Бөјүк руһани бичиндә вар ҝүҹүнлә иштирак ет
«Рәббин ишиндә... чох чалышын» (1 КОР. 15:58, ЈД).
1. Иса шаҝирдләрини нәјә сәсләјирди?
ЕРАМЫЗЫН 30-ҹу илинин сонунда Иса Самаријадан кечәркән Сухар шәһәринин јахынлығында бир су гујусунун јанында ајаг сахлајыб истираһәт едирди. Бурада о, шаҝирдләринә деди: «Ҝөзләринизи галдырын, бичилмәк үчүн ағармыш тарлалара бахын» (Јәһ. 4:35). Иса һәрфи бичини нәзәрдә тутмурду — о, руһани бичиндән, ҝәләҹәкдә онун давамчылары олаҹаг сәмими инсанларын јығымындан данышырды. Бу сөзләри демәклә, Иса, маһијјәт етибарилә, шаҝирдләрини бу бичин ишиндә иштирак етмәјә сәсләјирди. Иш чох, вахт исә аз иди.
2, 3. а) Бичин вахтында јашадығымыз нәдән ҝөрүнүр? б) Бу мәгаләдә сөһбәт нәдән ҝедәҹәк?
2 Исанын бичин барәдә дедији сөзләр бизим ҝүнләр үчүн хүсуси әһәмијјәт кәсб едир. Биз дүнја тарласынын — бәшәријјәтин — ‘бичилмәк үчүн ағардығы’ бир дөврдә јашајырыг. Һәр ил милјонларла инсанлар һәјатвериҹи һәгигәтләри өјрәнмәјә дәвәт олунур вә минләрлә јени шаҝирдләр вәфтиз едилирләр. Биз мәһсулун Саһиби олан Јеһова Аллаһын нәзарәти алтында апарылан бәшәр тарихинин ән бөјүк бичин ишиндә иштирак етмәји өзүмүзә шәрәф билирик. Бәс сән бу ишдә ‘чох чалышырсанмы’? (1 Кор. 15:58, ЈД).
3 Иса јер үзүндә хидмәт етдији үч ил јарым әрзиндә шаҝирдләрини бичин ишинә һазырлады. Бу мәгаләдә Исанын шаҝирдләринә өјрәтдији бир чох ваҹиб дәрсләрдән үчү нәзәрдән кечирилир. Онларын һәр бири јашадығымыз дөврдә һәјата кечирилән вә сәјлә иштирак етдијимиз шаҝирд јығымында бизим үчүн чох дәјәрли олан мүәјјән хүсусијјәти вурғулајыр. Ҝәлин онлары бир-бир арашдыраг.
Тәвазөкарлығын ваҹиблији
4. Иса тәвазөкарлығын ваҹиблијини һансы нүмунә әсасында ҝөстәрди?
4 Белә бир сәһнәни тәсәввүр ет: елә индиҹә шаҝирдләрин арасында кимин ән бөјүк олдуғу һагда мүбаһисә олуб. Онларын үзүндән һәлә дә етибарсызлыг вә әдавәт јағыр. Иса балаҹа бир ушағы чағырыб, онларын арасына гојур вә ону ҝөстәриб дејир: «Бу ушаг гәдәр өз-өзүнү алчалдан, Сәмави Сәлтәнәтин ән бөјүјүдүр». (Матта 18:1—4 ајәләрини оху.) Инсана һакимијјәтинә, вар-дөвләтинә вә ҹәмијјәтдәки мөвгејинә ҝөрә гијмәт гојан бу дүнја кими дүшүнмәк әвәзинә, шаҝирдләр баша дүшмәли идиләр ки, онларын бөјүклүјү өзләрини башгаларынын ҝөзүндә ‘алчалтмагдан’, јәни кичилтмәкдән асылыдыр. Јеһова онлары јалныз әсил тәвазөкарлыг тәзаһүр етдирдикләри тәгдирдә хејир-дуаландыраҹаг вә истифадә едәҹәкди.
5, 6. Бичин ишиндә там шәкилдә иштирак етмәк үчүн нәјә ҝөрә тәвазөкар олмаг ҝәрәкдир? Нүмунә чәкин.
5 Та гәдимдән бу ҝүнә гәдәр чохлары һәјатыны һакимијјәтә, вар-дөвләтә вә ҹәмијјәтдә јүксәк мөвгејә јијәләнмәјә һәср едир. Нәтиҹәдә, онларын руһани ишләрә ја аз, ја да ки һеч вахтлары галмыр (Мат. 13:22). Бунун әксинә олараг, Јеһованын халгы мәһсулун Саһибинин рәғбәтини вә хејир-дуаларыны газанмаг үчүн башгаларынын ҝөзүндә өзүнү кичилтмәкдән севинҹ дујур (Мат. 6:24; 2 Кор. 11:7; Филип. 3:8).
