Аллаһын никаһ әнамына һөрмәтлә јанашын
«Буна ҝөрә дә киши өз ата-анасыны тәрк едиб арвадына говушаҹаг вә онлар бир бәдән олаҹаг» (ЈАР. 2:24).
1. Нәјә ҝөрә Јеһова бизим һөрмәтимизә лајигдир?
НИКАҺЫН Баниси олан Јеһова Аллаһ, сөзсүз, бизим һөрмәтимизә лајигдир. Мүгәддәс Китабда дејилир ки, «һәр бир ҝөзәл бәхшиш вә һәр бир камил һәдијјә» Јараданымыз, Али Һөкмдарымыз вә сәмави Атамыз Јеһовадандыр (Јаг. 1:17; Вәһј 4:11). Бу, Онун бөјүк мәһәббәтинин тәзаһүрүдүр (1 Јәһ. 4:8). Онун бизә өјрәтдији вә вердији һәр шеј, гаршымыза гојдуғу һәр тәләб јалныз вә јалныз бизим хејримиз вә рифаһымыз үчүндүр (Јешаја 48:17).
2. Јеһова илк ҹүтлүјә һансы ҝөстәришләри вермишди?
2 Мүгәддәс Китабда никаһ Аллаһын «ҝөзәл» әнамларындан бири кими тәгдим олунур (Сүл. мәс. 19:14). Јеһова Адәмлә Һәвваны никаһ телләри илә бирләшдирәндә аилә һәјатларынын уғурлу олмасы үчүн конкрет ҝөстәришләр вермишди. (Матта 19:4—6 ајәләрини оху.) Әҝәр илк ҹүтлүк Онун дедикләринә әмәл етсәјди, әбәдијјәт боју хошбәхт олаҹагды. Анҹаг онлар ахмагҹасына Аллаһын ҝөстәришләрини рәдд едиб башларына бәла ачдылар (Јар. 3:6—13, 16—19, 23).
3, 4. а) Бу ҝүн чохлары никаһа вә Јеһова Аллаһа неҹә һөрмәтсизлик ҝөстәрир? б) Бу мәгаләдә биз һансы нүмунәләри нәзәрдән кечирәҹәјик?
3 Бу илк ҹүтлүк кими, бир чох инсанлар евлиликлә әлагәдар гәрарлар гәбул едәркән Јеһованын ҝөстәришләринә ја аз, ја да һеч әһәмијјәт вермирләр. Бәзиләри рәсми никаһы тамамилә рәдд едир, диҝәрләри исә ону өз истәкләринә вә шәхси нормаларына ујғунлашдырмаға чалышырлар (Ром. 1:24—32; 2 Тим. 3:1—5). Бу инсанлар никаһын Аллаһын әнамы олдуғуну инкар едир вә бу әнама гаршы һөрмәтсизлик ҝөстәрмәклә онун Баниси олан Јеһоваја һөрмәтсизлик ҝөстәрирләр.
4 Һәтта Јеһованын хидмәтчиләри белә бәзән Онун никаһа даир нөгтеји-нәзәрини унуда биләрләр. Бәзи мәсиһчиләр һәјат јолдашларындан ајры јашамаг, јахуд да Мүгәддәс Китаб әсасы олмадан бошанмаг гәрарына ҝәлирләр. Бунун баш вермәмәси үчүн нә етмәк лазымдыр? Јарадылыш 2:24 ајәсиндә јазылан Аллаһын ҝөстәриши евли мәсиһчиләрә никаһларыны мөһкәмләндирмәјә неҹә көмәк едә биләр? Аилә гурмаг нијјәтиндә оланлар буна неҹә һазырлаша биләрләр? Ҝәлин Мүгәддәс Китабдан үч уғурлу никаһа нәзәр салаг вә ҝөрәк, бу нүмунәләр Јеһоваја һөрмәтин никаһын уғурлу олмасында ваҹиб рол ојнадығыны неҹә ҝөстәрир.
Бир-биринизә гаршы һәмишә садиг олун
5, 6. Зәкәријјә илә Елизабет һансы сынагла үзләшдиләр вә онларын садиглији неҹә хејир-дуаландырылды?
