Мүгәддәс Китаб һәјатлары дәјишир

НАРКОТИКДӘН истифадә едән вә Русијадан олан бир ананы нә тәшвиг етди ки, о, бу вәрдишиндән әл чәксин вә өз ушаглары илә мүнасибәтләрини бәрпа етсин? Неҹә олду ки, Киотодан (Јапонија) олан евсиз бир киши өзүндә ҝүҹ тапыб ону сәфил вәзијјәтә ҝәтириб чыхаран вәрдишиндән әл чәкди? Австралијалы нахырчыја ички дүшкүнлүјүндән азад олмаға нә көмәк етди? Ҝәлин ҝөрәк онларын өзләри бу һагда нә данышырлар.

«Баша дүшдүм ки, өзүмү вә ушагларымы доландырмалыјам» (НЕЛЛИ БАЈМАТОВА).

ЈАШЫ: 45

ӨЛКӘ: РУСИЈА

ТАРИХЧӘСИ: НАРКОТИК ДҮШКҮНҮ

КЕЧМИШИМ. Мән Шимали Осетијанын — Аланијанын пајтахты Владигафгазда бөјүмүшәм. Валидејнләрим имканлы идиләр. Лакин буна бахмајараг, һәјатда хошбәхт дејилдим. Артыг 34 јашымда ики дәфә евләниб бошанмышдым. Он ил иди ки, наркотикә гуршанмышдым вә буна ҝөрә ики дәфә мүалиҹә олунмушдум. Ики ушағым вар иди, лакин онлара гаршы үрәјимдә һеч бир мәһәббәт јох иди; еләҹә дә достларымла вә аиләмлә мүнасибәтим чох пис иди.

Анам Јеһованын Шаһиди иди вә о, тез-тез Јеһоваја мәним үчүн дуа едиб јалварырды. «Ҝөр, анам неҹә дә садәлөвһдүр! Ахы Јеһова мәнә неҹә көмәк едә биләр?» — дејә фикирләширдим. Бу вәрдишдән гуртулмаг үчүн бир нечә дәфә ҹәһд ҝөстәрмишдим. Лакин өзүмлә баҹара билмирдим. Бир дәфә ики ҝүн наркотиксиз дөздүкдән сонра евдән чыхмаг гәрарына ҝәлдим вә евин икинҹи мәртәбәсиндән тулландым. Нәтиҹәдә әлим вә ајағым сынды, еләҹә дә онурғам зәдәләнди. Буна ҝөрә бир ај јатагдан галха билмәдим.

Бу мүддәт әрзиндә анам мәним гајғыма галырды вә буна ҝөрә мәни һеч вахт данламырды. Чох ағыр емосионал вәзијјәтдә олдуғуму баша дүшүрдү. Бир дәфә о, чарпајымын јанына бир нечә «Ојанын!»a журналы гојду. Һамысыны бир-бир охудум. Чох мараглы вә һәртәрәфли журналлар иди. Нәһајәтдә, Јеһованын Шаһидләринин көмәји илә Мүгәддәс Китабы өјрәнмәјә башладым.

МҮГӘДДӘС КИТАБ ҺӘЈАТЫМЫ ДӘЈИШДИ. Аллаһын Кәламы мәнә һәјатда мәсулијјәтли олмағы өјрәтди. Артыг дүшүнмүрдүм ки, анам мәни һәр шејлә тәмин етмәлидир. Баша дүшдүм ки, өзүмү вә ушагларымы доландырмалыјам. Узун мүддәт әрзиндә өз истәдијим кими јашадығым үчүн даима ишләмәк фикринә алышмаг мәним үчүн чәтин иди.

Ганунун тәкрары 6:5—7 ајәләриндәки мәсләһәтләрин мәнә бөјүк көмәји дәјди. Бу ајәләрдә дејилдији кими валидејнләр ушагларына Аллаһ һаггында билик ашыламалыдырлар. Баша дүшдүм ки, ушагларымы неҹә тәрбијә етдијимә ҝөрә Аллаһ гаршысында ҹавабдеһлик дашыјырам. Бу, мәни ушагларыма вахт ајырмаға вә онлара мәһәббәт инкишаф етдирмәјә тәшвиг етди.

