Јеһованын Адына Сығынын

«Итаәткар вә мәзлум бир халгы сағ гојаҹағам, онлар Рәббин адына пәнаһ ҝәтирәҹәкләр [«Јеһованын адына сығынаҹаглар», ЈД]» (СЕФ. 3:12).

1, 2. Бәшәријјәт гасырғајабәнзәр һансы һадисәнин астанасында дурур?

ЕЛӘ олубму ки, лејсан вә ја долу јағанда гачыб көрпүнүн алтында ҝизләнәсән? Лакин ҝүҹлү фыртына вә ја гасырға јахынлашырса, көрпүнүн алтында ҝизләнмәклә ҹаныны гуртара билмәзсән — ҝәрәк өзүн үчүн етибарлы бир сығынаҹаг тапасан.

² Јахын ҝәләҹәкдә исә бәшәријјәтин мөвҹудлуғуну тәһлүкә алтына алан башга бир гасырғанын олаҹағы ҝөзләнилир. Бу, гасырғајабәнзәр ‘виран ҝүнүдүр’. Јеһованын бу «мөһтәшәм ҝүнү» һеч бир инсандан јан кечмәјәҹәк. Буна бахмајараг, биз лазыми сығынаҹаг тапа биләрик. (Сефанја 1:14—18 ајәләрини оху.) Чох тез бир заманда булудлары башымызын үстүнү алаҹаг «Рәббин гәзәб ҝүнүндә» бу сығынаҹағы һарадан тапмаг олар?

Гәдимдә гасырғајабәнзәр ‘виран ҝүнләри’

3. Онгәбиләли Исраил падшаһлығына «бәрк јаған долу» нә иди?

³ Јеһованын ҝүнү бүтүн јалан динләрин мәһви илә башлајаҹаг. Сығынаҹағы неҹә тапа биләҹәјимизи өјрәнмәк үчүн ҝәрәк Аллаһын гәдим халгынын тарихинә нәзәр салаг. Б. е. ә. 8-ҹи әсрдә јашамыш Јешаја пејғәмбәр Јеһованын дөнүк онгәбиләли Исраил падшаһлығына гаршы чыхардығы һөкмүнү гаршысыны ала билмәјәҹәкләри «бәрк јаған долу» илә мүгајисә етмишди. (Јешаја 28:1, 2 ајәләрини оху.) Һәмин пејғәмбәрлик ерамыздан әввәл 740-ҹы илдә, ассуријалылар бу гәбиләләрин торпагларыны зәбт едәндә јеринә јетдиa.

4. Ерамыздан әввәл 607-ҹи илдә Јеһованын «мөһтәшәм ҝүнү» Јерусәлимин үзәринә неҹә ҝәлди?

⁴ Лакин сатгын Исраилә гаршы Јеһованын чыхардығы һөкмлә иш битмәди. Гоншу Јәһуда халгы да Аллаһдан үз дөндәрмишди. Бу сәбәбдән ерамыздан әввәл 607-ҹи илдә Јерусәлим шәһәри илә Јәһуда падшаһлығы үчүн дә Јеһованын «мөһтәшәм ҝүнү» ҝәлди. Навуходоносорун һөкмранлығы заманы бабиллиләр Јәһуданы вә онун пајтахты Јерусәлими һәдәләјирдиләр. Јәһудиләр Мисирлә сијаси иттифага ҝирәрәк ‘јалан сығынаҹағына’ үз тутдулар. Лакин бабиллиләр, мәһведиҹи долу кими, бу ‘сығынаҹағы’ јерлә јексан етдиләр (Јешаја 28:14, 17).

5. Бүтүн јалан динләр мәһв едилән заман Аллаһын халгы илә үмумиликдә нә баш верәҹәк?

⁵ Кечмишдә Јерусәлимин үзәринә ҝәлән Јеһованын мөһтәшәм ҝүнү бизим ҝүнләрдә дөнүк Христиан дүнјасынын үзәринә ҝәләҹәк даһа бөјүк һөкмү тәмсил едир. Даһа сонра исә јалан динин дүнја империјасы олан «Бөјүк Бабил»ин јердә галан һиссәси вә нәһајәт, Шејтанын пис дүнјасы тамамилә мәһв едиләҹәк. Лакин Јеһованын халгы бир груп кими сағ галаҹаг, чүнки бу халг Јеһоваја сығыныр (Вәһј 7:14; 18:2, 8; 19:19—21).

Руһани вә физики сығынаҹаг

6. Јеһованын халгы сығынаҹаг неҹә тапа биләр?

