Аллаһа јахынлашын

«Еј Аллаһым, мәни јадда сахла вә мәнә хејирхаһ ол!»

«ФИКИРЛӘШИРДИМ КИ, Аллаһ мәни јахшы таныдығындан һеч вахт севә билмәз вә мән Онун разылығыны газана биләрәм». Бу сөзләри өзүнүн дәјәрсиз олдуғуну дүшүнән Јеһованын Шаһиди олан бир гадын јазмышды. Бу һиссләр сизә дә танышдырмы? Аллаһын сизә ҝөзуҹу бахмасына белә лајиг олмадығынызы нә вахтса дүшүнмүсүнүзмү? Әҝәр беләдирсә, Неһемја 13:31 ајәсиндә јазылан сөзләр сизи руһландыра биләр.

Ерамыздан әввәл бешинҹи әсрдә јашамыш јәһудиләрин валиси Неһемја Аллаһы разы салмаг үчүн әлиндән ҝәләни едирди. Дүшмәнләрин мүгавимәтинә бахмајараг, о, Јерусәлимин гала диварларынын бәрпа ишләринә рәһбәрлик едирди. Неһемја Аллаһын Ганунунун риајәт олунмасына нәзарәт едирди, мәзлумларын гајғысына галыр вә һәмвәтәнләри исраиллиләрин иманыны мөһкәмләндирмәјә чалышырды. Ҝөрәсән, бу салеһ инсанын етдији јахшы ишләри Аллаһ нәзәрә алдымы? Јеһова Неһемјаја рәғбәт ҝөстәрдими? Бу суаллара ҹавабы Неһемјанын адыны дашыјан китабын сонунда јазылан сөзләрдән тапа биләрик.

«Еј Аллаһым, мәни јадда сахла вә мәнә хејирхаһ ол!» — дејә Неһемја Аллаһа јалварырa. Ҝөрәсән, Неһемја етдији јахшылыгларын Аллаһын нәзәриндән гачаҹағындан, јахуд да ону унудаҹағынданмы горхур? Хејр. О, Мүгәддәс Јазыларын әлиндә олан китабларындан билир ки, Јеһова Өз садиг хидмәтчиләрилә јахындан марагланыр вә онларын хејирхаһ әмәлләринә нәзәр јетирир (Чыхыш 32:32, 33; Мәзмур 56:8). Бәс јахшы, онун Аллаһдан диләдији нә иди? Бир мәнбәјә әсасән, «јадда сахла» кими тәрҹүмә олунан ибрани сөзүнүн алтында «әгли бағлылыг вә хатирәләрдән ирәли ҝәлән әмәл» нәзәрдә тутулур. Дуанын ҝүҹүнә там әмин олараг Неһемја Аллаһдан ону јадда сахламағы вә хејир-дуаландырмағы хаһиш едир (Неһемја 2:4).

Јеһова Неһемјанын дуасына ҹаваб верәҹәкми? Мүәјјән мәнада, артыг О, буну едиб. Јеһованын бу дуанын Мүгәддәс Јазыларда һәкк олунмасынын гајғысына галмасы бизи әмин едир ки, О, Неһемјаны унутмајыб. Анҹаг «дуалары ешидән» Рәбб Неһемјанын сәмими хаһишинә ҹаваб олараг даһа чох шеј едәҹәк (Мәзмур 65:2).

Аллаһ тәмиз ибадәт үчүн етдикләринә ҝөрә Неһемјаны мүкафатландыраҹаг (Ибраниләрә 11:6). Јеһованын вәд етдији јени дүнја гуруланда О, Неһемјаны өлүләрдән дирилдәҹәк (2 Петер 3:13; Вәһј 21:3, 4)b. Јерүзү Ҹәннәтдә әбәди јашамаг имканыны әлдә едәндә Неһемја ҝөрәҹәк ки, Јеһова һәгигәтән дә хејирхаһлыг ҝөстәриб ону јаддан чыхармајыб.

Неһемјанын дуасы Давуд падшаһын сөзләринин һәгигилијини тәсдиг едир: «Ја Рәбб, салеһә хејир-дуа верирсән, лүтфүнлә сипәр кими онлары һифз едирсән» (Мәзмур 5:12). Доғрудан да, Аллаһ Ону разы салмаг үчүн етдијимиз бүтүн сәмими сәјләримизи ҝөрүр вә гијмәтләндирир. Әҝәр Аллаһа сидги-үрәкдән ибадәт етсәниз, әмин ола биләрсиниз ки, О, сизи унутмајаҹаг вә бол-бол хејир-дуаландыраҹаг, чүнки О, сизи үрәкдән севир.

[Һашијәләр]