Дүнјанын сону артыг онлары горхутмур

ТӘХМИНӘН 1970-ҹи илләрин сонуна јахын Гери вә Карен белә гәнаәтә ҝәлдиләр ки, дүнјанын сону јахынлашыр. Онлар хилас олмаг истәјирдиләр вә буна ҝөрә дә кәндә көчмәк гәрарына ҝәлдиләр ки, сивилизасијада өјрәшдикләри һәјат тәрзиндән асылы олмасынлар.

Лазыми баҹарыглара јијәләнмәк үчүн онлар китаблар алыб, мүхтәлиф курс вә семинарлара гатылырдылар. Еләҹә дә, һамы илә мәсләһәтләширдиләр. Онлар бағ-бостан салыб 50 ҹыртдан мејвә ағаҹы әкдиләр. Һәмчинин аләтләр алдылар вә мүхтәлиф тохум тәдарүкү ҝөрдүләр. Мәһсул беҹәрмәји вә сахламағы да өјрәндиләр. Бир достлары исә онлара һејван кәсмәји вә әти консервләшдирмәји өјрәтди. Әҝәр тәдарүк ҝөрдүкләри әрзаг гуртарсајды, аҹ галмамаг үчүн Карен мешәдә битән вә јејилән биткиләри вә көкләри мүәјјән етмәк баҹарығына јијәләнди. Гери буғдадан јанаҹаг әлдә етмәји өјрәнди, одунла јанан дәмир соба дүзәлтди вә һеч бир коммуникасија системи олмајан бир ев тикди.

«Дүнја о вахт, елә бил, дағылырды. Фикирләширдим ки, бәшәријјәт артыг мәһв олмаг үзрәдир», — дејә Карен данышыр. Гери әлавә едир: «Диҝәр ҝәнҹләр кими, мән дә ирги ајры-сечкилијә, Вјетнамдакы мүһарибәјә вә коррупсијаја гаршы һәрәкатларда фәал иштирак едирдим. Лакин тезликлә бүтүн хәјалларым пуч олду. Мәнә елә ҝәлирди ки, бәшәријјәт бир аздан өз-өзүнү мәһв едәҹәк».

Гери дејир: «Бир дәфә ахшам бош вахтымда Мүгәддәс Китабы ҝөтүрүб “Матта”дан “Вәһј” китабына гәдәр охудум. Нөвбәти дөрд ахшам исә һәр шеји јенидән охудум. Бешинҹи ҝүн сәһәр Каренә дедим: “Биз сон ҝүнләрдә јашајырыг. Бир аздан Аллаһ јер үзүнү тәмизләјәҹәк. Ҝәрәк сон ҝүндә хилас олаҹаг инсанлары ахтарыб тапаг”». Бундан сонра Гери вә Карен үзвләри сон ҝүндә хилас олмаға һазырлашан динин ахтарышына башладылар.

Мүәјјән вахтдан сонра бир нәфәр Јеһованын Шаһиди гапыларыны дөјдү вә онлар Мүгәддәс Китабы өјрәнмәјә башладылар. «Севинҹимин һәдди-һүдуду јох иди! — дејә Карен хатырлајыр. — Нәһајәт ки, мән Мүгәддәс Китабы баша дүшмәјә башладым. Чохдандыр сон ҝүнләр һаггында билмәк истәдијим һәгигәти өјрәндим. Бунун сајәсиндә ҝәләҹәјә әминлијим јаранды. Ән әсасы исә мән Јараданыма вә Күлли-Ихтијар Аллаһыма јахынлаша билдим».

Гери: «Бу мәним һәјатыма әсил мәна ҝәтирди. Мүгәддәс Китабы өјрәнмәк мәним чох хошума ҝәлирди. Мән Мүгәддәс Китабдакы пејғәмбәрликләри охујуб онларын неҹә јеринә јетдијини арашдырырдым вә нәтиҹәдә әмин олдум ки, Аллаһ бир аздан һәрәкәтә кечәҹәк. Онда мән белә гәнаәтә ҝәлдим: “Инсанлар фәлакәтә јох, Аллаһын бизим үчүн һазырладығы һәјата һазырлашмалыдырлар”». Бундан сонра Гери вә Карен ҝәләҹәјә мүсбәт әһвал-руһијјә илә бахмаға башладылар. Артыг дүнјанын ахыры онлары горхутмурду. Онлар әмин олдулар ки, Аллаһ тезликлә бәшәријјәти ағушуна алан проблемләри арадан галдыраҹаг вә јер үзүндә Ҹәннәти бәрпа едәҹәк.

Артыг о вахтдан 25 ил кечиб. Инди Гери вә Карен нә ишлә мәшғулдурлар? Карен дејир: «Јеһова Аллаһа гаршы мәһәббәтими вә иманымы ҝүҹләндирмәјә вә һәмчинин башгаларына да буну етмәјә көмәк едирәм. Гери вә мән бир-биримизә дәстәк олуруг вә бирликдә Аллаһа хидмәт едирик. Ишләримизи елә гурмаға чалышырыг ки, садә һәјат тәрзи сүрәк вә башгаларына даһа чох диггәт ајыра биләк».

Гери исә әлавә едир: «Мән Аллаһын Падшаһлығынын ҝәлмәси вә онун милјонларла инсанлара раһатлыг ҝәтирмәси үчүн даима дуа едирәм. Һәр дәфә башгалары илә Аллаһын Падшаһлығы һаггында хош хәбәри бөлүшәндә Аллаһдан хаһиш едирәм ки, һеч олмаса, бир инсана Мүгәддәс Китабда олан бу үмиди чатдырым. Артыг 25 илдир ки, Јеһова Аллаһын дуаларыма неҹә ҹаваб вердијинин шаһиди олурам. Карен вә мән инанырыг ки, Аллаһ тезликлә јер үзүндә көклү дәјишикликләр едәҹәк, анҹаг биз артыг дүнјанын сонундан горхмуруг» (Матта 6:9, 10; 2 Петер 3:11, 12).

[9-ҹу сәһифәдәки шәкил]

Гери вә Карен башгаларына Мүгәддәс Китабын вердији үмидә наил олмаға көмәк едирләр