5 Зәкәријјә вә Елизабет һәр шеји дүз етмишдиләр. Аилә гураркән икиси дә руһән јеткин инсан иди. Зәкәријјә каһин вәзифәсини сәдагәтлә иҹра едирди. Һәр икиси Аллаһын Ганунуна дәгигликлә әмәл етмәјә чалышырды. Јеһоваја миннәтдар олмаг үчүн онларын бир чох сәбәбләри варды. Лакин сиз онларын Јәһудејадакы евләринә гонаг ҝетсәјдиниз, ҝөрәҹәкдиниз ки, орада нә исә чатышмыр. Елизабет сонсуз олдуғундан ушаглары олмурду вә һәр икиси артыг гоҹалмышды (Лука 1:5—7).
6 Гәдим Исраилдә ушаг саһиби олмаға бөјүк өнәм верилирди вә адәтән, аиләләр бөјүк олурду (1 Шам. 1:2, 6, 10; Мәз. 128:3, 4). Һәмин дөврдә бәзи исраилли кишиләр арвадлары дүнјаја өвлад ҝәтирмәјәндә хаинҹәсинә онлары бошајыб башга арвад алырдылар. Зәкәријјә исә белә давранмады. Нә о, нә дә ки јолдашы Елизабет вәзијјәтдән асан чыхыш јолу кими бошанмаға әл атмады. Дүздүр, ушагларынын олмамасы онлары кәдәрләндирирди, буна бахмајараг, онлар Јеһоваја хидмәтләрини бирҝә давам етдирирдиләр. Аллаһ бу әр-арвада мөҹүзәли шәкилдә бир оғул бәхш едәрәк аһыл јашларында онлары хејир-дуаландырды (Лука 1:8—14).
7. Елизабет башга һансы саһәдә әринә садиглик ҝөстәрди?
7 Елизабет башга саһәдә дә тәрифәлајиг садиглик ҝөстәрди. Билдијимиз кими, оғлу Јәһја дүнјаја ҝәләндә Зәкәријјә даныша билмирди, чүнки Аллаһын мәләјинин сөзләрини шүбһә алтына алмышды. Амма јәгин ки, о, арвадына Јеһованын мәләјинин она ҝөрүндүјүнү вә доғулаҹаг ушағын адыны «Јәһја» гојмағы тапшырдығыны неҹәсә хәбәр вермишди. Гоһум-гоншулар оғлана атасынын адыны гојмаг истәјирдиләр. Анҹаг Елизабет әринин сөзүнү јерә салмады. Буна ҝөрә дә онлара: «Јох! Онун ады Јәһја олаҹаг», — ҹаваб верди (Лука 1:59—63).
8, 9. а) Садиглик никаһы неҹә мөһкәмләндирир? б) Әрлә арвад бир-биринә садиг олдугларыны конкрет олараг неҹә ҝөстәрә биләрләр?
8 Зәкәријјә вә Елизабет кими, бир чох әр-арвадлар мәјуслуг вә диҝәр чәтинликләрлә үзләширләр. Әр-арвад бир-биринә садиг олмаса, хошбәхтликләриндән әсәр-әламәт галмајаҹаг. Ешгбазлыг, порнографија, хәјанәт вә бу кими диҝәр шејләр ҹүтлүјүн бир-биринә олан етибарыны тамамилә өлдүрә биләр. Аиләдә етибар олмајанда исә мәһәббәт ҝет-ҝедә сојујур. Мүәјјән мәнада садиглији евин әтрафына чәкилмиш һасарла мүгајисә етмәк олар; бу һасар евин сакинләрини «чағырылмамыш гонаглардан» вә диҝәр тәһлүкәләрдән горујур, еләҹә дә мүәјјән тәһлүкәсизлији тәмин едир. Бир-биринә садиг олан әр-арвад да өзләрини тәһлүкәсизликдә һисс едир вә ән дәрин, мәһрәм фикир вә дујғуларыны бир-биринә ачараг мәһәббәт телләрини мөһкәмләндирә билирләр. Бәли, садиглијин ваҹиблији данылмаздыр!
