Јеһованын хејир-дуаларыны сәјлә ахтарын
‘Аллаһ Ону ҹидд-ҹәһдлә ахтаранлара мүкафат верир’ (ИБР. 11:6).
1, 2. а) Бир чох инсанлар Аллаһын хејир-дуаларыны неҹә ахтарырлар? б) Нәјә ҝөрә хүсусилә биз Јеһованын хејир-дуаларыны ахтармалыјыг?
«ГОЈ Аллаһ сәнә хејир-дуа версин!» Бәзи өлкәләрдә асгыран инсанын тамамилә јад адамларын дилиндән бу сөзләри ешитмәси ади һалдыр. Мүхтәлиф динләрин руһаниләри инсанлара, һејванлара вә ҹансыз әшјалара хејир-дуа верирләр. Бир чохлары хејир-дуалар алмаг үмиди илә мүгәддәс һесаб олунан јерләри зијарәт едирләр. Сијасәтчиләр исә Аллаһдан халглары үчүн хејир-дуа диләјирләр. Неҹә дүшүнүрсүнүз, белә хаһишләр етмәк мүнасибдирми? Үмумијјәтлә, Аллаһдан хејир-дуа диләмәјин мәнасы вар? Бәс Аллаһ кимләрә хејир-дуа верир вә нәјә ҝөрә?
2 Јеһова габагҹадан демишди ки, ахыр ҝүнләрдә бүтүн халглардан Өзү үчүн тәмиз вә сүлһпәрвәр бир халг тәшкил едәҹәк; бу халг, нифрәтә вә мүгавимәтләрә бахмајараг, Падшаһлыг һаггында хош хәбәри јерин уҹгарларынадәк бәјан едәҹәк (Јешаја 2:2—4; Мат. 24:14; Вәһј 7:9, 14). Аллаһын халгынын үзвү олмаг бөјүк мәсулијјәтдир. Бу мәсулијјәти үзәрләринә ҝөтүрәнләр Аллаһын хејир-дуаларыны алмаг истәјирләр, һәм дә буна еһтијаҹлары вар, чүнки бунсуз уғур газанмаг гејри-мүмкүндүр (Мәз. 127:1). Бәс биз Аллаһын хејир-дуаларыны неҹә ала биләрик?
Итаәткарлыг бол-бол хејир-дуалар ҝәтирир
3. Исраиллиләр итаәткар олдуглары тәгдирдә нә әлдә едәҹәкдиләр?
3 Сүлејманын мәсәлләри 10:6, 7 ајәләрини оху. Вәд едилмиш дијара дахил олмаздан әввәл Јеһова исраиллиләрә демишди ки, Онун сөзүнә риајәт етдикләри тәгдирдә, онлары мүдафиә едәҹәк, фираван јашамаларынын гајғысына галаҹаг вә мүтләг хејир-дуаландыраҹаг (Ганун. т. 28:1, 2).
4. Әсил итаәткарлыг нәдир?
4 Исраиллиләр Аллаһа һансы әһвал-руһијјә илә итаәт етмәли идиләр? Мусанын Ганунунда дејилирди ки, халг Јеһоваја ‘севинҹлә вә хошлугла итаәт етмәсә’, бу, Онун наразылығына сәбәб олаҹаг. (Ганунун тәкрары 28:45—47 ајәләрини оху.) Һејванлар вә ҹинләр гејри-иради шәкилдә итаәткарлыг ҝөстәрирләр, лакин Јеһова бундан даһа бөјүк итаәткарлыға лајигдир (Марк 1:27; Јаг. 3:3). Аллаһа үрәкдән итаәткарлыг ҝөстәрмәк мәһәббәтин тәзаһүрүдүр. Белә итаәткарлығын сәҹијјәви ҹәһәти Јеһованын әмрләринин ағыр олмамасына вә «Ону ҹидд-ҹәһдлә ахтаранлара мүкафат вердијинә» иман етмәкдән ирәли ҝәлән севинҹдир (Ибр. 11:6; 1 Јәһ. 5:3).
