Јеһованы нәғмәләрдә тәрәннүм един!

«Аллаһымы нә гәдәр варам, тәрәннүм едәҹәјәм!» (МӘЗ. 146:2).

1. Ҝәнҹ Давуду мәзмурларынын бәзиләрини бәстәләмәјә нә тәшвиг етмишди?

ҜӘНҸ јашларында Давуд Бетлеһемин јахынлығында, чөлләрдә атасынын гојунларыны отарырды. Бу заман онун Јеһованын мөһтәшәм әл ишләрини — улдузлу сәманы, «чөлдә јашајан һејванлары», «ҝөјдәки гушлары» сејр етмәк имканы варды. Ҝөрдүкләри Давуда о гәдәр бөјүк тәәссүрат бағышламышды ки, о, еҹазкар тәбиәтин вә ҹанлыларын Јараданына үрәји исиндирән һәмд нәғмәләри бәстәләди. Онун нәғмәләринин бир чохуну бу ҝүн «Зәбур» китабында тапмаг оларa. (Мәзмур 8:3, 4, 7—9 ајәләрини оху.)

2. а) Мусиги инсанлара неҹә тәсир ҝөстәрир? Нүмунә чәкин. б) Мәзмур 34:7, 8 вә Мәзмур 139:2—8 ајәләриндән Давудун Јеһова илә мүнасибәтләри барәдә нә өјрәнирик?

² Ҝөрүнүр, һәјатынын мәһз бу дөврүндә Давуд бир мусигичи кими пүхтәләшмишди. Давуд о гәдәр баҹарыглы мусигичи олмушду ки, падшаһ Шаул үчүн лира чалмаг дәвәтини алды (Сүл. мәс. 22:29). Онун чалдығы мусиги гәлб раһатлығыны итирмиш падшаһы сакитләшдирирди. Мусиги бу ҝүн дә инсанлара ејни тәсири ҝөстәрир. Давуд мусиги аләтини әлинә алар-алмаз, «Шаул сакитләшәр, јахшы олар»ды (1 Шам. 16:23). Үрәјиндә Аллаһ горхусу олан бу мусигичи вә бәстәкарын јаздығы нәғмәләр индијә кими өз дәјәрини итирмәјиб. Бу, һәгигәтән дә, һејрәтамиздир! Давудун дүнјаја ҝөз ачмасындан 3 000 илдән чох вахт кечсә дә, јер үзүнүн дөрд тәрәфиндә јашајан мүхтәлиф инсанлар тәсәлли вә үмид үчүн Давудун бәстәләдији мәзмурлара даима мүраҹиәт едирләр. (2 Салн. 7:6; Мәзмур 34:7, 8; 139:2—8 ајәләрини оху; Амос 6:5.)

Мусигинин һәгиги ибадәтдә лајигли јери

3, 4. Давудун ҝүнләриндә мүгәддәс мусигинин ифа олунмасы үчүн һансы тәдбирләр ҝөрүлмүшдү?

³ Давудун мусиги саһәсиндә истедады варды вә о, бу истедадыны ән јахшы шәкилдә — Јеһова Аллаһы иззәтләндирмәк үчүн истифадә едирди. О, Исраилин падшаһы оландан сонра мүгәддәс мәскәндә ҝөзәл мусигинин ифа олунмасы үчүн лазыми тәдбирләр ҝөрдү. Хидмәт үчүн јарарлы олан левилиләрин онда бириндән чоху, тәхминән 4 000 нәфәри «Рәбби һәмд етмәк» үчүн тәјин олунмушду. Онларын арасында ‘Рәббә илаһи охумаға өјрәдиләнләрин вә буну баҹаранларын’ сајы 288 нәфәр иди (1 Салн. 23:3, 5; 25:7).

⁴ Левилиләрин ифа етдији бир чох нәғмәләри Давудун өзү бәстәләмишди. Давудун мәзмурлары сәсләнәндә онлары динләмәк имканы олан һәр бир исраилли, сөзсүз, бундан чох тәсирләнирди. Бир гәдәр сонра, әһд сандығы Јерусәлимә ҝәтириләндә «Давуд Левилиләрин башчыларына әмр етди ки, шадлыг етмәк үчүн өз гоһумлары арасындан мусиги аләтләриндә — чәнҝләрдә, лираларда вә синҹләрдә чалыб-охујан илаһичиләр тәјин етсинләр» (1 Салн. 15:16).