Онун һаггында һәгигәти өјрәнмәјә изин вердији үчүн үрәјим Јеһоваја гаршы миннәтдарлыгла долу иди. Буна ҝөрә мән өз һәјатымы Јеһоваја һәср едәрәк вәфтиз олундум.

МӘНӘ ФАЈДАСЫ. Әввәлләр өзүмдән тез чыхырдым, лакин инди өзүмү әла ала билдијим үчүн анам вә ушагларымла мүнасибәтләрим јахшылашыб.

Мәндә аллаһсыз ишләрә гаршы нифрәт һисси јарандығы үчүн әввәлки һәјат тәрзимдә олан проблемләр өз-өзүнә арадан галхды. Инди башгаларына севән Аллаһымыз Јеһова һаггында өјрәнмәјә көмәк етмәкдән бөјүк мәмнунлуг дујурам.

«Мүгәддәс Китаб һәјатымы хилас етди» (МИНОРУ ТАКЕДА).

ЈАШЫ: 54

ӨЛКӘ: ЈАПОНИЈА

ТАРИХЧӘСИ: КҮЧӘЛӘРДӘ ЈАШАЈЫРДЫ

КЕЧМИШИМ. Мән Јамагути шәһәриндә анадан олмушам, атам вә нәнәмлә јашајырдым. Һеч вахт анамы ҝөрмәмишәм. Мәним 19 јашым оландан нәнәм вәфат етди вә биз атамла тәк галдыг. Мән ашпаз ишләјирдим; атам да ејни саһәдә ишләјирди. Иш нөвбәләримиз мүхтәлиф олдуғундан бир-биримизи аз-аз ҝөрүрдүк. Ишә һәддән артыг вахт сәрф едир вә тез-тез ичирдим.

Мүәјјән вахтдан сонра ишимдән безмәјә башладым. Еләҹә дә мүдирим илә проблемим вар иди. Буна ҝөрә даһа чох ичирдим. Тәхминән 30 јашым оланда еви тәрк едиб сәјаһәтә чыхмаг гәрарына ҝәлдим. Пулум гуртаранда пачинко (гумар нөвү) ојун автоматлары залында ишләмәјә башладым. Сонралар таныш олдуғум бир гызла евләндим. Лакин евлилијимиз чох чәкмәди, ики ил јарымдан сонра бошандыг.

Өзүмү чох пис һисс едирдим. Мән һәмчинин зәиф ирадәли инсан идим вә бөјүк борҹа ҝирмишдим. Борҹлу олдуғум инсанлардан ҹанымы гуртармаг үчүн доғма шәһәрә гачыб бир мүддәт атамын јанында јашадым. Ону алдадырдым вә буна ҝөрә дә мүнасибәтләримиз корланды. Бир дәфә онун пулларыны ҝөтүрүб һамысыны гумарда удуздум. Нәтиҹәдә пулсуз галдым вә бир мүддәт вағзалда јашамалы олдум. Бир мүддәт сонра мән Һакатаја, сонра Һимедзијә, сонда исә Киото шәһәринә көчдүм. Бир нечә ил мән күчәләрдә јашамалы олдум.

МҮГӘДДӘС КИТАБ ҺӘЈАТЫМЫ ДӘЈИШДИ. 1999-ҹу илдә Киотода Камогава чајынын саһилиндәки паркда ики гадын мәнә јахынлашды. Онлардан бири сорушду: «Мүгәддәс Китабы өјрәнмәк истәјирсиниз?» Мән разылашдым. Јеһованын Шаһидләринин јерли јығынҹағындан руһани ҹәһәтдән јеткин инсанлар мәнимлә Мүгәддәс Китабы өјрәнмәјә вә онун принсипләрини тәтбиг етмәјин нә дәрәҹәдә ваҹиб олдуғуну баша дүшмәјә көмәк етдиләр. Онлар мәнә мәсләһәт ҝөрдүләр ки, иш вә јашамаг үчүн јер тапым. Онларын хәтринә ишә дүзәлмәк үчүн бир-ики ҝөрүшә ҝетдим. Амма кифајәт гәдәр сәј ҝөстәрмирдим. Лакин сонрадан дуа едәрәк ҹидди сурәтдә иш ахтармаға башладым вә нәтиҹәдә бир иш тапа билдим.

