Аллаһ шәхсән сизин гајғыныза галырмы?

СЕВИЛДИЈИНИЗИ һисс едирсинизми? Јохса һәрдән сизә елә ҝәлир ки, һеч ким сизинлә марагланмыр? Бу јүксәктемпли вә худбин дүнјада инсан өзүнүн нәзәрә чарпмајаҹаг гәдәр әһәмијјәтсиз олдуғуну дүшүнә биләр. Һәгигәтән дә, Мүгәддәс Китабда дејилдији кими, бизим ҝүнләрдә инсанлар анҹаг өзләри барәдә дүшүндүкләри үчүн башгаларына гаршы диггәтсизлик баш алыб ҝедир (2 Тимотејә 3:1, 2).

Јашындан, мәдәнијјәтиндән, дилиндән, иргиндән асылы олмајараг, бүтүн инсанларын севмәк вә севилмәк тәләбаты вар. Бир мәлумата әсасән, бизим синир системимиз севҝи вә нәвазишә гаршы чох һәссасдыр. Јараданымыз олдуғу үчүн Јеһова Аллаһ мәһәббәтә вә диггәтә нә дәрәҹәдә еһтијаҹ дујдуғумузу һамыдан даһа јахшы баша дүшүр. Әҝәр О, сизи Онун үчүн дәјәрли олдуғунуза әмин етсәјди, һансы һиссләри кечирәрдиниз? Әлбәттә, буну билмәк сизин үчүн нәјә десәниз дәјәрди. Јеһова Аллаһын гејри-камил инсанларла марагландығына неҹә әмин ола биләрик? О, бизимлә шәхсән марагланырмы? Әҝәр марагланырса, бизи Онун үчүн әзиз едән нәдир?

Јеһова гајғыкеш Аллаһдыр

Тәхминән 3000 ил бундан әввәл јашамыш Аллаһ горхусу олан бир мәзмурчу улдузлу ҝеҹәдә мөһтәшәм сәмаја баханда үрәји риггәтә ҝәлмишди. Шүбһәсиз, о, сајсыз-һесабсыз улдузлары јарадан Шәхсин нә гәдәр уҹа олдуғу барәдә дүшүнмүшдү. Аллаһын нә гәдәр уҹа, инсанын исә Онунла мүгајисәдә нә гәдәр аҹиз олдуғунун үзәриндә дүшүнәрәк мәзмурчу Јеһованын мәһәббәтинә вә гајғыкешлијинә һејранлығыны белә ифадә етмишди: «Әлләринин иши олан ҝөјләри, өз јеринә дүздүјүн ај вә улдузлары ҝөрдүкдә дејирәм: “Инсан кимдир ки, онун һаггында дүшүнүрсән? Бәшәр оғлу кимдир ки, онун гајғысыны чәкирсән?”» (Мәзмур 8:3, 4). Асанлыгла белә гәнаәтә ҝәлмәк олар ки, уҹаларда олан Аллаһ биздән чох узагдыр вә ја олдугҹа мәшғулдур, буна ҝөрә дә гејри-камил инсанлара диггәт јетирмир. Лакин мәзмурчу билирди ки, нә гәдәр әһәмијјәтсиз, ҝәлди-ҝедәр олмағымыза бахмајараг, биз Аллаһ үчүн чох дәјәрлијик.

Диҝәр мәзмурчу исә өз әминлијини белә ифадә етмишди: «Амма Рәбб Ондан горханлардан, Онун мәһәббәтинә үмид бағлајанлардан разы галар» (Мәзмур 147:11). Бу һәр ики мәзмурда ифадә олунан фикир чох тәсирлидир. Јеһова инсанлардан садәҹә аҝаһ дејил, О, һәм дә онларын ‘гајғысыны чәкир’ вә әмәлисалеһ инсанлардан разы галыр.

Бу факт бизим ҝүнләрдә јеринә јетән Мүгәддәс Китабын бир пејғәмбәрлијиндә вурғуланыр. Һаггај пејғәмбәр васитәсилә Јеһова Падшаһлыг һагда хош хәбәрин бүтүн дүнјада тәблиғ олунаҹағыны билдирмишди. Һаггај 2:7 ајәсиндә бунун нә илә нәтиҹәләнәҹәји барәдә охујуруг: «Бүтүн милләтләрин вар-дөвләти ҝәләҹәк вә бу еви әзәмәтлә долдураҹағам».