6 Ҹәнуби Америкада ағсаггал кими хидмәт едән Франсискунун нүмунәсинә бахаг. Ҝәнҹ икән о, университети атыб пионер хидмәтинә башлады. О дејир: «Бир гәдәр сонра мән нишанландым. Тојдан сонра һәјат јолдашымы вә өзүмү доландырмаг үчүн даһа сабит вә сәрфәли иш тапмаг имканым варды. Лакин биз садә һәјат тәрзи сүрмәјә вә бирликдә таммүддәтли хидмәти давам етдирмәјә үстүнлүк вердик. Сонра ушагларымыз дүнјаја ҝәлди вә чәтинликләримиз артды. Лакин Јеһова садә һәјат тәрзи сүрмәк гәрарымыздан дөнмәмәјә көмәк етди». Франсиску ахырда дејир: «Бир чох хүсуси тәјинатлардан әлавә, 30 илдән чохдур ки, мән ағсаггал кими хидмәт едирәм. Һеч бир дәфә дә олсун садә һәјат тәрзи сүрдүјүмүзә ҝөрә пешман олмамышыг».
7. Ромалылара 12:16 ајәсиндәки мәсләһәти неҹә тәтбиг етмисән?
7 Ромалылара 12:16 (ЈД) ајәсиндә дејилир: «Башгалары һаггында өзүнүз барәдә дүшүндүјүнүз кими дүшүнүн, ловға хүлјалара дүшмәјин, тәвазөкарлығы әлдә рәһбәр тутун. Өз ҝөзүнүздә ағыллы олмајын». Әҝәр бу дүнјанын ‘ловға хүлјаларына’ јох дејиб, ‘тәвазөкарлығы әлдә рәһбәр тутсан’, онда сән дә бичин ишиндә бир чох хејир-дуа вә тапшырыглар алаҹағына үмид едә биләрсән (Мат. 4:19, 20; Лука 18:28—30).
Чалышганлыг хејир-дуа ҝәтирир
8, 9. а) Исанын талант һаггында мәсәлини гысаҹа нәгл един. б) Бу мәсәл хүсусилә кимләри руһландыра биләр?
8 Бичин ишиндә бүсбүтүн иштирак етмәк үчүн бизә һәмчинин чалышган олмаг ҝәрәкдир. Иса буну талантлар һаггында мәсәлдә әјани олараг ҝөстәрдиa. Бу мәсәлдә башга өлкәјә јола дүшмәздән әввәл маликанәсини үч гулуна тапшыран бир адамдан бәһс едилир. Биринҹи гул беш, икинҹиси ики, үчүнҹүсү исә бир талант алды. Ағалары јола дүшән кими биринҹи вә икинҹи гул дәрһал талантларыны дөвријјәјә бурахдылар. Үчүнҹү гул исә «тәнбәл» иди, о, талантыны ҝөтүрүб торпаға басдырды. Аға сәфәрдән гајыданда ики гула «бөјүк ишләр» һәвалә етмәклә онлары мүкафатландырды. Үчүнҹү гула вердији таланты исә ҝери алыб, ону өз евиндән говду (Мат. 25:14—30).
9 Шүбһә јохдур ки, сән, Исанын мәсәлиндәки ики гул кими, чалышган олмаг вә әлиндән ҝәлдији гәдәр шаҝирд һазырламаг ишиндә там иштирак етмәк әзминдәсән. Һазыркы шәраитин хидмәтдә истәдијин гәдәр иштирак етмәјә јол вермирсә, онда неҹә? Ола билсин, игтисади вәзијјәт чәтин олдуғундан вә аиләни доландырмаг лазым ҝәлдијиндән чох ишләмәли олурсан. Јахуд да, ола билсин, әввәлки кими сағлам вә ҝүмраһ дејилсән. Әҝәр бу, беләдирсә, онда талант һаггындакы мәсәл сәни руһландыра биләр.
10. Талант һаггында мәсәлдәки ағанын әдаләтли олмасы нәдән ҝөрүнүр вә бу, шәхсән сәни нәјә ҝөрә руһландырыр?