⁶ Артыг инди, бу сон ҝүнләрдә Аллаһын халгы сығынаҹаг неҹә тапа биләр? Биз еһтирамла ‘Јеһованын ады барәдә дүшүнмәклә’ вә Она ҹанла-башла хидмәт етмәклә руһани сығынаҹаг тапа биләрик. (Малаки 3:16, ЈДb, 17, 18 ајәләрини оху.) Анҹаг Аллаһын ады барәдә дүшүнмәк кифајәт дејил. Мүгәддәс Китабда дејилир: «Јеһованын адыны чағыран һәр кәс хилас олаҹаг» (Ром. 10:13). Јеһованын адыны чағырмагла Онун бизи хилас етмәси бир-бирилә әлагәлидир. Бир чох сәмими инсанлар һәгиги мәсиһчиләрлә Јеһоваја хидмәт етмәјәнләр арасындакы фәрги ајдын ҝөрүрләр: һәгиги мәсиһчиләр еһтирамла ‘Јеһованын ады барәдә дүшүнүр’ вә Шаһидләри кими Она хидмәт едирләр.

7, 8. Биринҹи әсрдәки мәсиһчиләр ҹанларыны неҹә хилас едә билдиләр вә онларла мүасир һәгиги мәсиһчиләр арасында һансы охшарлыг вар?

⁷ Лакин хилас олмағымыз үчүн Аллаһ бизә јалныз руһани сығынаҹаг тәгдим етмир. О һәмчинин халгына физики сығынаҹаг верәҹәјини вәд едир. Биз бунун сүбутуну ерамызын 66-ҹы илиндә Сестиј Галлын башчылығы алтында Рома ордусунун Јерусәлимә һүҹум етдији заман баш верән һадисәдән ҝөрүрүк. Иса габагҹадан демишди ки, бу мүсибәтли ҝүнләр ‘гысалдылаҹаг’ (Мат. 24:15, 16, 21, 22). Бу, Рома ордусунун Јерусәлимдән ҝөзләнилмәдән ҝери чәкилдији заман баш верди. Бунун сајәсиндә һәгиги мәсиһчиләр Јерусәлимдән вә әтраф әразиләрдән гачараг ‘хилас ола билдиләр’. Бәзиләри Иордан чајыны кечиб шәргдә јерләшән дағларда сығынаҹаг тапдылар.

⁸ Һәмин мәсиһчиләрлә Аллаһын мүасир халгы арасында бир охшар ҹәһәт вар. Биринҹи әсрдә јашајан мәсиһчиләр өзләри үчүн сығынаҹаг ахтарырдылар; Аллаһын мүасир хидмәтчиләри дә ејни шеји едәҹәкләр. Лакин бу дәфә онлара мүәјјән бир әразијә гачмаг лазым ҝәлмәјәҹәк, чүнки һәгиги мәсиһчиләр бүтүн Јер күрәсиндә јашајырлар. Бунунла белә, ‘сечилмишләр’ вә онларын садиг әмәкдашлары Јеһованы вә Онун дағабәнзәр тәшкилатыны өзләринә сығынаҹаг етдикләри үчүн дөнүк Христиан аләми мәһв едилән заман бир халг кими сағ галаҹаглар.

9. Кимләр Јеһованын адыны инсанларын јаддашындан тамамилә силмәјә чалышыр? Нүмунә чәкин.

⁹ Христиан дүнјасы исә килсәјә ҝедәнләр арасындакы руһани ҹаһиллијә сәбәб олдуғуна вә Аллаһын адына нифрәт етдијинә ҝөрә ону ҝөзләјән мәһвә лајигдир. Орта әсрләрдә Аллаһын ады Авропа өлкәләриндә ҝениш јајылмышды. Дөрд ибрани һәрфлә ифадә олунан бу ад тетраграмматон адланыр вә ЈҺВҺ кими транслитерасија олунур. О вахтлар сиккәләрин үзәриндә, евләрин өн һиссәсиндә, бир чох китаб вә Мүгәддәс Јазыларда, һәтта бәзи католик вә протестант килсәләриндә бу ада раст ҝәлмәк оларды. Лакин сон вахтлар Аллаһын адыны Мүгәддәс Китаб тәрҹүмәләриндән вә диҝәр јерләрдән арадан галдырмаг ҹәһдләри ҝөстәрилир. Ватиканын Ибадәт вә дини мәрасимләр конгрегасијасынын бүтүн јепископлара ҝөндәрдији «Аллаһын ады» адлы 2008-ҹи ил 29 ијун тарихли мәктубу буна бир сүбутдур. Бу мәктубда Рома католик килсәси тетраграмматону вә онун мүхтәлиф формаларыны «Рәбб» сөзү илә әвәз етмәји мәсләһәт ҝөрүр. Ватиканын ҝөстәришинә ҝөрә, Аллаһын шәхси ады дини маһныларда вә ибадәт заманы едилән дуаларда истифадә олунмамалыдыр. Һәм христиан, һәм дә диҝәр динләрин руһаниләри Аллаһын кимлији барәдә һәгигәти ҝизләдәрәк милјонларла инсаны алдатмышлар.

