Имдад дејиб чағыранлары ким хилас едәҹәк?

«Еј Аллаһ, падшаһа әдаләт вер... О, имдад дејиб чағыран фәгирләри... гуртарыр» (МӘЗ. 72:1, 12).

1. Давудун һадисәсиндән Аллаһын мәрһәмәти һаггында нә өјрәнирик?

ГӘДИМ Исраил падшаһы Давуда аид едилән бу сөзләр үрәји неҹә дә исиндирир!a Давуд бу сөзләри гәләмә алмаздан илләр әввәл Бат-Шева илә ишләтдији зинаја ҝөрә виҹдан әзабы чәкирди. Һәмин вахт Давуд Јеһоваја јалварырды: «Бол мәрһәмәтинә ҝөрә ганунсузлугларымы сил... Ҝүнаһым даим ҝөзүмүн гаршысындадыр... Мән доғуландан бәри ҝүнаһкарам, ана бәтниндән белә, тәгсиркарам» (Мәз. 51:1—5). Јеһова мәрһәмәтли олдуғундан гејри-камиллијимизи нәзәрә алыр.

2. Мәзмур 72 бизә нәдә көмәк едир?

² Јеһова бизим аҹынаҹаглы вәзијјәтдә олдуғумузу јахшы баша дүшүр. Пејғәмбәрлик олундуғу кими, Аллаһын мәсһ олунмуш падшаһы «имдад дејиб чағыран фәгирләри, мәзлумлары, көмәксизләри» гуртараҹаг. «Јохсула, фәгирә рәһм» едәҹәк, «фәгирләрин ҹанларыны азад» едәҹәк (Мәз. 72:12, 13). Бәс бу неҹә олаҹаг? 72-ҹи мәзмур бу суала ҹаваб верир. Давудун оғлу Сүлејманын падшаһлығына һәср олунмуш бу маһны Аллаһын Оғлу Иса Мәсиһин һөкмранлығы заманы бәшәријјәтин әзаб-әзијјәтләрдән неҹә азад олаҹағы барәдә тәсәввүр јарадыр.

Мәсиһин һөкмранлығы неҹә олаҹаг?

3. Сүлејман Аллаһдан нә хаһиш етди вә неҹә ҹаваб алды?

³ Сүлејманын падшаһ тәјин олунмасындан бир мүддәт сонра аһыл јашларында олан атасы Давуд она хүсуси тапшырыг вериб ону сәдагәтлә јеринә јетирмәсини нәсиһәт етди (1 Пад. 1:32—35; 2:1—3). Сонра Јеһова Сүлејмана ҝеҹә јухуда ҝөрүнүб деди: «Нә истәјирсән, сәнә верим?» Сүлејман Ондан јалныз бир шеј хаһиш етди: «Мәнә елә бир дәрракәли үрәк вер ки, јахшы илә писи ајырд едиб сәнин халгына һөкм едә билим». Сүлејманын бу тәвазөкар хаһишинә ҹаваб олараг Аллаһ она истәдијини, һәтта даһа артығыны да верди (1 Пад. 3:5, 9—13).

4. Сәба мәләкәси Сүлејманын падшаһлығы һаггында нә дүшүнүрдү?

⁴ Јеһованын хејир-дуасы алтында Сүлејманын һөкмранлығы заманы бәшәр тарихиндә ҝөрүнмәмиш сүлһ вә әмин-аманлыг һөкм сүрүрдү (1 Пад. 4:25). Сүлејманын шөһрәтини ҝөрмәјә ҝәләнләрдән бири дә өз бөјүк мәијјәсинин мүшајиәти илә ҝәлән Сәба мәләкәси иди. О, Сүлејмана деди: «Сәнин ишләрин вә һикмәтин барәдә өз өлкәмдә ешитдијим сөзләр дүз имиш... Мәнә һеч ҝөрдүкләримин јарысы данышылмајыб, сәнин һикмәтин вә вар-дөвләтин мән ешитдијим шөһрәтдән үстүндүр» (1 Пад. 10:1, 6, 7). Анҹаг Сүлејмандан даһа мүдрик олан Иса һаглы олараг өзү барәдә демишди: «Сүлејмандан даһа бөјүјү бурададыр» (Мат. 12:42).