9 Јеһова Адәмә демишди: «Киши өз ата-анасыны тәрк едиб арвадына говушаҹаг» (Јар. 2:24). Бу, нә демәкдир? Тојдан сонра һәм гадынын, һәм дә кишинин гоһумларына, о ҹүмләдән достларына олан мүнасибәти дәјишмәлидир. Һәр ики тәрәф вахтыны вә диггәтини илк нөвбәдә бир-биринә јөнәлтмәлидир. Дост вә ја гоһумлары даһа онлар үчүн биринҹи јердә дура билмәз. Бундан әлавә, онлар јол вермәмәлидирләр ки, валидејнләри гәрарларына, јахуд аилә мүнагишәләринә мүдахилә етсинләр. Онлар бир-биринә бағланмалыдыр, чүнки бу, Аллаһын әмридир.
10. Әрлә арвада бир-биринә садиг галмаға нә көмәк едәҹәк?
10 Мәсиһчинин һәјат јолдашы онун иманына шәрик олмајанда да ҝөстәрилән садиглик мүкафатландырылыр. Әри һәгигәтдә олмајан бир баҹы дејир: «Јеһоваја неҹә дә миннәтдарам ки, мәнә әримә табе олмағы вә она дәрин һөрмәт бәсләмәји өјрәдиб. Бир-биримизә садиг галмағымызын сајәсиндә артыг 47 илдир ки, аиләмиздә мәһәббәт вә һөрмәт һөкм сүрүр» (1 Кор. 7:10, 11; 1 Пет. 3:1, 2). Буна ҝөрә дә һәјат јолдашынызын өзүнү тәһлүкәсизликдә һисс етмәси үчүн әлиниздән ҝәләни әсирҝәмәјин. Јолдашынызы сөз вә әмәлдә әмин един ки, о, сизин үчүн дүнјада ән ваҹиб инсандыр вә буну даима мүхтәлиф јолларла ҝөстәрмәјә чалышын. Киминсә вә ја нәјинсә сизин араныза ҝирмәсинә јол вермәјин. (Сүлејманын мәсәлләри 5:15—20 ајәләрини оху.) 35 илдән чохдур ки, бирҝә хошбәхт өмүр сүрән Рон вә Ҹанетт дејирләр: «Аллаһын тәләбләринә сәдагәтлә әмәл етдијимиз үчүн биз чох хошбәхтик».
Бирлик никаһы мөһкәмләндирир
11, 12. Акила вә Прискила а) евдә, б) ишдә вә в) мәсиһчи хидмәтиндә неҹә әмәкдашлыг едирдиләр?
11 Һәвари Павел јахын достлары олан Акила вә Прискила һаггында данышаркән адларыны һәмишә бир чәкәрди. Бу меһрибан ҹүтлүјүн нүмунәси Аллаһын әр-арвадын ‘бир бәдән олаҹағыны’ дејәркән нәји нәзәрдә тутдуғуну ајдын ҝөстәрир (Јар. 2:24). Онлар евдә, ишдә вә мәсиһчи хидмәтиндә даима чијин-чијинә чалышырдылар. Мисал үчүн, Павел Коринф шәһәринә илк дәфә баш чәкәндә Акила вә Прискила ону өз евләринә дәвәт етдиләр вә ҝөрүнүр, о, бир мүддәт бурада галыб хидмәт етди. Сонрадан Акила вә Прискила Ефесдә јашајаркән евләрини јығынҹаг ҝөрүшләринин кечирилмәси үчүн тәгдим етмишдиләр вә Аполлос кими һәгигәтә ҝәлән јени инсанлара руһән бөјүмәјә бирҝә көмәк едирдиләр (Һәв. иш. 18:2, 18—26). Јеһоваја ҹанла-башла хидмәт едән бу ҹүтлүк сонрадан Ромаја көчдү. Орада да онларын евиндә ҝөрүшләр кечирилирди. Сонра Акила илә Прискила Ефесә гајыдыб баҹы-гардашлары мөһкәмләндирирдиләр (Ром. 16:3—5).