Аллаһын адыны мүгәддәс тутанлар үчүн сығынаҹаг

10. Бу ҝүн Аллаһын адына кимләр һөрмәт ҝөстәрир вә онлар буну неҹә едирләр?

¹⁰ Диҝәр динләрдән тамамилә фәргли олараг, Јеһованын Шаһидләри Аллаһын адына еһтирамла јанашыр вә бу ады иззәтләндирирләр. Онлар Аллаһын адыны лајигли тәрздә истифадә етмәклә ону мүгәддәс тутурлар. Јеһова Она етибар едәнләри бәјәнир; О, хидмәтчиләринә хејир-дуа вермәк вә онлары горумаг үчүн истәнилән Шәхс ола биләр. «Рәбб... Она ҝүвәнәнләри таныјыр» (Наһ. 1:7; Һәв. иш. 15:14).

11, 12. а) Гәдим Јәһудада кимләр Јеһоваја садиг галмышлар? б) Бәс бу ҝүн Она кимләр садиг галыр?

¹¹ Гәдим Јәһуда падшаһлығынын әксәр сакинләри дөнүк чыхса да, Јеһованын ‘адына пәнаһ ҝәтирәнләр’ дә аз дејилди. (Сефанја 3:12, 13 ајәләрини оху.) Мәсәлән, Аллаһ сатгын јәһудиләри ҹәзаландырмаг үчүн бабиллиләрә өлкәни зәбт етмәјә вә халгыны әсир апармаға јол верәндә Јеремја, Барук вә Евед-Мелек кими бәзи инсанлар хилас олдулар. Онлар дөнүк бир халгын ‘арасында’ јашајырдылар. Диҝәрләри исә әсирликдә олсалар да, садигликләрини горудулар. Ерамыздан әввәл 539-ҹу илдә Кирин башчылығы алтында мидијалылар вә фарслар Бабили зәбт етдиләр. Чох кечмәди ки, Кир сағ галан јәһудиләрин вәтәнләринә гајытмасына иҹазә верән фәрман чыхарды.

¹² Һәгиги ибадәтин дирчәлишини ҝөрәҹәк инсанлар һагда Сефанја пејғәмбәрлик етмишди ки, Јеһова онлары хилас едәҹәк вә онлара ҝөрә севиниб шадланаҹаг. (Сефанја 3:14—17 ајәләрини оху.) Ејни шеји бизим ҝүнләр һагда да демәк олар. Аллаһын Падшаһлығы ҝөјдә тәсис едиләндән сонра Јеһова мәсһ олунмушларын садиг галығыны јалан динин дүнја империјасы олан Бөјүк Бабилин руһани әсарәтиндән азад етди. Аллаһ та бу ҝүнә гәдәр онлара ҝөрә севиниб шадланыр.

13. Бүтүн милләтләрдән олан инсанлар һансы азадлыға говушурлар?

¹³ Јер үзүндә әбәди јашамаға үмид едән инсанлар да Бөјүк Бабилин әсарәтиндән гуртармыш вә јалан дини тәлимләрдән азад олмушлар (Вәһј 18:4). Беләликлә, Сефанја 2:3 («Китабы Мукаддес») ајәсиндә јазылан пејғәмбәрлик бизим ҝүнләрдә даһа бөјүк мигјасда јеринә јетир: «Дүнјанын бүтүн тәвазөкарлары, Рәбби ахтарын». Сәмави вә ја јерүзү үмидләри олмаларындан асылы олмајараг, бүтүн милләтләрдән олан тәвазөкар инсанлар Јеһованын адына пәнаһ ҝәтирирләр.

Аллаһын ады талисман дејил

14, 15. а) Бәзиләри нәји талисман кими истифадә етмишдиләр? б) Биз нәләри талисман кими истифадә етмәмәлијик?

