Гој руһани мәшғулијјәтләр сәнә тәравәт ҝәтирсин
«Бојундуруғуму үзәринизә ҝөтүрүн,.. ҹаныныза раһатлыг тапарсыныз» (МАТ. 11:29).
1. Јеһова Сина дағында һансы гануну верди вә нә үчүн?
СИНА ДАҒЫНДА тәнтәнәли сурәтдә кәсилән Ганун әһдинә һәфтәлик шәнбә барәдә ганун да дахил едилмишди. Јеһова тәмсилчиси Муса васитәсилә Исраил халгына әмр етди: «Алты ҝүн ишләринизи ҝөрүн, једдинҹи ҝүн исә истираһәт един ки, мал-гараныз вә ешшәјиниз раһатлансын, евиниздә доғулан гуллар вә гәрибләр дә динҹәлсин» (Чых. 23:12). Бәли, Ганун алтында оланлары дүшүнәрәк Јеһова халгынын динҹәлә билмәси үчүн истираһәт ҝүнү тәјин етди.
2. Исраиллиләр шәнбә ҝүнүндән неҹә фајдаланырдылар?
2 Јеһова шәнбәни јалныз истираһәт үчүн тәсис етмишди? Хејр, бу, исраиллиләрин Јеһоваја ибадәтинин ваҹиб бир һиссәсини тәшкил едирди. Шәнбә ҝүнү аилә башчыларына аиләләринә ‘салеһ ишләр ҝөрмәләри үчүн Рәббин јолу илә ҝетмәји’ өјрәтмәјә имкан верирди (Јар. 18:19). Һәмчинин бунун сајәсиндә аиләләрин вә достларын бир јерә топлашыб Јеһованын ишләри үзәриндә дүшүнмәк вә хош үнсијјәтдән зөвг алмаг имканы варды (Јешаја 58:13, 14). Ән ваҹиби исә, шәнбә ҝүнү Мәсиһин Миниллик Һөкмранлығынын ҝәтирәҹәји әсил тәравәтли ҝүнләрин рәмзи иди (Ром. 8:21). Бәс бизим дөврүмүз һагда нә демәк олар? Јеһованын јолларына биҝанә олмајан әсил мәсиһчиләр әсил тәравәти һарада вә неҹә тапа биләрләр?
Һәмиманлыларла үнсијјәтдән тәравәтлән
3. Биринҹи әсрдәки мәсиһчиләр бир-бирләринә неҹә дәстәк олурдулар вә бунун онлара һансы фајдасы олду?
3 Һәвари Павел мәсиһчи јығынҹағыны «һәгигәтин дирәји вә әсасы» адландырмышды (1 Тим. 3:15). Еркән мәсиһчиләр һәмиманлыларыны руһландырмагла вә мәһәббәтдә мөһкәмләндирмәклә бир-бирләринә дәстәк олурдулар (Ефес. 4:11, 12, 16). Павел Ефесдә икән Коринф јығынҹағынын үзвләри она баш чәкиб руһландырмышдылар. Ҝөрүн, бу, Павелә неҹә тәсир етди: ‘Мән Стефанас, Фортунат вә Ахаикин ҝәлмәсинә севинирәм. Онлар мәним руһума фәрәһ ҝәтирдиләр’ (1 Кор. 16:17, 18). Титус гардашлара хидмәт етмәк үчүн Коринфә ҝедәндә Павел орадакы јығынҹаға ҝөндәрдији мәктубда јазды: «Онун руһу һамыныз сајәсиндә фәрәһләнмишдир» (2 Кор. 7:13). Елә бу ҝүн дә һәмиманлылары илә үнсијјәт Јеһованын Шаһидләринә фәрәһ, әсил тәравәт ҝәтирир.
4. Јығынҹаг ҝөрүшләри бизи неҹә тәравәтләндирир?
4 Јәгин, сән дә јығынҹаг ҝөрүшләринин бөјүк севинҹ мәнбәји олдуғуна әмин олмусан. Бурада биз «мүштәрәк иман васитәсилә» бир-биримизи руһландырырыг (Ром. 1:12). Мәсиһчи баҹы-гардашларымыз вахташыры растлашдығымыз ади танышлардан дејил. Онлар бизим әсил достларымыз, бизим севдијимиз вә һөрмәт етдијимиз инсанлардыр. Онларла бәрабәр мүнтәзәм олараг ҝөрүшләрдә иштирак етмәк бизә севинҹ вә тәсәлли верир (Филим. 7).