10 Диггәт јетир ки, мәсәлдәки аға гулларынын имканынын мүхтәлиф олдуғундан аҝаһ иди. Буна ҝөрә дә онлара талант верәндә ‘һәр биринин габилијјәтини’ нәзәрә алды (Мат. 25:15). Ҝөзләнилдији кими, биринҹи гулун әлдә етди ҝәлир икинҹинин ҝәлириндән хејли чох иди. Буна бахмајараг, аға һәр ики гулу «јахшы вә садиг» адландырмагла вә лајиг олдуглары мүкафаты вермәклә онларын сәјини гијмәтләндирдијини ҝөстәрди (Мат. 25:21, 23). Ејнилә, мәһсулун Саһиби Јеһова Аллаһ Она нә гәдәр хидмәт етмәјинин шәраитиндән асылы олдуғуну билир. Јеһова Она хидмәтдә ҝөстәрдијин сәји гијмәтләндирир вә лајиг олдуғун мүкафаты сәндән әсирҝәмәјәҹәк. (Марк 14:3—9; Лука 21:1—4 ајәләрини оху.)
11. Чәтин шәраитдә белә чалышган олмағын бол хејир-дуалар ҝәтирдијини нүмунә әсасында ҝөстәрин.
11 Бразилијада јашајан баҹымыз Селмиранын нүмунәси ҝөстәрир ки, Аллаһа хидмәтдә чалышганлыг әлверишли шәраитин олуб-олмамасындан асылы дејил. Селмиранын әри ијирми ил әввәл гарәт заманы гәтлә јетирилмишди. Баҹымыз үч балаҹа ушағыны тәк бөјүтмәли олуб. О, гуллугчу ишләјирди. Иши чох вахт апарырды; үстәлик, ишә ағзынаҹан долу шәһәр нәглијјаты илә ҝедиб-ҝәлмәли олурду. Бу чәтинликләрә бахмајараг, о, ишләрини елә дүзүб-гошмушду ки, даими пионер кими хидмәт едә билсин. Бир гәдәр сонра ики гызы да пионер хидмәтиндә она гошулду. Селмира дејир: «Бу илләр әрзиндә мән 20-дән чох инсанла Мүгәддәс Китабы өјрәнмишәм, инди исә биз онларла бир аилә кимијик. Та бу ҝүнә гәдәр онларын достлуг вә мәһәббәти гәлбими исиндирир. Бунлары пулла алмаг мүмкүн дејил». Бәли, мәһсулун Саһиби Селмиранын чалышганлығыны мүкафатландырды.
12. Тәблиғ ишиндә ҹанла-башла иштирак етдијимизи неҹә ҝөстәрә биләрик?
12 Ола билсин, һал-һазырда шәраитин даһа чох хидмәт етмәјә имкан вермир, бунунла белә, хидмәтини даһа сәмәрәли етмәклә бичин ишиндә даһа фәал ола биләрсән. Һәфтәлик Хидмәти ҝөрүшдә верилән мәсләһәтләрә ҹанла-башла риајәт едәндә сән бир тәблиғчи кими пүхтәләшир вә шаһидлик вермәјин јени үсулларыны тапырсан (2 Тим. 2:15). Үстәлик, әҝәр мүмкүнсә, бир о гәдәр дә ваҹиб олмајан ишләрини тәхирә сал вә ја үмумијјәтлә онлардан имтина ет ки, јығынҹағынын тәблиғ үчүн ҝөрүшләриндә мүнтәзәм шәкилдә иштирак едә биләсән (Колос. 4:5).
13. Чалышган олмагда вә бу хүсусијјәти горујуб сахламагда бизә көмәк едәҹәк ән ваҹиб амил һансыдыр?
13 Унутмамалыјыг ки, инсаны һансыса иши ҹанла-башла ҝөрмәјә тәшвиг едән миннәтдарлыгла долу үрәјидир (Мәз. 40:8). Исанын чәкдији мәсәлдәки үчүнҹү гул ағасындан горхур, ону һәддән артыг тәләбкар вә әдаләтсиз инсан һесаб едирди. Бу сәбәбдән гул, ағасынын талантыны дөвријјәјә бурахараг вар-дөвләтини артырмаг әвәзинә, ону јерә басдырды. Ишимиздә онун кими сәһләнкар олмамаг үчүн мәһсулун Саһиби Јеһова илә сых мүнасибәт инкишаф етдирмәли вә ону горујуб сахламалыјыг. Онун мәһәббәт, сәбир вә мәрһәмәт кими ҝөзәл хүсусијјәтләрини арашдырмаға вә онларын үзәриндә дәриндән дүшүнмәјә вахт ајыр. Бу да, өз нөвбәсиндә, сәни хидмәтдә әлиндән ҝәләни етмәјә тәшвиг едәҹәк (Лука 6:45; Филип. 1:9—11).