¹⁴ Бәзи исраиллиләр дүшүнүрдүләр ки, мәбәд онлары дүшмәнләриндән мүдафиә едәҹәк бир талисмандыр (Јер. 7:1—4). Бир вахтлар онлар Әһд сандығы барәдә дә бу фикирдә идиләр вә зәнн едирдиләр ки, сандыг онлары дөјүшдә горујаҹаг (1 Шам. 4:3, 10, 11). Император Бөјүк Константин әсҝәрләринин галханлары үзәринә «Мәсиһ» сөзүнүн јунан еквивалентинин илк ики һәрфини — хи вә ро һәрфләрини чәкмишди. О, үмидвар иди ки, бу ишарә онун әсҝәрләрини дөјүшдә горујаҹаг. 7-ҹи сәһифәдәки шәкилдә ҝөстәрилән зиреһ, еһтимал едилир ки, Отузиллик мүһарибәдә иштирак етмиш Исвеч кралы II Густав Адолфа мәхсус иди. Онун үзәриндә «Iehova» адынын јазылдығыны ајдын ҝөрмәк олар.

¹⁵ Ҹинләрин һүҹумларына мәруз галан Јеһованын бәзи хидмәтчиләри бу ады уҹадан чағырмагла онда сығынаҹаг тапмышлар. Бунунла белә, үзәриндә Аллаһын ады јазылмыш әшјалар талисман һесаб едилмәмәли вә санки, сеһирли мүдафиә гүввәсинә малик олан бир әшја кими нә ҝәздирилмәли, нә дә ки ҝүндәлик һәјатда истифадә олунмалыдыр. Буну һеч ҹүр Јеһованын адына сығынмаг адландырмаг олмаз!

Бизим ҝүнләрдә сығынаҹаг

16. Руһани сығынаҹағы бу ҝүн неҹә тапа биләрик?

¹⁶ Аллаһын халгы арасында һөкм сүрән руһани тәһлүкәсизлик бизим сығынаҹағымыздыр (Мәз. 91:1, 2). «Садиг вә ағыллы нөкәр», еләҹә дә јығынҹаг ағсаггаллары руһани тәһлүкәсизлијимизә зәрәр јетирә биләҹәк дүнјәви әһвал-руһијјәдән вә дүшүнҹә тәрзиндән горунмаг үчүн бизә мәсләһәтләр верирләр (Мат. 24:45—47; Јешаја 32:1, 2). Јадына сал, вар-дөвләт һәрислијинә ујмамаг үчүн биз нә гәдәр хәбәрдарлыг алмышыг? Өзүн фикирләш, бу хәбәрдарлыглар руһанилијимизин ифласа уғрамасындан бизи неҹә горујуб? Бәс Јеһоваја хидмәтдә гејри-фәал олмағымыза сәбәб ола биләҹәк лагејд мүнасибәт барәдә нә демәк олар? Аллаһын Кәламында дејилир: «Ахмағы лагејдлији мәһв едәҹәк. Мәнә гулаг асанларса әмин-аманлыгда јашајаҹаг, раһатлыг тапаҹаг, писликдән горхмајаҹаг» (Сүл. мәс. 1:32, 33). Өзүмүзү әхлаги ҹәһәтдән ләкәсиз сахламаг да руһани тәһлүкәсизлијимизи горумаға көмәк едир.

17, 18. Бу ҝүн милјонларла инсана Аллаһын адына сығынмаға нә көмәк едир?

¹⁷ Садиг нөкәрин бизи Исанын Падшаһлыг һаггында хош хәбәри бүтүн дүнјада тәблиғ етмәк тапшырығыны јеринә јетирмәјә неҹә тәшвиг етдији барәдә дә дүшүн (Мат. 24:14; 28:19, 20). Сефанја һансы дәјишиклијин инсанлара Аллаһын адында сығынаҹаг тапмаға көмәк едәҹәји һагда пејғәмбәрлик сөјләмишди: «О заман Мән халгларын нитгини дәјишиб, онлара пак дил верәҹәјәм ки, һамы Рәббин [Јеһованын] адыны чағырсынлар, Мәнә чијин-чијинә хидмәт етсинләр» (Сеф. 3:9).