5, 6. а) Нәјә ҝөрә Давудун һөкмранлығы дөврүндә мусигијә бу гәдәр өнәм верилирди? б) Һарадан билирик ки, гәдим Исраилдә мусиги ибадәтдә ваҹиб јер тутурду?

⁵ Давудун ҝүнләриндә мусигијә нәјә ҝөрә бу гәдәр өнәм верилирди? Падшаһ мусигичи олдуғу үчүнмү? Хејр, бунун башга сәбәби вар иди вә әсирләр сонра, салеһ падшаһ Хизгија мәбәддә хидмәти бәрпа едәндә һәмин сәбәб ачыгланмышды. Бу барәдә 2 Салнамәләр 29:25 ајәсиндә охујуруг: «Давудун, падшаһын ҝөрүҹүсү Гадын вә пејғәмбәр Натанын әмринә ҝөрә Хизгија Левилиләри синҹләрлә, чәнҝләрлә вә лираларла Рәббин мәбәдинә гојду. Бу әмр пејғәмбәрләр васитәсилә Рәбдән ҝәлмишди».

⁶ Бәли, пејғәмбәрләри васитәсилә Јеһова әмр етмишди ки, хидмәтчиләри нәғмәләрдә Ону тәрәннүм етсинләр. Һәтта каһин тајфасындан олан диҝәр илаһичиләр левилиләрдән тәләб олунан ишдән азад едилмишдиләр ки, нәғмә бәстәләмәјә вә чох еһтимал ки, мәшг етмәјә кифајәт гәдәр вахтлары олсун (1 Салн. 9:33).

7, 8. Падшаһлыг нәғмәләрини охујаркән истедаддан даһа ваҹиб олан нәдир?

⁷ Бәлкә дә, сән фикирләширсән: «Сөһбәт јахшы охумагдан ҝедирсә, мүгәддәс мәскәндә нәғмәләр ифа едән пешәкарларын сырасына мәни һеч вахт дахил етмәздиләр». Лакин левилиләрдән олан мусигичиләрин һеч дә һамысы пешәкар дејилди. 1 Салнамәләр 25:8 ајәсинә әсасән, онларын арасында ‘шаҝирдләр’ дә вар иди. Һәмчинин ону да гејд етмәк лазымдыр ки, Исраилин диҝәр гәбиләләри арасында чох баҹарыглы мусигичиләр вә ифачылар варды. Лакин Јеһова мусиги илә әлагәдар бүтүн ишләри левилиләрә тапшырмышды. Биз әмин ола биләрик ки, ‘мүәллим’ вә ја ‘шаҝирд’ олмаларындан асылы олмајараг, онларын һамысы бу ишә ҹан јандырырды.

⁸ Мусигини севән Давуд өз ишинин устасы иди. Бәс Аллаһ үчүн ваҹиб олан јалныз бизим истедадлы олмағымыздыр? Колослулара 3:23 ајәсиндә Павел јазыр: «Һәр нә едирсинизсә, ҹанла-башла един, санки инсанлар үчүн дејил, Јеһова үчүн едирсиниз». Һәр шеј тамамилә ајдындыр: ән ваҹиби одур ки, Јеһованы нәғмәләрдә тәрәннүм едәркән буну сидг-үрәкдән едәк.

Давуддан сонракы дөврдә мусигинин ролу

9. Әҝәр сән Сүлејманын һөкмранлығы дөврүндә мәбәдин һәср олунма мәрасиминдә иштирак етсәјдин, нә ҝөрәр вә ешидәрдин?

⁹ Сүлејман падшаһын һакимијјәти илләриндә дә мусиги һәгиги ибадәтдә мүһүм јер тутурду. Мәбәдин тәнтәнәли ачылышы 120 кәрәнајчыдан ибарәт мис нәфәсли аләтләр групу да дахил олан там тәркибли оркестрин мүшајиәти илә һәјата кечирилмишди. (2 Салнамәләр 5:12 ајәсини оху.) Мүгәддәс Китабда дејилир ки, «[һамысы каһин олан] кәрәнај чаланлар вә илаһичиләр бир сәслә Рәббә һәмд вә шүкүр етмәклә сәсләрини бирҝә уҹалтдылар... Онлар деди: “Рәббә һәмд един, чүнки јахшыдыр, чүнки мәһәббәти әбәдидир”». Севинҹ долу сәсләр јүксәлән кими Јеһованын разылығынын әламәти олараг ‘булуд мәбәди долдурду’. Кәрәнајчыларла минләрлә ифачынын сәси бирҝә уҹаланда бунун неҹә дә мөһтәшәм вә һәјәҹанландырыҹы олдуғуну бир тәсәввүр един! (2 Салн. 5:13).