Дүшдүјүм чәтин вәзијјәтдән чыхмаг үчүн дуанын мәнә бөјүк көмәји дәјди. Борҹлу олдуғум инсанлар мәни тапыб пулларыны ҝери тәләб едәндә үрәјимә горху дүшмүшдү. Бир дәфә Мүгәддәс Китабы охујанда Јешаја 41:10 ајәсиндә бу сөзләрә раст ҝәлдим: «Сәнә көмәк едәҹәјәм». Бу сөзләр мәнә әминлик вә ҹәсарәт верди. Ҝеҹә-ҝүндүз чалышыб бүтүн борҹларымы гајтардым. 2000-ҹи илдә исә вәфтиз олараг Јеһованын Шаһиди олдум.

МӘНӘ ФАЈДАСЫ. Мүгәддәс Китабдан өјрәндикләрим мәни атамла мүнасибәтләрими бәрпа етмәјә тәшвиг етди. О, мәни бағышлады. Аллаһын Кәламына ујғун јашадығым үчүн атам елә севинирди ки. Һәгигәтән дә, демәк олар ки, Мүгәддәс Китаб мәним һәјатымы хилас етди.

Бундан әлавә, пул газаныб өзүм өзүмү тәмин едә билирәм (Ефеслиләрә 4:28; 2 Салониклиләрә 3:12). Һәмчинин јығынҹагда чохлу достлар тапмышам (Марк 10:29, 30). Јеһова мәни өјрәтдији үчүн Она сидг үрәкдән миннәтдарам.

«Дәјишилмәк һеч дә асан дејилди» (ДЕЈВИД ҺАДСОН).

ЈАШЫ: 72

ӨЛКӘ: АВСТРАЛИЈА

ТАРИХЧӘСИ: ӘЈЈАШ

КЕЧМИШИМ. Мән валидејнләримин, Вилли вә Лусинин онбиринҹи ушағы идим. Биз Квинсленд штатынын шималында јерләшән абориҝенләрин (јерли тајфалар) мәскунлашдығы Оурукун кәндиндә јашајырдыг. Оурукун дәниз јахынлығындакы Арчер чајынын ҝөзәл мәнзәрәли саһилиндә јерләширди. Валидејнләримиз бизә ов овламағы вә балыг тутмағы өјрәдирдиләр. О вахтлар бизә пулдан истифадә етмәјә дөвләт тәрәфиндән гадаға гојулмушду, еләҹә дә биз абориҝенләрә јалныз бизим үчүн ајрылмыш әразиләрдә јашамаға иҹазә верилирди.

Валидејнләрим вар гүввәләри илә чалышырдылар ки, мәнә јахшы кејфијјәтләр ашыласынлар вә бизә бөјүкләрә һөрмәт етмәји, малик олдуғумуз шејләр, аз да олса, онлары башгалары илә бөлүшмәји өјрәтсинләр. Буна ҝөрә дә јашадығымыз јердә өзүмүздән бөјүкләрә ата, ана, дајы вә хала кими јанашырдыг.

Атам өләндә мәним 7 јашым вар иди вә биз Оурукундан 150 километр аралыда јерләшән Мапунадакы иҹмаја көчдүк. 12 јашында мән нахырчылығы өјрәнмәјә башладым. Тәхминән гырх ил мүхтәлиф фермаларда ишләдим. Һәјат чох ағыр иди. Тез-тез вә һәддән артыг чох ичдијим үчүн баш ағрыларындан вә проблемләрдән әзијјәт чәкирдим.