¹⁸ Пак дил дејәндә нә нәзәрдә тутулур? Бу, Јеһова Аллаһ вә Онун нијјәти һаггында илһамланмыш Кәламында јазылан һәгигәтдир. Сән Аллаһын Падшаһлығы һаггында һәгигәти вә бу Падшаһлығын Аллаһын адыны неҹә тәгдис едәҹәјини инсанларла бөлүшәндә, Аллаһын али һөкмранлығынын бәраәт газанаҹағыны вурғулајанда вә садиг инсанларын алаҹағы әбәди хејир-дуалар барәдә шөвглә данышанда пак дилдә данышмыш олурсан. Бу мәҹази дилдә данышанларын сајы чох олдуғу үчүн Јеһованын ‘адыны чағыранларын’ вә Она ‘чијин-чијинә хидмәт едәнләрин’ сајы ҝетдикҹә артыр. Һәгигәтән дә, бүтүн дүнјада милјонларла инсан Јеһованын адында сығынаҹаг тапыр (Мәз. 1:1, 3).

19, 20. Гәдимдә инсанларын ‘јалан сығынаҹағына’ бәсләдији үмидләр неҹә боша чыхды?

¹⁹ Инсанлар һәллолунмаз кими ҝөрүнән проблемләрлә гаршылашырлар. Бу проблемләри һәлл етмәк үмидини итирәнләр көмәк үчүн гејри-камил инсанлара үз тутурлар. Јахуд гәдим Исраилин бәзән гоншу халглардан көмәк диләјәрәк онларла иттифага ҝирдији кими, бу инсанлар да үмид едирләр ки, проблемләрини сијаси тәшкилатлар һәлл едәҹәк. Лакин билдијимиз кими, бунун Исраилә һеч бир көмәји дәјмәди. Бу ҝүн дә һеч бир дөвләт, нә дә ки Бирләшмиш Милләтләр Тәшкилаты бәшәријјәтин проблемләрини там сурәтдә һәлл етмәк гүввәсиндә дејил. Онда нәјә ҝөрә биз һансыса сијаси тәшкилаты вә ја иттифагы өзүмүзә сығынаҹаг етмәлијик? Мүгәддәс Китаб пејғәмбәрлијиндә онлар ‘јалан сығынаҹағы’ адланыр. Биз дә онлара бу ҹүр бахмалыјыг, чүнки онлара үмид едәнләрин һамысы чох мәјус олаҹаг. (Јешаја 28:15, 17 ајәләрини оху.)

²⁰ Тезликлә Јеһованын ҝүнү долу туфаны кими јер үзүнә ҝәләҹәк. Тәһлүкәсизлији тәмин етмәк үчүн инсанларын гурдуғу планлар, нүвә сығынаҹаглары, еләҹә дә вар-дөвләт онлары хилас етмәјәҹәк. Јешаја 28:17 ајәсиндә дејилир: ‘Јалан сығынаҹағыны долу мәһв едәҹәк, [онларын] ҝизләндији јерләри селләр јујуб-апараҹаг’.

21. Бу ил үчүн олан иллик ајәјә риајәт етмәјин бизә һансы фајдасы олаҹаг?

²¹ Бу ҝүн олдуғу кими, ҝәләҹәкдә дә Јеһова Аллаһ Өз халгы үчүн әсил сығынаҹаг олаҹаг. «Јеһова гуртарды» мәнасыны верән Сефанјанын ады бу сығынаҹағын етибарлы олдуғуну ҝөстәрир. Буна ҝөрә дә 2011-ҹи ил үчүн иллик ајәнин ‘Јеһованын адына сығынын’ сечилмәси мүнасибдир (Сеф. 3:12, ЈД). Артыг индидән биз Јеһоваја там етибар едәрәк Онун адына сығына биләрик вә сығынмалыјыг да (Мәз. 9:10). «[Јеһованын] ады гүввәтли бир галадыр, салеһ гачыб она пәнаһ апарыр» сөзләрини ҝәлин һәр ҝүн јадымызда сахлајаг! (Сүл. мәс. 18:10).

[Һашијәләр]

Јадыныздадырмы?

• Бу ҝүн биз Јеһованын адына неҹә сығына биләрик?

• Нәјә ҝөрә биз ‘јалан сығынаҹағына’ ҝүвәнмәмәлијик?

• Ҝәләҹәјимизи һансы сығынаҹаг тәмин едәҹәк?

[6-ҹы сәһифәдәки јазы]

2011-ҹи ил үчүн иллик ајә: ‘Јеһованын адына сығынын’ (Сефанја 3:12, ЈД).

[7-ҹи сәһифәдәки шәкил. Иҹазә илә]

Thüringer Landesmuseum Heidecksburg Rudolstadt, Waffensammlung “Schwarzburger Zeughaus”