5. Јеһованын вәдинә етибар етмәк исраиллиләрә Ганунунун тәкрары
5 Ҝәлин Ганунун тәкрары 15:7, 8 ајәләринә (Оху) нәзәр салаг вә ҝөрәк, исраиллиләр бу гануна риајәт етмәклә Јеһованын сөзүнә гулаг асдыгларыны вә Она етибар етдикләрини неҹә ҝөстәрә биләрдиләр. Һәмин гануну ҹандәрди јеринә јетирән исраилли касыб сојдашына әл тутмуш олса да, бу, Аллаһын халгы арасында јахшы мүнасибәтләрин вә ҝөзәл аб-һаванын олмасына ҝәтириб чыхарардымы? Ән әсасы, белә давранмагла исраилли Јеһованын Өз хидмәтчиләринин гајғысына галмаға гадир олдуғуна иман етдијини вә Онун сәхавәтлилијини әкс етдирмәк имканыны гијмәтләндирдијини ҝөстәрмиш олардымы? Чәтин ки! Аллаһ сәмими-гәлбдән сәхавәт ҝөстәрән инсанын үрәјинин вәзијјәтини ҝөрүрдү вә сөз вермишди ки, әл атдығы һәр ишә бәрәкәт верәҹәк (Ганун. т. 15:10). Аллаһын бу вәдинә иман едән исраилли Онун ганунуна үрәкдән риајәт едир, бунун да сајәсиндә чохлу хејир-дуалар бичирди (Сүл. мәс. 28:20).
15:7, 8 ајәләриндәки гануна риајәт етмәјә неҹә көмәк едирди?
6. Ибраниләрә 11:6 ајәси бизи нәјә әмин етмәлидир?
6 Ибраниләрә 11:6 ајәсинә әсасән, Јеһовадан хејир-дуа алмаг үчүн Онун мүкафат вердијинә иман етмәк һәлә аздыр. Фикир верин ки, Јеһова јалныз Ону «ҹидд-ҹәһдлә ахтаранлара» мүкафат верир. Бу ајәдә истифадә олунан јунан сөзү мәгсәдјөнлү шәкилдә сәј ҝөстәрмәји нәзәрдә тутур. Бу ајә бизи әмин едир ки, вар ҝүҹүмүзлә чалышсаг, хејир-дуа алаҹағыг. Бу хејир-дуалары бизә верән «јалан данышмајан» ваһид һәгиги Аллаһдыр (Тит. 1:2). О, минилликләр әрзиндә вәдләринин тамамилә етибара лајиг олдуғуну сүбут етмишдир. Онун сөзләри һеч вахт боша чыхмыр, һәмишә јеринә јетир (Јешаја 55:11). Буна ҝөрә дә биз там әмин ола биләрик ки, әсил иман тәзаһүр етдирдијимиз тәгдирдә мүкафатсыз галмајаҹағыг.
7. Ибраһимин нәслиндән олан ‘өвлад’ васитәсилә хејир-дуалар алмаг үчүн биздән нә тәләб олунур?
7 Иса Мәсиһ Ибраһимин нәслиндән олан ‘өвладын’ әсас, мәсһ олунмуш мәсиһчиләр исә икинҹи дәрәҹәли һиссәсини тәшкил едир. Онлара «Өз һејрәтамиз нуруна чағыранын “әзәмәтли кејфијјәтләрини бәјан етмәк”» тапшырылыб (Галат. 3:7—9, 14, 16, 26—29; 1 Пет. 2:9). Биз Иса Мәсиһин өз әмлакынын идарәсини тапшырдығы инсанларын рәһбәрлијини гәбул етмириксә, Јеһова илә јахшы мүнасибәтләр гураҹағымызы ағлымыздан белә кечирмәмәлијик. «Садиг вә ағыллы нөкәр»ин көмәји олмадан биз нә Аллаһын Кәламында охудугларымызын мәғзини там баша дүшә, нә дә ки онлары тәтбиг едә биләрдик (Мат. 24:45—47). Мүгәддәс Јазылардан өјрәндикләримизи һәјатымызда тәтбиг едириксә, Аллаһдан хејир-дуалар алаҹағымыза әмин ола биләрик.