Бир дәфә чох ичиб меһманханадан чөлә чыхдым. Ајагүстә ҝүҹлә дајанырдым. Мәни машын вурду. Нөвбәти ики или хәстәханаларда кечирмәли олдум. Бундан сонра нахырчы ишинә артыг гајыда билмәдим.

МҮГӘДДӘС КИТАБ ҺӘЈАТЫМЫ ДӘЈИШДИ. Хәстәханада јатанда таныш бир гадын мәнә «Ҝөзәтчи Гүлләси» вә «Ојанын!» журналлары ҝәтирди. Амма мәктәбдә пис охудуғум үчүн бу журналлары чәтинликлә охујурдум. Исти ҝүнләрин бириндә 83 јашлы бир киши мәним јаныма ҝәлди. Мән она сојуг су ичмәји тәклиф етдим. О, мәнә Мүгәддәс Китаба әсасланан бир нечә әдәбијјат сахлады вә ҝәлән дәфә ҝәлиб орада јазыланлары изаһ етмәк үчүн разылығымы алды. Нәтиҹәдә мүнтәзәм олараг онунла Мүгәддәс Китабы өјрәнмәјә башладым. Баша дүшдүм ки, әҝәр Аллаһа мәгбул олмаг истәјирәмсә, мүтләг өзүмдә вә һәјат тәрзимдә дәјишиклик етмәлијәм.

Өзүмү дәјишмәк һеч дә асан дејилди. Лакин анамдан алдығым тәрбијәнин сајәсиндә мәнимлә Мүгәддәс Китабы өјрәнән јашлы кишијә вә онун өјрәтдији дәјәрли руһани һәгигәтләрә дәрин һөрмәтлә јанашырдым. Буна бахмајараг, һәјатымы Аллаһа һәср етмәјә чәкинирдим. Елә һесаб едирдим ки, Мүгәддәс Китабда јазыланларын һамысыны јахшы билмәлијәм.

Јеһованын Шаһиди олан иш јолдашым јанлыш дүшүнҹә тәрзими дүзәлтмәјә көмәк етди. О, мәним диггәтими Колослулара 1:9, 10 ајәләриндә јазылан сөзләрә јөнәлтди. Орада дејилир ки, биз ‘Аллаһ һаггында дәгиг билијимизи артырмалыјыг’. Иш јолдашымын көмәји сајәсиндә бир шеји баша дүшдүм: мән һәмишә јени шејләр өјрәнәҹәјәм вә буна ҝөрә дә Јеһоваја һәср олунмагдан мәни һеч нә чәкиндирмәмәлидир.

Јеһованын Шаһидләри илә үнсијјәт мәнә хош тәәссүрат бағышлады. Фикир вердим ки, миллијәтиндән асылы олмајараг, онлар бирлик ичиндә Аллаһа ибадәт едирләр. Бу бирлији ҝөрәндә әмин олдум ки, бу, һәгиги ибадәтдир. Буна ҝөрә дә 1985-ҹи илдә вәфтиз олараг Јеһованын Шаһиди олдум.

МӘНӘ ФАЈДАСЫ. Инди мәним охумаг габилијјәтим даһа да јахшылашыб вә башгаларына Мүгәддәс Китабы охумағы вә арашдырмағы өјрәтмәк үчүн һәфтәдә чохлу саат сәрф едирәм. Бундан әлавә, хәстәханада мәнә «Ҝөзәтчи Гүлләси» вә «Ојанын!» журналыны ҝәтирән гадын да Јеһованын Шаһиди олду; инди исә о, мәним севимли һәјат јолдашымдыр. Онунла бирликдә абориҝенләрә Јеһова Аллаһ һаггында өјрәнмәјә көмәк етмәкдән севинҹ дујуруг.

[Һашијә]

[21-ҹи сәһифәдәки јазы]

Һәјат јолдашымла мән абориҝенләрә Јеһова Аллаһ һаггында өјрәнмәјә көмәк етмәкдән севинҹ дујуруг