5. Конгресләрдә бир-биримизи неҹә тәравәтләндирә биләрик?
5 Һәр ил кечирилән конгресләр дә бизә тәравәт ҝәтирир. Һәјатвериҹи сулардан, јәни Аллаһын Кәламы олан Мүгәддәс Китабдан әлдә етдијимиз һәгиги биликдән әлавә, бу бөјүк ҝөрүшләр һәр биримизә ‘үрәјимизи’ диҝәр баҹы-гардашлар үчүн ‘ачмаға’ имкан верир (2 Кор. 6:12, 13). Әҝәр биз утанҹаг олдуғумуздан инсанларла үнсијјәт етмәкдән чәкинириксә, онда неҹә? Баҹы-гардашларла таныш олмағын үсулларындан бири конгресләрдә көмәк етмәкдир. Бејнәлхалг конгресдә јардым ҝөстәрән бир баҹы гејд едир: «Аилә үзвләримдән вә бир-ики достларымдан савајы, мән орада һеч кими танымырдым. Лакин тәмизлик ишиндә иштирак едәркән чохлу баҹы-гардашларла таныш олдум. Вахтымыз чох шән кечди!»
6. Истираһәт заманы бизә нә тәравәт ҝәтирә биләр?
6 Илдә үч дәфә кечирилән бајрамларда иштирак етмәк үчүн исраиллиләр Јерусәлимә сәфәр едирдиләр (Чых. 34:23). Онлар, адәтән, зәмиләрини вә дүканларыны бурахыб бир нечә ҝүн тозлу-торпаглы јолларла пијада ҝетмәли олурдулар. Бунунла белә, мәбәдә зијарәт етмәк ‘бөјүк севинҹә’ сәбәб олурду, чүнки бајрамда иштирак едәнләр «Рәббә һәмд едирдиләр» (2 Салн. 30:21). Бизим ҝүнләрдә Јеһованын бир чох хидмәтчиләринә аиләликҹә Бет-Елә — Јеһованын Шаһидләринин јахынлыгда јерләшән филиалына баш чәкмәк севинҹ ҝәтирир. Ҝәлән дәфә аиләликҹә истираһәт едәркән филиала баш чәкмәји планларыныза дахил едә биләрсинизми?
7. а) Достлуг ҝөрүшләри бизә һансы фајданы ҝәтирир? б) Достлуг ҝөрүшләрини јаддагалан вә тәравәтләндириҹи едән нәдир?
7 Аилә үзвләримизлә вә достларымызла бирҝә вахт кечирмәк дә бизи руһландыра биләр. Мүдрик Сүлејман падшаһын белә бир кәлмәси вар: «Инсан үчүн јејиб-ичмәкдән вә ҝөрдүјү ишдән зөвг алмагдан јахшы шеј јохдур» (Ваиз 2:24). Достлуг ҝөрүшләри нәинки ҹанымыза тәравәт ҝәтирир, һәм дә һәмиманлыларымызла јахындан таныш олдугҹа арамыздакы мәһәббәт телләрини мөһкәмләндирир. Достлуг ҝөрүшүнүн хош хатирәләрлә јадда галмасы вә руһландырыҹы кечмәси үчүн јахшы оларды ки, гонагларын сајы чох олмасын вә мәҹлисә лазыми гајдада нәзарәт едилсин; спиртли ичкиләр олаҹагса, буну етмәк хүсусилә ваҹибдир.
Тәблиғ хидмәти тәравәт ҝәтирир
8, 9. а) Исанын тәблиғ етдији хәбәр фәрисеј вә дин алимләринин гајдаларындан нә илә фәргләнирди? б) Мүгәддәс Китаб һәгигәтләрини инсанларла бөлүшмәк бизә һансы фајданы ҝәтирир?