Бүтүн милләтләрин «вар-дөвләти» дејилдикдә нә нәзәрдә тутулур? Бурада мадди вар-дөвләт нәзәрдә тутула билмәз (Һаггај 2:8). Чүнки Јеһова Аллаһын үрәјини севиндирән гызыл-ҝүмүш јох, гејри-камил олмаларына бахмајараг, мәһәббәтдән ирәли ҝәләрәк Она хидмәт едән инсанлардыр (Сүлејманын мәсәлләри 27:11). Бу инсанлар Јеһова Аллаһа иззәт ҝәтирән ‘вар-дөвләтлә’ мүгајисә олунур вә О, үрәкдән сәдагәтли олан, еләҹә дә сәјлә хидмәт едән бу инсанлары чох гијмәтләндирир. Сиз дә өзүнүзү белә инсанларын арасында ҝөрүрсүнүзмү?

Гејри-камил, ҝүнаһлы инсанларын Күлли-Ихтијар Аллаһ үчүн бу гәдәр әзиз олмасы фикри адама инанылмаз ҝәлә биләр. Әслиндә, бу һәгигәт бизи Аллаһа јахынлашмаг үчүн едилән дәвәти гәбул етмәјә тәшвиг етмәлидир (Јешаја 55:6; Јагуб 4:8).

«Аллаһ сәни чох севир»

Аһыл јашларында оланда Даниел пејғәмбәрлә бир ахшамчағы һејрәт доғуран бир һадисә баш верир. Даниел дуа едән заман онун јанына бир шәхс ҝәлир. Онун ады Ҹәбрајыл иди. Даниел онун Јеһованын мәләји олдуғуну баша дүшүр, чүнки бу мәләји әввәлләр дә ҝөрмүшдү. Ҹәбрајыл мәләк гәфил ҝәлишинин сәбәбини изаһ едәрәк дејир: «Еј Даниел! Инди мән ҝәлдим ки, сәнә мүдриклик вә дәрракә верим. ...Чүнки Аллаһ сәни чох севир» (Даниел 9:21—23).

Башга бир вахт Јеһованын бир мәләји Даниелә хитабән дејир: «Еј Аллаһын севимлиси олан Даниел!» Сонра да ону мөһкәмләндирмәк үчүн нөвбәти сөзләри дејир: «Еј Аллаһын севимлиси, горхма, сәнә сүлһ олсун» (Даниел 10:11, 19). Беләликлә, үч дәфә Даниел пејғәмбәрин Аллаһын севимлиси олдуғу вурғуланыр. «Севир» вә «севимли» кими тәрҹүмә олунан ибрани сөзү, һәмчинин «јүксәк гијмәтләндирилән», һәтта «әзиз» мәнасыны дашыјыр.

Әлбәттә, Даниел пејғәмбәр артыг Аллаһла јахын мүнасибәтләр гурмушду вә ибадәтинин Аллаһ тәрәфиндән гәбул олдуғуна әмин иди. Лакин мәләкләри васитәсилә Аллаһын ону мәһәббәтинә әмин етмәси Даниелин бу әминлијини онгат артырды. Буна ҝөрә дә Даниелин: «Сән мәнә ҝүҹ вердин» демәси һеч дә тәәҹҹүблү дејил (Даниел 10:19).

Мүгәддәс Китабда Јеһованын садиг пејғәмбәрә бәсләдији дәрин һиссләр һаггында мәлумат бизим үчүн чох фајдалыдыр (Ромалылара 15:4). Даниелин нүмунәси үзәриндә дүшүнмәклә Аллаһын севимли бәндәси олмаг үчүн нә етмәли олдуғумузу анлаја биләрик.

