Болгарыстанда кечирилән кампанијада әлдә олунан наилијјәтләр
«Мәһсул бол, ишчи исә аздыр. Буна ҝөрә дә бичин Саһибинә јалварын ки, мәһсулу јығмаг үчүн бичинчи ҝөндәрсин» (МАТ. 9:37, 38).
ИСАНЫН дедији бу сөзләр Авропанын ҹәнуб-шәргиндә, Балкан јарымадасында јерләшән Болгарыстандакы вәзијјәтә неҹә дә ујғун ҝәлир! Әһалиси једди милјондан чох олан бу ҝөзәл өлкәдә хош хәбәри бәјан етмәк үчүн ишчиләрә, һәгигәтән дә, бөјүк еһтијаҹ вар. Болгарыстанда тәхминән 1 700 тәблиғчи олса да, онлар хош хәбәри өлкәнин бүтүн әразиләринә чатдыра билмирләр. Буна ҝөрә дә Рәһбәрлик Шурасы разылыг верди ки, 2009-ҹу илдә бу өлкәдә хүсуси кампанија кечирилсин вә бу кампанијада иштирак етмәләри үчүн Авропанын бир нечә өлкәсиндән болгар дилини билән Шаһидләр дәвәт олунсун. Јај ајларына тәсадүф едән кампанија једди һәфтә давам етмәли вә 2009-ҹу илин 14—16 август тарихләриндә Софијада кечириләҹәк «Ојаг дурун!» конгресиндә баша чатмалы иди.
Ҝөзләнилмәз сајда көнүллү
Софијада јерләшән филиалдакы гардашлара мараглы иди, ҝөрәсән, Франсадан, Алманијадан, Јунаныстандан, Полшадан вә Испанијадан нә гәдәр тәблиғчи бу чағырыша һај верәҹәк. Чүнки онлар Болгарыстана өз һесабларына ҝәлмәли вә мәзунијјәт вахтларыны тәблиғә сәрф етмәли идиләр. Ҝүнү-ҝүндән көнүллүләрин сајынын артараг нәһајәтдә 292 нәфәрә чатдығыны ҝөрмәк неҹә дә севиндириҹи иди! Көнүллүләрин сајынын чох олмасы онлары Болгарыстанын үч шәһәринә — Казанлыка, Санданскијә вә Силистраја тәјин етмәјә имкан верирди. Рајон нәзарәтчиләри јерли пионерләри вә тәблиғчиләри дә бу кампанијаја гошулмаға чағырдылар. Нәтиҹәдә, хош хәбәрин тәк-түк һалларда тәблиғ едилдији әразиләрә дүз 382 көнүллү ҝөндәрилди вә онлар һәмин әразиләрдә ҹанла-башла шаһидлик вердиләр.
Һәмин шәһәрләрә јахын әразиләрдә јерләшән јығынҹагларын гардашлары көнүллүләрин галмалары үчүн јер тапмаг мәгсәдилә габагҹадан ораја ҝөндәрилмишдиләр. Онлар кирајәјә мәнзилләр ҝөтүрмүш вә меһманханаларда уҹуз отаглар сифариш етмишдиләр. Јерли гардашлар јорулмаг билмәдән көнүллүләри јербәјер етмәклә јанашы, онлара бир чох мәсәләләрдә көмәк едирдиләр. Һәр үч шәһәрдә ҝөрүшләрин кечирилмәси үчүн кирајәјә јер ҝөтүрүлмүшдү. Јығынҹаг ҝөрүшләрини көнүллүләр арасындан олан гардашлар кечирирди. Бир нәфәр дә олсун Јеһованын Шаһиди олмајан бу әразиләрдә 50 тәблиғчинин ҝөрүшләрдә иштирак едәрәк Јеһоваја һәмд етдијини ҝөрмәк неҹә дә үрәкачан иди!
Кампанија илә әлагәдар башга өлкәләрдән бураја ҝәлән гардашлар әлләриндән ҝәләни әсирҝәмирдиләр. Болгарыстанда јај ајларында һаванын һәрарәти, адәтән, 40 дәрәҹәдән јүксәк олур. Лакин хош хәбәри тәблиғ етмәк арзусу илә алышыб-јанан бу баҹы-гардашлары һеч нә дајандыра билмәзди. Дунај чајынын саһилиндә јерләшән вә 50 000-дән чох әһалиси олан Силистра шәһәриндә илк үч һәфтә әрзиндә әсаслы шаһидлик верилди. Бу сәбәбдән, гардашлар гоншу кәндләрдә дә тәблиғ етмәјә башладылар вә һәтта Силистрадан 55 километр гәрбдә јерләшән Тутракан шәһәринә ҝәлиб чыхдылар. Адәтән, онлар тәблиғә сәһәр онун јарысында башлајырдылар. Наһар етдикдән сонра хидмәтләрини ахшам саат једдијә, бәзән бундан да ҝеҹ вахта гәдәр давам етдирирдиләр. Казанлык вә Сандански шәһәрләриндә көнүллүләрин сәјлә тәблиғ етмәси сајәсиндә дә хош хәбәр әтраф кәндләрдә вә шәһәрләрдә тәблиғ олунду.
