«Горхма, сәнә көмәк едәҹәјәм»

ИСА шаҝирдләрини габагҹадан хәбәрдар етмишди: «Иблис сизләрдән бәзиләрини зиндана атаҹаг ки, имтаһан олунасыныз». Лакин бу сөзләри сөјләмәздән әввәл Иса демишди: «Чәкәҹәјин әләмләрдән горхма». Шејтан Падшаһлығын тәблиғ ишини дајандырмаг үчүн бизи һәбс ҹәзасы илә горхутмаға давам етдијиндән бәзи һөкумәтләрин һәгиги мәсиһчиләри тәгиб едәҹәји еһтималы лабүддүр (Вәһј 2:10; 12:17). Буну нәзәрә алараг, Шејтанын фәндләринә һазыр олмаға вә Исанын мәсләһәт вердији кими ‘горхмамаға’ бизә нә көмәк едәҹәк?

Сөзсүз ки, әксәријјәтимизин бәзән горху һисси кечирдији анлар олур. Амма Аллаһын Кәламы бизи әмин едир ки, Јеһованын көмәји илә горху үзәриндә гәләбә чала биләрик. Јеһова бизи тәгибләрә һазырламаг үчүн Шејтанын вә онун тәрәфдарларынын истифадә етдији фәндләри ачыглајыр (2 Кор. 2:11). Буну неҹә етдијини баша дүшмәк үчүн ҝәлин Мүгәддәс Китабын јазылдығы дөврдә баш верән бир һадисәјә нәзәр салаг. Биз һәмчинин мүасир дөврдә јашајан вә ‘Иблисин һијләләринә гаршы дуран’ бәзи садиг һәмиманлыларымызын нүмунәсинә дә диггәт јетирәҹәјик (Ефес. 6:11—13).

Аллаһдан горхан падшаһ вә пис һөкмдар

Б. е. ә. 8-ҹи әсрдә Ашшур империјасынын пис һөкмдары Санхерив бәзи халгларын үзәриндә бир сыра гәләбәләр газанды. Бу гәләбәләрдән сонра өзүнә там ҝүвәнән падшаһ Јеһованын халгыны вә Аллаһдан горхан Хизгијанын һөкмранлыг етдији шәһәри — Јәһудејанын пајтахты Јерусәлими зәбт етмәк арзусуна дүшдү (2 Пад. 18:1—3, 13). Шүбһәсиз, Шејтан фүрсәтдән истифадә едиб һәгиги ибадәти јер үзүндән тамамилә силмәк үчүн Санхериви өз нијјәтини һәјата кечирмәјә тәһрик етди (Јар. 3:15).

Тәслим олмаг тәләби илә Санхерив, нүмајәндәләри дә дахил олмагла, өз елчисини Јерусәлимә ҝөндәрдиa (2 Пад. 18:17). Елчи истәјирди ки, исраиллиләрин әминлијини вә ҹәсарәтини јох етсин, беләликлә дә онлар дөјүшсүз тәслим олсунлар. Јәһудиләрин үрәјинә горху салмаг үчүн о, һансы үсуллара әл атды?

Тәҹрид олунсалар да садигдирләр

Елчи Хизгијанын нүмајәндәләринә деди: «Бөјүк падшаһ — Ашшур падшаһы белә дејир: “Нәјә ҝүвәнирсән? Јәгин сән әзилмиш гамыш чубуғуна — Мисирә ҝүвәнирсән. Бил ки, ким она сөјкәнсә, әлинә батыб дешәр”» (2 Пад. 18:19, 21). Онун иттиһамлары јалан иди, чүнки Хизгија Мисирлә һеч бир иттифага ҝирмәмишди. Бунунла белә, ирәли сүрдүјү бу иттиһамларла Санхеривин елчиси јәһудиләрин нөвбәти сөзләри јахшы јадда сахламаларыны истәјирди: «Һеч ким сизә көмәк етмәјәҹәк. Сиз тәҹрид олунмусунуз».