Бөјүк Сүлејманын һакимијјәти алтындакы азадлыг

5. Мәзмур 72 ҝәләҹәјә даир һансы тәсәввүрү јарадыр?

⁵ Ҝәлин 72-ҹи мәзмуру нәзәрдән кечирәк вә Бөјүк Сүлејман Иса Мәсиһин рәһбәрлији алтында һансы хејир-дуаларын олаҹағы барәдә өјрәнәк (Мәзмур 72:1—4 ајәләрини оху.) Бу мәзмур Јеһованын «Әмин-аманлыг Һөкмдары» олан Оғлу Иса Мәсиһин чијинләри үзәриндә олан һакимијјәт барәдә нә дүшүндүјүнү ајдын ҝөстәрир (Јешаја 9:6, 7). Аллаһын рәһбәрлији алтында Бөјүк Сүлејман «салеһликлә», «әдаләтлә һакимлик» едәҹәк, «мәзлум халгын һаггыны» верәҹәк вә «фәгирләри хилас» едәҹәк. О, әмин-аманлыгла идарә едәҹәк. Иса јер үзүндә оларкән Миниллик Һөкмранлығын нәләри һәјата кечирәҹәји барәдә тәсәввүр вермишди (Вәһј 20:4).

6. Падшаһлығын инсанлара һансы хејир-дуалар ҝәтирәҹәјини Иса неҹә ҝөстәрди?

⁶ Ҝәлин Иса Мәсиһин кечмишдә ҝөрдүјү бәзи ишләри нәзәрдән кечирәк вә ҝөрәк, онлар Исанын бәшәријјәт үчүн ҝәләҹәкдә нәләр едәҹәји барәдә һансы тәсәввүрү јарадыр. Онун әзаб-әзијјәт чәкәнләрә ҝөстәрдији шәфгәт һисси бизә бөјүк тәәссүрат бағышлајыр (Мат. 9:35, 36; 15:29—31). Мәсәлән, бир нәфәр ҹүзамлы Исаја јахынлашыб јалварыр: «Әҝәр истәсән, мәни саф едә биләрсән». «Истәјирәм, саф ол!» — дејә Иса ҹаваб верди. О андаҹа ҹүзам кечди, һәмин адам тәмизләнди (Марк 1:40—42). Сонра Иса јеҝанә оғлуну итирмиш дул гадына раст ҝәлди. Онун гадына јазығы ҝәлдијиндән ҹәназәјә јахынлашыб деди: «Еј ҝәнҹ, сәнә дејирәм: Дур!» Вә гадынын оғлу һәјата гајытды! (Лука 7:11—15).

7, 8. Исанын шәфа вермәк ҝүҹүнә малик олдуғуну һансы һадисәләр ҝөстәрир?

⁷ Јеһова Исаја мөҹүзәләр ҝөстәрмәк сәлаһијјәти вермишди. «Он ики илдән бәри ајбашы ганахмасы кәсилмәмиш бир гадын»ын нүмунәси буну ајдын ҝөстәрир. О, «бир чох һәкимләр әлиндән хејли әзијјәт чәкмишди, бүтүн варыны сәрф едиб һеч бир фајда ҝөрмәмиш, әксинә вәзијјәти даһа да писләшмишди». Гадын издиһамын арасындан кечәрәк Исаја тохунду вә «ајбашы вахты ганахмасы» оланлар барәдә Ганунун тәләбини позду (Лев. 15:19, 25). Иса өзүндән гүввә чыхдығыны һисс едәрәк она кимин тохундуғуну сорушду. Гадын «горхуб титрәјәрәк ҝәлди, ајағына дөшәнди вә Она бүтүн һәгигәти сөјләди». Иса баша дүшүрдү ки, гадыны сағалдан Јеһовадыр, буна ҝөрә дә хејирхаһлыгла она деди: «Гызым! Иманын сәни хилас етди. Сүлһ илә ҝет вә дәрдиндән сағал» (Марк 5:25—27, 30, 33, 34).

