Гапымыз һамынын үзүнә ачыгдыр!
ҺАМЫМЫЗ Јеһованын Шаһидләринин Бет-Ел кими танынан филиалларындан биринә дәвәт олунуруг. Мүхтәлиф өлкә вә әразиләрдә јерләшән белә мәркәзләрин сајы 118-ә јахындыр. Чохлары Бет-Елә баш чәкәндән вә бурада ҝедән ишлә јахындан таныш оландан сонра өз хош тәәссүратлары илә бөлүшүрләр.
Мүгәддәс Китабы өјрәнән бир ҝәнҹ оғлан Мексика филиалында чијин-чијинә хидмәт едәнләри ҝөрәндән сонра сорушду: «Бурада галмаг үчүн мән нә едә биләрәм?» Она дедиләр: «Әввәлҹә вәфтиз олмалысан. Јахшы оларды ки, сонра пионер — Падшаһлығын таммүддәтли хидмәтчиси кими хидмәт етмәјә башлајасан». Ҹаван оғлан верилмиш мәсләһәтләрә әмәл етди вә ики илдән сонра Бет-Елә дәвәт олунду. Сон 20 ил әрзиндә о, Мексикадакы Бет-Елдә хидмәт етмишдир.
Бет-Ел нәдир?
Ибрани дилиндә «Бет-Ел» сөзү «Аллаһын еви» мәнасыны дашыјыр (Јар. 28:19, һашијә). Бу филиалларын әсас вәзифәси Мүгәддәс Китаб вә она әсасланан әдәбијјатлар һазырлајыб пајламаг, еләҹә дә Јеһованын Шаһидләринин бүтүн дүнјада мөвҹуд олан 100 000-дән чох јығынҹагларына руһани көмәк ҝөстәрмәкдир. 20 000-ә јахын бет-елли — мүхтәлиф мәдәнијјәтләрдән вә сосиал тәбәгәләрдән олан киши вә гадын таммүддәтли хидмәтчи кими Јеһоваја вә руһани баҹы-гардашларына фәдакарлыгла хидмәт едир. Узун илләр әрзиндә бу хидмәтдә оланлар ҝәнҹләрлә бирҝә чијин-чијинә хидмәт едирләр. Бет-Ел аиләсинин үзвләри ахшамлар вә һәфтә сонлары Јеһованын Шаһидләринин јахынлыгда кечирилән јығынҹаглары илә сых үнсијјәтдә олур вә онларла бирҝә хидмәтдә иштирак едирләр. Онлар һәмчинин бош вахтларында Мүгәддәс Китабы өјрәнир, истираһәт едир вә шәхси ишләри илә мәшғул олурлар.
Бет-Ел аиләсинин үзвләри аз мәбләғдә ајлыг хәрҹлик алырлар. Онлар дадлы вә фајдалы јемәкләр јејир, тәмиз вә раһат отагларда јашајырлар. Бу отаглар дәбдәбәли вә тәмтәраглы дејил, анҹаг орада шәраит чох әлверишлидир. Бет-Елә ҝәләнләри тәкҹә сәлигәли биналар, әтраф әразиләр вә низам-интизам јох, һәм дә орада һөкм сүрән хејирхаһлыг вә әмәкдашлыг руһу һејрәтләндирир. Һамынын сәјлә чалышмасына бахмајараг, онлар башгаларына диггәт ҝөстәрмәјә чалышырлар. Бет-Елдә нә сосиал ајры-сечкилик вар, нә дә һеч ким өз тәјинатына ҝөрә диҝәрләриндән үстүн сајылмыр. Истәр тәмизлик иши, истәр бағбанлыг, истәр ашбазлыг, истәрсә дә чапхана вә ја офис иши — бүтүн бунларын һамысы ваҹиб ишләрдир. Бет-Елдә хидмәт едәнләр бирҝә чалышараг Јеһованын Шаһидләринин хидмәтләринә дәстәк олурлар (Колос. 3:23).