Мүнтәзәм олараг Аллаһын Кәламыны өјрәнин

Даниел пејғәмбәрин јаздығы сөзләрдән бәлли олур ки, о, Мүгәддәс Јазылары чох диггәтлә арашдырырды. О јазмышды: «Мән... Јерусәлимин виранә галаҹағы мүддәтин јетмиш ил олдуғу барәдә... китаблардан анладым» (Даниел 9:2). О дөврдә онун әлиндә олан китабларын арасында Мусанын, Давудун, Јешајанын, Јеремјанын, Језекелин вә диҝәр пејғәмбәрләрин Аллаһ тәрәфиндән илһамландырылмыш јазылары вар иди. Биз Даниелин тумарлары ачыб Јерусәлимдә һәгиги ибадәтин бәрпасы һаггында пејғәмбәрликләри диггәтлә охујуб мүгајисә етмәсини тәсәввүр едә биләрик. Фикрини јајындырмасынлар дејә, ола билсин, о, јухары отагда отуруб Мүгәддәс Јазыларын бу парчаларынын мәнасыны дәрк етмәк үчүн дәриндән дүшүнүрдү. Белә арашдырманын сајәсиндә о, иманыны мөһкәмләндирир вә Јеһова Аллаһа даһа да јахынлашырды.

Һәмчинин Аллаһын Кәламыны арашдырмаг Даниелин шәхсијјәтини формалашдырыр вә бүтүн һәјатыны истигамәтләндирирди. Шүбһә јохдур ки, ушаглыгда Мүгәддәс Јазылар әсасында алдығы тәрбијәнин ҝәнҹ јашларында Аллаһын Ганунунда о дөвр үчүн гадаған олунмуш јемәкләрдән имтина етмәк гәрарыны вермәкдә ролу олмушду (Даниел 1:8). Сонралар о, ҹәсарәтлә Аллаһын хәбәрини Бабил һөкмдарларына чатдырырды (Сүлејманын мәсәлләри 29:25; Даниел 4:19—25; 5:22—28). Онун чалышганлығы, дүрүстлүјү вә етибара лајиг олмасы һамыја бәлли иди (Даниел 6:4). Һәр шејдән әлавә, Даниел һәјатыны хилас етмәк үчүн ҝүзәштә ҝетмәк әвәзинә, һәмишә ахыра кими Јеһова Аллаһа етибар едирди (Сүлејманын мәсәлләри 3:5, 6; Даниел 6:23). Буна ҝөрә дә онун Аллаһын «севимлиси» адланмасы тәәҹҹүблү дејил.

Мүәјјән мәнада, Мүгәддәс Китабы арашдырмаг Даниелә нисбәтән бизим үчүн даһа раһатдыр. Ири тумарлар истифадәси раһат олан китабларла әвәз олунуб. Даниелин бәзи пејғәмбәрликләринин јеринә јетмәсини ҝөстәрән јазылар да дахил олмагла, инди әлимиздә там Мүгәддәс Китаб вар. Еләҹә дә, Мүгәддәс Јазылары арашдырмаға вә өјрәнмәјә көмәк едән кифајәт гәдәр вәсаитимиз варa. Сиз бу нәшрләрдән истифадә едирсинизми? Мүгәддәс Китабы охујуб үзәриндә дүшүнмәк үчүн вахт ајырырсынызмы? Әҝәр белә едирсинизсә, онда сизин дә Даниел пејғәмбәр кими, ҝүҹлү иманыныз вә Јеһова Аллаһла дәрин мүнасибәтиниз олаҹаг. Аллаһын Кәламы сизи Онун мәһәббәтли гајғысына әмин етмәклә һәјатынызда јол ҝөстәрәҹәк.

Дуада мәтанәтли олун

Дуа Даниел пејғәмбәрин һәјатында ваҹиб јер тутурду. Онун хаһишләри Аллаһын нијјәтинә ујғун ҝәлирди. Бир дәфә о, ҝәнҹ јашларында, Бабил падшаһы Навуходоносорун јухусуну јоза билмәјәҹәји тәгдирдә едам едилмәк тәһлүкәси илә үзләшмишди. Даниел чәкинмәдән Јеһова Аллаһдан көмәк диләјирди (Даниел 2:17, 18). Гејри-камиллијини тәвазөкарлыгла гәбул едән пејғәмбәр илләр сонра өзүнүн вә халгын ҝүнаһларыны етираф едәрәк әфв үчүн Јеһоваја јалварырды (Даниел 9:3—6, 20). Аллаһдан алдығы вәһјләрдә нәјисә баша дүшмәјәндә Даниел көмәк үчүн Аллаһа дуа едирди. Бир дәфә онун јанына баша дүшмәдији шејләрә ајдынлыг ҝәтирмәк үчүн ҝәлән мәләк онун ‘сөзләринин ешидилдијини’ деди (Даниел 10:12).

