Иса Мәсиһ. Онун чатдырдығы хәбәрин ҝүҹү
«Кефернаһумлу мүдрик инсанын даһилијинә ән тутарлы сүбут онун һәлә дә инсанларын үрәјинә вә ағлына һаким кәсилмәсидир»a (ЈАЗЫЧЫ ГРЕГ ИСТЕРБРУК).
СӨЗЛӘР бөјүк гүввәјә маликдир. Һикмәтли, дүзҝүн сечилмиш сөзләр үрәкләри иситмәјә, инсана үмид вермәјә вә һәјатлары дәјишмәјә гадирдир. Дүнјада Иса Мәсиһ кими сөзләрдән мәһарәтлә истифадә едән икинҹи шәхс олмамышдыр. Исанын мәшһур нитгини динләјән бир нәфәр сонралар јазмышды: «Иса бу сөзләри битирдикдән сонра, халг Онун тәлиминә тәәҹҹүбләнди» (Матта 7:28).
Бизим ҝүнләрдә дә Исанын бир чох кәламлары дүнјанын истәнилән ҝушәсиндән олан инсанлара танышдыр. Ҝәлин онун дәрин мәналы кәламларындан бәзиләринә нәзәр јетирәк.
«Сиз һәм Аллаһа, һәм дә сәрвәтә гуллуг едә билмәзсиниз» (Матта 6:24, Мүгәддәс Китаб—09).
«Буна ҝөрә, инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» (Матта 7:12).
«Нә үчүн гардашынын ҝөзүндә түкү ҝөрүрсән, өз ҝөзүндә исә тири сечмирсән?» (Матта 7:3).
«Вермәк алмагдан даһа бөјүк бәхтијарлыг ҝәтирир» (Һәвариләрин ишләри 20:35).
Амма Иса јаддашлардан силинмәјән кәламлар сөјләмәклә кифајәтләнмәмишди. Онун тәблиғ етдији хәбәр бөјүк ҝүҹә малик иди. Чүнки бу хәбәр Аллаһ һаггында һәгигәти чатдырыр, инсанлара һәјатын мәнасыны тапмаға көмәк едир, о ҹүмләдән, инсанларын бүтүн дәрдләринин әлаҹыны ҝөстәрир, јәни Аллаһын Падшаһлығыны тәблиғ едирди. Нөвбәти сәһифәләрдә бу хәбәрин нәдән ибарәт олдуғуну арашдырдыгҹа Исанын нәјә ҝөрә һәлә дә милјонларла ‘инсанын үрәјинә вә ағлына һаким кәсилдијини’ ҝөрәҹәјик.
[Һашијә]