«Мүгәддәс олун»
14. Бичин ишиндә иштирак етмәк истәјәнләр һансы ваҹиб тәләбә мүвафиг олмалыдырлар?
14 Ибраниҹә Мүгәддәс Јазылардан ситат ҝәтирәрәк һәвари Петер Аллаһын јер үзүндәки хидмәтчиләринә даир ирадәсинин нәдән ибарәт олдуғуну ҝөстәрәрәк дејир: «Сизи чағыран Аллаһ мүгәддәс олдуғу кими, өзүнүз дә һәр һәрәкәтиниздә мүгәддәс олун, чүнки јазылмышдыр: “Мүгәддәс олун, чүнки Мән мүгәддәсәм”» (1 Пет. 1:15, 16; Лев. 19:2; Ганун. т. 18:13). Бу сөзләрдән ајдын ҝөрүнүр ки, бичин ишиндә иштирак едәнләр әхлаги вә руһани ҹәһәтдән тәмиз олмалыдырлар. Бу ваҹиб тәләбә мүвафиг олмаг үчүн, мәҹази дилдә десәк, јујунуб тәмизләнмәлијик. Биз буну Аллаһын һәгигәт кәламынын көмәји илә едә биләрик.
15. Аллаһын һәгигәт кәламы һансы ҝүҹә маликдир?
15 Аллаһын һәгигәт кәламы тәмизләмә хүсусијјәтинә малик олан су илә мүгајисә едилир. Мәсәлән, һәвари Павел јазырды ки, мәсһ олунмуш мәсиһчиләрин јығынҹағы Аллаһын ҝөзүндә тәмиздир, санки, Мәсиһин исмәтли нишанлысы кими су илә јујунуб, кәламла тәмизләнәрәк тәгдис едилиб ки, «мүгәддәс вә нөгсансыз олсун» (Ефес. 5:25—27). Иса тәблиғ етдији Аллаһын Кәламынын тәмизләмә ҝүҹү барәдә әввәлләр дә данышмышды. Шаҝирләринә мүраҹиәт едәрәк о демишди: «Сизә сөјләдијим сөз сајәсиндә, сиз артыг тәмизсиниз» (Јәһ. 15:3). Һәгигәтән дә, Аллаһын һәгигәт кәламы әхлаги вә руһани ҹәһәтдән тәмизләмә ҝүҹүнә маликдир. Әҝәр бу һәгигәтләрин бизи тәмизләмәсинә јол версәк, онда Аллаһ ибадәтимизи гәбул едәҹәк.
16. Өзүмүзү руһани вә әхлаги ҹәһәтдән неҹә тәмиз сахлаја биләрик?
16 Демәли, биз Аллаһын бичин ишиндә иштирак етмәк үчүн, илк нөвбәдә, Аллаһын ҝөзүндә әхлаги вә руһани ҹәһәтдән натәмиз сајылан һәр бир әмәлдән әл чәкирик. Бундан сонра да бу шәрәфли ишә јарарлы олмаг үчүн Јеһованын јүксәк әхлаг вә руһани нормаларына риајәт етмәкдә нүмунәви олмалыјыг. (1 Петер 1:14—16 ајәләрини оху.) Һәр заман физики тәмизлијимизә диггәт јетирдијимиз кими, еләҹә дә мүнтәзәм олараг Аллаһын һәгигәт кәламынын бизи тәмизләмәсинә јол вермәлијик. Бура Мүгәддәс Китабы мүталиә етмәк вә ҝөрүшләримиздә иштирак етмәк дахилдир. Үстәлик, бу, Аллаһын хатырлатмаларыны тәтбиг етмәк үчүн сәмими-гәлбдән сәј ҝөстәрмәк демәкдир. Әҝәр белә етсәк, ҝүнаһа олан мејилимиз вә бу дүнјанын позуҹу тәсири бизи үстәләјә билмәјәҹәк (Мәз. 119:9; Јаг. 1:21—25). Бәли, Аллаһын һәгигәт кәламынын көмәјилә һәтта ҹидди ҝүнаһлардан белә тәмизләндијимизи билмәк бизим үчүн чох севиндириҹидир! (1 Кор. 6:9—11).
17. Тәмиз галмаг үчүн Мүгәддәс Китабын һансы мәсләһәтләринә әмәл етмәлијик?