Наилијјәтләр барәдә
Бу једди һәфтә әрзиндә мөһтәшәм шаһидлик верилди. Һәвариләрин ҝүнләриндә олдуғу кими, бу шәһәрләрин сакинләринин «сиз өз тәлимләринизи бүтүн шәһәрә јајдыныз» сөзләрини демәјә там әсаслары варды (Һәв. иш. 5:28). Кампанијада иштирак едән тәблиғчиләр 50 000-ә јахын журнал пајладылар вә 482 нәфәрлә Мүгәддәс Китабы өјрәнмәјә башладылар. Севиндириҹи һалдыр ки, 2009-ҹу ил сентјабрын 1-дә Силистрада јығынҹаг тәшкил олунду. Казанлык вә Санданскидә исә һал-һазырда груплар фәалијјәт ҝөстәрир. Хош хәбәри илк дәфә бу кампанија заманы ешидәнләрин руһани ҹәһәтдән тәрәгги етдијини ҝөрмәк чох хошдур!
Кампанијанын илк һәфтәси Испанијадан ҝәлән вә хүсуси пионер кими хидмәт едән бир баҹы Силистрада күчәдә гәзет сатан Карина адлы гадына тәблиғ етди. О, һәгигәтә бөјүк мараг ҝөстәрди вә јығынҹаг ҝөрүшүнә ҝәлди. Карина Мүгәддәс Китаб өјрәнмәсинә һәвәслә разылыг верди. Әри атеист олдуғундан өјрәнмәни паркда кечирмәји хаһиш етди. Өјрәнмәдә онун ики гызы да иштирак едирди. Каринанын бөјүк гызы Даниела һәгигәти бөјүк һәвәслә өјрәнирди. О, бир һәфтәнин ичиндә «Мүгәддәс Китаб өјрәдир» китабыны башдан-ајаға кими охуду вә баша дүшдү ки, Аллаһын Кәламына әсасән ибадәтдә бүтләрдән истифадә етмәк олмаз. Даниела елә һәмин ҝүн охудугларыны һәјата кечирди. Сонра о, һәгигәти достлары илә бөлүшмәјә башлады. Илк дәфә јығынҹаға ҝәләндән үч һәфтә сонра Карина онунла Мүгәддәс Китабы өјрәнән баҹыја белә деди: «Өзүмү сизләрдән бири һесаб едирәм. Сизин кими тәблиғ етмәк үчүн нә етмәлијәм?» Даниела, анасы вә кичик баҹысы индијә кими руһани ҹәһәтдән инкишаф едирләр.
Казанлык шәһәриндә Италијадан ҝәлән Орлин адлы болгар гардаш хидмәтдән евә гајыдаркән паркда скамјада әјләшән ики ҝәнҹә тәблиғ етди. Онларын һәр икисинә «Мүгәддәс Китаб өјрәдир» китабыны верди вә сәһәриси ҝүн ҝәләҹәјинә сөз верди. Онлар ҝөрүшәндә Орлин онлардан бири илә, Светомирлә Мүгәддәс Китабы өјрәнмәјә башлады. Доггуз ҝүнүн ичиндә онлар дүз сәккиз дәфә ҝөрүшдүләр. Светомир: «Сизинлә ҝөрүшмәздән ҹәми ики ҝүн әввәл Аллаһа јалварырдым ки, Өзүнү мәнә танытсын. Һәмчинин сөз вердим ки, әҝәр мәнә көмәк етсә, бүтүн һәјатымы Она һәср едәҹәјәм», — дејә етираф етди. Орлин Италијаја гајыдандан сонра јерли гардашлар онунла Мүгәддәс Китабы өјрәнмәји давам етдирдиләр вә о, һал-һазырда һәгигәтдә ирәлиләјишләр едир.
Фәдакарлыгларына ҝөрә бол-бол хејир-дуа аланлар
Бәс өз һесабларына Болгарыстана ҝәлиб мәзунијјәт ҝүнләрини хош хәбәрин тәблиғинә сәрф едән баҹы-гардашларын өзләри бу кампанија барәдә нә дүшүнүрләр? Испанијада хидмәт едән бир ағсаггал өз һиссләрини бу сөзләрлә ифадә едир: «Испанијада болгар саһәсиндә хидмәт едән баҹы-гардашлар бу кампанијадан сонра бир-биринә даһа јахын олдулар вә бу, онлара бөјүк тәсир бағышлады». Италијадан олан бир әр-арвад исә јазыр: «Бу, бизим һәјатымызда ән ҝөзәл ај иди! Бу кампанија һәјатымызы дәјишди. Инди биз там башга инсанларыг». Бу әр-арвад тәблиғчиләрә даһа чох еһтијаҹ олан әразиләрдә хидмәт етмәк үчүн Болгарыстана һәмишәлик көчмәк барәдә ҹидди дүшүнмәјә башлады. Испанијада даими пионер кими хидмәт едән субај баҹымыз Карина да Силистрадакы кампанијаја гошулмушду. Бундан сонра о, Испанијадакы ишиндән чыхыб һәмин шәһәрдә јениҹә јаранмыш јығынҹаға көмәк етмәк мәгсәдилә Болгарыстана көчдү. О, бу өлкәдә бир ил јашамаг үчүн кифајәт гәдәр пул јығмышды. Карина гәрары барәдә дејир: «Јеһова мәнә Болгарыстанда хидмәт етмәјә јол ачдығы үчүн о гәдәр хошбәхтәм ки... Үмидварам, Јеһова мәнә бурада узун мүддәт галмаға көмәк едәҹәк. Һал-һазырда беш нәфәрлә Мүгәддәс Китабы өјрәнирәм вә онлардан үчү јығынҹаг ҝөрүшләриндә иштирак едир».