10, 11. Еркән мәсиһчиләрин ибадәтдә мусигијә өнәм вердикләри һарадан мәлумдур?

¹⁰ Еркән мәсиһчиләр дә ибадәтдә мусигијә өнәм верирдиләр. Әлбәттә, онлар мүгәддәс мәскәндә вә ја мәбәддә јох, шәхси евләрдә јығышырдылар. Тәгибләр вә диҝәр сәбәбләр уҹбатындан бәзән вәзијјәтләри һеч дә үрәкачан олмурду. Буна бахмајараг, онлар Аллаһы нәғмәләрдә тәрәннүм едирдиләр.

¹¹ Һәвари Павел Колос шәһәриндәки һәмиманлыларыны: «Бир-биринизә мәзмурлар, мәдһијјәләр вә ҝөзәл руһани маһныларла өјүд-нәсиһәт верин», — дејә сәсләјирди (Колос. 3:16). Павел вә Сила зиндана атыланда «дуа едиб маһны охујур, Аллаһа һәмд едирдиләр», һалбуки онларын әлләриндә нәғмә китабы јох иди (Һәв. иш. 16:25). Бәс әҝәр сән зиндана атылсајдын, әзбәрдән нечә Падшаһлыг нәғмәси охуја биләрдин?

12. Падшаһлыг нәғмәләрини гијмәтләндирдијимизи неҹә ҝөстәрә биләрик?

¹² Мусиги ибадәтимиздә шәрәфли јер тутдуғу үчүн өзүмүздән сорушмалыјыг: «Мән дә мусигини лајигинҹә гијмәтләндирирәмми? Баҹы-гардашларла бирҝә илк нәғмәни охумаг үчүн јығынҹаг ҝөрүшләринә вә конгресләрә вахтында ҝәлирәмми? Бу нәғмәләри шөвглә ифа едирәмми? Ушагларымы өјрәдирәмми ки, онлар Теократик Хидмәт Мәктәби илә Хидмәти ҝөрүш вә ачыг мәрузә илә “Ҝөзәтчи Гүлләси”нин өјрәнилмәси арасында ифа едилән нәғмәләрә өзләри үчүн фасилә, јахуд отурмагдан јорулдуглары үчүн јерләрини лазымсыз јерә тәрк етмәк имканы кими бахмасынлар?» Нәғмә охумаг ибадәтимизин бир һиссәсидир. Бу саһәдә пешәкар олуб-олмамағымыздан асылы олмајараг, һамымыз Јеһованы нәғмәләрдә тәрәннүм едә биләрик вә бу, һәр биримизин борҹудур. (2 Коринфлиләрә 8:12 ајәси илә мүгајисә ет.)

Вахт кечир, тәләбатларымыз дәјишир

13, 14. Јығынҹаг ҝөрүшү заманы сидг-үрәкдән нәғмә охумаг нәјә ҝөрә ваҹибдир? Изаһ един.

¹³ Тәхминән 100 ил әввәл «Сион Ҝөзәтчи Гүлләси» журналында Падшаһлыг нәғмәләринин нәјә ҝөрә бу гәдәр ваҹиб олдуғу изаһ олунмушду: «Аллаһын халгы үчүн һәгигәти маһныда охумаг ону өз үрәкләринә вә зеһинләринә һәкк етмәјин ҝөзәл үсулудур». Бир чох нәғмәләрин сөзләри Мүгәддәс Китаба әсасландығы үчүн һеч олмаса онлардан бәзиләрини әзбәрләмәклә һәгигәти үрәјимизә һәкк едә биләрик. Ҝөрүшләрә илк дәфә ҝәләнләр јығынҹаг үзвләринин үрәкдән нәғмә ифа етдикләрини ешидәндә, адәтән, бу, онлара бөјүк тәсир бағышлајыр.