Садиг пејғәмбәрин дуалары анҹаг хаһишләрдән ибарәт дејилди. Даниел 6:10 ајәсиндә дејилир: «Даниел әввәлләр етдији кими ҝүндә үч дәфә диз чөкүб өз Аллаһына дуа етди вә Онун өнүндә шүкүр етди». Даниелин Аллаһа шүкүр етмәјә вә Ону иззәтләндирмәјә чохлу сәбәбләри вар иди. Вә о, буну мүнтәзәм едирди. Бәли, онун ибадәтиндә дуа елә ваҹиб јер тутурду ки, һәтта һәјаты тәһлүкә алтында оланда белә ондан имтина етмәди. Тәбии ки, мәтанәтли олдуғуна ҝөрә Јеһова ону чох севирди.

Дуа етмәк неҹә дә бөјүк әнамыдыр! Гој бир ҝүнүнүз белә дуасыз кечмәсин. Етдији бүтүн јахшылыглара ҝөрә Аллаһа миннәтдарлығынызы билдирмәји вә шүкүр етмәји һеч вахт унутмајын. Чәкинмәдән дуада өз нараһатчылығынызы вә проблемләринизи Она ифадә един. Дуаларыныза верилән ҹавабларын үзәриндә дүшүнәрәк Аллаһа өз миннәтдарлығынызы билдирин. Дуаја лазымынҹа вахт ајырын. Јеһоваја дуада үрәјимизи бошалтмагла биз шәхсән Онун мәһәббәтини һисс едирик. ‘Даима дуа етмәк’ үчүн бу, тутарлы сәбәбдир, елә дејилми? (Ромалылара 12:12).

Јеһованын адына иззәт ҝәтирин

Әҝәр достлардан бири һәмишә өзү һаггында фикирләширсә, бу достлуғун ахыры олмајаҹаг. Ејни шеји Јеһова Аллаһ илә мүнасибәтләримизә дә аид етмәк олар. Даниел буну чох јахшы баша дүшүрдү. Ҝәлин ҝөрәк, Јеһованын адыны иззәтләндирмәк онун үчүн нә дәрәҹәдә әһәмијјәтли иди.

Аллаһ онун дуасына ҹаваб олараг Навуходоносорун јухусуну вә онун мәнасыны ачанда Даниел белә деди: «Аллаһын ады әбәди олараг иззәтләнсин! Чүнки һикмәт вә гүдрәт Она мәхсусдур». Сонрадан јухуну вә онун мәнасыны Навуходоносора билдирәндә Даниел Јеһованын «сирләри ачан» олдуғуну вурғулајараг, бир даһа бүтүн иззәти Она јөнәлтди. Һәмчинин о, ҝүнаһларын бағышланмасы вә хилас үчүн јалваранда белә деди: «Еј Аллаһым,.. шәһәрин вә халгын Сәнә мәхсусдур» (Даниел 2:20, 28; 9:19).

Даниели бу саһәдә тәглид етмәк үчүн бизим чохлу имканларымыз вар. Дуа едәркән Аллаһын адынын мүгәддәс тутулмасы барәдә истәјимизи билдирә биләрик (Матта 6:9, 10). Һеч вахт истәмәздик ки, давранышымызла Аллаһын адына ләкә ҝәтирәк. Онун Падшаһлығы һаггында өјрәндикләримизи башгалары илә бөлүшмәклә Јеһованын адына һәмишә иззәт ҝәтирә биләрик.

Јашадығымыз бу дүнјада мәһәббәтә вә диггәтә бөјүк еһтијаҹ вар. Лакин Јеһованын ајры-ајрылыгда һәр биримизин гајғысыны чәкдијини билмәк бизим үрәјимизи севиндирир. Мәзмурчунун дедији кими, «Рәбб Өз халгындан зөвг алар, зәфәри илә мәзлумларын үстүнә јарашыг салар» (Мәзмур 149:4).

[Һашијә]

[21-ҹи сәһифәдәки јазы]

Аллаһ Даниел пејғәмбәри мөһкәмләндирмәк үчүн Ҹәбрајылы ҝөндәрмәклә она Өз мәһәббәтини ифадә етди

[23-ҹү сәһифәдәки јазы]

Даниел пејғәмбәрин арашдырма апармагда чалышган вә дуада мәтанәтли олмасы ону бир шәхсијјәт кими пүхтәләшдирир вә Аллаһа јахын едирди