⁸ Иса Аллаһдан алдығы гүввә илә хәстәләрә шәфа верирди, бу да һәмин һадисәләрин шаһиди оланлара ҝүҹлү тәсир бағышлајырды. Мәсәлән, Исанын Дағүстү тәблиғиндән өнҹә инсанлары сағалтдығыны ҝөрәнләрин чоху һејрәт ичиндә идиләр (Лука 6:17—19). Вәфтизчи Јәһја Исанын Мәсиһ олуб-олмадығына әмин олмаг үчүн ики шаҝирдини онун јанына ҝөндәрди. Онлар да ҝәлиб онун «бир чохларыны хәстәликләрдән, дәрдләрдән вә мурдар руһлардан» хилас етдијини, «кор оланлардан бир чохунун ҝөзләрини» ачдығыны ҝөрдүләр. Иса онлара деди: «Ҝедин, нә ҝөрдүјүнүзү вә ешитдијинизи Јәһјаја билдирин: корлар ҝөрүр, ахсаглар јеријир, ҹүзамлылар сафлашыр, карлар ешидир, өлүләр дирилир вә јохсуллара Мүждә тәблиғ олунур» (Лука 7:19—22). Бу хәбәр Јәһјаны неҹә дә үрәкләндирди!

9. Исанын мөҹүзәләри нәјә ишарә едирди?

⁹ Дүздүр, Исанын јерүзү хидмәти заманы инсанлары әзаб-әзијјәтләрдән гуртармасы мүвәггәти иди. Онун сағалтдығы вә дирилтдији инсанлар сонрадан хәстәләниб өлдүләр. Анҹаг Исанын јер үзүндә ҝөстәрдији мөҹүзәләр Мәсиһин һөкмранлығы алтында бәшәријјәтин алаҹағы әбәди хејир-дуалара ишарә едирди.

Гаршыда бизи јерүзү Ҹәннәт ҝөзләјир

10, 11. а) Падшаһлығын хејир-дуалары нә гәдәр сүрәҹәк вә Исанын рәһбәрлији нә илә мүгајисә олунур? б) Јерүзү Ҹәннәтдә Мәсиһлә бирликдә ким олаҹаг вә о, нәјин сајәсиндә әбәди һәјата наил ола биләр?

¹⁰ Ҹәннәтдә һәјатын неҹә олаҹағыны бир тәсәввүр ет. (Мәзмур 72:5—9 ајәләрини оху.) Һәгиги Аллаһын хидмәтчиләри Ҹәннәт һәјатындан ҝүнәшин вә ајын дурдуғу гәдәр, јәни әбәдијјән зөвг алаҹаглар! Падшаһ Иса Мәсиһ «бичилән тарлаја јағыш кими, торпағы суваран ҝур јағыш кими» јер үзүнә тәравәт ҝәтирәҹәк.

¹¹ Бу мәзмурун һәјата кечәҹәјини тәсәввүр едәндә үрәјин јерүзү Ҹәннәтдә јашамаг үмидилә алышыб-јанмырмы? Исанын јанындакы ҹинајәткара: «Сән Мәнимлә бәрабәр ҹәннәтдә олаҹагсан», — дедији сөзләр, шүбһәсиз, ону чох севиндирмишди (Лука 23:43). Исанын Миниллик Һөкмранлығы заманы һәмин адам һәјата гајтарылаҹаг. Әҝәр о, Мәсиһин рәһбәрлијинә табе олса, јер үзүндә әбәдијјән камил сағламлыг вә хошбәхтлик ичиндә өмүр сүрәҹәк.