¹⁴ 1869-ҹу илдә, ахшам ишдән евә гајыдаркән Ч. Т. Рассел зирзәмидән ҝәлән маһны сәсләрини ешитди. О вахтлар Рассел гардашын Аллаһ барәдә һәгигәти тапаҹағына даир бүтүн үмидләри пуча чыхмышды. Буна ҝөрә дә о, өзүнү ишә һәср етмәк гәрарына ҝәлди. О дүшүнүрдү ки, инсанлара руһани ҹәһәтдән көмәк едә билмәсә дә, һеч олмаса пул газаныб онлара мадди ҹәһәтдән јардым ҝөстәрсин. Рассел гардаш тозлу, гаранлыг отаға ҝирди вә орада ибадәт мәрасиминин кечирилдијини ҝөрдү. О отуруб гулаг асды. Сонралар о јазмышды ки, һәмин ахшам ешитдикләри «кифајәт иди ки, Мүгәддәс Китабын Аллаһдан илһам алдығына даир сарсылмыш иманы Аллаһын көмәји илә мөһкәмләнсин». Ҝөрдүјүмүз кими, Рассел гардашы илк дәфә ҝөрүшә ҹәлб едән мәһз нәғмә олмушду.

15. Нәјә ҝөрә јени нәғмә китабына еһтијаҹ јаранды?

¹⁵ Вахт кечдикҹә Мүгәддәс Јазылары даһа дәгиг баша дүшүрүк. Сүлејманын мәсәләләри 4:18 ајәсиндә дејилир: «Салеһләрин јолу... дан јери тәк шәфәг сачар, нуруну артырараг ҝүндүзә говушар». Нур артдыгҹа һәгигәти неҹә «охумағымыза» даир дәјишикликләрин едилмәси лабүддүр. Сон 25 ил әрзиндә бир чох өлкәләрдә Јеһованын Шаһидләри «Јеһоваја һәмд нәғмәләри охујун»b адлы нәғмә китабындан истифадә етмишләр. Бу нәғмә китабынын инҝилис дилиндә чыхмасындан бәри нурун чохалмасы сајәсиндә бәзи мөвзулара даһа чох ајдынлыг ҝәтирилмишдир. Нәтиҹәдә, һәмин нәғмә китабында истифадә олунан бәзи ифадәләр көһнәлмишди. Мәсәлән, биз артыг «јени гурулуш» јох, «јени дүнја» дејирик. Еләҹә дә Јеһованын ады «тәмизә чыхарылмајаҹаг», о «тәгдис едиләҹәк». Бу сәбәбдән һәгигәтин мүасир анлајышымызы әкс етдирән јени нәғмә китабына еһтијаҹ јаранды.

16. Јени нәғмә китабы Павелин Ефеслиләрә 5:19 ајәсиндә јазылан мәсләһәтинә риајәт етмәјимизә неҹә көмәк едәҹәк?

¹⁶ Бу вә диҝәр сәбәбләрә ҝөрә Рәһбәрлик Шурасы «Јеһованы нәғмәләрдә тәрәннүм един» адлы јени нәғмә китабынын бурахылмасына гәрар верди. Јени нәғмә китабында маһныларын сајы 135-ә дүшдүc. Бунун сајәсиндә биз ән азындан бәзи јени маһныларын сөзләрини әзбәрләјә биләрик. Бу, Павелин Ефеслиләрә 5:19 ајәсиндә јазылан мәсләһәтинә ујғундур. (Ајәни оху.)

Сән өз миннәтдарлығыны неҹә ҝөстәрә биләрсән?

17. Јығынҹагда нәғмә охујаркән утанҹаглыг һиссинин өһдәсиндән ҝәлмәјә бизә нә көмәк едә биләр?

¹⁷ Утанҹаглыг һиссинин јығынҹаг ҝөрүшләриндә һәмд нәғмәләри охумағымыза мане олмасына јол вермәлијикми? Бир фикирләшин, мәҝәр данышығымызда ‘һәр биримиз дәфәләрлә сәһв етмирик’? (Јаг. 3:2). Бунунла белә, биз јол вермирик ки, мүкәммәл олмајан данышыг габилијјәтимиз евдән-евә тәблиғ едәрәк Јеһованы иззәтләндирмәјимизә мане олсун. Бәс онда нәјә ҝөрә гејри-мүкәммәл сәсимизин Јеһованы нәғмәләрдә тәрәннүм етмәјә мане олмасына јол вермәлијик? Хидмәтчиләри һәмд нәғмәләри охујанда инсана ‘ағыз верән’ Јеһова Аллаһ севинир (Чых. 4:11).