8 Иса хидмәтә ҹан јандырырды вә шаҝирдләрини дә хидмәтә бу ҹүр јанашмаға тәшвиг едирди. Буну онун нөвбәти сөзләриндән ҝөрмәк олар: «Мәһсул чох, ишчиләр исә аздыр. Беләликлә, мәһсулун Саһиби олан Рәббә јалварын ки, Өз мәһсулуну јығмаға ишчиләр ҝөндәрсин» (Мат. 9:37, 38). Исанын бәјан етдији хәбәр һәгигәтән дә тәравәтләндириҹи иди; бу, әсил «Мүждә» иди (Мат. 4:23; 24:14). Онун тәблиғ етдији бу хәбәр фәрисејләрин халгын үзәринә гојдуғу ағыр гајдалардан кәскин сурәтдә фәргләнирди. (Матта 23:4, 23, 24 ајәләрини оху.)
9 Падшаһлыг хәбәрини инсанларла бөлүшәндә онлара руһани тәравәт ҝәтиририк, ејни заманда исә, гијмәтли Мүгәддәс Китаб һәгигәтләрини үрәјимизә вә зеһнимизә һәкк едирик. Буна ујғун олараг, мәзмурчу демишди: «Рәббә һәмд един! Аллаһымызы тәрәннүм етмәк нә гәдәр јахшыдыр!.. Она һәмдләр сөјләмәк хошдур!» (Мәз. 147:1). Инсанлар гаршысында Јеһованы иззәтләндирмәкдән дујдуғун севинҹи артырмаг үчүн нә едә биләрсән?
10. Хидмәтдә уғурлу олмағымыз инсанларын хош хәбәрә һај вермәләриндәнми асылыдыр? Изаһ един.
10 Дүздүр, бәзи әразиләрдә инсанлар диҝәр јерләрә нисбәтән хош хәбәрә даһа чох мараг ҝөстәрирләр. (Һәвариләрин ишләри 18:1, 5—8 ајәләрини оху.) Әҝәр сән чохларынын Падшаһлыг хәбәринә лагејд јанашдығы әразидә јашајырсанса, диггәтини хидмәтдә әлдә етдијин јахшы шејләрә ҹәмләмәјә чалыш. Јадда сахла ки, Јеһованын адыны иззәтләндирмәк үчүн давамлы олараг сәј ҝөстәрмәјин әбәс дејил (1 Кор. 15:58). Бундан әлавә, инсанларын хош хәбәрә мүнасибәти хидмәтдә уғурлу олуб-олмамағымызын мејары дејил. Биз архајын ола биләрик ки, Јеһова Падшаһлыг һаггында хәбәри гәбул етмәк истәјәнләрә ону ешитмәк имканыны верәҹәк (Јәһ. 6:44).
Аиләви ибадәт тәравәт ҝәтирир
11. Јеһова валидејнләрин үзәринә һансы мәсулијјәти гојуб вә онлар бунун өһдәсиндән неҹә ҝәлә биләрләр?
11 Аллаһдан горхан валидејнләр ушагларына Јеһова вә Онун ганунлары барәдә өјрәтмәк мәсулијјәти дашыјырлар (Ганун. т. 11:18, 19). Әҝәр сизин ушагларыныз варса, онлара мәһәббәтли сәмави Атамыз һаггында өјрәтмәк үчүн вахт ајырырсынызмы? Бу ваҹиб вәзифәнин өһдәсиндән ҝәлмәкдә вә аиләнизин еһтијаҹларыны өдәмәкдә сизә көмәк етмәк үчүн Јеһова бол-бол сағлам руһани гида — китаб, журнал, аудиојазылар вә видеофилмләр тәгдим едир.
12, 13. а) Аиләләр аиләви ибадәт ахшамларындан неҹә фајдалана биләрләр? б) Валидејнләр аиләви ибадәтләринин тәравәтләндириҹи олмасы үчүн нә едә биләрләр?
12 Бундан әлавә, садиг вә ағыллы гул аиләви ибадәт ахшамларынын кечирилмәси үчүн мүвафиг дәјишикликләр едиб. Аиләви ибадәт ахшамы һәр һәфтә Мүгәддәс Китабы аиләликҹә өјрәнмәк үчүн ајрылан бир вахтдыр. Чохлары ҝөрмүшләр ки, аиләви ибадәт аилә үзвләри арасындакы мәһәббәти вә Јеһова илә мүнасибәтләри мөһкәмләндирир. Бәс аиләви ибадәт әсил тәравәт ҝәтирсин дејә валидејнләр нә едә биләрләр?