12. Мәсиһин Миниллик Һөкмранлығы заманы дирилдилән гејри-салеһләрин гаршысында һансы имкан ачылаҹаг?

¹² Бөјүк Сүлејманын, Иса Мәсиһин һакимијјәти алтында салеһләр чичәк ачаҹаг (Мәз. 72:7). Јерүзү хидмәти заманы олдуғу кими, Мәсиһ ҝәләҹәкдә дә бол мәһәббәтли вә шәфгәтли олаҹаг. Аллаһын вәд етдији јени дүнјада, һәтта «салеһ олмајан» дирилдиләнләрә дә Јеһованын нормаларына ујғун јашамаг имканы вериләҹәк (Һәв. иш. 24:15). Әлбәттә, Јеһованын тәләбләринә гаршы чыханларын јашамаларына вә јени дүнјанын сүлһ вә әмин-аманлығыны позмаларына изин верилмәјәҹәк.

13. Падшаһлығын һакимијјәти нә дәрәҹәдә ҝениш олаҹаг вә нәјә ҝөрә орада сүлһ һеч вахт позулмајаҹаг?

¹³ Бөјүк Сүлејманын һөкмранлығынын һүдудларынын нә гәдәр ҝениш олаҹағы нөвбәти сөзләрдән ҝөрүнүр: «Дәниздән-дәнизә гәдәр, Фәратдан јерин уҹгарларына гәдәр сәлтәнәт сүрсүн. Онун гаршысында көчәри халглар диз чөксүн, дүшмәнләри исә гој јерә вурулсун» (Мәз. 72:8, 9). Бәли, Иса Мәсиһин һөкмранлығы бүтүн јер үзүнү әһатә едәҹәк (Зәк. 9:9, 10). Онун һакимијјәтини вә ҝәтирәҹәји хејир-дуалары гијмәтләндирән инсанлар көнүллү итаәткарлыг ҝөстәрәрәк онун гаршысында диз чөкәҹәкләр. Диҝәр тәрәфдән исә, төвбә етмәјән ҝүнаһкарлар кәсилиб атылаҹаг, башга сөзлә десәк, јүз јашында олсалар белә, өләҹәкләр (Јешаја 65:20). Онлар ‘јерә вурулаҹаглар’.

Иса бизә гаршы чох шәфгәтлидир

14, 15. Мәсиһин һиссләримизи баша дүшдүјүнү вә «имдад дејиб чағыран фәгирләри» гуртараҹағыны һарадан билирик?

¹⁴ Ҝүнаһлы бәшәријјәт аҹынаҹаглы вәзијјәтдәдир вә үмидсиз һалда көмәјә еһтијаҹ дујур. Лакин бизим үмидимиз вар. (Мәзмур 72:12—14 ајәләрини оху.) Бөјүк Сүлејман Иса гејри-камил олдуғумузу баша дүшдүјү үчүн бизә шәфгәтлә јанашыр. Үстәлик, Иса салеһлик уғрунда әзаб чәкди, һәмчинин Аллаһ онун сынаглара мәруз галмасына јол верди. Иса о гәдәр емосионал ҝәрҝинлик кечирмишди ки, «тәри јерә даман ган дамлаларына бәнзәјирди» (Лука 22:44). Сонра ишҝәнҹә дирәјиндә оланда: «Аллаһым, Аллаһым! Нә үчүн Мәни тәрк етдин?» — дејә, јүксәк сәслә гышгырды (Мат. 27:45, 46). Гаршылашдығы бүтүн әзаб-әзијјәтләрә вә Шејтанын ону Јеһовадан узаглашдырмаг ҹәһдләринә бахмајараг, Иса Јеһова Аллаһа садиглијини сүбут етди.

