Ушагларынызы өјрәдин

Нәјә ҝөрә Иса тәләсмәди?

БИР ҜҮН Лазарын баҹылары Мәрјәм вә Мартанын ҝөндәрдикләри адам Исаја хәбәр чатдырыр ки, онун јахын досту Лазар бәрк хәстәләнәрәк јатаға дүшүб. Онларын ҝөндәрдији бу адам Лазар вә баҹыларынын јашадығы Бејтанјадан иди. Баҹылар инанырдылар ки, узагда, Иордан чајынын о бири тајында јашамаларына бахмајараг, Иса онларын гардашларыны ора ҝәлмәдән сағалда биләр. Онлар Исанын инсанлары, һәтта узаг мәсафәдән белә сағалтдығыны билирдиләр (Матта 8:5—13; Јәһја 11:1—3).

Һәмин адам бу пис хәбәри Исаја чатдыранда о, һеч бир тәдбир ҝөрмәди. Мүгәддәс Китабда дејилир: «Анҹаг Лазарын хәстәләндијини ешидәндә ики ҝүн дә олдуғу јердә галды» (Јәһја 11:6). Билирсән, нәјә ҝөрә Иса Лазара көмәк етмәк үчүн тәләсмәди? ~a Ҝәл бу һагда данышаг.

Иса Лазарын хәстәликдән өлдүјүнү билирди вә буна ҝөрә дә һәвариләринә деди: «Ҝәлин јенә Јәһудејаја ҝедәк». «Јәһудејалылар тәзәликҹә сәни дашламаг истәјирдиләр, сән исә јенә ора ҝедирсән?» — дејә онлар етираз етдиләр. Иса исә деди: «Достумуз Лазар јухуја ҝедиб, мән исә ону ојатмаға ҝедирәм».

«Аға, јатырса, демәли, сағалаҹаг», — дејә онлар ҹаваб вердиләр. Лакин Иса онлара изаһ етди: «Лазар өлүб». Сонра да Иса, ола билсин, һәвариләринин тәәҹҹүбүнә сәбәб олан белә сөзләр дејир: «Мән чох шадам ки, орада олмамышам... Дурун, онун јанына ҝедәк».

Томас ҹәсарәтлә дејир: «Ҝедәк, биз дә онунла өләк». Томас билирди ки, дүшмәнләр јенидән ҹәһд ҝөстәрәрәк Иса илә бирликдә һәвариләри дә өлдүрә биләрләр. Бунунла белә, онлар Иса илә бирликдә ҝетдиләр. Ики ҝүн јол ҝедәндән сонра онлар Лазарын доғма шәһәри Бејтанјаја ҝәлиб чатдылар. Бејтанја Јерусәлимдән тәхминән үч километр аралыда јерләширди (Јәһја 11:7—18).

Билирсән, нәјә ҝөрә Иса ора тез ҝәлмәдијинә ҝөрә севинирди? ~ Бундан әввәл Исанын дирилтдији инсанлар ҹәми бир нечә саат әрзиндә өлү галмышдылар (Лука 7:11—17, 22; 8:49—56). Лазар исә артыг бир нечә ҝүн иди ки, мағарада иди. Вә һеч ким онун һәгигәтән дә өлдүјүнү шүбһә алтына ала билмәзди!

Лазарын баҹысы Марта Исанын Бејтанја јахынлығында олдуғуну биләндә евдән чыхараг гача-гача ону гаршыламаға ҝедир. «Аға, сән бурада олсајдын, гардашым өлмәзди», — дејә о билдирир. Иса исә ону әмин едир: «Гардашын дириләҹәк». Марта тәләсик евә гајыдараг ҝизлиҹә баҹысына дејир: «Мүәллим ҝәлиб, сәни ҝөрмәк истәјир».

Һәмин ан Мәрјәм евдән чыхыб Исанын јанына ҝедир. Ҹамаат онун гәбрә тәрәф ҝетдијини зәнн едәрәк онун ардынҹа ҝедир. Мәрјәмин вә издиһамын ағладығыны ҝөрән Иса да ағлајыр. Сонда онлар ағзына бөјүк бир даш гојулмуш сәрдабәнин јанына ҝәлирләр. Иса деди: «Дашы кәнара чәкин». Лакин Марта: «Аға, о, дөрд ҝүндүр ки, бурададыр, индијә јәгин ијләнәр», — дејә етираз едир.

Инсанлар Исанын ҝөстәришинә әмәл едәрәк мағаранын дашыны кәнара чәкирләр. Сонра да о, Аллаһа дуасында Лазары дирилтмәк үчүн гүввә вердијинә ҝөрә әввәлҹәдән Она өз миннәтдарлығыны билдирир вә уҹа сәслә дејир: «Лазар, чөлә чых!» Вә Лазар да кәфәнли чөлә чыхыр. Иса дејир: «Кәфәнини ачын, азад олсун» (Јәһја 11:19—44).

Исанын нәјә ҝөрә тәләсмәдијини инди баша дүшүрсәнми? ~ О билирди ки, әҝәр бир аз ҝөзләсә, Атасы Јеһова һаггында даһа јахшы шаһидлик едә биләр. Елә буна ҝөрә дә јахшы вахт сечдији үчүн бир чохлары Исаја иман етди (Јәһја 11:45). Сәнҹә, бурада Исанын нүмунәсиндән нә өјрәнә биләрик? ~

Сән дә Аллаһын ҝөрдүјү вә еләҹә дә ҝәләҹәкдә едәҹәји мөһтәшәм ишләри барәдә шаһидлик етмәк үчүн јахшы вахт сечә биләрсән. Мәсәлән, бу шејләр барәдә сәнин синиф јолдашларына вә ја мүәллимләринә данышмаг имканын вар. Һәтта бәзи ушаглар дәрс заманы фүрсәтдән истифадә едәрәк Аллаһын Падшаһлығынын бүтүн бәшәријјәт үчүн ҝәтирәҹәји мөһтәшәм хејир-дуалар һаггында данышырлар. Әлбәттә, сән өлүләри дирилдә билмәзсән, анҹаг инсанлара өлән әзизләримизи дирилтмәји вәд едән вә буна гадир олан Аллаһла таныш олмаға көмәк едә биләрсән.

[Һашијә]

СУАЛЛАР:

▪ Нәјә ҝөрә Иса Лазара көмәк етмәк үчүн тәләсмәди?

▪ Нәјә ҝөрә Томас: «Ҝедәк, биз дә онунла өләк», — деди?

▪ Нәјин сајәсиндә Иса Лазары дирилтди?

▪ Исанын нүмунәсиндән ибрәт ҝөтүрдүјүнү неҹә ҝөстәрә биләрсән?