Диггәтиниз Аллаһын ирадәсиндә олсун
8, 9. Јагуб Јеһованын вәдинә ујғун олараг неҹә давранды?
8 Аллаһын хејир-дуаларыны алмаг үчүн бөјүк сәј ҝөстәрмәк лазым олдуғуну ешидәндә, јәгин ки, илк олараг јадыныза Јагубун нүмунәси дүшүр. О, Аллаһын Ибраһимә вердији вәдин неҹә јеринә јетәҹәјини билмәсә дә, зәррә гәдәр дә шүбһә етмирди ки, Јеһова онун бабасынын нәслини артыраҹаг вә онлар ҝәләҹәкдә бөјүк бир халг олаҹаглар. Ерамыздан әввәл 1781-ҹи илдә Јагуб өзүнә һәјат јолдашы тапмаг үчүн Харана јола дүшдү. Онун мәгсәди садәҹә олараг ҝөзәл-ҝөјчәк һәмдәм тапмаг јох, ушагларына јахшы ана олаҹаг вә Јеһоваја ибадәт едән руһән јеткин бир гызла аилә гурмаг иди.
9 Мүгәддәс Китабда Јагубун гоһуму Рәһиләјә раст ҝәлдијини охујуруг. О, Рәһиләни севди вә онун үчүн атасы Лавана једди ил хидмәт етмәјә разылыг верди. Бу, садәҹә олараг унудулмаз ешг маҹәрасы дејилди. Јагубун һәр шејә гадир олан Јеһова Аллаһын бабасы Ибраһимә вердији, сонра да атасы Исһага тәкрарән сөјләдији вәддән хәбәри варды (Јар. 18:18; 22:17, 18; 26:3—5, 24, 25). Исһаг да, өз нөвбәсиндә, оғлу Јагуба демишди: «Күлли-Ихтијар Аллаһ сәнә хејир-дуа версин, сәни бәһәрли едиб нәслини чохалтсын, сәндән чохлу халглар төрәсин; Ибраһимин хејир-дуасыны сәнә вә сәнинлә бирҝә нәслинә версин ки, Аллаһын Ибраһимә вердији торпағы — гәриб кими јашадығын торпағы ирс олараг аласан» (Јар. 28:3, 4). Беләликлә, јахшы гыз тапыб аилә гурмаг үчүн Јагубун ҝөстәрдији сәјләр Јеһованын вердији вәдә етибар етмәсиндән ирәли ҝәлирди.
10. Нәјә ҝөрә Јеһова Јагуба үрәкдән хејир-дуа верди?
10 Јагуб аиләси үчүн вар-дөвләт топламаг барәдә дүшүнмүрдү. О, бүтүн фикрини Јеһованын вәдинә вә Онун ирадәсинин јеринә јетирилмәсинә ҹәмләмишди. Јагуб Аллаһын хејир-дуаларыны алмаг үчүн, манеәләрә бахмајараг, әлиндән ҝәләни етмәк әзминдә иди. О, аһыл јашларына гәдәр бу әзмини горујуб сахлады вә Јеһова буна ҝөрә она хејир-дуа верди. (Јарадылыш 32:24—29 ајәләрини оху.)
11. Јеһованын бизә ачыгладығы нијјәтини биләрәк бүтүн ҝүҹүмүзү нәјә јөнәлтмәлијик?