Бәзи бет-еллиләрлә танышлыг
Ҝәлин бу бејнәлхалг аиләнин үзвләриндән бәзиләри илә јахындан таныш олаг. Ҝөрәк Бет-Елдә хидмәт етмәјә онлары нә тәшвиг етмишдир? Марјонун нүмунәсинә нәзәр салаг. Јеһованын Шаһиди оланда онун Алманијанын танынмыш автомобил ширкәтләриндән бириндә сәрфәли иши вә вәзифәдә ирәлиләмәк имканы варды. Вәфтизиндән бир аз сонра о, јашадығы өлкәнин Бет-Елиндә көнүллү кими бир һәфтә әрзиндә типографијада хидмәт етмәјә дәвәт олунду. Марјо Бет-Елдә бирликдә хидмәт етдији әмәкдашлары илә дүнјәви ишиндәки инсанлар арасында ајдын фәрги ҝөрдү. Буна ҝөрә дә о, Бет-Елдә таммүддәтли хидмәт етмәк үчүн әризә јазды. Бир чох гоһумлары вә иш јолдашлары онун бу гәрарыны баша дүшә билмәсәләр дә, Марјо Алманија Бет-Елиндә хидмәт етмәкдән бөјүк севинҹ дујур.
Бет-Елдә хидмәт етмәјә башлајанда бир чох баҹы-гардашларын хүсуси тәһсили вә ја баҹарығы олмајыб. Бу, Мексика Бет-Елиндә 15 илдир ки, хидмәт едән Абелин нүмунәсиндән ҝөрүнүр. «Бет-Ел мәним үчүн әсил мәктәб олуб», — дејә о вурғулајыр. «Мән чох мүрәккәб чап машынларыны идарә етмәји өјрәнмишәм. Билирәм ки, бу биликлә Бет-Елдән кәнарда чохлу пул газана биләрәм, анҹаг бурада малик олдуғум сакит вә мәмнунедиҹи һәјат тәрзини исә һеч јердә тапа билмәрәм; чүнки бу дүнјада пул мүгабилиндә ишләнилән иш јерләри проблемләрлә долудур вә орада рәгабәт руһу һөкм сүрүр. Бурада алдығым тәлим руһани ҹәһәтдән инкишаф етмәјимә вә дүнја ҝөрүшүмүн артмасына көмәк едиб. Һәтта ән јахшы университетләрдә белә бу ҹүр руһани фајда әлдә едә билмәздим».
Руһландырыҹы екскурсија
Садәҹә бир дәфә Бет-Елдә олмаг инсанын руһанилијинә мүсбәт тәсир ҝөстәрә биләр. Мексикада јашајан Өмәр буна бариз нүмунәдир. Ушаглыгдан анасы она Мүгәддәс Китаб һәгигәтләрини ашыламышды. Лакин 17 јашында Өмәр јығынҹаг ҝөрүшләринә ҝәлмәјә вә тәблиғ хидмәтиндә иштирак етмәјә сон гојду. Нәтиҹәдә о, пис һәјат тәрзи сүрмәјә башлады вә мадди һәрислијә гуршанды. Сонралар рабитә ширкәтиндә ишләјәндә о, бәзи аваданлыглары нүмајиш етдирмәк үчүн Мексика Бет-Елинә ҝәләнләрин арасында иди. Өмәр дејир: «Ишимизи гуртардыгдан сонра бизим үчүн Бет-Елдә екскурсија кечирдиләр. Ҝөрдүкләрим вә мәнә гаршы олан хејирхаһ мүнасибәт мәни Јеһоваја мәгбул олмајан һәјат тәрзим барәдә дүшүнмәјә вадар етди. Мән дәрһал јығынҹаглара ҝетмәјә вә Мүгәддәс Китабы өјрәнмәјә башладым. Бет-Елдә олдугдан алты ај сонра вәфтиз олундум. Мәни јенидән хидмәтә башламаға тәшвиг етдији үчүн Јеһоваја чох миннәтдарам».
Јапонијадан олан Масаһико да мәсиһчи аиләсиндә бөјүјүб. Буна бахмајараг, о, мәсиһчи һәјат тәрзинин инсаны һәјатда чох шејләрдән мәһрум етдијини дүшүнмәјә башлады. Вахт кечдикҹә, онун башы мәктәб ишләринә гарышды вә о, артыг јығынҹаг ҝөрүшләринә ҝетмир вә тәблиғ хидмәтиндә иштирак етмирди. Масаһико хатырлајыр: «Бир ҝүн аиләмиз вә бир нечә мәсиһчи достларымыз Бет-Елә екскурсијаја ҝетмәк гәрарына ҝәлди. Аиләмин тәкиди илә мән дә онларла ҝетдим. Һеч вахт белә руһланмамышдым. Дүнјәви достларымла үнсијјәт мәнә мәсиһчиләрлә үнсијјәтдә олмаг гәдәр мәмнунлуг ҝәтирмәмишди. Мәндә мәсиһчи кими јашамаға ҝүҹлү истәк јаранды вә Мүгәддәс Китабы өјрәнмәји гәрарлашдырдым». Һал-һазырда Масаһико өз јығынҹағында таммүддәтли хидмәт едир.