Бу јахынларда да һәгиги ибадәтә гаршы чыханлар мәсиһчиләрин үрәјинә горху салмаг үчүн онлары тәҹрид едәҹәкләри илә һәдәләјирдиләр. Әгидәсинә ҝөрә зиндана атылан вә узун илләр һәмиманлыларындан узаг дүшән бир мәсиһчи баҹы горхуја үстүн ҝәлмәјә она нә көмәк етдијини сонралар нәгл едир: «Јеһоваја јахынлашмагда мәнә көмәк едән дуа олду... Јешаја 66:2 ајәсиндә Аллаһын «һәлим вә руһу әзилмиш» инсанлара нәзәр салмасы һаггында јазылан сөзләр јадымдан һеч чыхмырды. Бу сөзләр һәмишә мәним үчүн ҝүҹ вә бөјүк тәсәлли мәнбәји иди». Буна бәнзәр сөзләри илләр әрзиндә бирнәфәрлик камерада јатан бир гардаш да дејир: «Мән баша дүшдүм ки, Јеһова илә јахын мүнасибәти олан инсан үчүн кичик дөрдбуҹаглы камера һәмчинин каинат да ола биләр». Бәли, башгаларындан ајры дүшмәләринә таб ҝәтирмәкдә бу ики мәсиһчијә ҝүҹ верән Јеһова илә сых мүнасибәтләри иди (Мәз. 9:9, 10). Һәбсдә олан Шаһидләр билирләр ки, тәгибчиләри онлары аиләләриндән, достларындан вә һәмиманлыларындан ајыра биләрләр, Јеһовадан исә әсла! (Ром. 8:35—39).

Буна ҝөрә дә һәр бир имкандан истифадә едәрәк Јеһова илә мүнасибәтләримизи мөһкәмләндирмәк неҹә дә ваҹибдир! (Јаг. 4:8) Һәр заман өзүмүздән сорушмалыјыг: «Јеһова мәним үчүн нә дәрәҹәдә реалдыр? Онун сөзләри ҝүндәлик һәјатымда гәбул етдијим истәр кичик, истәрсә дә бөјүк гәрарларыма ҝүҹлү тәсир едирми?» (Лука 16:10) Аллаһла јахын мүнасибәтимизи горумаға чалышырыгса, онда горхмаға һеч бир әсасымыз јохдур. Јеремја нараһатчылыг кечирән јәһудиләрин адындан данышараг демишди: «Ја Рәбб, исмини о гујунун дибиндән сәсләдим... Сәни чағыранда јаныма ҝәлдин, мәнә “горхма” сөјләдин» (Мәрс. 3:55—57).

Шүбһә тохумлары әкмәк ҹәһди боша чыхыр

Падшаһын елчиси јалан иддиалар ирәли сүрәрәк халгын үрәјиндә шүбһә тохумлары әкмәјә чалышырды. О деди: «Мәҝәр бу һәмин Аллаһ [Јеһова] дејилди ки, Хизгија Онун сәҹдәҝаһларыны вә гурбанҝаһларыны арадан галдырды?.. Рәбб мәнә “бу өлкәјә һүҹум едиб ону виран ет” деди» (2 Пад. 18:22, 25). Бунунла о сүбут етмәк истәјирди ки, Јеһова халгындан наразыдыр вә онларын уғрунда мүһарибә етмәјәҹәк. Анҹаг бу, ағ јалан иди. Әксинә, Јеһова Хизгијадан вә һәгиги ибадәтә гајыдан јәһудиләрдән разы иди (2 Пад. 18:3—7).

Бу ҝүн фитнәкар тәгибчиләр мәсиһчиләрлә үмуми дил тапмаг мәгсәдилә доғру мәлуматдан бир һиссә ҝөтүрүб онларла бөлүшүр, ејни заманда исә шүбһә тохумлары сәпмәк үмидилә ҝизли шәкилдә һәгигәти јаланла гарышдырырлар. Мәсәлән, һәбсдә олан баҹы-гардашлара бәзән дејирдиләр ки, рәһбәрләри имандан дөнүбләр вә онларын да белә етмәјә там һаггы вар. Лакин бу кими иддиалар дәрракәли мәсиһчиләрин үрәјинә шүбһә тохумлары сәпә билмәз.

Икинҹи Дүнја мүһарибәси заманы бир баҹынын башына нәләрин ҝәлдијинә бахаг. Һәбсдә оларкән она бир мәсул гардашын имандан дөндүјүнә шәһадәт едән јазылы билдириш ҝөстәрдиләр. Мүстәнтиг ондан һәмин Шаһидә етибар едиб-етмәдијини сорушду. Баҹынын ҹавабы исә белә олду: «О, садәҹә гејри-камил бир инсандыр». Сонра о әлавә етди ки, һәмин гардаш Мүгәддәс Китаб принсипләринә риајәт етдији мүддәтдә Јеһова ондан истифадә едирди. «Лакин Мүгәддәс Китаб принсипләрини рәдд едәндән сонра артыг мәним гардашым дејил». Садиглијини горујан бу баҹы Мүгәддәс Китабын нөвбәти хәбәрдарлығына мүдрикҹәсинә јанашырды: «Әсилзадәләрә, сизи гуртара билмәјән бәшәр оғлуна ҝүвәнмәјин» (Мәз. 146:3).