11 Биз дә, Јагуб кими, Јеһованын Өз нијјәтини неҹә һәјата кечирәҹәјини бүтүн тәфсилатлары илә билмирик. Бунунла белә, Аллаһын Кәламыны арашдырмағымызын сајәсиндә «Јеһованын ҝүнү»ндә нәләрин баш верәҹәјинә даир үмуми тәсәввүрүмүз вар (2 Пет. 3:10, 17). Мисал үчүн, биз һәмин ҝүнүн нә вахт ҝәләҹәјини билмәсәк дә, о ҝүнүн астанасында јашадығымыздан хәбәрдарыг. Биз инанырыг ки, Аллаһын Кәламында дејилдији кими, галан гыса вахт әрзиндә шаһидлик етмәклә һәм өзүмүзү, һәм дә бизи динләјәнләри хилас етмиш олаҹағыг (1 Тим. 4:16).
12. Биз нәјә әмин олмалыјыг?
12 Биз јахшы баша дүшүрүк ки, сон истәнилән ан ҝәлә биләр; Јеһова хош хәбәрин јер үзүндә јашајан һәр бир инсана ајры-ајрылыгда чатдырылана гәдәр ҝөзләмәк фикриндә дејил (Мат. 10:23). Бундан әлавә, хош хәбәри сәмәрәли шәкилдә тәблиғ етмәјимиз үчүн бизә јахшы рәһбәрлик верилир. Әлимиздә олан һәр бир вәсаитдән истифадә едәрәк бу тапшырығы иманла вә вар ҝүҹүмүзлә јеринә јетиририк. Биз тәблиғ етдијимиз әразидә нә гәдәр инсанын хош хәбәрә һај верәҹәјини габагҹадан дејә билмәрик. (Ваиз 11:5, 6 ајәләрини оху.) Бизим ишимиз тәблиғ етмәкдир вә бу заман там әмин ола биләрик ки, Јеһова хејир-дуасыны биздән әсирҝәмәјәҹәк (1 Кор. 3:6, 7). О, бүтүн сәјләримизи ҝөрүр вә мүгәддәс руһу васитәсилә бизә лазыми рәһбәрлији тәгдим едәҹәк. Буна зәррә гәдәр дә олсун шүбһә етмәмәлијик (Мәз. 32:8).
Мүгәддәс руһун рәһбәрлијини ахтарын
13, 14.Мүгәддәс руһун Аллаһын хидмәтчиләринә лазыми баҹарыг вердији нәдән ҝөрүнүр?
13 Туталым, биз дүшүнүрүк ки, һансыса тапшырығы јеринә јетирмәк вә ја тәблиғ етмәк үчүн лазыми баҹарығымыз јохдур. Белә олан һалда Јеһовадан хаһиш едә биләрик ки, һәр һансы бир баҹарығымызы тәкмилләшдирмәк үчүн бизә Өз мүгәддәс руһундан версин. (Лука 11:13 ајәсини оху.) Әввәлки шәраитимиздән вә тәҹрүбәмиздән асылы олмајараг, Аллаһын руһу бизә һал-һазыркы иш вә ја тапшырыг үчүн лазым олан баҹарыг вә кејфијјәтләрә јијәләнмәјә көмәк едә биләр. Мәсәлән, Аллаһын руһу Мисирин көләлијиндән тәзәҹә чыхмыш, малдарлыгла мәшғул олан вә үмумијјәтлә дөјүш тәҹрүбәләри олмајан исраиллиләрә дүшмәнләри мәғлуб етмәк үчүн ҝүҹ вермишди (Чых. 17:8—13). Бир гәдәр сонра елә һәмин руһ Мусанын Аллаһдан алдығы план үзрә мүгәддәс мәскәни тикмәк кими усталыг тәләб едән иши ҝөрмәк үчүн Бесалел илә Оһолиава лазыми баҹарыг верди (Чых. 31:2—6; 35:30—35).