13 Аиләви ибадәт гуру вә ҹансыхыҹы кечмәмәлидир. Ахы биз ‘хошбәхт Аллаһа’ (ЈД) ибадәт едирик, О исә истәјир ки, ибадәт бизә севинҹ ҝәтирсин (1 Тим. 1:11; Филип. 4:4). Мүгәддәс Китабын дәјәрли руһани һәгигәтләрини мүзакирә етмәк үчүн ихтијарымызда әлавә ахшамын олмасы әсил хејир-дуадыр. Валидејнләр мәһарәт вә фантазијаларыны ишә салараг тәлим үсулларыны ушагларынын мараг вә тәләбатларына ујғунлашдырмаға чалышмалыдырлар. Мәсәлән, онјашлы Брендонун валидејнләри она «Нәјә ҝөрә Јеһова Шејтанын рәмзи кими иландан истифадә едир?» мөвзусуна аид балаҹа бир чыхыш һазырламағы тапшырдылар. Бу суал Брендону нараһат едирди, чүнки о, иланлары чох севир; Мүгәддәс Китабда иланын Шејтанын рәмзи олмасы ону кәдәрләндирирди. Бәзи аиләләр вахташыры олараг Мүгәддәс Китаб һадисәләрини роллара бөлүб ону ја охујур, ја да ки сәһнәләшдирирләр. Бу кими тәлим методлары шән олмагла јанашы, ушагларынызы аиләви ибадәтдә фәал иштирак етмәјә тәшвиг едир, бунун сајәсиндә дә Мүгәддәс Китаб принсипләри онларын үрәјинә јол тапа биләрa.
Һеч нәјин сизи ағырлашдырмасына јол вермәјин
14, 15. а) Ахыр ҝүнләрдә ҝәрҝинлик вә тәһлүкә неҹә баш алыб ҝедир? б) Биз даһа һансы тәзјигләрлә үзләшә биләрик?
14 Јашадығымыз системин ахыр ҝүнләриндә ҝәрҝинлик вә тәһлүкә артмагдадыр. Ишсизлик вә башга игтисади чәтинликләр милјонларла инсана тәсир ҝөстәрир. Һәтта ишләри оланлар белә газандыглары пулларын аиләләринә чох аз фајда ҝәтирдијини һисс едирләр, санки, ‘мәваҹибләрини ҹырыг кисәјә гојурлар’. (Һаггај 1:4—6 ајәләри илә мүгајисә ет.) Сијасәтчиләр вә диҝәр рәһбәрләр терроризмин вә бир чох писликләрин гаршысында аҹиз ҝөрүнүрләр. Бир чох инсанлар исә өз сәһвләри уҹбатындан руһ дүшкүнлүјүнә гапылырлар (Мәз. 38:4).
15 Шејтанын системини чәнҝинә кечирән проблем вә чәтинликләр һәгиги мәсиһчиләрдән дә јан кечмир (1 Јәһ. 5:19). Бәзән мәсиһчиләр Јеһованын гаршысында садигликләрини горумаға чалышдыглары үчүн әлавә тәзјигләрлә үзләшә биләрләр. Иса демишди: «Әҝәр Мәни тәгиб етдиләрсә, сизи дә тәгиб едәҹәкләр» (Јәһ. 15:20). Анҹаг биз ‘тәгиб едиләндә’ белә ‘тәрк едилмирик’ (2 Кор. 4:9). Нәјә ҝөрә белә демәк олар?
16. Севинҹимизи горумагда бизә нә көмәк едә биләр?
16 Иса демишди: «Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм» (Мат. 11:28). Мәсиһин фидјә гурбанлығына там иман ҝәтирмәклә өзүмүзү Јеһованын ихтијарына веририк. Бунунла да «ән үстүн гүдрәт»и алмыш олуруг (2 Кор. 4:7). «Көмәкчи» (ЈД), јәни Аллаһын мүгәддәс руһу иманымызы әһәмијјәтли дәрәҹәдә мөһкәмләндирир ки, нәинки сынаг вә чәтинликләрә таб ҝәтирә биләк, һәтта севинҹимизи горујуб сахлајаг (Јәһ. 14:26; Јаг. 1:2—4).
17, 18. а) Өзүмүзү нәдән ҝөзләмәлијик? б) Бу дүнјада кеф далынҹа дүшмәк нә илә нәтиҹәләнә биләр?