Аллаһын Кәламындан дәгиг билик әлдә етмәк вә орадакы мәсләһәтләри иҹра етмәк бизә садиг галмаг әзмимизи зәифләдә билән јалан иддиалардан өзүмүзү горунмаға көмәк едәҹәк (Ефес. 4:13, 14; Ибр. 6:19). Буна ҝөрә дә, тәзјигләрлә үзләшән заман сағлам дүшүнмәјә өзүмүзү һазырламаг үчүн һәјатымызда биринҹи јерә Мүгәддәс Китабы ҝүндәлик охумағы вә шәхси өјрәнмәни гојмалыјыг (Ибр. 4:12). Бәли, инди билијимизи артырмағын вә иманымызы мөһкәмләндирмәјин әсил вахтыдыр! Узун илләр бирнәфәрлик камерада һәбсдә олан бир гардаш дејир: «Алдығымыз бүтүн руһани гиданы лазымынҹа гијмәтләндирмәјә һәр кәси тәшвиг етмәк истәјәрдим, чүнки бунларын бизә мүәјјән вахтларда неҹә фајда ҝәтирәҹәјини билмирик». Әҝәр биз Аллаһын Кәламыны вә садиг гулун бу ҝүн тәгдим етдији нәшрләри диггәтлә арашдырырыгса, һәјатымызын чәтин анларында мүгәддәс руһ вахтилә өјрәндијимиз шејләри бизә «хатырладаҹаг» (Јәһ. 14:26).

Һәдә-горхудан неҹә горунмалы?

Падшаһын елчиси јәһудиләрә һәдә-горху ҝәлмәјә чалышырды. О дејирди: «Инди ағам Ашшур падшаһы илә мәрҹә ҝәл: әҝәр сән ики мин сүвари тапа билсән, мән сәнә о гәдәр ат верәрәм. Ҝөрәк сән ағамын кичик гулу олан бир башчыны неҹә мәғлуб едәҹәксән?» (2 Пад. 18:23, 24) Инсан нөгтеји-нәзәри илә Хизгија вә онун халгы үчүн гүдрәтли Ашшур ордусуна гаршы дурмаг гејри-мүмкүн иди.

Бу ҝүн дә тәгибчиләр, хүсусилә һакимијјәтин дәстәји илә, һәддән артыг ҝүҹлү ҝөрүнә биләрләр. Нүмунә үчүн Икинҹи Дүнја мүһарибәси заманы насист тәгибчиләрини гејд етмәк олар. Онлар Аллаһын бир чох хидмәтчиләрини һәдәләмәјә чалышырдылар. Узун илләр һәбсдә олан бир гардашымыз сонралар ону неҹә һәдәләдикләрини данышыр. Бир дәфә забитләрдән бири ондан сорушур: «Гардашынын неҹә ҝүлләләндијини ҝөрдүн? Бу, сәнә дәрс олду?» Гардашын ҹавабы исә белә олду: «Мән Јеһованын Шаһидијәм вә Шаһиди олараг галаҹағам». «Онда нөвбәти ҝүлләләнән сән олаҹагсан», — дејә забит ону тәһдид етди. Һәр шејә рәғмән гардашымыз мөһкәм дурду, забит дә ону һәдәләмәкдән әл чәкди. Бу ҹүр һәдә-горху гаршысында мөһкәм галмаға она нә көмәк етди? Бу суала о, өзү ҹаваб верир: «Мән Аллаһын адына ҝүвәнирдим» (Сүл. мәс. 18:10).

Бүтүнлүклә Јеһоваја архаланмагла Шејтанын бизә руһани ҹәһәтдән зәрәр вурмаг мәгсәдилә әл атдығы һәр шејдән бизи горујан бөјүк галханы әлимизә ҝөтүрмүш олуруг (Ефес. 6:16). Буна ҝөрә дә, јахшы оларды ки, дуада Јеһовадан иманымызы мөһкәмләндирмәсини хаһиш едәк (Лука 17:5). Бундан әлавә, садиг вә ағыллы гулун иманымызы мөһкәмләндирмәк үчүн тәгдим етдији шејләрдән фајдаланмалыјыг. Тәһдид олунан заман инадкар халга һөкм хәбәрини чатдыран Језекел пејғәмбәрә Јеһованын вердији әминлији јада салараг мөһкәмләнирик. Јеһова она демишди: «Мән сәни дә онлар кими инадкар едәҹәјәм, онлар кими дикбаш едәҹәјәм. Сәнин инадыны чахмаг дашындан мөһкәм олан алмаз кими мөһкәм едәҹәјәм» (Јез. 3:8, 9). Лазым ҝәләрсә, Јеһова бизи дә алмаз кими мөһкәм едә биләр.

