Аллаһа јахынлашын

«Ал оғлуну»

2 ПАДШАҺЛАР 4:8—37

ӨВЛАДЫН өлүмү гәдәр инсана ағры ҝәтирән һеч нә јохдур. Анҹаг Јеһова Аллаһ әзизләримизи һәјата гајтармаға гадирдир. Биз буна она ҝөрә инанырыг ки, О, гәдимдә бәзи хидмәтчиләринә өлүләри дирилтмәк сәлаһијјәти вермишди. Мәсәлән, 2 Падшаһлар 4:8—37 ајәләриндә Елиша пејғәмбәрин бир оғланы дирилтдији һагда јазылыб.

Һадисә Шунем шәһәриндә баш верир. Ушаглары олмајан бир әр-арвад тез-тез Елишаја гонагпәрвәрлик ҝөстәрир, она јемәк вә ҝеҹәләмәјә јер верирләр. Бир ҝүн пејғәмбәр миннәтдарлыг әламәти олараг гадына дејир: «Бир илдән сонра бу фәсилдә гуҹағында бир оғлун олаҹаг». Вә будур, гадынын бөјүк сәбирсизликлә ҝөзләдији һәмин ан ҝәлиб чатыр: Елишанын дедији кими, онун оғлу олур. Анҹаг гадынын севинҹи узун чәкмир. Бир нечә илдән сонра оғлан атасы илә чөлдә оланда онун ҝүҹлү баш ағрысы тутур. Ушағы евә ҝәтирирләр вә о, «анасынын дизләри үстүндә» ҹан верир (16, 19, 20-ҹи ајәләр). Кәдәр ичиндә олан ана оғлунун ҹәсәдини пејғәмбәрин чарпајысына гојур.

О, Елишаны ҝөрмәк үчүн әринин разылығы илә дәрһал Шунемдән 30 километр аралыда јерләшән Кармел дағына јолланыр. Пејғәмбәрин јанына чатанда нә ағлајыб-сызлајыр, нә дә кәдәрини башга ҹүр бүрузә верир. Ола билсин, о, Елишанын сәләфи Илјас пејғәмбәрин бир дул гадынын оғлуну һәјата гајтардығы һагда ешитмишди (1 Падшаһлар 17:17—23). Бәлкә, бу гадын инаныр ки, Елиша да онун оғлуну дирилдәҹәк. Һәр неҹә олурса-олсун, пејғәмбәр онунла ҝетмәјә разылыг вермәмиш гадын ораны тәрк етмир.

Елиша Шунемә ҝәләндә әввәлләр тез-тез галдығы отаға ҝирир вә чарпајысында ушағын ҹәсәдини ҝөрүр (32-ҹи ајә). Пејғәмбәр Јеһоваја ҝүҹлү дуа едир. Сонра ушағын үстүнә узаныр вә онун бәдәни исинир. Вә будур, ушағын үрәји јенидән дөјүнмәјә башлајыр! Елиша ананы чағырыр вә «ал оғлуну» дејир. Һәмин ан ананын кәдәри һәдсиз севинҹә чеврилир (34, 36-ҹы ајәләр).

Шунемли гадынын оғлунун дирилмәси һагда Мүгәддәс Китабда јазылан мәлумат инсана үмид вә тәсәлли верир. Јеһова өвладларыны итирән валидејнләрин кечирдији ағрылары чох јахшы баша дүшүр. Бундан әлавә, О, бу иткини ҝери гајтармаг истәјир (Әјјуб 14:14, 15). Мүгәддәс Китабда јазылан бу вә диҝәр дирилмә һадисәләри ҝөстәрир ки, Јеһова дирилмәни ҝәләҹәк јени дүнјада даһа ҝениш мигјасда һәјата кечирәҹәкa.

Әлбәттә, Мүгәддәс Китабын вердији дирилмә үмиди әзизләрини итирәнләрин ағры-аҹыларыны тамамилә арадан галдырмыр. Јеҝанә оғлуну итирән Аллаһын садиг бир хидмәтчиси дејир: «Мәним ағрыларым оғлуму јенидән бағрыма басаҹағым ҝүн динәҹәк». Јенидән әзизләринизи ҝөрәҹәјиниз вахты бир тәсәввүрүнүзә ҝәтирин! Аллаһын онлары јенидән һәјата гајтараҹағы фикри ағрыларынызы јүнҝүлләшдирәҹәк. Бу ҹүр ҝөзәл үмид бәхш едән Аллаһ һаггында даһа чох билмәк истәмәздинизми?

[Һашијә]