ҝүнаһларымыз «гыпгырмызы парча кими ҝөрүнсә дә, онлар гар кими ағ олаҹаг»,— дејә Мүгәддәс Китабда гејд олунур (Јешаја 1:18). Буна ҝөрә дә Аллаһын ирадәсини јеринә јетирәркән ҝәлин һеч вахт тәслим олмајаг.
Ҝүнаһлы олдуғумуз үчүн биз һеч вахт Аллаһ гаршысында салеһ ад газана билмәрик. Адәмлә Һәвва камиллији вә әбәди јашамаг имканыны јалныз өзләри үчүн дејил, бүтүн нәсилләри үчүн дә итирдиләр (Ром. 6:23). Анҹаг бәшәријјәтә бөјүк мәһәббәтиндән ирәли ҝәләрәк, Јеһова ҝүнаһларымызын бағышланмасы үчүн мүәјјән тәдбирләр ҝөрдү вә бунун үчүн биз Онун Оғлу Иса Мәсиһин фидјә гурбанлығына иман ҝәтирмәлијик (Мат. 20:28; Јәһ. 3:16). Бу, Аллаһын «лүтфү»нүн неҹә дә ҝөзәл тәзаһүрүдүр! (Тит. 2:11). Бизим ҝүнаһларымызын бағышланмасы мүмкүндүр! Онда нәјә ҝөрә Шејтана јол вермәлијик ки, бунун белә олмадығыны дүшүнмәјимизә наил олсун
«Онун әтинә вә сүмүјүнә тохун»
Шејтан иддиа едирди ки, Әјјуб сағламлығыны итирсә, имандан дөнәҹәк. Иблис Јеһованы буна тәһрик етмәјә чалышараг деди: «Онун әтинә вә сүмүјүнә тохун, о, ҝөзүнүн габағында мүтләг Сәнә ләнәт едәҹәк» (Әјј. 2:5). Әҝәр Аллаһын Дүшмәни зәифликләримизә ҝөрә һеч бир ишә јарамадығымызы дүшүнмәјимизә наил олсајды, шүбһәсиз, чох севинәрди.
Амма әввәлләр хидмәт етдијимиз кими хидмәт едә билмириксә, буна ҝөрә Јеһова бизи рәдд етмир. Тәсәввүр едәк ки, јахын бир достумузун үстүнә һүҹум чәкиб јаралајыблар. Мәҝәр о, әввәлләр бизим үчүн етдикләрини инди едә билмәдијинә ҝөрә ҝөзүмүздән дүшәҹәк? Әлбәттә, јох! Биз бундан сонра да ону севәҹәк вә онун гајғысына галаҹағыг, хүсусилә о, бизи мүдафиә етмәјә чалышдығы үчүн јараланыбса. Мәҝәр Јеһовадан бундан аз шеј ҝөзләмәлијик? «Аллаһ һагсыз дејилдир ки,.. Онун ады наминә ҝөстәрдијиниз мәһәббәти унутсун»,— дејә Мүгәддәс Китабда гејд олунур (Ибр. 6:10).
Мүгәддәс Јазыларда ‘касыб бир дул гадындан’ бәһс олунур, ҝөрүнүр, о, чох илләр иди ки, сәдагәтлә Јеһоваја ибадәти дәстәкләјирди. Иса бу гадынын мәбәдин ианә гутусуна «ики лептон» атдығыны ҝөрәндә онун вә ианәсинин һеч бир дәјәри олмадығыны фикирләшдими? Јох, һәгиги ибадәти дәстәкләмәк үчүн шәраитинин јол вердијини етдији үчүн ону тәрифләди (Лука 21:1—4).
Әҝәр нөгсансызлығымызы горујуб сахласаг, әмин ола биләрик ки, гејри-камиллик уҹбатындан јаранан хәстәлијин вә ја гоҹалығын бизә нә гәдәр зәрәр јетирмәсинә бахмајараг, Јеһова илә мүнасибәтләримиз мөһкәм галаҹаг. Бәдбәхтликләр Онун хидмәтчиләринин ибадәтләрини мәһдудлашдырдығына ҝөрә Аллаһ Өз садиг хидмәтчиләрини һеч вахт атмајаҹаг (Мәз. 71:9, 17, 18).
«Хилас дәбилгәсини» ҝејинин
Өзүмүзү Шејтанын тәблиғатындан неҹә горуја биләрик? Һәвари Павелин јаздыгларына диггәт јетирәк: «Рәббдә вә Онун үстүн гүдрәтиндә гүввәтләнин. Иблисин һијләләринә гаршы дура билмәк үчүн Аллаһын бүтүн зиреһләрини ҝејинин». Руһани зиреһләрдән бири дә ‘хилас дәбилгәсидир’ (Ефес. 6:10, 11, 17). Шејтан бу дүнјада ҝүҹлү тәблиғат апардығы үчүн биз ону ҝејинмәли вә һеч вахт чыхармамалыјыг. Дәбилгә әсҝәрин башыны горујур. ‘Хилас дәбилгәмиз’ — Аллаһын ҝөзәл јени дүнја илә бағлы вәдләрини јеринә јетирәҹәјинә даир әминлијимиз зеһнимизи Шејтанын јаланларындан горујур (1 Салон. 5:8). Мүгәддәс Јазылары диггәтлә арашдырмагла үмидимизи мөһкәм вә ҹанлы сахламалыјыг.
Әјјуб Шејтанын гәзәбли вә аҹыглы һүҹумларына таб ҝәтирди. Әјјубун дирилмәјә олан иманы о гәдәр ҝүҹлү иди ки, һәтта өлүм горхусу белә ону иманындан дөндәрә билмәди. О, Јеһоваја деди: «Сән чағыранда ҹаваб верәҹәјәм, әлләринин бу ишинин һәсрәтини чәкәҹәксән» (Әјј. 14:15). Әјјуба нөгсансызлығыны горумаг наминә өлмәк лазым ҝәлсәјди белә, о шүбһә етмирди ки, Аллаһ садиг хидмәтчиләрини мәһәббәтдән ирәли ҝәләрәк дирилдәҹәк.
Гој бизим дә һәгиги Аллаһа етибарымыз бу гәдәр ҝүҹлү олсун. Јеһова Шејтанын вә онун әлалтыларынын вурдуғу һәр бир зәрәри арадан галдырмаға гадирдир. Ҝәлин Павелин јаздығы сөзләри һеч вахт унутмајаг: «Аллаһ садигдир; О, ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тәмин едәҹәкдир ки, таб ҝәтирә биләсиниз» (1 Кор. 10:13).
[20-ҹи сәһифәдәки шәкил]
Јеһова сәнин Она сәдагәтлә хидмәт етмәјини гијмәтләндирир
[21-ҹи сәһифәдәки шәкил]
Хилас дәбилгәсини ҝејин вә ону чыхартма