14 Мүасир дөврдә тәшкилатда чап ишинә башламаг зәрурәти јарананда бу гүдрәтли руһ Аллаһын хидмәтчиләринә бөјүк дәстәк олду. О вахтлар мәтбәәнин нәзарәтчиси олан Роберт Мартин јаздығы мәктубда 1927-ҹи иләдәк әлдә олунан наилијјәтләрдән сөз ачыр: «Рәббимиз гапыны вахтында үзүмүзә ачды вә бөјүк ротасија (чап) машыны бизим әлимизә — онун гурулушундан вә неҹә ишләдијиндән хәбәри олмајан әлләрә дүшдү. Лакин Рәббимиз өзүнү тамамилә Она һәср едән бәндәләринә неҹә көмәк етмәји јахшы билир... Бир нечә һәфтәдән сонра биз ону ишә салмаға мүвәффәг олдуг вә о, индијәдәк ишләјир; һеч истеһсалчылар да ағылларына ҝәтирә билмәздиләр ки, бу машын белә бир иши ҝөрмәјә гадирдир». Јеһова бу ҝүн дә хидмәтчиләринин бу ҹүр сәјләринә хејир-дуа верир.
15. Ромалылара 8:11 ајәси ширникдириҹи тәсирләрлә вә ҹисмани арзуларла мүбаризә апаранлары неҹә руһландыра биләр?
15 Јеһованын руһу мүхтәлиф ҹүр фәалијјәт ҝөстәрир. Аллаһын бүтүн хидмәтчиләринә әлчатан олан бу руһун көмәји илә онлар бөјүк манеәләри аша биләрләр. Бәс әҝәр ширникдириҹи тәсирләр вә ҹисмани арзуларла мүбаризә апарырыгса, онда неҹә? Павелин Ромалылара 7:21, 25 вә 8:11 ајәләриндәки сөзләри бизә ҝүҹ верә биләр. Һәгигәтән дә, «Исаны дирилтмиш Шәхсин руһу» ҹисмани арзуларла мүбаризәдә галиб ҝәлмәјимиз үчүн бизә дә ҝүҹ вермәјә гадирдир. Бу сөзләр руһла мәсһ олунмуш мәсиһчиләрә үнванланса да, онун әсасыны тәшкил едән принсип Аллаһын бүтүн хидмәтчиләринә аиддир. Һәјат газанмаг үчүн һәр биримиз Мәсиһә иман ҝәтирмәли, дүзҝүн олмајан ҹисмани арзулары өлдүрмәли вә руһун рәһбәрлијинә әсасән јашамалыјыг.
16. Аллаһдан мүгәддәс руһ алмаг үчүн биздән нә тәләб олунур?
16 Әлимизи әлимизин үстүнә гојуб Аллаһдан мүгәддәс руһ алаҹағымыза үмид едә биләрикми? Хејр. Аллаһдан мүгәддәс руһ диләмәклә јанашы, биз бу руһун тәсири алтында јазылан Кәламы илә гидаланмалыјыг (Сүл. мәс. 2:1—6). Бундан әлавә, Аллаһын мүгәддәс руһу мәсиһчи јығынҹағында фәалијјәт ҝөстәрир. Һәр бир мәсиһчи ҝөрүшүндә иштирак етмәклә «руһун јығынҹаглара нә дедијини» ешитмәк истәдијимизи ҝөстәрмиш олуруг (Вәһј 3:6). Үстәлик, өјрәндикләримизи тәвазөкарлыгла тәтбиг етмәлијик. Сүлејманын мәсәлләри 1:23 ајәсиндә бизә мәсләһәт верилир: «Мәзәммәтимдән дүзәлсәјдиниз, Руһуму үстүнүзә төкәрдим». Бәли, Аллаһ Өз мүгәддәс руһуну јалныз Она бир Һөкмдар кими «итаәт едәнләрә» верир (Һәв. иш. 5:32).
17. Аллаһын сәјләримизә хејир-дуа вермәсинин бизә тәсирини нә илә мүгајисә етмәк олар?