Ширникдириҹи тәсирләрә гаршы дур

Дүшмәнләр истифадә етдикләри бүтүн ҹәһдләрин боша чыхдығыны ҝөрәндә фикир верибләр ки, ширникдириҹи тәклифләр бәзән инсанын садиглијини сарсыда билир. Елә падшаһын елчиси дә бу үсула әл атды. О, Јерусәлим әһалисинә деди: «Ашшур падшаһы белә дејир: “Мәнимлә сүлһ бағлајын вә јаныма ҝәлин... Сонра мән ҝәлиб сизи өлкәнизә бәнзәр бир өлкәјә — буғда, шәраб, чөрәк, үзүм бағлары, зејтун јағы вә бал олан бир торпаға апараҹағам. Беләҹә өлмәјиб сағ галарсыныз”» (2 Пад. 18:31, 32). Тәзә чөрәк јејиб шәраб ичмәк имканы шәһәр диварларынын архасында мүһасирәдә олан инсанларын гулағына хош ҝәлирди!

Һәбсдә олан миссионерин әзмини сындырмаг мәгсәдилә бир дәфә белә бир үсула әл атылмышды. Гардаша демишдиләр ки, алты ај әрзиндә «ҝөзәл бағда» јерләшән «гәшәнҝ евдә» јашамаг истәјирсә, онда бу һагда дүшүнсүн. Амма гардаш садиглијини горумаға вә мәсиһчи принсипләринә ҝүзәштә ҝетмәмәјә гәти гәрарлы иди. Она нә көмәк етди? Сонралар о буну белә изаһ едир: «Мән Падшаһлыг һаггында реал үмид кими дүшүнүрдүм... Аллаһын Падшаһлығы һаггында билијин көмәји илә мөһкәмләнмәјин, буна әмин олмағын, бир ан да олсун, онун реал олдуғуна шүбһә етмәмәјин сајәсиндә садиглијимдән дөнмәдим».

Бәс бизим үчүн Аллаһын Падшаһлығы неҹә реал ола биләр? Гәбилә башчысы Ибраһим, һәвари Павел вә Исанын өзү чәтин сынаглардан башыуҹа чыхмаға там мүвәффәг олмушлар. Чүнки Падшаһлыг онлар үчүн реал иди (Филип. 3:13, 14; Ибр. 11:8—10; 12:2). Падшаһлығы һәјатымызда биринҹи јерә гојмаға давам етсәк вә онун ҝәтирәҹәји әбәди хејир-дуалары јадымызда сахласаг, биз дә сынаглардан мүвәггәти јаха гуртармаг үчүн едилән ширникдириҹи тәклифләри рәдд едә биләҹәјик (2 Кор. 4:16—18).

Јеһова бизи тәрк етмәјәҹәк

Јәһудиләри горхутмаг үчүн падшаһын елчисинин етдији бүтүн ҹәһдләрә рәғмән Хизгијанын һәм өзү, һәм дә тәбәәләри Јеһоваја тамамилә архаландылар (2 Пад. 19:15, 19; Јешаја 37:5—7). Јеһова исә, өз нөвбәсиндә, онларын көмәк үчүн етдикләри дуалара ҹаваб олараг Өз мәләјини ҝөндәрди ки, Ашшур дүшәрҝәсинин 185 000 әсҝәрини бир ҝеҹәдә мәһв етсин. Сәһәриси ҝүн Санхерив ордусунун аз сајда галан һиссәси илә бирҝә кор-пешман пајтахт Ниневаја гајытды (2 Пад. 19:35, 36).

Јеһованын Она ҝүвәнәнләри тәрк етмәдији ҝөз габағындадыр. Сынаглара таб ҝәтирән баҹы-гардашларын мүасир нүмунәләри ҝөстәрир ки, Јеһова бу ҝүн дә белә давраныр. Әбәс јерә сәмави Атамыз бизи әмин етмир: «Сәнин сағ әлиндән тутуб “Горхма, сәнә көмәк едәҹәјәм” дејән Аллаһын Рәбб Мәнәм» (Јешаја 41:13).

[Һашијә]

[13-ҹү сәһифәдәки јазы]

Өз Кәламында Јеһова хидмәтчиләрини 30 дәфәдән чох әмин едир: «Горхма»

[12-ҹи сәһифәдәки шәкил]

Падшаһ елчисинин ишләтдији фәндләр Аллаһын мүасир халгына гаршы ишләнилән фәндләрә нәдә бәнзәјир?

[15-ҹи сәһифәдәки шәкилләр]

Јеһова илә сых мүнасибәтләрин сајәсиндә сынаглар заманы нөгсансызлығымызы горуја биләҹәјик