Ушагларынызы өјрәдин
Аллаһ вә достлары ону севирди
БУ ҜҮН һеч ким онун адыны билмир. Ону Јефтаһын гызы кими таныјырлар. Ҝәлин бу гыз вә атасы һаггында Мүгәддәс Китабдан өјрәнәк. Орада биз Јефтаһын гызынын Аллаһ вә достлары тәрәфиндән нә гәдәр чох севилдијини ҝөрәҹәјик.
Јефтаһ вә гызы һагда Мүгәддәс Китабын «Һакимләр» китабынын 11-ҹи фәслиндән охуја биләрик. Јефтаһ Аллаһа садиг инсан иди вә шүбһәсиз гызына да мүнтәзәм олараг Мүгәддәс Јазылардан данышырды.
Јефтаһ Аллаһын халгы олан исраиллиләрин өзләринә падшаһ истәмәздән әввәлки дөврдә јашамышды. О, ҝүҹлү инсан вә мәһарәтли дөјүшчү иди. Һәмин вахтлар исраиллиләр гоншу халг олан аммонлулара гаршы вурушанда Јефтаһдан дөјүшә рәһбәрлик етмәсини хаһиш етдиләр.
Јефтаһ истәјирди ки, аммонлулары мәғлуб етмәкдә Аллаһ она көмәк етсин. Буна ҝөрә дә сөз верди ки, Јеһованын она гәләбә газандырдығы тәгдирдә евә гајыданда гаршысына биринҹи ким чыхса, Аллаһа тәгдим едәҹәк. Һәмин адам өмрүнүн ахырына кими Аллаһын мүгәддәс мәскәниндә — о вахтлар инсанларын Аллаһа ибадәт етдикләри јердә хидмәт етмәли иди. Билирсән, онун гаршысына биринҹи ким чыхды?~a
Бәли, онун өз гызы! Јефтаһ чох пис олду, чүнки о, ҝөзүнүн ағы-гарасы јеҝанә өвлады иди. Анҹаг Јефтаһ Јеһоваја сөз вермишди вә сөзүнүн үстүндә дурмалы иди. Онда гызы атасына деди: «Ата, сән Рәббә әһд етмисән. Сөз ағзындан неҹә чыхыбса, мәнә еләҹә дә ет». Сонра исә дағлара ҝедиб ағламаг үчүн атасындан она ики ај изин вермәсини хаһиш етди. Нәјә ҝөрә? Чүнки атасынын әһдинә әмәл етмәклә о, әрә ҝетмәк вә ушаг саһиби олмаг һүгугундан имтина етмиш олурду. Анҹаг онун үчүн шәхси арзулары јох, атасына итаәт етмәк вә Јеһоваја садиг галмаг даһа ваҹиб иди. Сәнҹә, о, белә етмәклә Јеһованы вә атасыны севиндирдими?~
Јефтаһ гызыны рәфигәләри илә бирликдә ики ајлыг дағлара ҝетмәјә гојду. Гызы гајыданда атасы әһдинә әмәл едиб ону Аллаһын Шилодакы мүгәддәс мәскәниндә хидмәт етмәјә ҝөндәрди. О, галан өмрүнү орада кечирди. Һәр ил исраилли ҝәнҹ гадынлар Шилоја ҝедиб Јефтаһын гызыны руһландырырдылар.
Сән валидејнләринин сөзүнә гулаг асан вә Јеһованы севән ушаглар таныјырсанмы?~ Һәмин ушагларла јахындан таныш олмаг вә онларла дост олмаг чох јахшы оларды. Әҝәр Јефтаһын гызы кими итаәткар вә садиг олсан, сәнин дә јахшы достларын олаҹаг. Вә сән валидејнләринин үрәјини севиндирәҹәксән, Јеһова да сәни чох севәҹәк.
Өз Мүгәддәс Китабыныздан охујун
[Һашијә]
a Әҝәр бу мәгаләни ушагла охујурсунузса, гојулан тилда (~) ишарәси ҝөстәрир ки, пауза етмәк вә ушағы өз фикрини сөјләмәјә тәшвиг етмәк лазымдыр.