17 Аллаһдан хејир-дуалар алмаг үчүн биздән сәј ҝөстәрмәк тәләб олунса да, јадда сахламалыјыг ки, бу, Јеһованын Өз халгына бол-бол ҝөзәл әнамлар вермәсинин јеҝанә сәбәби дејил. Онун сәјләримизә хејир-дуа вермәсинин бизә тәсирини сағлам гиданын организмимизә ҝәтирдији фајда илә мүгајисә етмәк олар. Аллаһ организмимизи елә јарадыб ки, биз једијимиз шејләрдән һәзз ала, һәм дә онлардан гидалы маддәләр әлдә едә билирик. Гиданы верән дә Одур. Биз нә једијимиз әрзагларда гидалы маддәләрин неҹә әмәлә ҝәлдијини ахыра гәдәр баша дүшүр, нә дә ки чохларымыз онларын бәдәнимиздә неҹә енержијә чеврилдијини изаһ едә билирик. Тәкҹә ону билирик ки, белә бир просес ҝедир, бизә исә онлары гәбул етмәк галыр. Әҝәр биз тәркибиндә бәсләјиҹи маддәләр олан гидалар гәбул едәриксә, бунун фајдасы даһа чох олар. Ејнилә, Јеһова әбәди һәјаты әлдә етмәк истәјәнләрин гаршысына мүәјјән тәләбләр гојур вә бу тәләбләрә ҹаваб вермәјимиз үчүн бизә көмәк әлини узадыр. Бәли, ишин чох һиссәсини ҝөрән Јеһовадыр вә буна ҝөрә О, һәмдә лајигдир. Бунунла белә, биз Аллаһдан хејир-дуа алмаг үчүн ирадәсинә ујғун давранараг Онунла әмәкдашлыг етмәлијик (Һаг. 2:18, 19).
18. Сиз нә етмәк әзминдәсиниз вә нәјә ҝөрә?
18 Сизә һәвалә олунан һәр бир иши ҹанла-башла ҝөрүн. Һәр шејдә Јеһоваја ҝүвәнин вә О, сизин ишинизи аванд едәҹәк (Марк 11:23, 24). Белә етдијиниз тәгдирдә әмин ола биләрсиниз ки, «ахтаран тапыр» (Мат. 7:8). Руһла мәсһ олунмушларын мүкафаты ҝөјләрдә ‘һәјат таҹы’ олаҹаг (Јаг. 1:12). Ибраһимин нәслиндән олан өвлад васитәсилә хејир-дуалар алмаға сәј ҝөстәрән Мәсиһин ‘башга гојунлары’ исә онун нөвбәти сөзләрини ешидәндә севинҹдән ҹуша ҝәләҹәкләр. О демишди: «Еј Атамын хејир-дуасыны алмыш бәндәләр! Ҝәлин, әзәлдән бәри сизин үчүн һазырланмыш падшаһлығы мирас алын» (Јәһ. 10:16; Мат. 25:34). Бәли, «Рәбдән бәрәкәт алан өлкәни [«јери», КМ] мүлк олараг алаҹаг,.. орада әбәди мәскән салаҹаг» (Мәз. 37:22, 29).
Изаһ едә биләрсинизми?
• Әсил итаәткарлыг нә демәкдир?
• Аллаһын хејир-дуаларыны алмаг үчүн биздән нә тәләб олунур?
• Аллаһын мүгәддәс руһуну алмаг үчүн нә етмәлијик вә бу руһ бизә һансы фајданы ҝәтирә биләр?
[9-ҹу сәһифәдәки шәкилләр]
Јагуб Јеһовадан хејир-дуа алмаг үчүн мәләклә ҝүләшди.
Сән дә хејир-дуа алмаг үчүн сәј ҝөстәрирсәнми?
[10-ҹу сәһифәдәки шәкил]
Аллаһын руһу Бесалел илә Оһолиава лазыми баҹарыг верди