17 Аллаһын һәгигәт кәламынын сәни тәмизләмәсинә јол верирсәнми? Мәсәлән, позуҹу әјләнҹәләрин тәһлүкәси барәдә хәбәрдарлыглара неҹә реаксија ҝөстәрирсән? (Мәз. 101:3). Иманына шәрик олмајан синиф вә ја иш јолдашларынла достлугдан гачырсанмы? (1 Кор. 15:33). Сәни Јеһованын ҝөзүндә натәмиз едәҹәк зәифликләринин өһдәсиндән ҝәлмәк үчүн вар ҝүҹүнлә чалышырсанмы? (Колос. 3:5). Сијаси мүбаһисәләрдән вә бир чох идман јарышларында мүшаһидә олунан милләтчилик руһундан кәнар дурурсанмы? (Јаг. 4:4).
18. Әхлаги вә руһани тәмизлик бичин ишиндә даһа чох сәмәрә ҝәтирмәкдә бизә неҹә көмәк едир?
18 Сәнин бу мәсәләләрдә итаәткарлыг ҝөстәрмәјин ҝөзәл бәһрәләр ҝәтирә биләр. Иса мәсһ олунмуш шаҝирдләрини мејнә будагларына бәнзәдәрәк деди: «Мәндә олуб мејвә вермәјән һәр будағы О [Атам] гопарыр; вә һәр мејвә верәни даһа чох версин дејә будајыб тәмизләјир» (Јәһ. 15:2). Әҝәр Мүгәддәс Китаб һәгигәтинин сәни тәмизләмәсинә јол версән, онда даһа чох сәмәрә ҝәтирәҹәксән.
Индики вә ҝәләҹәк хејир-дуалар
19. Исанын еркән шаҝирдләри бичин ишиндә сәјлә иштирак етдикләринә ҝөрә һансы хејир-дуалары алдылар?
19 Исанын тәлимләринә һај верән садиг шаҝирдләр «дүнјанын ән узаг јерләринә гәдәр» тәблиғ етмәк үчүн ерамызын 33-ҹү илинин Пентикост ҝүнүндә мүгәддәс руһ вә гүввәт алдылар (Һәв. иш. 1:8). Онлар рәһбәрлик шурасынын үзвү, миссионер, сәјјар нәзарәтчи кими хидмәт едәрәк «ҝөј алтында олан һәр мәхлуга» хош хәбәрин чатдырылмасында әсас рол ојнамышлар (Колос. 1:23). Бу адамлар бөјүк хејир-дуалар бичмиш вә башгаларына севинҹ ҝәтирмишләр!
20. а) Руһани бичиндә вар ҝүҹүнлә иштирак етмәјин сајәсиндә һансы хејир-дуалары алмысан? б) Сән нә етмәјә гәти гәрарлысан?
20 Бәли, тәвазөкар вә чалышган олсаг, Аллаһын Кәламындакы јүксәк нормалара риајәт етсәк, бизим ҝүнләрдә баш верән бөјүк руһани бичин иши бизә севинҹ вә мәмнунлуг ҝәтирәҹәк. Бу дүнјада вар-дөвләт вә кеф-дамаг далынҹа гачараг әзаб-әзијјәт чәкән вә руһ дүшкүнлүјүнә гапыланлардан фәргли олараг, биз әсил севинҹ вә мәмнунлуг дујуруг (Мәз. 126:6). Ән ваҹиби исә, «Рәббин јолунда чәкдијиниз әмәк әбәс дејилдир» (1 Кор. 15:58). Мәһсулун Саһиби Јеһова Аллаһ чәкдијимиз әмәји вә Онун ады наминә ҝөстәрдијимиз мәһәббәти унутмајаҹаг вә әбәдијјәт бојунҹа Өз хејир-дуаларыны үстүмүздән әскик етмәјәҹәк! (Ибр. 6:10—12).
[Һашијә]
a Талант һаггында мәсәл, әсасән, Исанын мәсһ олунмуш давамчылары илә неҹә рәфтар етмәси барәдәдир, лакин бурада бүтүн мәсиһчиләрин тәтбиг едә биләҹәји принсипләр јер алыр.
Јадыныздадырмы?
Бичин ишиндә там шәкилдә иштирак едәрәк...
• тәвазөкар олмаг нәјә ҝөрә ваҹибдир?
• чалышган олмаға вә ону горујуб сахламаға нә көмәк едә биләр?
• әхлаги вә руһани тәмизлији горумаг нәјә ҝөрә зәруридир?
[17-ҹи сәһифәдәки шәкил]
Тәвазөкарлыг садә һәјат тәрзи сүрмәјә вә диггәтимизи Падшаһлыг ишинә јөнәлтмәјә көмәк едәҹәк