Бир баҹы ишләмәк үчүн Франсадан Москваја көчүр. Бурада о, Јеһованын халгы илә әлагәни итирир вә руһән зәифләмәјә башлајыр. О, сәһвләрә јол верир, нәтиҹәдә исә дүнјәви инсанла аилә гурур. Сонра бир баҹы Франсадан ону ҝөрмәјә ҝәлир вә онлар бирликдә Русијанын Санкт-Петербург шәһәриндә јерләшән Бет-Елә ҝедирләр. О јазыр: «Бет-Елдә бизи чох меһрибан гаршыладылар вә бу, мәнә ҝүҹлү тәәссүрат бағышлады. Һамы бир-бирилә сүлһ ичиндә јашајырды вә мән орада Јеһованын руһунун һөкм сүрдүјүнү һисс етдим. Өзүмдән сорушдум: “Јеһованын тәшкилатындан узаглашараг бу бөјүк сәһвә неҹә јол вердим?” Бет-Елдән гајыдандан сонра мәнә көмәк етмәси үчүн Јеһоваја дуа етдим вә гәтијјәтлә Мүгәддәс Китаб һәгигәтләрини гызларыма өјрәтмәјә башладым». Бир заманлар руһән зәифләмиш бу баҹыја руһани көмәк ҝөстәрилди, бунунла јанашы Бет-Елдә олмаг да ону чох мөһкәмләндирди, бундан сонра о, руһән инкишаф етмәјә башлады.
Бәс Бет-Елдә олмаг Јеһованын Шаһидләри илә јахындан таныш олмајан инсанлара неҹә тәсир ҝөстәрир? Сијасәтлә ҹидди мәшғул олан Алберто 1988-ҹи илдә Бразилија Бет-Елиндә олмушду. Орадакы тәмизлик, низам-интизам вә ишләрин ҝизлин ҝөрүлмәмәси она тәсир етди. Бет-Елдән сонра Алберто гајнынын кешиш кими хидмәт етдији руһани семинаријаја ҝедир. Бет-Еллә семинарија арасында зиддијјәт олдуғуну ҝөрән Алберто дејир: «Семинаријада һәр шеј сирдир». Бет-Елдә олдугдан гыса мүддәт сонра о, Мүгәддәс Китабы өјрәнмәјә башлады, сијасәти тәрк етди вә инди јығынҹагда ағсаггал кими хидмәт едир.
Јолунузу ҝөзләјирик!
Чохлары өз өлкәләриндәки филиалда олмаг үчүн чохлу ҝүҹ вә сәј сәрф етмишләр. Мәсәлән, Бразилијадан олан Пауло илә Еухенија Бет-Ели ҝөрмәк үчүн дөрд ил әрзиндә пул јығмышдылар; онлар 2 ҝүн автобусла 3 000 километрлик јол ҝетдиләр. Онлар дејирләр: «Бу, ҝөстәрдијимиз бүтүн сәјләрә дәјди. Инди биз Јеһованын тәшкилаты һаггында даһа ҝениш тәсәввүрә маликик. Мүгәддәс Китабы өјрәтдијимиз инсанлара Бет-Елдә ҝөрүлән ишләр барәдә данышанда бәзән онлар сорушурлар: “Сиз орада олмусунуз?” Инди биз “бәли” дејә ҹаваб верә билирик».
Сизин јашадығыныз өлкәдә вә ја јахын әразидә Бет-Ел вә ја офис вармы? Биз сизи онлары ҝөрмәјә дәвәт едирик. Бет-Елә ҝәлсәниз, әмин ола биләрсиниз ки, сиз хош гаршыланаҹаг вә Јеһоваја хидмәтинизи давам етдирмәк үчүн руһланаҹагсыныз.
[18-ҹи сәһифәдәки шәкил]
Марјо
[18 сәһифәдәки шәкил]
Абел
[18-ҹи сәһифәдәки шәкил]
Алманија
[18-ҹи сәһифәдәки шәкил]
Јапонија
[18-ҹи сәһифәдәки шәкил]
Бразилија