Италијалы бир баҹымыз да кампанијада иштирак етмәк истәјирди, амма ишә тәзәҹә ҝирдији үчүн мәзунијјәт ҝүнләри јох иди. Лакин бу, она мане олмады. Баҹы мүдириндән хаһиш етди ки, она өз һесабына бирајлыг мәзунијјәт верилсин. Хаһиши јерини јетирилмәдији тәгдирдә баҹы ишдән чыхмаға белә һазыр иди. Мүдири она: «Јахшы, амма бир шәртлә: сән Болгарыстандан мәнә ачыгҹа ҝөндәрмәлисән», — дејәндә о, гулагларына инана билмәди. Баҹы бунун дуаларына ҹаваб олдуғуна шүбһә етмирди.
Болгарыстанын Варна шәһәриндән олан вә јүксәк мәваҹибли ишдә там ҝүн чалышан ҝәнҹ баҹымыз Станислава Силистрадакы кампанијада иштирак етмәк үчүн ишдән иҹазә алды. Јашадығы өлкәдә тәблиғ етмәк үчүн узагдан ҝәлән пионерләрин севинҹини ҝөрәндә о, ҝөз јашларыны сахлаја билмәјиб ағлады. Станислава карјера архасынҹа дүшмәклә һәјатыны нәјә сәрф етдији барәдә ҹидди дүшүндү. Ики һәфтәдән сонра евә гајыдан кими о ишдән чыхды вә даими пионер хидмәтинә башлады. Инди баҹымыз ҹаванлыг ҝүнләриндә Јараданыны хатырладығы үчүн әсил хошбәхтлик дујур (Ваиз 12:1).
Јеһоваја ҹанла-башла хидмәт етмәк бөјүк хејир-дуадыр. Һәм гүввәмизи, һәм дә вахтымызы хош хәбәрин тәблиғи вә тәлим иши кими ваҹиб ишә сәрф етмәкдән јахшы нә ола биләр?! Бу хиласедиҹи ишдә даһа чох иштирак етмәк үчүн нәсә едә биләрсәнми? Ола билсин ки, јашадығын өлкәдә тәблиғчиләрә еһтијаҹ олан әразиләр вар. Нәјә ҝөрә белә әразиләрә көчмәјәсән? Јахуд да хариҹи дил өјрәнәрәк јашадығын өлкәдә Мүгәддәс Китаб һәгигәтини өјрәнмәк арзусунда олан инсанлара көмәк етмәјәсән? Хидмәтини ҝенишләндирмәк үчүн һансы дәјишикликләри етмәјиндән асылы олмајараг, әмин ол ки, Јеһова сәни бол-бол хејир-дуаландыраҹаг! (Сүл. мәс. 10:22).
[32-ҹи сәһифәдәки чәрчивә/шәкил]
Унудулмаз ҝүн
Авропанын диҝәр өлкәләриндән ҝәлән тәблиғчиләр Болгарыстанда тәшкил олунан бу хүсуси кампанијадан сонра Софијада кечириләҹәк «Ојаг дурун!» адлы вилајәт конгресиндә иштирак етмәји дә планлашдырмышдылар. Јерли баҹы-гардашлара ән чох тәсир бағышлајан шеј мүхтәлиф өлкәләрдән ҝәлән чохлу сајда һәмиманлыларыны ҝөрмәк иди. Рәһбәрлик Шурасынын үзвү Ҹефри Ҹексон ҹүмә ҝүнү болгар дилиндә «Мүгәддәс Јазыларын Јени Дүнја Тәрҹүмәси»нин там версијасыны тәгдим едәндә конгресдә иштирак едән 2 039 нәфәрин севинҹини тәсәввүр етмәк чәтин дејил. Онлар өз миннәтдарлыгларыны ҝурултулу алгышларла ифадә етдиләр. Чохларынын үзүндә севинҹ ҝөз јашларыны ҝөрмәк оларды. Бу дәгиг вә асан башадүшүлән тәрҹүмә сәмими-гәлбли болгарлара Јеһованы даһа јахындан танымаға көмәк едәҹәк.
[30-ҹу сәһифәдәки хәритә]
(Хәритәјә нәшрин өзүндә бахын)
БОЛГАРЫСТАН
СОФИЈА
Сандански
Силистра
Казанлык
[31-ҹи сәһифәдәки шәкилләр]
Бу једди һәфтә әрзиндә мөһтәшәм шаһидлик верилди