12 Онлар һәмчинин бир мүддәт Павеллә бирликдә чадыр тикмәклә мәшғул олурдулар. Биз јенә дә онларын рәгабәт апармадан вә мүбаһисә етмәдән әмәкдашлыг етдикләринин шаһиди олуруг (Һәв. иш. 18:3). Шүбһә јохдур ки, онларын бирҝә мәсиһчи хидмәтиндә иштирак етмәләри сајәсиндә аиләләри руһән мөһкәм иди. Онлар һәр јердә — Коринфдә, Ефесдә вә Ромада ‘Мәсиһ Иса јолунда [Павелин] әмәкдашлары’ кими танынырдылар (Ром. 16:3). Һарада хидмәт едирләр-етсинләр, онлар Падшаһлыг һаггында хош хәбәри бирҝә јајырдылар.
13, 14. а) Аиләдә бирлији нә поза биләр? б) Әрлә арвад «бир бәдән» олмалары үчүн өз никаһларыны неҹә мөһкәмләндирә биләрләр?
13 Ҝөрдүјүмүз кими, әрлә арвадын мәгсәди ејни оланда вә онлар һансыса иши бирҝә ҝөрәндә мүнасибәтләри ҝетдикҹә мөһкәмләнир (Ваиз 4:9, 10). Әфсуслар олсун ки, евли инсанларын әксәријјәти бирликдә чох аз вахт кечирир. Онлар ајры-ајры јерләрдә ишләјәрәк саатларла бир-бириләрини ҝөрмүрләр. Башгалары исә ја тез-тез езамијјәтә ҝедир, ја да аиләләрини гојуб хариҹи өлкәјә көчүрләр ки, ишләјиб евләринә пул ҝөндәрсинләр. Һәтта евдә бәзи әр вә арвадлар телевизора, севимли мәшғулијјәтләринә, идмана, видеоојунлара вә ја Интернетә чох вахт сәрф етдикләри үчүн бир-бириндән узаглашырлар. Сизин дә аиләниздә вәзијјәт бу јердәдир? Әҝәр беләдирсә, бирҝә даһа чох вахт кечирмәк үчүн һансы дәјишикликләр едә биләрсиниз? Бирҝә јемәк биширмәк, габлары јумаг, бағда ишләмәк, ушагларынызын вә ја јашлы валидејнләринизин гајғысына галмаг барәдә нә дүшүнүрсүнүз?
14 Амма ән ваҹиби руһани ишләрлә мүнтәзәм олараг бирҝә мәшғул олмагдыр. Ҝүндәлик ајәни бирликдә мүзакирә етмәк вә аиләви ибадәт кечирмәк сизә аилә кими бир дүшүнүб, бир мәгсәдә ҹан атмаға көмәк едәҹәк. Бирҝә хидмәт един. Мүмкүндүрсә, бирликдә пионер хидмәтинә башлајын. Шәраитиниз бирҝә ән азы бир ај вә ја бир ил пионер кими хидмәт етмәјә јол верирсә, бу фүрсәти әлдән вермәјин. (1 Коринфлиләрә 15:58 ајәсини оху.) Јолдашы илә бирҝә хидмәтин бу нөвүндә иштирак едән бир баҹы дејир: «Хидмәт бирҝә вахт кечирмәк вә дојунҹа үнсијјәт етмәк үчүн ҝөзәл имканлардан биридир. Һәр икимизин дә мәгсәди инсанлара руһән көмәклик ҝөстәрмәк олдуғу үчүн, зәннимҹә, биз әсил командајыг. Јанымда нәинки әримин, јахын бир достумун олдуғуну һисс едирәм». Икиниз дә ваҹиб ишлә мәшғул оланда марагларыныз, вәрдишләриниз, истәк вә арзуларыныз јаваш-јаваш бир-биринизинкинә ујғунлашаҹаг вә нәһајәтдә, сиз дә Акила вә Прискила кими «бир бәдән» олараг ејни дүшүнүб һәрәкәт едәҹәксиниз вә һиссләриниз ејни олаҹагдыр.