17 Һәгиги мәсиһчиләр еһтијатлы олмалыдырлар ки, бу дүнјаја хас олан әјләнҹә дүшкүнлүјүнә гапылмасынлар. (Ефеслиләрә 2:2—5 ајәләрини оху.) Әкс тәгдирдә, биз ‘ҹисмани еһтирасын, ҝөзләрин еһтирасынын вә һәјатын тәкәббүрүнүн’ тәләсинә дүшә биләрик (1 Јәһ. 2:16). Јахуд да јанлыш олараг елә гәнаәтә ҝәлә биләрик ки, ҹисмани арзуларымызы тәмин етмәк бизә әсил тәравәт ҝәтирә биләр (Ром. 8:6). Мәсәлән, бәзи инсанлар наркотик маддәләрдән вә спиртли ичкиләрдән суи-истифадә етмәклә, порнографијаја алудә олмагла, һәмчинин тәһлүкәли идман нөвләри вә бир чох ганунсуз ишләрлә мәшғул олмагла кәскин һәјәҹан һиссләри јашамаға, адреналин алмаға ҹан атырлар. Шејтанын чохсајлы ‘һијләләри’ инсанларда сахта тәравәт һисси јаратмаға јөнәлдилиб (Ефес. 6:11).
18 Әлбәттә, јејиб-ичмәк вә сағлам әјләнҹә нөвләри илә мәшғул олмаг гәбаһәт дејил, лакин бу заман таразлығы горумаг ваҹибдир. Бунунла белә, биз јол вермирик ки, бу кими мәшғулијјәтләр һәјатымызда биринҹи јери тутсун. Таразлығы горумаг вә нәфсимизә һаким олмаг һәмишә — хүсусилә дә јашадығымыз дөврдә чох ваҹибдир. Шәхси мәгсәдләримизә ҹан атмаг бизи о дәрәҹәдә ағырлашдыра биләр ки, бу, «Иса Мәсиһи танымагда фәалијјәтсиз вә сәмәрәсиз» олмағымыза ҝәтириб чыхара биләр (2 Пет. 1:8).
19, 20. Һәгиги тәравәти неҹә тапмаг олар?
19 Дүшүнҹә тәрзимизи Јеһованын тәләбләринә ујғунлашдыранда баша дүшүрүк ки, бу дүнјанын тәклиф етдији истәнилән әјләнҹә мүвәггәтидир. Муса кими, буну биз дә дәрк едирик (Ибр. 11:25). Һәгигәтән дә, әсил тәравәти — дәрин вә түкәнмәз олан севинҹ вә мәмнунлуғу јалныз сәмави Атамызын ирадәсини јеринә јетирмәкдән әлдә етмәк мүмкүндүр (Мат. 5:6).
20 Гој руһани шејләр һәр заман бизә тәравәт ҝәтирсин. Бунунла «биз Аллаһа гаршы һөрмәтсизлији вә дүнјәви еһтираслары рәдд едиб,.. Бөјүк Аллаһ вә Хиласкарымыз Мәсиһ Исанын мүбарәк үмидини вә иззәтли зүһуруну ҝөзләјә[ҹәји]к» (Тит. 2:12, 13). Буна ҝөрә дә ҝәлин Исанын һакимијјәтинә вә рәһбәрлијинә табе олараг онун бојундуруғуну үзәримиздә сахламаг гәтијјәтиндә олаг. Белә етмәклә биз әсил хошбәхтлик вә тәравәт тапаҹағыг!
[Һашијә]
a Аиләви ибадәти мараглы вә мәзмунлу етмәјин әлавә үсуллары барәдә мәлуматы «Ҝөзәтчи Гүлләси»нин 2009-ҹу ил 15 октјабр сајынын 29—31 вә 2010-ҹу ил 15 јанвар сајынын 16—20-ҹи сәһифәләриндә тапа биләрсиниз.
Неҹә ҹаваб верәрдиниз?
• Бу ҝүн Јеһованын хидмәтчиләри тәравәти неҹә тапырлар?
• Тәблиғ хидмәти бизи вә бизи динләјәнләри неҹә тәравәтләндирир?
• Аилә башчылары нә едә биләрләр ки, онларын аиләви ибадәтләри тәравәтләндириҹи олсун?
• Бизи руһән ағырлашдыран нәдир?
[26-ҹы сәһифәдәки шәкилләр]
Исанын бојундуруғуну үзәримизә ҝөтүрмәклә биз әсил тәравәт мәнбәјини тапырыг