18. Нәғмәләрин сөзләрини әзбәрләмәјә даир һансы тәклифләри ирәли сүрә биләрсән?

¹⁸ Артыг бир чох дилләрдә «Јеһованы нәғмәләрдә тәрәннүм един — вокал ифа» адлы CD ишыг үзү ҝөрүб. Ҝөзәл оркестрин мүшајиәти илә хорун ифа етдији јени нәғмәләрә гулаг асмаг инсана, сөзүн әсил мәнасында, зөвг верир. Онлара тез-тез гулаг ас; онда сән һеч олмаса бәзи јени нәғмәләрин сөзләрини әзбәрләјәҹәксән. Әксәр нәғмәләрин сөзләри елә јазылыб ки, сән бир сәтри охујанда ондан сонра һансы сөзләрин ҝәләҹәјини билирсән. Буна ҝөрә дә CD-јә гулаг асанда нәјә ҝөрә хорла бирликдә охумајасан? Әҝәр евдә нәғмәләрин сөзләри вә мусигиси илә таныш олсан, шүбһәсиз, Падшаһлыг Залында онлары даһа әминликлә ифа едәҹәксән.

19. Падшаһлыг нәғмәләримизин оркестрин ифасында һазырламасы үчүн һансы ишләр ҝөрүлүр?

¹⁹ Хүсуси бирҝүнлүк, рајон вә вилајәт конгресләриндә сәсләнән мусигијә гаршы биздә асанлыгла етинасыз мүнасибәт јарана биләр. Лакин јадда сахламалыјыг ки, бу мусиги әсәрләринин әрсәјә ҝәлмәси үчүн бөјүк әмәк сәрф олунуб. Мусиги әсәри сечиләндән сонра ону 64 нәфәрдән ибарәт олан «Ҝөзәтчи Гүлләси»нин оркестр тәркиби үчүн ишләмәк (аранжиман етмәк) лазымдыр. Сонра мусигичиләр саатларла вахт сәрф едәрәк мәшг едәҹәкләри материалы диггәтлә нәзәрдән кечирирләр. Вә нәһајәт, бу әсәрләр Патерсонда (Нју–Јорк) јерләшән сәсјазма студијаларымызда јазылыр. Бу баҹы-гардашларын 10-у Бирләшмиш Штатларын хариҹиндә јашајыр. Онларын һамысы бүтүн ҝөрүшләримиз үчүн ҝөзәл мусигинин һазырланмасында иштирак етмәји өзләринә шәрәф санырлар. Биз онларын мәһәббәт долу әмәкләрини гијмәтләндирдијимизи ҝөстәрә биләрик. Конгресә сәдрлик едән гардаш бизи јерләримизи тутуб мәһәббәтлә һазырланан мусигијә сакитҹә гулаг асмаға дәвәт едәндә ҝәлин онун дедијини едәк.

20. Сән нә етмәк әзминдәсән?

²⁰ Јеһова һәмд нәғмәләримизә бөјүк өнәм верир вә онлары ваҹиб һесаб едир. Буна ҝөрә дә Аллаһа ибадәт үчүн топлашанда шөвглә охујараг Онун гәлбини севиндирә биләрик. Бәли, пешәкар олсаг да, олмасаг да, ҝәлин Јеһованы нәғмәләрдә тәрәннүм едәк! (Мәз. 104:33).

[Һашијәләр]

Неҹә фикирләширсиниз?

• Гәдимдә мусигинин һәгиги ибадәтдә ваҹиб рол ојнадығыны һансы нүмунәләр ҝөстәрир?

• Исанын Матта 22:37 ајәсиндә јазылан әмринә табе олмагла Падшаһлыг нәғмәләрини шөвглә ифа етмәк арасында һансы әлагәни ҝөрүрсән?

• Падшаһлыг нәғмәләримизи лајигинҹә гијмәтләндирдијини неҹә ҝөстәрә биләрсән?

[23-ҹү сәһифәдәки шәкил]

Јығынҹагда нәғмә ифа едилән заман ушагларынызын еһтијаҹ олмадан јерләрини тәрк етмәләринин гаршысыны алырсынызмы?

[24-ҹү сәһифәдәки шәкил]

Евдә јени нәғмәләримизин сөзләрини әзбәрләјирсәнми?