Гој руһанилик сизин бәләдчиниз олсун!
15. Хошбәхт никаһын ачары нәдир? Изаһ един.
15 Иса аиләдә Аллаһы биринҹи јерә гојмағын нә дәрәҹәдә ваҹиб олдуғуну јахшы билирди. О, Јеһованын илк никаһын тәмәлини неҹә гојдуғунун шаһиди иди. Иса һәм дә Адәмлә Һәвванын Аллаһын рәһбәрлијинә әмәл етдикләри мүддәтдә нә гәдәр хошбәхт вә бу рәһбәрлији рәдд едәндә нә гәдәр бәдбәхт олдугларыны ҝөрмүшдү. Буна ҝөрә дә о, инсанлара Атасынын Јарадылыш 2:24 ајәсиндә јазылан ҝөстәришинә ујғун тәлим верирди. Һәмчинин о әлавә едәрәк демишди: «Аллаһын бир бојундуругда бирләшдирдијини гој һеч кәс ајырмасын» (Мат. 19:6). Јеһоваја дәрин һөрмәт һисси бу ҝүн дә никаһын хошбәхт вә уғурлу олмасында ваҹиб рол ојнајыр. Исанын јердәки валидејнләри олан Јусифлә Мәрјәм бу саһәдә чох ҝөзәл нүмунә гојмушлар.
16. Јусифлә Мәрјәмин руһән јеткин инсанлар олдуглары аилә һәјатларындан неҹә ҝөрүнүрдү?
16 Јусиф Мәрјәмә гаршы чох хејирхаһ иди вә онунла һөрмәтҹил тәрздә давранырды. Онун һамилә олдуғуну биләндә исә һәлә Аллаһын мәләјинин она ҝөрүнүб Мәрјәмлә нә баш вердијини изаһ етмәсиндән әввәл, онунла мәрһәмәтлә давранмаг истәјирди (Мат. 1:18—20). Артыг евли оланда һәр икиси дә сезарын әмринә табе олду вә Мусанын Ганунуна дәгигликлә риајәт едирдиләр (Лука 2:1—5, 21, 22). Гануна әсасән, Јерусәлимдә кечирилән үч мүһүм дини бајрамда јалныз кишиләрин иштирак етмәси тәләб олунса да, Јусифлә Мәрјәм диҝәр аилә үзвләри илә бирликдә һәр ил бу бајрамлара ҝедирдиләр (Ганун. т. 16:16; Лука 2:41). Бу вә диҝәр тәрздә Јусифлә Мәрјәм Јеһованы разы салмаға чалышыр вә руһани шејләрә бөјүк һөрмәтлә јанашырдылар. Мәһз бу сәбәбдән Јеһова јер үзүндә Өз Оғлунун гајғысына галмағы онлара һәвалә етмишди.
17, 18. а) Әрлә арвад руһанилији аиләләриндә биринҹи јерә неҹә гоја биләр? б) Бунун онлара һансы фајдасы олаҹаг?
17 Сизин дә аиләниздә руһанилијин биринҹи јери тутдуғуну демәк олармы? Мисал үчүн, ваҹиб гәрар гәбул етмәздән өнҹә, илк нөвбәдә нә едирсиниз? Мүгәддәс Китаб принсипләрини арашдырыр, бу һагда дуа едир вә јеткин баҹы-гардашлардан мәсләһәт алырсыныз, јохса проблеми өз билдијиниз кими, јахуд аиләнизин вә достларынызын дедији кими һәлл едирсиниз? Садиг нөкәрин никаһ вә аилә һәјаты илә бағлы вердији чохсајлы практики мәсләһәтләрә риајәт етмәјә чалышырсынызмы? Јохса јерли адәт-әнәнәләрә вә ја дүнјада јајылан нөгтеји-нәзәрә ујғун олараг һәрәкәт едирсиниз? Мүнтәзәм олараг руһани ишләрлә бирҝә мәшғул олурсунузму? Мәсәлән, бир јердә дуа едир, аиләви өјрәнмә кечирир, гаршыныза руһани мәгсәдләр гојур, аиләниз үчүн даһа өнәмли олан шејләри мүзакирә едирсинизми?