¹⁵ Биз әмин ола биләрик ки, Иса бизим ағрыларымызы ҝөрүр вә «имдад дејиб чағыран фәгирләри, мәзлумлары, көмәксизләри» гуртараҹаг. Иса Атасы кими мәһәббәтлә гајғы ҝөстәрәрәк «фәгирләри» ешидәҹәк, «сыныг гәлбләрә шәфа» верәрәк онларын «јараларыны» сарыјаҹаг (Мәз. 69:33; 147:3). О, «бизим кими имтаһан» олундуғу үчүн «зәифликләримиздә бизә аҹыја» билир (Ибр. 4:15). Һал-һазырда Падшаһ Иса Мәсиһин ҝөјләрдән идарә етдијини вә онун бәшәријјәтә раһатлыг ҝәтирмәк арзусунда олдуғуну билмәк неҹә дә хошдур.

16. Нәјә ҝөрә Сүлејман өз тәбәәләринә гаршы шәфгәтли иди?

¹⁶ Мүдриклик вә анлајыш саһиби олдуғу үчүн Сүлејман, шүбһәсиз, «фәгирә рәһм едир»ди. Бундан әлавә, онун һәјатында чохлу кәдәрли вә фаҹиәли анлар олмушду. Онун гардашы Амнон баҹысы Тамары зорламыш, диҝәр гардашы Авшалом исә буна ҝөрә Амнону гәтлә јетирмишди (2 Шам. 13:1, 14, 28, 29). Авшалом Давудун тахтыны әлә кечирди, лакин сонра уғурсузлуға уғрајыб Јоав тәрәфиндән гәтлә јетирилди (2 Шам. 15:10, 14; 18:9, 14). Сонра Сүлејманын гардашы Адонија һакимијјәти әлә кечирмәјә чалышды. Ҹәһди баш тутсајды, о, Сүлејманы өлдүрә биләрди (1 Пад. 1:5). Сүлејманын инсанларын изтирабларыны баша дүшдүјү Јеһованын мәбәдинин ачылыш мәрасиминдә етдији дуасындан ҝөрүнүр. Падшаһ өз тәбәәләри һагда дуа едирди: «Һәр кәс өз бәласыны вә дәрдини билиб бу мәбәдә тәрәф әлләрини ачса, о вахт Сән [Јеһова] ҝөјдән — Өз мәскәниндән ешит вә бағышла. Үрәјини билдијин һәр адама бүтүн әмәлләринә ҝөрә әвәз вер» (2 Салн. 6:29, 30).

17, 18. Аллаһын бәзи хидмәтчиләри һансы әзаб-әзијјәтләрлә үзләширләр вә онлар буна нәјин сајәсиндә таб ҝәтирирләр?

¹⁷ Кечмишдә һәјатымызда баш вермиш мүәјјән һадисәләр бизим үчүн бөјүк бир дәрд ола биләр. Тәхминән 30 јашларында олан Мериb адлы Јеһованын Шаһиди дејир: «Хошбәхт олмаг үчүн чохлу сәбәбләрим олса да, чох вахт кечмишим мәндә хәҹаләт вә икраһ һисси доғурур. Мәни ҝүҹлү кәдәр һисси бүрүјүр вә һөнкүр-һөнкүр ағламаг истәјирәм, санки, бүтүн бунлар дүнән баш вериб. Дәрин көк салмыш хатирәләр нәтиҹәсиндә һәлә дә өзүмү дәјәрсиз вә ҝүнаһкар һисс едирәм».