18 Әлли ил хошбәхт аилә һәјаты сүрән Реј дејир: «Елә бир проблем олмајыб ки, ону һәлл едә билмәјәк, чүнки Јеһова аиләмиздә һәмишә үчүнҹү “ип” олуб». (Ваиз 4:12 ајәсини оху.) Дени вә Трина онун сөзләринә шәрикдирләр. Онлар дејирләр: «Јеһоваја бирҝә хидмәт етдијимиз үчүн никаһымыз ҝет-ҝедә мөһкәмләнир». Бу әр-арвад 34 илдән чохдур ки, фираван јашајыр. Сиз дә аилә һәјатынызда Јеһованы һәмишә биринҹи јерә гојсаныз, О, сизә уғур газанмаға көмәк едәҹәк вә бол-бол хејир-дуа верәҹәк (Мәз. 127:1).
Аллаһын әнамына гаршы һеч вахт һөрмәтсизлик етмәјин!
19. Аллаһ инсанлара никаһ әнамыны нәјә ҝөрә бәхш едиб?
19 Бу ҝүн бир чох инсанларын фикри-зикри јалныз өзләринин хошбәхт олмаларындадыр. Амма Јеһованын хидмәтчиси һәр шејә башга ҝөзлә бахыр. О баша дүшүр ки, Јеһова Өз нијјәтини һәјата кечирмәк үчүн инсанлара бу әнамы бәхш едиб (Јар. 1:26—28). Адәмлә Һәвва Аллаһын бу әнамына һөрмәтлә јанашсајдылар, инди Ҹәннәтә чеврилмиш јер үзүндә Аллаһын хошбәхт вә салеһ хидмәтчиләри јашајарды.
20, 21. а) Нәјә ҝөрә никаһа мүгәддәс гурулуш кими јанашмалыјыг? б) Нөвбәти мәгаләдә сөһбәт һансы әнамдан ҝедәҹәк?
20 Һәр шејдән өнҹә, Јеһованын хидмәтчиси никаһ әнамына Аллаһа иззәт ҝәтирмәк имканы кими јанашыр. (1 Коринфлиләрә 10:31 ајәсини оху.) Бәли, садиглик, бирлик вә руһанилик кими Јеһованын бәјәндији хүсусијјәтләр никаһы мөһкәмләндирир. Буна ҝөрә дә истәр аилә гурмаға һазырлашаг, истәрсә дә никаһымызы мөһкәмләндирмәјә вә ја горумаға чалышаг, никаһа, илк нөвбәдә, онун олдуғу кими, јәни илаһи вә мүгәддәс гурулуш кими јанашмалыјыг. Бу һәгигәти мөһкәм јадда сахласаг, аилә һәјаты илә бағлы гәрарлар гәбул едәркән Мүгәддәс Китабда јазыланлары нәзәрә алаҹағыг. Бунунла биз нәинки никаһ әнамына, һәмчинин бу әнамы бизә бәхш едән Јеһова Аллаһа һөрмәт етдијинизи ҝөстәрәҹәјик.
21 Әлбәттә, никаһ Аллаһын бизә вердији јеҝанә әнам дејил. Ону хошбәхтлијә апаран јеҝанә јол да адландырмаг олмаз. Нөвбәти мәгаләдә биз Аллаһын диҝәр әнамы, субајлыг әнамындан данышаҹағыг.
Неҹә ҹаваб верәрдиниз?
• Садиглик хүсусијјәти әр-арвада неҹә тәсир ҝөстәрмәлидир?
• Нәјә ҝөрә бирликдә һансыса ишлә мәшғул олмаг никаһы мөһкәмләндирир?
• Аиләли инсанлар руһанилијин онларын бәләдчиси олмасына неҹә јол верә биләрләр?
• Никаһын Баниси олан Јеһоваја һөрмәт етдијимизи неҹә ҝөстәрә биләрик?
[15-ҹи сәһифәдәки шәкилләр]
Бирҝә һансыса ишлә мәшғул олмаг аиләдәки бирлији мөһкәмләндирир