¹⁸ Аллаһын хидмәтчиләринин чоху бу һиссләрлә танышдыр. Бәс бу һиссләрә таб ҝәтирмәјә онлара нә көмәк едә биләр? Мери дејир: «Јахын достларым вә руһани баҹы-гардашларымла олмаг мәнә хошбәхтлик ҝәтирир. Һәмчинин мән диггәтими Јеһованын ҝәләҹәјә даир вәдинә ҹәмләјирәм вә әминәм ки, кәдәр ҝөз јашларым севинҹ ҝөз јашларына чевриләҹәк» (Мәз. 126:5). Биз үмидимизи Аллаһын Оғлуна — Онун тәјин етдији Рәһбәрә бағламалыјыг. Чүнки Мүгәддәс Китабда онун һаггында пејғәмбәрлик едилмишди: «Јохсула, фәгирә рәһм едир, фәгирләрин ҹанларыны азад едир. Онлары һәдә-горхудан, зоракылыгдан гуртарыр, онун ҝөзүндә бунларын ганы гијмәтлидир» (Мәз. 72:13, 14). Бу, бизим үчүн чох тәсәлливериҹидир!

Јени дүнјада боллуг олаҹаг

19, 20. а) Мәзмур 72-јә әсасән, Падшаһлығын рәһбәрлији алтында һансы проблем өз һәллини тапаҹаг? б) Мәсиһин һакимијјәти алтына олаҹаг хејир-дуалар сәндә һансы һиссләри доғурур вә буна ҝөрә ким иззәтә лајигдир?

¹⁹ Аллаһын гураҹағы јени дүнјада Бөјүк Сүлејманын һакимијјәти алтында салеһ инсанларын неҹә һәјат сүрәҹәкләрини тәсәввүрүнүздә ҹанландырын! Бизә белә бир вәд верилир: «Гој өлкәнин зәмиләри бол олсун, дағларын башында далғалансын» (Мәз. 72:16). Билдијимиз кими, адәтән, дағларын башында тахыл битмир, буна ҝөрә дә, бу сөзләр јер үзүнүн чох мәһсулдар олаҹағына ишарә едир. Сүлејманын һакимијјәти дөврүндә Ливан торпаглары мәһсулдар олдуғу кими, јер үзүндә дә елә боллуг олаҹаг. Бир дүшүнүн: артыг гида чатышмазлығы, аҹлыг, гытлыг олмајаҹаг! О заман һамы «зәнҝин јемәкләрдән... ибарәт зијафәт»дән ләззәт алаҹаг (Јешаја 25:6—8; 35:1, 2).

²⁰ Бүтүн бу хејир-дуалара ҝөрә, илк нөвбәдә, Әбәди Падшаһ вә каинатын Һөкмдары Јеһова Аллаһ иззәтә лајигдир. О заман биз бөјүк севинҹлә бу маһнынын сонундакы ҝөзәл вә үрәји исиндирән сөзләрә гошулаҹағыг: «Гој падшаһын [Иса Мәсиһин] ады әбәди галсын, ҝүнәшин өмрү тәк ады вар олсун. Онун васитәсилә инсанлар хејир-дуа алсын, ону бүтүн милләтләр бәхтијар адландырсын! Алгыш олсун Рәбб Аллаһа, Исраилин Аллаһына, харигәләрин јеҝанә јараданына! Онун шәрәфли ад-санына әбәди алгыш олсун, бүтүн јер үзү Онун иззәтинә бүрүнсүн! Амин! Амин!» (Мәз. 72:17—19).

[Һашијәләр]

Неҹә ҹаваб верәрдиниз?

• 72-ҹи мәзмурда нә һагда пејғәмбәрлик олунур?

• Бөјүк Сүлејман кимдир вә онун һакимијјәтинин һүдудлары нә дәрәҹәдә ҝениш олаҹаг?

• 72-ҹи мәзмурда вәд олунан хејир-дуалар һагда сән нә фикирләширсән?

[29-ҹу сәһифәдәки шәкил]

Сүлејманын һакимијјәти дөврүндәки фираванлыг нәји тәмсил едирди?

[32-ҹи сәһифәдәки шәкил]

Бөјүк Сүлејманын һакимијјәти алтында Ҹәннәтдә јашамаг үчүн сәј ҝөстәрмәјимиз һәр шејә дәјәр